من مآثر الملك عبدالعزيز طيّب الله ثره
من صفاة الملك عبدالعزيز وافعاله قلت عشرات القصائد ومما قلت هذه الابيات من قصيدة طويله :
عبدالعزيز الـلي من أعـداه ما هـاب *** واصـل كفاح وعـاد مجـده وماضيه
وحـد جـزيرتـنا عـلى خـيـل وركــاب *** بالسيف الأملح كل مشرك أيـصفـيه
بالسيـف يـردع كـل عـابـث ونهــاب *** حـكـم بـعـدل وحـقـق الـلـه مساعـيه
شهـر صقيل السيف قطـاع الأرقـاب *** سيف العدل ماهو على الظلم حانيـه
الساطي الـلي لـه بالأضداد مضـراب *** مـن عـاوده زومـه بحــده يـداويـــه
مضـراب سيفـه ما تشافـيه الاطـباب *** حـده شـطيـر ومـن تـعـاوج يـذكـيــه
يا ما جـزر بـه مـن منافـق ونصــاب *** ومن طاغـيه جبـار وإبليس مغـويـه
شره على اللي صايبه كبر وأعجـاب *** من ثـقـل نـفسه مـا تـمكـن أتحاكيـه
مـن خـالـف السنـة يحـطـه بسرداب *** ومـن يقتـرف جنحـة بذنـبه يجازيـه
طوع طواغيت الحواضر والأعـراب *** صنـديـد مـا جـامـل عــدوه أيـداريـه
دق الأفاعي وأنتـزع شوكـت الــداب *** وخلا الحنش مـا عـاد بالسم يـوذيـه
كف المغازي وأنتهى شلح الأسـلاب *** وخـلا العشـايـر تـرجهـن بـمـفـالـيـه
وكـلـن مخـيّر بيـن سفـره ومنسـاب *** من جاع له يشبع ومـن عـال يكويـه
ما ربح مـن يأخذ عن الحق مجنـاب *** مصقـول أبـو تركي يصافـح علابـيه
والـدار غيـره مـا بغـت كـل خـطــاب *** جـاهـا الـزعيم الـلي بغـاهـا وتـبغـيه
ومن ساد من نسله للأمجـاد كسـاب *** حيـث أبـو تـركي للمكارم أمـوصيـه
ومن قصيدة أخرى طويله بالأمير سلطان رحمه الله قلت عن الملك عبدالعزيز طيّب الله ثراه :
جـدك حـما الديـرة ولا هـاب الأدراك *** هـو سورهـا من دورعصر المماليك
وأبوك وحدها عـقب حـرب واعـراك *** وانقـذ جـماهيـر الشعـوب المهاليـك
المقـرنـي خـلا الـطـواغـيـت نـسـّـاك *** حـدب السيـوف استبدلوها مساويـك
وانجب ملوك المملكة تحمي الأملاك *** أدنـاهـم الـلي بالـمـفـاعـيـل يـكـفيـك
مصقـر صـوارم كـل من هـد عـشّـاك *** ماكـر نـوادر والـمخـالـب مشـاويـك
وعن وصفهم تقصر سجلات الأبواك *** اخبـرك يا مـن تكتـب المجـد وانبيك