قال الشيخ مفلح بن عياده المرواني الجهني أبو سلطان يمدح قبيلة عنزة فيقول :
الـف الـنـعـم فـيـكـم يـا اولاد وايــل *** نقولهـا والنـعـم بـذيـك العشيـره
اولاد وايـل كـاسـبـيـن الـجـــمـايــل *** اهل الوفاء والطيب في كل ديره
نقولهـا في صـدق والـراس طـايـل *** حـمـايـة الموقـف نهـار المغيـره
منكم مصوت بالعشاء بقـول قـايـل *** هـذا كـلام الصّدق ما فيـه غيـره
ومنكم راعي الوقفه فعوله جزايـل *** بالموقف الغصّاب اعتـق قصيره
ومنكـم اخـو بقشه جزيـل الفعـايـل *** اعتق غريم ابنـه وكـمّل مسيـره
افـعـالـكـم لـو ابـي اعـدد هــوايــل *** يصعـب عـلي تعديدهـا واتعبيـره
قال عبدالله بن دهيمش بن عبار هذه القصيدة مجاراة لقصيدة الرجل
الوجيه الشاعر مفلح بن عياد المرواني الجهني أبو سلطان :
جاني جزيل القـاف عبـر الوسايـل *** من مفلـح العـيـاد نـقي السـريـره
القـرم أبـو سلطـان نسـل الحمايـل *** ضـيـفـه بـعـز ولا تـملـل قـصيـره
من ساس عزوه كاملين الخصايل *** مبطي لهم بالطيب والمجد سيـره
عـزوة جهينـه مـن خـيـار القبايـل *** بسيوفهم حامين غـرب الجـزيـره
منهـم صحـابـه بالعصـور الأوايـل *** ومنهم الشيخ اللي علومه شهيره
مقدمهـم أبـن غنيـم زبـن الدخايـل *** يـذخـر لصعبـات الأمـور العسيـره
اخـو سـنـيـدا فـك قـيـد الـحـبـايــل *** واطلق سراح الـلي عليهم جريـره
قال الشاعر بشيّر مناور العبدلي المطيري قناص الشمال هذه الأبيات
مجاراة لقصيدة عبدالله بن دهيمش بن عبار يقول :
سمعت قاف اللي على الخصم ورّاد *** الـلي مكانه فـوق وسق الشدادي
الـلي اليـا صـارت بـشـدات وعـنـاد *** شبـره عـلى كـل الأشابـيـر زادي
الـلي اليـا هـابـوا شـغـامـيـم الأولاد *** دون القبيلـه ماقـفـه مـا يـحـادي
عـبـدالـلـه الـعـبـار اليـا قـال نـشّـاد *** يـارد اليـابـار الـكـذوب الـربـادي
ناسن يا ابـو مشعل يغثون الأكبـاد *** وفـي وقتهـم جاء للمصيّح منادي
والـلي يـبي زود من الكذب لا فـاد *** خـلـه يحـدر وانـت مشيك سنـادي
لا صار ماهو في المواجيب سـداد *** طـيـر الرخـم مـا غـذيـت للهـدادي
ما ياصـل الأكديش لا طـول المـاد *** يــقــعــد وخـلـنـه طــوال الأيــادي
هـذا كـلام العبدلي يا ابن الأجـواد *** الـلي بهرج الحق والصدق شادي
قال عبدالله بن دهيمش بن عبار هذه القصيدة جواب لقصيدة الشاعر بشيّر
ابن مناور العبدلي المطيري أبو طلال :
يا أبو طلال ارسلت لك عبر الأيباد *** أبيـات تصدر من صميم الفوادي
عساك ترفـل دوم فـي عـز وسعـاد *** تعـيش يالـلي للقـطـامي تشـادي
أنـت الـذي شـاعـر وللصيـد صيّـاد *** باما جدعـت الـلي قرونها حـدادي
يا أبو طلال الوضع يلزم لـه جهـاد *** والشـر من أهـل الغوى بازديادي
المـرجفيـن الشـر مـن كذبهـم عـاد *** في زعمهم بالسب صاروا نوادي
والحيص يا بشّيـر تـوذا مـن قـراد *** مع صغـر حجمه مص دم الثنادي
وش عـاد يالمنعور لـو نلـزم حيـاد *** ونعـوذ مـن شـر الحقود المعادي
اهـل الحسـد يبلوننـا قصـد واعمـاد *** تعاضـدوا بالكـيـد كثـر الجـرادي
كلن سحب سيفه من جراب وغماد *** حـربـة لسانه مثـل طعن الهنادي