يقول خليف بن سعيد موجه القصيده الى رواف الحرير /

راكب اللي ليا مشى حلو المسير
.... ماقفه رواف يعطيه القرار
جيب لكزز ليا مشى خطرن يطير
... يطوي طول الخط قوه وإقتدار
ما تسمع له صوت إزعاج وصفير
... ليا شعر وقت الخطر يعطي إنذار
وإنت يا ابن هطيل في شعرك جدير
... آخذن كل المراجل بإفتخار
يفداك خطوا الﻻش العفن الحقير
... وإنت عندي من طويلين الشبار
من صديق أبوك يكتب لك خبير
... فاهمن كل المعاني والوقار
ضايعين الطيب بخساس الضمير
... يجزى المعروف جحود ونكار
والردي لو يرتدي جوخ وحرير
... مايطيب يعذربه لبس الغتار
ناكر المعروف في أمره تحير
... والله بالإحسان في أمره أشار
وين رجال العرف والعقل المنير
... نطلبك يالله تصحيح المسار
قدوتن للناس العقل الضرير
... ما يعرف الليل من فصل النهار


يقول رواف الحرير ردا على قصيدة خليف بن سعيد /

مرحبا يا خليف ... يا الشيخ الشهير

... يا عريب الساس... يانسل الحرار

ياسفير المرجله ... واعظم سفير

... ياشموخ طويق في وضح النهار

يالشجاع الفذ.. يالسهم الخطير

... ياشعار الطيب ياأعظم .. شعار

يالقراح العذب .. يامي ..الغدير

... يالعديم الصيرمي واف الشبار

يالمهيب الجسر يالسيف الشطير

...بالمواقف ... للعدا نار .. وشرار

لايهمّك.. وانت بالحكمه ... جدير

... لازرعت الطيب .. لاترجي ..ثمار

البشر أصناف بإحساس وضمير

... ومن تنكّر.. مادروا عنه ... الكبار

ومن ينافق لا تحطه لك ... شوير

... المنافق ..... يقلب الظلما ....نهار

والمنقنق .... والمنمنم ....يالبصير

... سلمهم ... واعوذ بالله .... الدمار

ومن تململ يحسبٍ نفسه ...وزير

... همّشه .. تهميشته فيها .. اعتبار

البنادم ... يستشير ... ويستنير

... ومن غلط بالحق يلزمه ...اعتذار

وعادة الدّنيا الدّنيه ... تستدير

... لاعجب عصفور .. تثني له حرار

وانت والله ( ياخوي ابوي ) غير

... ومايخاوون الكبار ... الا الكبار