هذه القصيدة تحذر عن الظلم والبغي والعدوان والكذب والأفتراء والأتهامات الاطله
بسم الله الرحمن الرحيم وبه نستعين على الظالمين المفترين
هذه القصيدة تبلغ ميئة وعشرون بيتاً وهي من أحدث ما قلت نصيحة عن الظلم والبغي والعدوان والكذب والأفتراء وبها ذكر عدد من الظلمة الذين ورد لهم قصص في التاريخ وانتقم الله منهم بسبب طغيانهم وظلمهم نذكرهم للعظة والعبرة وقد ورد بالقرآن الكريم والأحاديث النبوية الشريفة التحذير من الظلم قال الله سبحانه وتعالى ( فَتِلْكَ بُيُوتُهُمْ خَاوِيَةً بِمَا ظَلَمُوا إِنَّ فِي ذَلِكَ لآيَةً لِقَوْمٍ يَعْلَمُونَ ) وقال : ( لَا يَنَالُ عَهْدِي الظَّالِمِينَ ) وحرّم الله الظلّم وتوعّد فاعله بالعقاب وفي الحديث القدسي قال : ( يا عبادي إني حرمت الظلم على نفسي، وجعلته بينكم محرماً فلا تظالموا ) وقال النبي ï·؛ : ( اتقوا الظلم، فإن الظلم ظلمات يوم القيامة) وفي الأثر ( دار الظلامين تصبح خراب ) وفي هذا الوقت كثر في وسائل التواصل الظلم والأفتراء والكذب والسب والطعن بالأنساب والشتم والقدح وأثارة الفتن والأتهامات الباطلة دون خوف من الله ودون وجه حق ودون رادع وما فعله المفترين بدافع الحقد والحسد وحب المال والشهرة حسبنا الله ونعم الوكيل وقلت :
مـبـداي فـي خالـق جـميـع البـريـات *** مجـري نظام الكـون مـن معجزاتـه
رب الـمـلأ رفــّاع سـبـع السـمـاوات *** وأرضـه بسطهـا واحتـوت كـايناتـه
عـلاّم بـأسـرار الـعـبــاد الـخـفـيــات *** ويعـلـم كـلام النـاس مـع مفـرداتـه
جـل الولـي فـرّاض خمس الصلوات *** والحج مع صـوم رمضان وزكاتـه
فـي رحمتـه غـاث الديـار المحيـلات *** مـن هاطـلٍ تسقي الثـرى هاشلاتـه
سبحـان سجـار البحـور المحيطـات *** من أجـل ما تغشى الفيافي صراتـه
لـه سـبـحـت كـل الـخـلايـق بـلـغـات *** حـتّى الـوحـش والطـيـر بتغـرداتـه
انزل عـلى الهادي مـن الوحي آيات *** والصادق المصدوق طبّق وصاتـه
خلاقـنـا لـه نبتهـل بأعـلا الأصـوات *** عـظيـم باسـمـاه العـظـام وصـفاتـه
به نستجير من المصايب والأزمات *** عـون ومـلاذ العـبـد عـن معظلاتـه
أحمـد ولـي الكـون فـي كـل الأوقات *** والشـكـر للمـولـى عـلى مكـرماتـه
عشنا بوطن مابه احزاب وعصابات *** بالعـدل تقـضي بالشريعـه قضـاتـه
سلمان ومحمد عـلى الشعب سادات *** من طال بوعه يقصرون اخطواته
نسـل الـزعيـم الـلي بحـد الرهيفـات *** عبـدالعزيـز الليـث يقـهـر اعـداتـه
عـوايـده نـطـح السـبـايـا المغـيـرات *** كـم فـارسٍ صنـديـد حطـم غـزاتـه
مـن عـزوة لـهـم فـعـايـل عـظيمـات *** سـرج الصويتي يعتلـون بصهاتـه
يوم الزمن عصره حرايب وصولات *** عصـرٍ بـه كحيـلان عسكر حذاتـه
مبـطي لهم بديـار الأجنـاب جـولات *** فوق الأصيل اللي عريضه قطاتـه
السـيـف لـلـعـي المعـاعـد عـلاجـات *** سيف العدل من عال يقعد صغاتـه
وأولاد وايـل يـوم عصـر القوامـات *** يشهد حديث المصطفى وادعواتـه
تسمع لهـم مـع تـالي الـذود حنـدات *** خـيـالـهـم بالكـون تـوحـي حـداتـه
هـذا مـضى واليـوم أمـن وسلامـات *** كلـن هجـع مـا عـاد يجـدع هـواتـه
وعندي نصيحه قلتها خص بالـذات *** لأنظـار صاحيـن العـقـول التـفـاتـه
يا أهـل القلـوب الطاهـرات التقيـات *** وقـت الـزمـن دايـم سـريـعٍ فـواتـه
تـوبوا تـرى كلن يحاسب اليـا مـات *** تـوزن اعمالـه حيـن تعـلـن وفاتـه
الـعـبـد لـو عـمّـر سنـيـنٍ طـويـلات *** لابـد مـن سـاعـه ينـوحـن خـواتـه
شين الضمير أن كان به قلب نيات *** مـا تـاب حـتى لـو تشيب شعـراتـه
عـن قـول مظمونه تعـدّي وغلطات *** كـلـن يـشـد ربــاط مـقـول لـهـاتــه
المعـتـدي جـزاه سـجـن وغـرامـات *** حـتى يـفـيـق وينـتبـه مـن سـبـاتـه
والمنهـرف يـدخـل بعنبـر مصحـات *** ويكتـب لـه التـقـريـر بمـلاحظـاتـه
من لا يـدل الـدرب ضـاع بمتاهـات *** والهـرج بالبـاطل سمـاج وبـهـاتـه
لا خــيـر بـالـمـغـتـاب نـقّـال نـمـات *** شـغـلـه بـنـقـل الـهـرج وده هـاتـه
نسمـع سـوالـف بالوسايـل تفاهـات *** واللي يسب النـاس يلـزم اسكاتـه
الـلـي يـوجـه لـلعـفـيـف اتـهـامـات *** عـنـاز تـشهـد فـي نـقـاه وبـراتـه
لا عاش من دوّرعلى الناس غرّات *** خطو السفيـه الـلي بطبعـه هياتـه
بالهـايـف الكـذاب تظهـر عـلامـات *** يعـرف ويكشف من خلال احركاته
كلـن عـلى من عـال يرفـع بلاغات *** فـي ظـلـمـه المشهـود وتـعـديـاتـه
من اعترض للنـاس يدخـل بنشبات *** والـلي وقـع بالبيـر تصعـب نجاتـه
والـلي يـسجـل بالـوسـايـل مـقـالات *** مقـصـوده يمـوّه عـلـى مشـكـلاتـه
الـنـاس مـا تـقـبـل كـلام الخـرافـات *** مـهـمـا هـذر مـا صـدّقـوا تـرهـاتـه
والـلي تـعـنـا مـن بـعـيـد المسافـات *** يقصـد ضنـا عـنـاز راس معنـاتـه
غـزاي صـايـل مـا مـرامـه زيــارات *** وأصبح على العزوة يكرر حجاته
بـالـزور والتـزويـر سـوى عـلاقـات *** دجـل وحصّل مقصـده وشهـواتـه
صـنـف ضـنـا عـنـاز سـتـة كيـانـات *** وجـنى عـلى الـويـلان بمصنفاتـه
جـد عنـزه سبـه لمـقـصـد وغـايـات *** ولا تـاجـد الـلي بـاح بمعـاتـبـاتـه
جـد القبـيلـه فـي صـريـح العبـارات *** صـرّح بنفيـه واعجبـوا بكـلمـاتـه
وعقـب الطعن بالجـد صار احتفالات *** والكـل فـي مدحـه يشيـل اغنياتـه
واصبـح يكـرّم بالخـراف السمينـات *** دايــم تـقـدّم بـالـصـيـانـي شـواتـه
يـا لـيـت لـو تـفتـح جـميـع الملفـات *** عن جملـة اعمالـه وعن منجزاته
يحضر صكوك مـزوره مالها اثبـات *** والـلي خـدعهـم بالـغـوا بعطيـاتـه
معـه عـلى التـزويـز زمـره وشّـلات *** محتـال والـلي صدقـه مـن عناتـه
جـازوا الـلي وثـق نـسبـهـم بـسيّـات *** واللي جنى وزوّر تناسوا جناتـه
واللي على المجهود عنـده شهادات *** هــذاك أبـن عــبــار بـمـولـفـاتــه
لـه يشهدون أهـل الهـداف البعيـدات *** المنصفين اللي الشّرف هم حماته
يفـخـر بوايـل فـي جـميـع المجـالات *** والعـز الأقعـس غـاليـه مشتراتـه
عـلـم النسب مـاهـو أغـاني وشيلات *** مـصـادر الأنـسـاب فـي مكـتبـاتـه
من يرغـب الشهـرة يسوي جمـالات *** الطـيـب والعـفـه مـن مـواصفـاتـه
الطـيـب يكسـب بالفـعـال الشريـفـات *** يـنـالـه الـلـي قـام فــي واجـبـاتــه
الطيـب بأعمـال الصخى والمـروات *** وصنع الجميـل وعفتـه هـي حلاتـه
الصـادق الـوافـي خصـالـه حميـدات *** فعـل المـراجـل هـي منـاه وشفـاتـه
شهم وكريم وله مع الناس جاهـات *** والضيـف لا جـالـه فـرح بـه وقاتـه
يصيـر لـه تـقـديـر عـنـد الجماعـات *** مـع عـزوتـه مـا حـاد عن ملزماتـه
تـفـخـر بـعـلـمـه لابـتـه والـقـرابـات *** وكـل الرجـال تحشـمـه مـن غـلاتـه
والـلـي تــدنّـى لـلـعــلـوم الــرديـات *** مـا اظـن حـصـل طايـلـه مـن رداتـه
ومن كان قصده بس جمع الـريالات *** يـدفـع لـه الـمـبـلـغ مـن متـابـعـاتـه
جـداه يـنـشي بـالـوسـايـل حسـابـات *** غـروه عـوجـان السـوالـف رواتـه
ما يرفـع الطامـن شباشر وشوشات *** يسقـط وتنـزل للحضيض درجـاتـه
والـمـفـتـن الـغـدار يـزرع حـزازات *** شتم الخلايق من خصايص سماتـه
مـا يقـلـع البـاغي عـن العنجـهيـات *** حـتى مفيـض الشـط تنشف فـراتـه
ولا يـنـفـع المذمـوم بـث الأشاعـات *** يـدور بشخـوص الحـمايـل شماتـه
مـعـتـاد ينـشـر بالـوسايـل دعـايـات *** بـعـلـوم رهــمـهـا مـن مـخـيـلاتــه
يكتب رسايـل في صفـاح القروبـات *** ويلفـظ هـذاريـم الخـطأ فـي قنـاتـه
مـهـمـا يـوزع بـالـوسـايـل بـيـانـات *** دبـلاج زيـفـه واضـحـه فـبـركـاتـه
مالـه عـلى العـالـم مطـالـب وقـالات *** يدهـر ويظـلم مـن غـواه وغبـاتـه
الـلي يصـنّـف بالسـوالـف حكـايـات *** مـع البـغي والظـلـم فـيـه انـفـلاتـه
نـهـايـة الظالـم حسايـف وحسـرات *** يـنـدم اليـا ثـالـث رجـولـه عصاتـه
لابـد يشـعـر بـالأسـف والحسافـات *** ويـجـر مـن حـدب الظلـوع نهتـاتـه
يحـمـل ثـقيـلات الذنـوب الكـثيـرات *** وينفق على المظلوم جـل احسناته
الـظـلـم يـهــد الـبـروج الـرفـيـعـات *** كـم قصـر ظـالـم حطمـت واجهاتـه
والظالمين مـن العصـور القـديمـات *** ذكــرهــم الـتــاريــخ بــمـذكـراتــه
عمليق ملك طسم بالعصر اللي فات *** مـا أحد عمـل مثله وسوى سواتـه
خـلا لحريم جديس يا حول صيحات *** ومصقول الأسود شلقه فـي شباته
وفرعون من رب الملأ جـاه لعنـات *** مـن لعـنـة المولى حصل لـه كفاتـه
حاول يبي خوض البحور الغميقات *** وعلى الرصيف الموج طّوح رفاته
وهـامـان بـأمـر سيـده زال هـامـات *** سـار بهـدف فـرعـون وموامراتـه
وآخـر مصيـره مـع حليـفـه بـلجـات *** مـات بغـرق وعقوبـة الـرب جاتـه
ونمـرود جالـه فـي حياتـه عقوبـات *** اصغـر ذبـابـه هـي سبايـب مماتـه
صابه صداع ويسهـر الليل ما بـات *** والخادم الممـلـوك بالـنـعـل شـاتـه
وقـارون زادت ثـروتـه بالجنيهـات *** وطـغى وتجبـر وابتهـج في غناتـه
خسـف بقصره بالحفور السحيقات *** وذهـب زهـر عمره وزالت طراتـه
وجالـوت يـرفـل بالهـنـا والمـلـذات *** ويسمر مـع البهلول يسمع انكاتـه
عقب الطغى لاعه من البين لوعات *** ما عـاد يسحب بالمجالس عـباتـه
والسامـري جـت قصتـه بالروايـات *** بـالـبــر تـايـه مـا تـعـيّـن مـبـاتــه
يـهـوم بـفـجـوج الـديـار الـخـلـيـات *** ضايع ولا يعرف المسا من غداته
والـلي لصديقه قال يا صاح هيهات *** بستـان غـرسي ما يحصرم نباتـه
صابـه كبـر حيثـه تفاخـر بغـرسات *** وخوت عـرايش غرستـه ونخلاته
وكـليـب حـمـاي الـديـار الوسيعـات *** تـعـقـبـه جـسـاس يـنــوي ذكـاتــه
جـاه بضريـه في جنوب المشيشات *** وخـلاه ملـقى في صحـاري فلاتـه
وكسـرا الأعـاجـم هـام بالمنذريـات *** حـتـّم عـلى النعمـان يبـغي بـنـاتـه
غـزا بكـر ثم أودعوا جيشه اشتات *** خـمسيـن عـام ولا تـلـيّـم شـتـاتـه
ونيرون الـلي سبب مآسي وويلات *** رومـانـيـا لـجــت مـن تـصـرّفـاتـه
عـاف القصور الشامخـه والبنايـات *** ثـم انـتحـر بالسـم وانـهى حـيـاتـه
والـلي غـزا الكعبه بجيش ومعـدات *** الطيـر فـوقـه يرجمـه فـي حصاتـه
اقفت فيوله مع هـاك الريع عجلات *** عـاد مخـذول ولا حصـل لـه مناتـه
ومنذر أبن ماء السماء فيه شارات *** عـن البشـر اسـمـه دليـل افتخاتـه
دفن صديقه حـي مـن خمـر كاسات *** ونـدم عقـب ما فاق من مسكراتـه
وأبـو لهـب حصّل مـن الـرّب تبّـات *** حـيـثـه تعـرّض للنـبي فـي صلاتـه
كفـر وصابـه عـل بأسبـاب دعـوات *** مـات وجحيـم النـار هـي منتهـاتـه
والـظـالـم الحـجـاج قـام بـمـهـمـات *** ابـن الـزبـيـر ارداه وايــتـم فـتـاتـه
بعده بطش بالشيخ من دون ثارات *** العالـم ابـن جبيـر ضمن اضحياتـه
والقـرمطي فـي قـوتـه شن غـارات *** قضى عـلى الـلي صادفه من تلاته
وعـثابـهـم عـلي العـيـونـي بـقـوات *** خيـالـت القـيسي وجـملـت مشاتـه
هـذي نتايج ظـلم والـظـلـم ظـلمـات *** والـلـه حسيب الـعبـد في منكراتـه
ومـن يظلـم المخلـوق تأتيـه نكبـات *** كـل الخـلايـق يـجـهرون بـشنـاتـه
والـلي ظلـم لـه عـنـد ربـه كرامات *** يـردع حليـف الظلـم عـن مخزياتـه
مـن انظلـم يـسجـد لمـولاه ركـعـات *** مظـلـوم والمظـلـوم تـقبـل دعـاتـه
يطلب عـسى الظالم تدوسه تريلات *** سكسٍ محـمّـل يـدعسـه بكـفـراتـه
وآخـر ختـام القاف أزكـى التحيـات *** مـع الـسـلام ورحـمـتـه وبـركـاتـه
وصلّوا عدد قطر المزون الغزيرات *** عـلـى الـذي فـي ديـن ربّـه ثبـاتـه
شعر عبدالله بن دهيمش بن عبار الفدعاني العنزي