صح لسانك يابو معيض على المجاراه
جزل
وهذه قصيدة عبدالله بن دهيمش بن عبار العنزي الذي جاراها الشاعر معوّض وهي مسنده على هليّل بن فرحان بن خلاف الغضوري العنزي :
سر يا قلم واكتب عبـارات بخطـوط ** سجّـل صمايـلهـا وجـنـّب غـلطهـا
ابي اسنده للي يحوط الفخـر حـوط ** الغضوري روس المعـالي شبطهـا
القـرم ابـن خـلاف يستاهـل النـوط ** الـلـي يـمـيـنـه بـالمـكـارم بسطـهـا
طيـب أبـو جـزأ لـه مقاديـم وقلوط ** يتبع سلوم اهل الصخى ما شمطها
هـليـّل الـلي سـار بالمرجلـه شـوط ** يـجهـد لنظـم عـقودهـا مـا فـرطهـا
من يمدحه ما قال به هـرج مغلـوط ** ولا هو بحال اللي الحقيقه غمطها
أبـي امدحـه مـا همني كـل زربـوط ** خـطـو الـذي زلت رفـيقـه لـقـطهـا
صفر الـدلال بربعـتـه كنـهـا بطـوط ** الـلي بهـا خـمس الحوايج خلطهـا
وكـم حاشيٍ جـابـه بـدنـّاه مـربـوط ** خـلاه لـلـخـطـار بـالـقـدر يـطـهــــا
والحايل اللي صوفها تقـل ممشوط ** مـن طيب مفـلاهـا تـناقـط حمطهـا
قـلّط شحمها بيـن مندي ومضغـوط ** روس الهـرافي بالصياني قـرطهـا
واليـاعطا يعطي كـرامه ومصفـوط ** ما مقصده مـدح الرجـال ولغـطهـا
دار سكنها من المطرجعها شطـوط ** هـوج الريـاح العـاتـيه ما شفطهـا
يزهر نبات القـاع بالحـزم والسوط ** تريـف ويورق قشعها مع سبطهـا
الطيـب يا هليّـل لـه اركان وشروط ** ودنـيـاك لا تأمـن بوايـق اخططهـا
من جار وقـته مرزقه صار ناقـوط ** مـا دام هـي تعـطيك دنيـاك عـطهـا
دنيـاك هـذي بـيـن قاشط ومقـشوط ** ودولاب بـقـعـا كـم جـيـل قـشطهـا
كـم واحـدٍ خلاه وقتـه عـلى جنـوط ** وأصبح يغـص بلقمتـه مـا زرطهـا
والحر اللي ريشه منتـّف وممروط ** ما اظـن يـعطب صيدته لـو خبطهـا
الحـر لولا الريش مـا صـاد شبـوط ** بـيـض الثنـادي مخلـبه ما معـطهـا
ومن يحتزم بسمال ونكوث وخيوط ** نـكـث المحـازم تـنقطع لـو ربطهـا
وأن كان بشتك واسع الفج مشعوط ** لا تهملـه ارقـع افجوجـه وخـطهـا
الجرب في رقـط المثامل تبي مـوط ** من أجل مايعدي الصحيحه حبطها
ومن عاش بالدنيا مكيّف ومبسوط ** يـقـنع بـرزقـه والبشر مـا غـبطهـا
ما يغني المفلس تضجر ولا قـنوط ** ولا يـنفـع النـفس الشقيـه سخطهـا
والرابح الـلي منهجه دوم مضبوط ** عـن الخطـأ كـل الجـوارح ضبطهـا
لا بـد مـا يحمـل عـلى الـواح بلـّوط ** بالشاش يـدرج والقـوايـم مغـطهـا