*- وهذه عدد من القصائد مساجلة بين عبدالله بن دهيمش بن عبار العنزي
وسليمان بن مقبل الحربي وذلك عندما كانا في منطقة شرورا عام 1399هـ
حيث وجدت أبيات من الشعر مكتوبة بورقة ولم يكتب عليها أسم صاحبها وقد
أطلق عليها أسم المجهولة ورد على هذه القصيدة عبدالله بن دهيمش بن عبار
وأرسلها لسليمان بن مقبل ورد سليمان وبدأت المساجلة حتى بلغت ربعماية
بيت وعندما طبعتها بالديوان حصل اختصار عدد من الأبيات وهذا ملخص
هذه القصائد وقال صاحب القصيدة المجهولة : 128
ووجود الـلي رقى براس الطـويلـه *** وايـتـذكـر مـا مـضى بالفـايـتـاتـي
جـر قـلبي جـر سـلـك فـي هـلـيـلـه *** لا تـذكـرت العـصـور المـاضياتـي
وهـنـي الـلي ركـب جنـب الـدلـيلـه *** لأ تـجــاه عــارفــه عـلــمٍ ثـبـاتــي
فـوق هـاف مـجـهـزٍ مـا فـر ويـلـه *** والبلـوف مـن الحفيـز مضبطاتـي
بالعجـل لا سـار لـزومـه يـجـي لـه *** مـن ركب بـه ما شعـر بالهاوياتي
منـوت الـلي نـاحـرٍ ديـرت خـليـلـه *** صابـر وقـلبـه عـلى خـلـه يهـاتـي
صـابـر دام الـصبـر نـقـدر نـشيـلـه *** وأن تعـدا الصبـر طرقـت العبـاتي
* قال عبدالله بن دهيمش بن عبار رداً على صاحب المجهولة : 129
هيـه يا اللي مرقب براس الطويلـه *** أستمع لي يا فتى وأقبـل وصاتـي
صاحب القـلب المشقى عـزتـي لـه *** سـاهـرٍ بالـلـيـل عـينـه مـا تبـاتـي
كـم غـلام من الهـوى حالـه عليلـه *** يـوم هـام بـحـب تـرفـات البنـاتـي
كـم غـلام الحـب زاود مـن غـليـلـه *** مـن سببهـن عـاف ذات الحيـاتـي
قيـس هـام بحـب منسوع الجديلـه *** عـذبـه وجـد العـذارىالمحصناتـي
أنخـلع مـن حـب لـيـلى هـد حـيـلـه *** جـرب اللوعـة وشاف المعضلاتي
أحتـرص حـذراك لا تصبح مثيـلـه *** تعـرض الـوم الخلايـق والشماتـي
مـن يـودك لا تـعـذب فـي سـبـيـلـه *** بـالـتـمـنـي مـا تـهــيـا لـك بـتـاتـي
من عداه الصبر ما يجني حصيلـه *** وأنـا مثـلـك مـا تهيـت لـي منـاتـي
في قعـافـز صرت والديـرة محيلـه *** جـرهـد زيـزاه مـا فـيـهـا نـبـاتـــي
نحتسي للحرب حين انشوف زيله *** ما أنتخفـى عـن هجـوم الطايراتي
باذليـن الروح مـا نرضى الفشيلـه *** والـلـيـالـي بـالـمـعـزة مـقـبـلاتــي
ولا بـد الـشـدات يـأتـيـنـا بـديـلـــه *** تـذهـب أيــام الـكـدر والـعـز يـاتـي
* قال سليمان بن مقبل الحربي رداً على عبدالله بن عبار العنزي : 130
قـال ابن مقبـل درس في كل حيلـه *** دون حـقـه مـا يـدنـق باخضعـاتـي
كـل رجـل دون حـقــه مـا يـزيـلــه *** مــا نـعـيـل ولا نـحـب الـعـايـلاتـي
مرحبـا بالقاف فكـري مهتـوي لـه *** عـدد نـواض البـروق السامـراتـي
مـرحـبـا اعــداد بــراق نـخـيــلــــه *** بـالـبـيـوت الـلي لفـني مـرسلاتـي
قـام ابن عـبـار وارسـل لـي نفـيلـه *** ومـسـتـعـد بـردهـا عـلـم ثـبــاتـي
وأن بغيت القـاف وأنـا منتـوي لـه *** أصخره صخـر الجبال الراسياتـي
عـنـدي القيفـان وابحـوراً مهـيـلـه *** قـاف بـدع اليـوم ما هـن محيلاتي
والجـمـل لا حـمـل بحـمـل يـشيـلـه *** يـرتـكي كـان الهـزايـل عـاجزاتـي
والعـميـل الـيـا نشـد يلـقـا عـمـيلـه *** ولا نـحـب الا الـعـلـوم الطيـبـاتـي
والـلـي يـدور الـردى يلـقـا زمـيلـه *** والعـلـوم الـلي يبيهـن جـاهـزاتـي
والزميل الـلي طريقـه يهـتـدي لـه *** ولا سمعـت أن الرسوس مسيلاتي
الرسوس رسوس ما فيهـا جميلـه *** مـا تـفـيـد الا الـعـدود الـراهيـاتـي
كـم رسٍ مـاه مـا يـغـطـي نـثـيـلــه *** وأن وردته ما يجي خمس دلواتي
* قال عبدالله بن دهيمش بن عبار رداً على سليمان بن مقبل الحربي : 131
قـال ابـن عـبـار مـن منظـوم قيلـه *** يـبـدع القيفـان مـن شـط الفـراتـي
قـافـنـا هـداج مـا قـالـوا ثـمـيـلــــه *** يا قريحـة من بحـور القيـل هـاتي
من صميم الجاش ما جاني هميلـه *** من روابع خاطـري هاضت ابياتي
أترك هـزل القاف وآخذ من جميله *** والقـوافي في ضميري حاضراتـي
أطـلع البـوك المسطـر مـن مشيلـه *** والقـلم مليـان مـن حبـر الـدواتـي
الـمـزرف يـم أبـو مـقـبـل نـحـيـلـه *** يا صليب الشـور جـتـك معـاملاتي
خـطـكـم جـانـي وخـذ مـني بـديـلـه *** جـاك ردي يـا زبـون الـوانـيــاتـي
يا عشيـر الغـوش يا زبـن العطيلـه *** يا شـوق اللي كنها ظبي المهـاتي
مـا اتـدنى لصاحـب النـفس الذليلـه *** والعـلـوم الطيـبـه هـذي شـفـاتـي
وكـان تـرديـد القـوافي طـال طيـلـه *** الـزعـل مرفـوع والمكنـون ياتـي
قـافـنـا يـا الـقـرم مـا كـمـل نضيلـه *** والقـوافـي مـا تـوقـف مـن تلاتـي
لابـتي صـاع الخصيم تـزيـد كيـلـه *** تنصر الصاحب وتردع كـل عـاتـي
لـي قـبيـلـه مـا تحـمّـل كـل عـيـلـه *** وخصمهم يـوم اللقـا يذهب فـواتي
بـني وايـل كـان هـز إبـليس ذيـلـه *** مـن تعـاوج يدعسونـه بالجـواتـي
* وقال الشاعر سليمان بن مقبل الحربي هذه القصيدة رداً على عبدالله بن دهيمش بن عبار للمرة الثانيـة : 132
قـلـت من مكنـون فكـري واتعليلـه *** مـا اتسلـف مـن معـاني سـارياتـي
موج من طاش البحر ماهي حثيله *** زايــدات والـعـدود امــقــفـلاتــــي
عـارف المـيـزان ميلـه وأتعـديـلـه *** وأن هـرجـنـا بالـعـلـوم الـوافياتـي
قـلتهـا والقـلـب مـا يقـبـل عـذيـلـه *** مـا أتـعـذر لـو تـجـيـنـا مجـلـداتـي
قـلـت قـولـن بـالـلـوازم نـنـثـي لـه *** والـبـيـارق للـخـصـوم مـركـزاتـي
والسـوالـف لا تـدانـت بالـخـجيـلـه *** يـخـربـن بـيـوت نـاسٍ عـامـراتـي
مـا نصـاحـب مـارج يـرفع شليـلـه *** مـا يـعـرف المخطيـة والمقـدياتـي
نصاحب الـلي باللـوازم ينبـدي لـه *** لابـس درع الـمـعـزة والـنـجــاتـي
والـردي يا القـرم مثـل الحنضليلـه *** لـو تـزايـن طلعـهـا مـابـه حـلاتـي
الـردي حسـو يـغـرك فـي نـثـيـلــه *** وأن حـداك اللال ما يملأ الرواتـي
لا تـعـنـا كـل شـي نـلـتـجـي لــــــه *** ونعـتـلي فـوق الجبـال العـاليـاتـي
والـمـعـانـد بـالـملاقـا نـحـتـدي لـه *** ونـلـبس ادروع تـضـد الصايباتـي
* قال عبدالله بن دهيمش بن عبار هذه القصيدة رداً على سليمان بن مقبل الحربي للمرة الثانية : 133
قـال أبـن عـبـار بـبـيـوت جـزيـلــه *** مـن قـديـم مـا نـقـول المخطيـاتـي
وارد الحسيـان مـا يـمـلأ صمـيـلـه *** والثـمـايـل مـا تـروي المظميـاتـي
أبـني القيفـان لـو هـي مستـحـيـلـه *** صغـتـهـا وسجـلـتـهـا بمـولـفـاتـي
القـوافـي شـاربـن مـن سلسـبـيلـه *** والـقـلـم والبـوك عـنـدي والماتـي
والقـريحـة بالطلـب ما هي بخـيلـه *** دوم تـمـلـي بالـبـيـوت الـوافيـاتـي
والشعـر موروث من جـدي نحيلـه *** وأحمـد المولى نحوش الطايلاتـي
جاك عذب القـاف ما نبـدي حميلـه *** والحثـال حثـال مـا فـيـه اثمـراتـي
مـا يهـم القـيـل حـزت نشتـقـي لـه *** أعتـقـد عنـدي وعـنـدك واجـداتـي
وأنـت مثـل الحيص شيال الثـقيلـه *** لـو ثقل حملك مثـل ريش القطاتـي
وأنـت عـلم الطيب دايـم تعتـني لـه *** وتصعـد بروس الجبـال العالياتـي
ذايـع صيتـك ومـن عـزوه أصيـلـه *** الحـروب اهـل العلـوم المعجـزاتي
والـردي خـلـه عـسى ربـك يـزيلـه *** مجـلسه يـا القـرم بيـن السيـداتـي
الـردي ممشـاه بالطـرق الـرزيـلـه *** طـول عمـره مـا ينـال المكـرماتـي
الـردي يـا مسـنـدي محـدٍ دري لـه *** الردي معدود من عرض الخواتي
* وقال سليمان بن مقبل رداً على عبدالله بن عبار للمرة الثالثة : 134
قـال من هو باللقـا شعـوره عتيلـه *** مـا تضجـر مـن حـمـول مثقـلاتـي
خصمنـا الممدوح لازم نحتـفي لـه *** وجنـه أوراق اللحـون مقرطساتي
والخـصيـم إلـى بـغـانـا نعـتـني لـه *** مـا اتـسيّـد للسهـوم الـضـاربـاتـي
دام راسي عايش من عرض جيله *** أحـتـميـه مـن السهـوم العـايلاتـي
ومن يحاول خدعنا مـا ننحـني لـه *** ومن ضربنا بعود شتناه بحصاتـي
مـن تمـادا بالهجا حـنـا انهجي لـه *** ومن يسب الناس يبشر بالشناتي
وصاحب الحق المحنك ما ايغديلـه *** يـاخـذه لا جـاء نـهـار مـعـانـداتـي
جـاني المكتوب وفكـري منتبي لـه *** فـز قـلـبي باللـحـون المـطـربـاتـي
يـوم خصمي قـال مـا فيهـا زعيلـه *** طـاب كـيفـي والمعــاني والمـاتـي
وأسمحوا لي كان جت مني ختيلـه *** ما وصفتـك للرسوس المصفيـاتي
أسـمح الـزلات يـا مـزبـن دخـيـلـه *** يـا زبـون الحـرد يـوم المشكلاتـي
وأنـت مـن ربع لهـم ذكـر وفعـيلـه *** بـني وايـل مـدركـيـن الـطـايـلاتـي
طـايـليـن العـز بسيـوف صـقـيـلـه *** كـم عـدو جـادعـيـنـه بـالـهــواتــي
مقحـميـن الحـرب لا شبـت فـتيلـه *** مـن قـديـم وحافـظيـن الـواجبـاتـي
*وقال عبدالله بن دهيمش بن عبار هذه القصيدة رداً على سليمان بن مقبل الحربي للمرة الثالثـة : 135
مـا يخيـب العـبـد والمـولى كفـيلـه *** هـو كـفـيلـه بالحـيـاة وبالـممـاتـي
ومن يخالف سنة الهادي يا ويـلـه *** مـا يعـرف المخـطيـة والمقـدياتـي
ولا يفيـد العبـد زرعـه مـع نخـيلـه *** ولا يفيـده كود صومـه والصلاتي
وكـل جـيـل بالـفـنـا يـقـفـاه جـيـلـه *** ويـن كسرى والجيـاد الصافنـاتـي
وين عـنتر ويـن راح طـراد خـيلـه *** زال عـنـتـر والسـوالـف بـاقيـاتـي
أن غزانا الخصم ملزوم انغزي لـه *** حتى يرجع بالفلس عقب الغـزاتي
مـا درقـنا للخـصيم ولا أنحـبـي لـه *** بـالـنـقـا ننطح صنـاديـد الـرماتـي
قـلتها والذيب جاء للي ايعـوي لـه *** وأن كشر بالناب حركت اعضلاتي
الحصان حصان ما يقصر صهيلـه *** ولا يهاب البـرد لـو هو كان شاتي
أصلـه كحيلان ينجـب مـن كحـيـلـه *** سابق ومن ساس حصن سابقاتي
ومن يـدور الطيب لا بـد ايعـني لـه *** دوم أبـوابـه لـلـدخـول مفـتحـاتـي
من قعـد بالخلف ما يرعى الخميله *** ومن قصر مفلاه ما طـال الفلاتـي
من يصون النفس ما شي ايغـديلـه *** من عمل سيات ما حاش حسناتي
ولا يحوش الغانمة خطـو الهبيـلـه *** ذيك لأهـل الطيب وافين الصفـاتي
* وقال سليمان بن مقبل الحربي هذه القصيدة رداً على عبدالله بن دهيمش بن عبار رد القصيدة للمرة الرابعة : 136
قـال من هـو بالمعاند هـاض قـيلـه *** يـارد الـمـاء مـا حبالـه قاصراتـي
جـاك مقـرٍ فـاح مـن بيـر العضيلـه *** زاد فـوحـه والسـواقـي جـارياتـي
يـروي الـنـداي والـلي فـي مقـيلـه *** ويـشـربـن أذواد نـاس هـالـكـاتـي
عـد راهـي والظـوامي تنـتـدي لـه *** تشرب النقروح ما تشرب صراتي
يرتكي وأن جولـه بـدوان امحيـلـه *** يشربـون وشـريهـم فيـه الهنـاتـي
من سقـانـا شربتن من ماء عسيله *** نسقيـه كـاس الهـنـا والعـافـياتـي
وأن مـديـنـا مـا يمـانـيـنـا بـخـيـلـه *** مـن عطأ مفـرود نعطيـه القحاتـي
لـو يطول القـاف أو يقصر نضيلـه *** مـا نـقـول أن المـثـايـل قـاضياتـي
دامـهـا بـالـعـدل نـمـشي بالعـديلـه *** وأن لفـت بالعـوج فيـه معـوجاتـي
كان تبي العفوا كم واحـد اعفي له *** أصلـح وصـالح وكـب الـثـايـراتـي
وكـان وسط الراس حب ما دريلـه *** كـم حـب دقــقــتــه الـطـاحـنــاتــي
مـن نعضـه عضة المغـلوث ويلـه *** قـرد حـظـه وأربـعــيـنـه دانـيـاتــي
واللي يعول بالشفا نعـول عـويلـه *** أن صهل نصهل صهيل الصاهلاتي
نطلـب الـلي دمـر الطاغـي وفـيلـه *** الـولي بـأمـره تهـون المصعبـاتـي
* قال عبدالله بن دهيمش بن عبار هذه القصيدة رداً على سليمان بن مقبل للمرة الرابعة : 137
قـال ابـن عـبـار فـي قيـل بـقي لـه *** عـارفٍ فـي وردهـا والـصـادراتـي
من يحاول خـدعنـا ما ننضوي لـه *** وخصمنا نرميـه في قعـر الهباتـي
ومـن تحدا الناس حاله ينرثـي لـه *** لا بـد بنصـر الـولي ننطح القـاتـي
أتـمـركـز فـوق مشمـوخ التـلـيـلـه *** وأعلن الأنذار في عـالي اصواتـي
صامدين وخصمنـا مـا نرتخـي لـه *** وتابعيـن الحـق ما حنـا اعصـاتـي
كـان تبي الصلح خلـك مهتـوي لـه *** والـمـثـايـل بـالـعـدد مـتـعــادلاتـي
مـا مـنــا زلـه ولا مـنـكـم زلـيــلــه *** والأيـادي بــيـنـنـا مـتـعــاونــاتــي
مـن دعانـا بخيـر حـنـا نـندعي لـه *** وأطلب المولي عسى يقبل دعاتي
ومن يجي بالطيب حنا ما نـبي لـه *** غـيـر عـلـوم بالـفـخـر مـتبـادلاتـي
والحـرايـب بـيننـا عيـب وفـشيـلـه *** ومـن تعـدا الحق يجلد بالصفـاتـي
والرجـل مثـل الجبـل يـذري مقيلـه *** ومن عمل زينـه فعـوله شاهـداتي
والقطامي صيدته مـا هـي هـزيلـه *** عـادتـه دايـم يـصيـد المسمـنـاتـي
والغضنفر مـا أحـد يـقـرب دحـيلـه *** مثل وصف الزير ما هـاب البياتي
وأبـو مقبـل طيّـب من عـرفـتي لـه *** مـا تـكـلّـم بالهـروج النـاقـصـاتـي
* وقال سليمان بن مقبل الحربي هذه القصيدة رداً على عبدالله بن دهيمش بن عبار للمرة الخامسة : 138
قال من هو فاهـم اللي ينحـكي لـه *** رايـح بـرايـه بـغــيـر مشــاوراتـي
مـن يحنشل ينطحـونـه حـنشـليلـه *** وبـالـلـقـا لازم تـثـور الـثـايـراتــي
والخصيم اليـا جمع للحرب ضيلـه *** نـاحـريـنـه والـركـاب امـدنـيـاتــي
حـل اطلاق النـار واشتبت شعيلـه *** أصلحوا يا نـاس نـبي امصالحاتـي
لا تصيـر جـروح وانفـوسٍ قـتيلـه *** أفـزعـوا في جاهكم والـواسطاتـي
مـا نـخـلـي حـقـنـا لأفـعــا أكـيـلــه *** ولا نـكـبـه دام فـيـهـا مـطـالـبـاتـي
من رقا فوق الجبل صعب تحويلـه *** ومـن تعـلـق مخطرٍ بالسـاقـطاتـي
مـن وصـل للقـرم لا بـد ايحكي لـه *** قـل لأبـن عـبـار بـالعـلـم الـثبـاتـي
هات من عنـده طريـق نقـتـدي لـه *** والـركـايـب لـلعـسوس مـقـيـداتـي
كـان شـاب الـقـاف ملـزوم نحيـلـه *** قـافـنـا صـارت تـلاعـه ممحـلاتـي
والـمـزرف يـوم جـانـا نـلـتـقي لـه *** فـز قـلـبـي بـالـوفــود الـبـاذلاتـــي
نرسـل المكتـوب مع زود اتهلـيلـه *** ونكثر الترحيب من غير اسهواتي
والـتـحـيـة دوم نـبـذلـهـا بـذيــلـــه *** للصـديـق الـلي لحـونـه فـايـزاتـي
أسـمـح الـزلات لـو مـقـدار هـيـلـه *** كـان مني شفـت بالقيـل اهـزباتـي
* وقال عبدالله بن دهيمش بن عبار هذه القصيدة رداً على سليمان بن مقبل الحربي للمرة الخامسة : 139
قـال ابـن عـبـار فـي منظـوم قـيلـه *** يـفتهـم حـل الـرمـوز المبهـمـاتـي
قـلتـها وبـدع القـوافـي معـتبي لـه *** بـارعٍ في نظمهـا مـن اول حياتـي
مهـمـا تـكـون المثـايـل مستطيـلـه *** نرسـم القـيـفـان رسـم الـزاويـاتـي
جـاك سيـل طـامي تسمع صـويـلـه *** مـن محيـط فـيـه سفـنٍ راسيـاتـي
والمحيط الأطلسي غـطى الرميلـه *** راسيـه فـوقـه اسطـول مـدمـراتـي
موقعـه مـن روسيـا إلى فنـزويلـه *** طامي وفي كـل صـوب لـه قـناتـي
مـا هـو زي بحيرة يصفـق نجيلـه *** تلقا فيها الرفش هـو والسلحفاتـي
ولا هوحسو مـاه ما ياصل جـويلـه *** ولاهومقر ماه ما يغطي الحصاتي
ولا هو خبرا جمعها يصبح طميلـه *** مـا كـر الدغـلـوب بالمستنقعـاتـي
ومن يهيل الطعس بيـّد من يهيـلـه *** عـّذب بهـوج الريـاح العـاصفاتـي
الطعوس اطعوس بالصحرا مطيله *** زاميـة فـوق الجبـال الشـامخـاتـي
قـلـتـها ولا أريـد تـولـيع الفـتـيـلـه *** والمـريـض يراجـع المستشفياتـي
ما نحب الدجـل وأصحاب الدجيلـه *** والنمـايـم دوم مـن طبع الـوشاتـي
عـذت بالـرحمـن مـن جنـه وغيلـه *** والخبـايـث بالحـديـد امصـفـنـاتـي
* قال سليمان بن مقبل الحربي هذه القصيدة رداً على عبدالله بن دهيمش بن عبار للمرة السادسة : 140
مـرحـبـا بقيفانـكـم جتـني مـزيـلـه *** مـرحبـا واشعـورنـا مستبشـراتـي
مـرحـبـا تـعـداد مـزن مـاع سـيـلـه *** مـزن غـيـث بـالـربـيـع معـزلاتـي
يا عـميـل الخيـر مـا قـلبي غـفـيلـه *** أطـبع القـيـفـان طـبع المطبعـاتـي
فسّـر الألغـاز وأن جـتـكـم جهـيـلـه *** حل لغوزي بالحروف الواضحاتي
ويـش رجـل مـن بـعـيـدٍ ينعـني لـه *** مـا يـجـيـب الا بـنـات محصنـاتـي
كـم واحـد لا فـقـد شـوفـه يجي لـه *** يـدلـه العـشـاق والـه امـتـرخـاتـي
وأنشـدك عـن شـايـب يفقـر قبيلـه *** شال في بطنه يجي عشرين شاتي
مـار هـو محبوب مـا يكثـر جفيلـه *** عـاقـل وبـالـيـه ربـي بـالـسـكـاتـي
وش بـنـات حـطـن بقـلبي مـلـيـلـه *** يسقـن العشـاق كـاس المسكراتـي
مخـفيات بحـوش مصكوك قـفـيلـه *** وبالشمطري روسهـن مخضباتـي
ويش رجل صيحته تشفي الغـليلـه *** يفـزع الجـيـران فـي قـو النهـاتـي
لـه صحيـب مـرافـقـه مثـل الدليلـه *** وأن وطـالـه دولـة راحـت شتاتـي
واضـحٍ أن كـان قـلـبـك ملـتـبي لـه *** فسـره لي زيـن يا شيخ القضاتـي
حـلـول الألغـاز منـكـم محـتـري لـه *** مـا يـجـني مـنـك كـود مفسـراتـي
* وقال عبدالله بن دهيمش بن عبار هذه القصيدة رداً على سليمان بن مقبل الحربي للمرة السادسة : 141
قـال ابـن عـبـار واشعـوره نبـيـلـه *** تحـيـاتـي لأبـو مـقـبـل مـهـديـاتـي
المعـانـي بالـهـقـاوي نـهـتـدي لـه *** عـادتـي حـل الرمـوز الغـامضاتـي
لغزكـم يا القـرم مـن نـوع الرقيلـه *** واضح ومفهوم من دون اهقواتي
شايبك غلاف البكت هي هقوتي له *** والسجـايـر هـقـوتى هـن البناتـي
يعـلـم الـلـه كـن كـتـبـه خـط نـيـلـه *** راسمينـه بالعـكـوس الصافـيـاتـي
والرجل اللي صيحته تشفي الغليله *** ذاك نجـر أن كـان بالمعنا ايواتـي
والقهـوة هـي الـلي قـلـت الدويـلـه *** لا هبشها القهوجي صارت هتاتي
أستمع وأسألـك من فكـري مسيلـه *** عـن عـلـوم يالسنـافـي مسملاتـي
ويـش رجـل عـادتـه دق الـطبـيـلـه *** ينطـق ولا لـه لـسـان ولا لـهـاتـي
عاقـل وسامت وهرجه ينصغي لـه *** وايـتـكـلـم فـي هـروج منـوعـاتـي
والـيـا سـكـت مـا تكـلـم لـو تسيلـه *** مـا يجـاوب لو ضربتـه بالعصاتي
أفهـمـه يا القـرم وأسـرع بتحليلـه *** كـان تـعـرف يا فـتى معـنا اخباتـي
أي بـدر اللـيـل أو طـلعـت سهيـلـه *** كـل مـنهـم بـالـبـروج الـعـالـيـاتـي
القـمـر يا مسندي يضـوي شعـيلـه *** ولا نجـم سهيـل يهـدي الغـادياتـي
* قال سليمان بن مقبل الحربي هذه القصيدة رداً على عبدالله بن دهيمش بن عبار للمرة السابعـة : 142
الـخـبـايـا حـلـهـا عـنـدي سهـيـلـه *** نــاجـح بـالـهــيـنــة والـكـايـداتــي
لغـزكـم يا القـرم نعـطيـك اتحليـلـه *** ذاك رادو كـان أن خـمـني ثـبـاتـي
خـصمنـا نحـل لـغـزه وأنحـجي لـه *** مـا أنتملـل لـو تكـون مبـاغـتـاتـي
ويـش عـذرا راكـب فـوقـه حليـلـه *** ما يحـول لـو يشوف الجـمع يـاتي
مـا يـفـّرق بـينهـم عـود الشتـيـلـه *** والحصص بيـن الأثـنين موقـتاتـي
راسيـه مـا تـمشي الا ينـمشي لـه *** وحلقها بـه نوع من نـوع السباتي
ويـش بكـره راكـب فوقـه اجميلـه *** شالت المفرود والهـرش الخشاتي
هـولـتـني يـالـسنـافـي كـل هـيـلـه *** باركـه للهرش وهي كبـر الحذاتـي
ويش رجل كاشتن لـه فـي خميلـه *** كـل مـا شـفـتـه لبـوسـه زاهـياتـي
ما خشي يا القرم من هب الثعيلـه *** ولا يخـيـل بـروق مـزن نـاشيـاتـي
يـا زمـيـلي شفـت بقعـا مستزيـلـه *** ومن سبـب بقعـا افكـاري شاذاتـي
أشكي وحـالي مـن الفـرقـا عـليلـه *** ودمع عيني مثـل وبـل المرزماتي
أشتـكي وأقـول يـا مـنجي دخـيـلـه *** عقـب مـا هـو بالبحور السافحاتي
تـفـرج لمن صابـر لـو شاف ميلـه *** ما تجيـه مـن الشمـال مواصلاتـي
* قال عبدالله بن دهيمش بن عبار هذه القصيدة رداً على سليمان بن مقبل الحربي للمرة السابعـة : 143
قـال ابـن عـبـار قـافـي نـنـتـبي لـه *** مـن قـديـم نـفـتهـم نحـو النحـاتـي
الـقـوافـي نـفـتـهـم عـدلـه ومـيـلـه *** جـاك رد القاف ما ايفيـد السكاتـي
لغـزك الـلي صار عندك فيـه هيلـه *** العـفـريـتـه مـن انـواع الرافعـاتـي
والعذراء يا القـرم نعطيك اتحليلـه *** ذيك ساعـه كان هو صح امعناتـي
والرجل اللي كاشت وسط الخميله *** ذيـك صـوره بـروزت بستديـواتـي
وجـاك لغـزي ما هقيته ينقوي لـه *** ويـش خـمسه بالكتـاب مسجـلاتي
يـاكـلـون ويشـربـون بـكـل لـيـلــه *** ولا لــهــم لا أم ولا أبـــو بــتــاتـي
ذكـرهـم الـرب فـي محكـم انجـيلـه *** ومـذكـوريـن فـي آيـات مـنـزلاتـي
وكان تذكر من زمانك شفت زيلـه *** الزمن خلا الصخـر يصبح هتـاتـي
وانـا مثلـك اطلب الله واشتـكي لـه *** أشتـكي ظيـم السنيـن المعسـراتـي
يرحم الـلي عنـده الـونسـة قـليـلـه *** فـي قـعـافـز بـلـقـع مـا بـه نـبـاتي
يرقـب المرقـاب والمرجـع فصيلـه *** يوصـل الأسناد ويرجـع للمشاتـي
وش يلم اللي سكن بارض السليله *** لـلـذي يالـقـرم قـرب امخطـطـاتـي
شـف بـالـي بـيـن دبـه والجـبـيـلـه *** فـي جنوب المفتلح غـرب القلاتي
* وقال سليمان بن مقبل الحربي هذه القصيدة رداً على عبدالله بن دهيمش بن عبار للمرة الثامنة : 144
راكب اللي لا مشى يمسي العبيلـه ** مصعـبٍ يـوم الـركـاب معسـفـاتـي
أسمه شعيلان واسـم امـه شعـيلـه *** أقطم الفخذين من جيش اعلـواتـي
عـانـي لـلـقـرم حـواش الـنـفـيـلــه *** يـم ابـن عـبـار ريـف الـهـاشلاتـي
لغـزكـم يـا الـقـرم نـبـدي بتعـميلـه ** نـرد فيـه الفكـر عـقـب ملاحظـاتي
أمـا صـارت حـلـتـه لـيـه سهـيـلـه *** أو شريتـه منـك بخـمس مـدبلاتـي
وكـان تشكي بعد منسوع الجديلـه *** وتشتكي من وجد عمهوج البناتي
تشكي اللي كـل ملبس يـزدهي لـه *** زاهـيـه لبـس المقـصب والعبـاتـي
ضامـر السرجوف وقرونـه فليلـه *** عـيـن حـراً مـاكـره بالـشـامخـاتـي
من شكى فرقـا عشيره عـزتي لـه *** ومـن يلـوم أهـل الهوى للمنكراتي
مـن يلـومـك يـبـلـشه ربـي بحيلـه *** ذاك هـيـس ولا شـقـا بالمتـرفـاتـي
والكـلام أيـفـيـد عـن كثـره قـليـلـه *** وكـل شـي يالـسنـافـي لـه طـراتـي
أسمـح الـزلات يـا ذرب الفـعـيـلـه *** أشـهـد أنـك مـدرك لـلـمـوجـبـاتــي
والسلام ختـام عـنـد آخـر نضيلـه *** وأسمحـوا لـي بالـردود البـاقـياتـي
والصلاة على النبي خير الوسيلـه *** بالختـام أزكـى سـلامي والصلاتـي
* وقال عبدالله بن دهيمش بن عبار هذه القصيدة رداً على سليمان بن مقبل الحربي للمرة الثامنة والأخيرة : 145
راكـب الـلي لا مشى عجـل هـذيلـه *** صيعري من ساس هجن معرباتي
اسمـه حجيلان واسـم أمـه حجيلـه *** لـونـه أحمـر والعضود محجلاتـي
مصعب ولولا الرسن ما ينقوي له *** يجفل من اللمس مايداني الوهاتي
سافر المندوب وأعجـل في رحيله *** سـار من دون ابن مقبـل ما يباتـي
يـوصـل سليمـان كـسـاب النـفـيلـه *** راسي مـثـل الـجـبـال الـزامـيـاتـي
يا أبـو مقبـل سمني ناقـض ثـليلـه *** شفي الـلي خـدهـا مـثـل الـمـراتـي
شـفي الـلي مـا تمشـت بالفـنـيـلـه *** الجـمـيـل الـلي لبـوسـه ضـافيـاتـي
وهـنـي الـلي يحـصـلـهـا حـلـيـلــه *** هـي منـا قـلبي وهي غـاية مناتـي
ذاب قلبي من أجلها واهمد قصيله *** مـن سمـوم القيـظ يأتيـه الهبـاتـي
صاحبي يا القرم ساسه مـن قبيلـه *** يحـتمـون ديـارهـم بالـمـرهـفـاتـي
لابـتـه بالـكـون يحـمـون الدبـيـلـه *** فـي نهـار الكـون واحـدهـم زناتـي
بالعـتيم انجـورهـم تـوحي صليلـه *** والــدلال الـيـا لـفــيـت مـبـهـراتـي
تشـرب مـن الهيـل مابـه زنجبيلـه *** وبعـده الـبـراد يحضـر بـه حـلاتـي
وبعده من الضان لك عيتـا جزيلـه *** قـدمـوهـا مـن خـيـار المسمـنـاتـي
يتبع