قال الشاعر جمال الأسود الشملاني ابو غازي هذه القصيدة تهنئة لزميله عبدالله بن دهيمش بن عبار واشادة بجهده لقبيلة عنزة يقول :
عـاد عـيـدك يا عشيـر الغـانـمينـا *** ابو مشعل يا عسى تبطي سنينه
يشهـد الـلـه والجماعـة شاهدينـا *** والـلـه أنـي مـن كبـار مشجعينه
يشهـد التـاريـخ والـلي منصفينـا *** مـا بـذلـتـه للقـبـيـلـه شـايـفـيـنـه
يـوم هبّت من شمال ومن يمينـا *** كـل سباع الغاب ما تقرب عرينه
يـوم شـعّـار الـرخـى عيت تبينـا *** بـان فـعـل اللـيـث حـنـا خابرينـه
يا كريـم ويا مجـيـب ويا معـينـا *** احفظه ياللي حفظت اهل السفينه
ابتهجنـا بالعـلـوم الـلي تجـيـنـا *** نـحـمـد الـلـه يـوم خـيّـب شامتينه
سل سيف العـدل قطّاع الوتينـا *** وكـلمـة التـوحـيـد تلجـم حاسدينـه
قال عبدالله بن دهيمش بن عبار هذه القصيدة جواب لقصيدة الشاعر
جمال الأسود الشملاني أبو غازي :
يا أبـو غـازي يا سليـل الأكـرمـيـنـا *** جـانـي المنـظـوم وبيـوتـك ثـمينـه
من حـكى الواقـع نعـده مثـل أخـينـا *** ولـي عـلاقة مع الـلي مثلك متينـه
الـتـهـانـي مـنـك يـا ذرب الـيـمـيـنـا *** قـلبـك الـطـيّـب تعـبّـر عـن كـنينـه
يـا زمـيـل الـعـون لأبـيـاتـك قـريـنـا *** سبكهـا مثـل الجـواهـر بالخـزينـه
فشّل الـلـه كـل الـلي عـالـوا عـلينـا *** الضمـايـر سـود والأعـمال شـينـه
كـان قـالـوا لـلي عـمـلـتـه نـسيـنـا *** الهـدف يا مسندي حسد وضغـينه
ويـوم بـالظـالـم ورطـنـا وابتـلـيـنـا *** سـنـعـوه حـمـاة مـكّـة والـمـديـنـه
السفينـة مـا رست من دون مـيـنـا *** وآل سعود المعتدي هم هزم عينه