حياك الله يابومشعل وصبحك الله بالخير الحقيقة في سالفة طرت علي وهي تغني عن الكلام وهي طرفه مضحكة ومناسبه للموضوع"فيه رجال على ذلوله ماشي لحاله وانطحوه اهل ركايب واطمعوا فيه يبون ياخذون ذلوله واللي معاه يوم اوقفوه قالو له وشنت من عرب يارجل وعلمهم العرب اللي هو منهم قالوله وش اسمك قال اسمي قنيبر قالوا إسمع ياقنيبر حنا مانبي نذبحك لكن نبي ناخذ ذلولك وانت توكل على الله قال قنيبر لاوالله ذلولي غالية عندي ما أعطيكم اياها قالوله اجل ناخذ شدادك ونخلي ذلولك قال لهم لاوالله شدادي غالي عندي يااللحوات الغانمة يعادل غلا ذلولي قالوله أجل إسمع ياقنيبر الله مخيرك بين ثنتين ياناخذ ذلولك ونخلي شدادك أوناخذ شدادك ونخلي ذلولك وانت إختار وعطنا رايك قال قنيبر ماغير هالثنتين شي قالوا ماغيرهن شي واحتار قنيبر بين هالشرطين وقعد يفكر شوي عقب قال تدرون يارجال إخذوا ذلولي وخلولي شدادي قال واحد منهم"أجل خلوا قنيبر على شداده" وسلامتك انت والموجودين