هذي أبيات وصايا لابني منصور أصلحه الله وأصلح أبناءكم كتبتها هنا لعلها تحوز على إعجابكم مع أني مقل بالشعر ومبتليه بلوه:-
هذي وصاةٍ ياولدي لك من الراس
------------من خبرة الدنيا وواقع دروسه
الحكي يامنصور لازم على ساس
------------من قبل لايطلع كلامك تسوسه
اخير من كلمة تخليك تنحاس
------------تصبح قضية بالمجالس وحوسه
الضيف لامن جاك من ساير الناس
------------لاتكون لك نظره بوجهه عبوسه
وجارك لياشفته بهمٍ وهوجاس
------------ارخص اموالك لاجل تطرد هجوسه
احذر تحط المال بالوقت مقياس
------------ترى الكريم اللي يرخص فلوسه
خلك كريم بعزة النفس لاباس
------------من اللي يندي بقشر الوقت موسه
المال يجذب لك من الناس اجناس
------------فيهم صحيح وفيه ناسٍ هلوسه
ابعد عن النمام لو زان مجلاس
------------حلون لسانه بالمجالس وسوسه
وابعد عن اللي فيه شكٍ ولولاس
------------ودربٍ مشابه جنبه لا تدوسه
خلك مع اللي خوته ترفع الراس
------------اللي افعاله باينه ومحسوسه
وخلك بحلمك للاجاويد نبراس
------------شجرة وفاء بين العباد مغروسه
اخوكم
احمد بن محمد الحريميس
ابو منصور