تابع
*- أما الشاعر جريد بن عوض بن صحن الغضوري العنزي فقد كان بينه وبين
زميله عبدالله بن دهيمش بن عبار عدد من قصائد المساجلات وذلك من خلال
وجودهما في المنطقة الجنوبية في الأعوام 1388هـ وما بعدها قال الشاعر
جريّد هذه القصيدة يسند على عبدالله بن دهيمش العبار : 88
يـا راكـب مـن عنـدنـا فـوق كنفيـر *** سـريـعـة الـمشـوار بـمـدرج القـار
أسـرع من الـلي طالعـن الصقاقيـر *** ولا كما الـلي بيضهـا باوس الغـار
تحـركت مـن عنـدنـا نوضت الطير *** وفي ربع ساعه واصله لأبن عبار
وإلى وصلت القرم عطـه التباشيـر *** عـطه الكتـاب وبلغـه كـل الأسـرار
أسـجـل المـكـتـوب يـمـك بـتحـريـر *** وأعطيك يـوم ونصف ليلة ابمقدار
عجـل مـرده تـرى جـني حـواشيـر *** غـدالهـن عـنـدي مـوارد ومصـدار
غـدالهـن وسـط الضمايـر محاديـر *** ودليت أسجـل بالقلم قدر ما اختـار
بالبوك لكـم أصـور القـيـل تصويـر *** وأبدع غزيرالقاف من جم الأبحار
مـا نـاخـذه يـا مـسنـدي بالـدنـانيـر *** ولا مكاسر بـه يا فتى الجود تجـار
لا شـك نـاخـذ بـالـلـيـالـي تـعـابـيـر *** نـبـي انـتسلا مع تـنـاظيم الأشعـار
إلـى نـويـت القـاف جـبتـه بتيسيـر *** الفـكـر يـمـلي والقـلـم يـشـر أشـار
جاكم شعيب يطمـر الحـزم وايزيـر *** وادي الرمـةلا فـاض بايام الأمطار
أرسل كلام الصدق ما هي معاذيـر *** والعـذر مـا يقـنع مـن الربع خطـار
يا القرم ما نقبل هروج المصاخير *** والقيل ما قـلته على همش الأخبار
متجمعـه عتبـان وعـنـوز ومطـيـر *** عنـدي شهود بكـل ما قـلت حضّـار
وحنا هـل الطولات بالشـر والخيـر *** لـو جاني خطك ماحكي لك بالأنكار
يا شـوق هنـوف تـربي الـدعـاثيـر *** أقسـم بـرب الـلي لـه الـنـاس زوّار
لـو قـيـل خـطـك فـوق ولا تحاديـر *** حلفت لك غيـر أوصله وين ماصار
أرسـلـت للمكتـوب جملـة مـداويـر *** مـن شانكم نعطي البلايس بالأذكار
ويحرم عليه كود أسوق المخاسير *** ولا خير باللي من الرجاجيل مكـار
* وقال عبدالله بن دهيمش بن عبار هذه القصيدة رداً على الشاعر جريد ابن عوض الغضوري : 89
ياراكب اللي دوم تمشي على انبير *** للجـو تصعد حين يضغط لهـا زرار
بالجـو طارت تسبق الريح بالسيـر *** من نوع ميـق وتتسع لأربع أنفـار
مـلاح ومساعـد وراصـد وشنفـيـر *** تمشي بسيد البوصلة وزن واعيار
تروحت من عندنـا وقـتهـا عصيـر *** تحمل رسالة من يمين ابـن عـبـار
جاني مـن جـريّـد جـواب وتعـابيـر *** حيه وحي الـلي كتب خـط الأسطار
مرسل من جريـد عشيـر المناعيـر *** الغـضوري من عـزوة تاخـذ الثـار
يـوم الـفـخـر بمصقـلات البـواتـيـر *** يـروون لـدنـات الـقـنـا وكـل بـتـار
أدنـاهـم الـلـي بـالـلـقـا كـنـه الزيـر *** صنديـد بـاتع يـدحـر الخصم جبـّار
يابن عوض ما قلت بالهرج تزوير *** لا شـك فكـري بالمخـاليـق محـتـار
دونـك مـرد خطـوطكـم والأساطيـر *** ويفداك من يهمل وعـنده أستهتـار
أهديك شوري كان تقبل من أيشير *** ولا أنت ترجع لك مباهيم الأشـوار
حـنـا لبـعـضنـا بالـلـوازم منـاصيـر *** والرزق عند الله على الخلق قهـار
قـلتـه وعندي لـك حشيمة وتوقيـر *** وأنا بالـلي شرواك يا القـرم فخـار
أن جاك مني يا فتى الجـود تقصير *** أفطن ترى يمحا الذنوب الأستغفار
الجـو تعصـف بـه زوابـع معاصير *** والهـرج يا مشكـاي للكبـد مسمـار
أن كان سيلك يطمر الحزم وايزيـر *** جاك المحيط اللي بـه الموج هـدار
جاك المحيط الـلي يشيل الشخاتيـر *** مـا ينطح موجـه وفوجـه إلـى فـار
تسمع على جاله صريـر النواعيـر *** سيله عرمرم يقذف الموج بالطـار
ودنيـاك هـذي بين ربح ومخاسيـر *** كم واحدٍ شاف الجفا عقب الأيسار
نعـوذ بالـلـه من نفـيح الـزمهـريـر *** ونلـوذ بالرحمـن عـن واهـج النـار
*وقد رد الشاعر جريّد بن عوض على زميله عبدالله بن عبار للمره الثانية يقول : 90
يا راكب الـلي ما يصلب بـه القـيـر *** صاروخ ما مثـله على الجـو طيـار
صاروخ ياخـذ بالخضيرا مشاويـر *** يمـوح موحـات النـداوي اليـا طـار
يمشي عدال ولا ايتيامن ولا ايديـر *** إلى مشى يوصل بعيدات الأمصـار
من عندنا الصاروخ حـدر محاديـر *** وفي قضي لازم عـاني لأبن عـبـار
يا مسندي عـطه الرسالـة بتفسيـر *** عطـه الكتاب وهات لي رد الأخبار
وقـلـه لـفـانـي خـطكـم دون تأخيـر *** هرجك صحيح وكل قولك له أثمـار
والشاهد الله ما حصل منـك تقصير *** أقـولـهـا مـانـي مـنـافــق وقــمّــار
الـلـه يـفـكـك مـن جـميع العـواثيـر *** عساك ماقي يا فتى الجود وامجار
حيثك فهيم وتصخر القاف تصخير *** وأنـا كـذلـك بـالـتـمـاثـيـل بـيـطــار
مثل القطامي فـوق روس العناقيـر *** يـعـجـبـك بـالهـدات للصـيـد جـزار
ولا الـردي لـو قـال يـفعـل معيثيـر *** أعنز على اللي فزعته سر واجهار
ولا ياصل الحـروة كثير المشاويـر *** وبالكون ما يفزع على قب الأمهار
والـرجـل مـا يمـشي بليـا تبـاصيـر *** والطير لـو مالـه جناحين مـا طـار
والبـيـت مـا يـرفـع بـلـيـا كـواسيـر *** ولا ظـنتي تـبنـا عـمـارة بلا جـدار
ومـن لا تـوقع يا فـتى طـاح بالبيـر *** طيـر السعـد بيّـن وللصيـّد صـقـار
وحنين قـلبي حن خلج عـلى ضيـر *** أغـدن ولدهـن بـيـن وارد وصـّدار
من عقـب ما نقطع فياض مزاهيـر *** ومن عقب نقل خميسة وأم شنكار
اليـوم من عـقب البـداوة محاضيـر *** هيهات مـا تـقـل الـبـداوة لـنـا كـار
* وقال عبدالله بن دهيمش بن عبار رداً على جريّد بن عوض للمرة الثانية : 91
يا راكـب الـلي ما مشى بالمواطيـر *** يـسيـر بـالـذرة مـسيـره إلـى طـار
يمشي على الـذرة بحكمة وتبصيـر *** مركب فضا ما صار مثله بالأقمار
يـحـمـل جـهـاز فـيـه آلات تصـويـر *** مركب أبلـو فوق سطح القمـر دار
يمشي على الذرة بضغـط الأزاريـر *** مـن عنـدنـا مرسـل بتوجيـه رادار
يحمـل رسايـل بـه قـوافـي وتعـبيـر *** صوب الذي يفرح إلى جوه خطار
يا أبن عوض دنياك دولابها أيـديـر *** نـوب صعود ونـوب للقاع محـدار
دنـيـاك هـذي فـانـيـه مـا بهـا خـيـر *** يلعـب بهـا يـا مسنـدي كـل عـيـار
مـثـل فـكـاهـات الـتـمـامي ودرديـر *** ومـثـايـل حـديـجـان وأفـلام غـوار
لـو كـان شيّـد بـه مبـاني وتعـمـيـر *** لا بـدهـا مـع طـول الأيـام تـنـهــار
دنـيـاك ما دامـت لأبـو زيـد وبجيـر *** يا مـا هفـابـه من سلاطيـن وأمـار
وجدي على اللي ينطحون الطوابير *** حـمر النواظـر لابتي نسـل عـقـار
أهل الصخى والجود لا نوشح المير *** من مارثـة عـنـاز وافين الأشبـار
أهـل الـدلال المـتـعـبـات الـمبـاهـيـر *** وأهـل بيـوت شامخـه تفرح المـار
من دون شفي وادي الأمياه وسدير *** شمالي القلته وشـرقي من الطـار
من دونهم حوران وهديب وصويـر *** بأقصى الحماد وكل ديره لهـم دار
قـطعـانهـم ترتع مـن الخـور للـديـر *** ومن شرقي الحلة ليا حد الأغوار
من ديرة الغشلة إلى التنف لضميـر *** ومـا حـده المنخـر إلى حد سنجار
* وقال الشاعر جريد بن عوض الغضوري هذه الأبيات يتوجد : 92
يـا ناشـد جـريّـد تـرى شـاب راسه *** وروابـعـــه تــوه تـبـيـّن كـنـنـهــا
وخطو الولد يمشي دروب الدناسه *** لـو هـو بضاعـة مـا يـربح ثمنهـا
مـا عـنـده الا النـقـنـقـة والخساسه *** وسط المجالس كلمتـه مـا وزنهـا
والشخـص لا بـده يـعـود لـسـاسـه *** والعـبـد فـي ممشاه يـومـر وينهـا
عـزاه يـا قـلـبـي تـزاود اعـمـاسـه *** مثـل العسيف الـلي تنـوز برسنهـا
الصبـر بـاح وزاد عـنـدي مقـاسـه *** والـروح شافـت مـا يـكـدر بـدنهـا
يـبـوني أدرس ما عـرفت الدراسه *** قـلبي دروس المدرسة صد عـنهـا
شفـاتـي الـلي مـا تـرجـك حساسه *** مـن نـوع جـمس موجـديـن ثمنهـا
تلقـا المكينـة صـافيـه تـقـل طاسه *** والـبـلـف صـافـي مـا يكتـم دخنهـا
أروح لـديـار الـطـرب والـونـاسـه *** الـديـره الـلي شـف بـالـي سـكـنهـا
* وقال عبدالله بن دهيمش بن عبار هذه الأبيات مجاراة لقصيدة الشاعر جريّد بن عوض الغضوري : 93
ما ألوم أنا جريـد ولو شاب راسـه *** شاف العلـوم اللي القلوب اتغـبنها
محـتـار من ناس تخـالف اجناسـه *** نـاس يحتـار بوصفهـا من بخـنهـا
يا القرم كب أهـل الغشم والتياسـه *** الـلي عـلى الفاضي تقضي زمنهـا
لعـب الورق ما فيه غيـر الفلاسـه *** يـا مـن تـدوّر سيحـت الـبـال منهـا
الـلي مـن البالـوت يـبي الـوناسـه *** لا ضـاق بـالـه بالمجالس حضنهـا
خطـو الولـد راحـت حياتـه خياسه *** أمـه تـحـسّـف بـالـغـذاوة لـبـنـهــا
مـا يـنـفع المثـبـور زاهـي لبـاسـه *** لـو العـوارض بالـمـراهـم دهـنـهـا
صافي الذهب ماظن يشبه انحاسه *** حيـث الجواهـر ما يبـور امعـدنهـا
ولا يستفـاد من الـردي والهلاسـه *** ومـن خالـط الجربـا يصيبه درنهـا
* وهذه الأبيات من قصيدة قالها جريد بن عوض الغضوري : 94
البارحـة مضيت أنا الليـل سهـران *** وقـلبي تهيـّض بالشقـا عـزتي لـه
قـلب العنـا حيــران والمختفي بـان *** وأصخـر القيفـان مـا هـي هـميلـه
مقـرنا بخـريص فـي غـربي العـان *** والقـلـب دايـم بـه هـمـوم تشيـلـه
شفي باللي مرباعهم صوب عرنان *** وشربت من مـر الحدج حنضليله
مقـرهـم بالـريش وأطـراف حلـوان *** ومقيضهم عـلى القـليب الطويلـه
لي عشقة يا القـرم مع نجع ويـلان *** تتلي ضعون اللي ايحمون الدبيله
* وقال عبدالله بن عبار رد على زميله جريّد بن عوض الغضوري : 95
يابن عوض كانك من الوجد هيمان *** أصبـر عسى الشدات ربك يزيلـه
أصبر ومن يستعمل الصبر ربحـان *** عسـاك تـدرك شـف بالـك حليـلـه
وأن كان شفك موقعه حول عرنـان *** أنـا شـفـاتي فـي حـدود السلـيـلـه
بيـن الدخـول وبيـن ديـرة عظامـان *** بأيمن شعيب الهيل شرق التليلـه
وش يجمع اللي صار بديار نجـران *** حتى الرسايل والخبر ما يجي لـه
نـصـبـر ومـا دبـر ولـي الـمـلأ كـان *** ولا بد ما نشاهـد عـريـب القبيلـه
* وقال جريد بن عوض الغضوري هذه الأبيات يسند على عبدالله بن دهيمش بن عبار : 96
لمحـلا وقـت الضحـى نـط مشـراف *** وآخذ براسه حول عشرة دقـايـق
وأختار حزل الشعر وأصخر القاف *** وأجـنـب الـلي منطقـه غيـر لايـق
الـوجـد شربني خبيثـات الأصناف *** ووجس بجوفي شب مثل الحرايق
على وليفي صرت يا القرم ميلاف *** عـنده سلوك القـلب راحت علايـق
يا عود ريحان على المي غـريـاف *** فـي ضـل بستـان ودونـه حـدايـق
غـرو جعـل قـلبي عـلى حد ميهاف *** قـلبي غـدا مابيـن سـارق وبـايـق
تكفـا يا أبـن عبـار دنـولي الـهـاف *** فـوقـه اثنين وثالـث الـربع سايـق
قطاعت الفرجة وراء جر الأسياف *** وعـلى الشجـاعـة آخـذيـن وثايـق
حيث أنت للمظمون فاهم وعـراف *** وافي شبـر في كـل سبع الطرايـق
* قال عبدالله بن دهيمش بن عبار رداً على جريّد بن عوض الغضوري : 97
حي الكتاب وحي من ولـف القـاف *** لـك أحـتـرام يـا فـتى الجـود فايـق
يا مرحبابـه عد من بالحـرم طـاف *** حـول المـقـام وبالركـون العتـايـق
يامن شكالي من عذيات الأوصاف *** وأبـدأ عـلـينـا قـصـتـه والحقـايـق
أن كان قلبك يا فتى الجـود ميلاف *** أمض وتـقـدم بالطلـب دون عايـق
وحنـا معـك حضار في كل ميقـاف *** لـو دون مطلوبـك أقفـول وغلايـق
نـزور واليهـا عـلى سلم الأشراف *** عـلى الشـريعـة مـا نـدور البوايـق
عليك فـي منسب بعيدين الأهـداف *** ماهم من اللي يشاورون الرفـايـق
خفـراتهـم تـأتي نزيهات واعفـاف *** مـا منهـن الـلي بـالأخـلـه تـهـايـق
ولا ترى العوبا من البيض تنعـاف *** لـو حسنهـا فتـان والهـرج شايـق
ولا بـد مـا يـأتـي للأرواح قصـاف *** المـوت مـا يـوفـر جـميع الخلايـق
* وقال جريد بن عوض يسند على عبدالله بن دهيمش بن عبار : 98
يا راكب الـلي لا مشى ولـع النـور *** ويـنـوز بـالسـواق قـبـل أشتـغـالـه
أسرع من اللي مرقبه راس عنقور *** ورقـا وحداهـا الليل تبغـي اعيالـه
ونيت هـاف إلى مشى يسبق الفـور *** سـواقـه الـلي مـا بـلش بـالـدلالـه
يلفي لأبـن عـبـار بالطـيـب مـذكـور *** قـرم إلـى عـدو رجـال الـشـكـالــه
عـطـه الرسالـة يا ظنيني ومشكـور *** وعجـل لنـا بالـرد جـب لـي بدالـه
وقـله زميلك يشتكي لـك من الجـور *** ومن لـه صديـق مثـلكـم ينشكالـه
حيثك شبيه الحـر من ماكر اصقـور *** مثـل الجمـل لا حـده الحمل شالـه
أرجوك ترسل لي نصيحة بها شور *** تـرى زمـيـلـك دوم مـشـدوه بـالـه
أرسلت لك خط به رمـوز وأسطـور *** متهيّض من يـوم جـتني الرسالـه
أرسل لك المكتوب لو دونك ابحـور *** والقلب من وجـدي كلا الهم حالـه
* وقال عبدالله بن دهيمش بن عبار رداً على جريّد بن عوض : 99
يا راكب اللي ما وضع فوقه الكـور *** ولا شـد بالمـركـب منايـن احبـالـه
ونيـت مـن ركبـه مكيـّف ومسـرور *** إلـى مشى يوصـل طـريـق عنـالـه
يحـمـل قـوافـي كنهـا الـدر مـنـثـور *** من قـاف ابن عبـار ما هي عتالـه
سلام يهدى مع شـذا الـورد بالبـور *** مـثـل النـفـل منبـوت قـفـر الحيالـه
يهـدى عـلى اللي بالملازيم ممرور *** أبن عوض بالطيـب بانـت افعـالـه
عسـاه عـن كـل المعـاييـب مسـتـور *** وأطلب ولي الكون يستـر خمالـه
عسى الولي ياقـاه عـن كـل عاثـور *** ويحميه رب العـرش عـز الجلالـه
وأن كان يا جريّـد تبي مني الشـور *** أحذر من دروب الغـوى والضلاله
وأياك لا تصاحب من الناس مثبور *** ولا ترافق الخايب ضعيف الزمالـه
وأصبـر ولا بــد الــيـالـي لـهـا دور *** وأفطن تـرى دنياك مثـل المحـالـه
العـلـم يـودع خـامـل الـذكـر دكتـور *** والمـال خـلا الـلاش يفخـر ابمالـه
* قال عبدالله بن دهيمش بن عبار يسند على جريّد بن عوض الغضوري : 100
يا راكب الـلي سافـر الفجر طـّراش *** يفـوق لمحـات البصـر بالـرماشـه
يحمل بديع القاف من منبع الطاش *** لأبن عـوض مهديه قصدي نقاشه
قـلـه زميلـك يشتكي كـثـر الأبـلاش *** مقصـود شفـه فـاز فيهـا عـكاشـه
من ظيم بقعا يا فتى الجود منـداش *** والمرجلـة مـا كـل مـن جـد حاشـه
واللي يدور الهـون للعـز ما حـاش *** العـز والطـولات صـارت اغـباشـه
الله يخـون المـال يـرفع بـه الـلاش *** من كثر مالـه بالعـرب صار باشـه
نسعى نبي من وافـر الـزاد نعتـاش *** وكلـن من المخلوق يـطرد معاشـه
ونعـوذ بالرحمن من كـلمـة الـواش *** الـلي جموع الربع يرغب طشاشه
* وقال الشاعر جريد بن عوض الغضوري رداً على عبدالله بن دهيمش بن عبار : 101
يا الله يا اللي تنبت العشب برشاش *** ورازق طيور ساكنه في عشاشـه
تفـرج لمن قـلبـه من الهـم يجتـاش *** قـلبـه حزيـن وحـّرق الهـم جاشـه
يـا الـبـاركـر خـلـك للأمـثـال نقـّاش *** البـال ضاق وجوهـر الفكـر ناشـه
أعجل بـرد القاف من قبل الأغباش *** أكـتـب وهـزلات الـمـثـايـل تلاشـه
وده لـقـرم بـالـمـسـايـيـر بـشـــّاش *** اللي بنا حرف الرساله عـلى آشـه
يا مسندي حـذراك من كـل غشـاش *** عظم الهلامة ما لقي بـه عـراشـه
أعنز على اللي يوم الأشناب كلاش *** إلى زعل يشفي الضمير ابمهاشـه
يالقـرم قلبي صايبه خف وأخـراش *** خطراً على الهيمان يطوي فراشه
ما ينعذل قلب على الشوق عطـاش *** يضرب كما التيـار والماص ناشـه
أقفـوا بهـا بـدواً يقـودون الأدبـاش *** يـتـلـون بــراقٍ تـنـثــر أرشــاشــه
بارض بها ريح النفـل ينعش نعاش *** تنثـر بـهـا بـرق الحبـاري رياشـه
* وقال عبدالله بن دهيمش بن عبار يسند على جريد بن عوض : 102
يـا راكـب الـلي كـنهـا روج ميـراج *** وـنيـت هـاف وصمموها ابـاريـس
ونـيـت هـاف ولا يـشـبـه لــلأدواج *** إلى مشى يسبق هبـوب النسانيس
جـديـد مـثـلـه بـالـمـديـلات مـا داج *** عـوايـده قـطـع الـديـار المـراميس
يـنـوز بالبـيـدا لـو الـدرب بـطـنـاج *** بطـل الصحاري ما تعثره تغـاريس
يـمـد مـن نـجـران لـلــقـاع بـــواج *** يفوج عسرات العـروق الطعاميس
ويمـر من غـرب السليـل والأفـلاج *** ليـل ونهـار يقـيس الـدرب تقيـيس
سافـر سـريع لهضبة العـان نهـاج *** يلفي على الـلي يدركون النواميس
وصل كتابي ريف من جاه محتـاج *** أبن عوض شوفه يزيل الهواجيس
وقـله زميلك عـلتـه مـالـهـا عـلاج *** متحـيـّر وقـلـت عـلـيـه الـتـوانيـس
هـام وبـلاه اللي ثمانـه كمـا العـاج *** عوده طري مع زمة العمر ماديس
عـاقـل ولا هـو معشـرانـي وغنـاج *** البيض غيـره كـل أبوهن حماليس
* قال جريّد بن عوض هذه الأبيات رداً على عبدالله بن عبار : 103
يا راكب اللي ما وضع تحتها صاج *** مركابها يجـلي جميع الحـواسيس
عـلـيـهـا غـلام مـا تـونـى بـالأدلاج *** عباها بالممتاز من شيشة إدريس
تلـفي عـلى الـلي للخصيمين فـلاج *** شره على اللي ما تعوذ من إبليس
لا جيـت أبن عـبـار يلقـاك بحجـاج *** بشوش ما هـو من وجيـه معابيس
ولا الـردي لـو هـو تـلبس بـديبـاج *** ماله عمل كـود الـردى والدنافيس
اللاش مالـه مع هـل الجـود منتـاج *** يجمع عـليك الهـم هرجـه تناكيس
يا مسندي نومي على العين ما لاج *** واهموم قلبي مسملات ومراميس
قلبي على شوف النشاما به خلاج *** عـليهـم عـروق الضمايـر ميابيس
أقـولـهـا مـا هـي حكـاوي ولجـلاج *** ولاني من اللي زلخهم بالمجاليس
وصـلاة ربـي عـد مـا حـج حـجـاج *** عـلى النبي اعـداد ما شدوا العيس
* وقال جريّد بن عوض يسند على عبدالله بن دهيمش بن عبار : 104
مـضى عـلـينـا يـالمعـنى قـدر حـول *** ولا جـت رسالـه يا بعـيـد المشافـه
أن جاني خطك عن ثمانين مرسول *** مشتـاق للمكـتـوب عـجـل ازرافـه
يا مسندي أسمح خطايه وأبي أقول *** قـول تـمـام ولا ذكـر بـه لـقـافــــه
أسمـع كلام الـلي عـرف كـل دالـول *** جـرب تقـاليب الـزمـن وأنحـرافـه
من شاعر ماهو من الناس مجهول *** يكفيـك عـن عـرفـه كلامـه وقافـه
أجـزم على ما تريد والرزق مكفول *** الـرزق عنـد الـلي وسـاع طـرافـه
الـلاش لا يعجبـك بالنـظـر والطـول *** يـده عـن الطولـه قصيرت مسافـه
تـراه لـو يعجبـك في نظـرة الـزول *** دايـم قـبـيـلـه مـا عـلـيـه المخـافـه
لا شفـت زولـه نـاعـم تـقـل بهلـول *** من النـوم والدلهه وكثـر المـرافـه
متريّح ويفطر على الخبـز والفـول *** ولا هو على الطولات راعي كلافه
* قال عبدالله بن دهيمش بن عبار رداً على جريد بن عوض الغضوري : 105
سجلت مردود القوافي عـلى طـول *** رد الـزمـيـل الـلي بـعـيـده أهـدافـه
يابن عوض كثر الجفا غيـر مقبول *** لـكـن حـدانـي عـنـك بعـد المسافـه
احسنت بالمنطوق يا صادق القول *** مظمـون هـرجـك ينّشر بالصحافـه
الطـول مـا يرفـع هلابـيج وأخبـول *** أيـضـاً ولا ضـر الشجـاع النحـافـه
ما كـل سيف مشذر الحـد مصقـول *** ولا كـل ضخـم من الخلايـق تخافـه
كبـر الهياكـل مع خـراتيت وأفيـول *** والجسـم ما فـاد الجمـل والـزرافـه
والناس يا جريّد لها الباب وعقول *** والـكـل مـنـهـم يـدعـي بـالـثـقـافــه
من لا يحوزالمال والضان والشول *** يـمـد رجـلـه قــد طــارف لـحـافــه
يا الله يا منـزل من المـزن هملـول *** يا رب يا مغيث الثـرى عـن جفافـه
تلطف بحال للي من الوجد منحول *** عـده عـلى جـمـرٍ تلاهـث أرضـافـه
النـاس تسمـر بـيـن دحـه ومفتـول *** وأنـا لـذيـذ الـنـوم عـيـنـي تـعـافــه
صاد الضمير من الغنادير مجمـول *** اللي سوات الورس حمرة اشفافـه
الـلي ثـليلـه فـوق الأمتـان مجـدول *** قـربـه مـنـاتـي وأبـتعـاده حسـافـه
* وهذه القصيدة الألفية المربعة قالها الشاعر جريّد بن عوض عندما توقف زميله عبدالله بن
دهيمش بن عبار عن المراسلة بسبب ظروف العمل فأرسل له هذه الألفية ولم يسبق نشرها : 106
الألف أولف بالمثـل وأشـرب اللـف *** والـلي يـراسلـني بـالأمـثـال وقّـف
وأنـا خـبــره مـن ردنـا مـا تـكـلـف *** ومعـه على طرق المثـايـل شهـاده
والبـاء بنيت من المثايـل طواريـق *** مـن مبهمـات بالضمـايـر مغـالـيـق
نبي انتسلا بالمثـايـل عـن الضيـق *** هـات الـقـلـم والبـوك نـكتـب أفـاده
والتـاء تـراني عقبكم يا أبـن عبـار *** دايـم عـلى كثـر الهواجيس صبـار
يا ليـت تـدري عقبكـم بالـذي صـار *** عـدي مريض ولا حصل له عياده
والثـاء ثـلاث شهـور أديـر الفكايـر *** وأقـول أبـن عـبـار عـني مـخـايـر
وأنـا مـعـه فـي كـل قـاف امـسـايـر *** وقـف مـكـاتـيـبـه ولا هـي بـعــاده
والجيم جبت من البحور الغزيـرات *** من جوهـر الأفكار نظمت الأبيـات
القيل من صدري كما سيل موجـات *** قـافـي بـديـتـه حيـث لـي بـه أرداه
والحـاء حـل القـيـل يـحـتـاج حـلال *** حـيث الجمل يصبر وللحمل شيـال
ومن يدحم الهيات يوم أشهب اللال *** عـز الـلـه أنـه يـسـتـحـق القـيـاده
والخاء خلا عـنـدي عـذابي وخـيّـم *** وعـزي لمـن هـمـه بصـدره تـلـيـّم
والـحـظ كـان أنـي بـغـيـتـه امـكـيـّم *** هـذي اعـقوبـه جـاه ذنـب وصـاده
والـدال ديـانـي عـلامــه عــلــيــــه *** مـا عـاد يرسـل لـي بـزرف هـديـه
وأنـا عـمـيـلـه دامـت النـفس حـيـه *** ودي يـجـاهـدني وشـفـي اجـهـاده
والـذال ذل أبهـا الشياطين تـذهــب *** وعيون من عاداك ندخل بها شـب
وعـدوكـم نـرمـيـه فـي نـار تـشتـب *** حـتى يـتـوب ويـعـتـنـي بـالعـبـاده
والـراء رميت الهـم والحـزن عـني *** من يوم جاء تقريب عشرين سني
طـرايـق أهـل الـرمـز مـا يجهـلـنـي *** حـراً يـلـوف الـصيـد بـأول هـداده
والـزاي زمـت وقـام عـزمي يــقـزا *** مـع الخطـوط الـطـايلات اجـرهـزا
ولا الـردي مـذمـوم مـا مـنـه عــزا *** بـس ايتـقـلـب مثـل ضـب الحمـاده
والسيـن ساسي كالجبـال الـرواسي *** أصنع صليب الراي من قـو باسي
وأشوف أبن عـبـار يا نـاس نـاسي *** لا طـالـت الـمــدة يـقـل أجـتـهــاده
والشيـن شـي خـابـريـنـه ومفهـوم *** وأبن عوض يا ناس ماهو بمليوم
شـاف الفكايـر والتعاجيب فـي يـوم *** يوطـأ بـرجلـه فـوق شوك الكـداده
والصاد صد الخصم وخـلا خصيمـه *** حـرام واللـه يا عـرب ذي ظليمـه
تسمعـوا يا أهـل العـقـول الفهـيـمـه *** الــنــار نـــار وتــالـيـتـهــا رمـاده
والـضـاد ضـدي لازم أنـي أضــــده *** وعـلـى مـهـايـيـف الـمـنـايـا أحـده
والــدرب قــدامــه لــزوم نـــســـده *** حتى ايتشفق ما مضى مـن قـعـاده
والطـاء طبعـي ما أطـيع الشرابيـك *** أصبر عليه يا عميلي وأنا أرضيك
أنـا عـدو الـلي بـحـقـده أيـعــاديــك *** لـو كـان نار الحـرب يقـدح أزنـاده
والظـاء ظهـر نجـم عـليـه وغـابـي *** وأنكف ما بين السماء والسحابـي
وأنـا مـعـي ضـده وهـو مـا درابــي *** سطح القمـر لي منزل في أشـداده
والعـيـن عيـت تـقـبـل النـوم عـيني *** وأجـاذب الـونـات قـلـبـي حـزينـي
واخطوط ابـن عـبـار عيـت تجينـي *** عسى المطر يسقي غرايس بـلاده
والغيـن غـابـن النجـوم المهـاديـف *** أشكي لك الأحوال يامكرم الضيف
أشـوف لـي بالوقـت هـذا تصانيـف *** يـا طـارح الشـارة بـرمي الـركـاده
والفـاء فهيـم القـلب يـدري بـحـالي *** حـالـي هـفـت يـا نـاس وعـزتالـي
أفـرح اليـامـن القـمـر جـاء هـلالـي *** وأخـذت مـن فـوق العلامـة زيـاده
والـقـاف قـرت بالـقـرار المـيـازيـن *** وأنا معيي ما أقبل الشور هالحين
وعليك يا راعـي المكاتيب عاصيـن *** ولـو تـبـي مـثـقــال حـبـة رشــاده
والـكـاف كـفـيـت الـمـكـاتـيـب عـنـا *** وضح لـنـا وش السبب يـا المعـنـا
يا طيـب المعـروف وش جـاك مـنـا *** الـزرع جـاد ومـسـتـعـد بحـصـاده
والـلام لميـت الشقـا فـي ضلـوعـي *** وقـلبي من الوجلا خطير يـزوعـي
زادن همـوم القـلب من كـل نوعـي *** عـدي سـجـيـن مـقـيـد فـي احـداده
والميم مـاج القـلب مـوج المقـامـي *** كـل ما ذكـرت خميسة والحـزامـي
وامشـوك يشـظى صليب العـظـامي *** والــلـي يـعــاديــنــا نــدوّر نـكـاده
النون نويت أقطع ولا أبي القطاعه *** حيـث المعنى من خيـار الجمـاعـه
أهل الوفا والطيب وأهـل الشجاعـه *** وقصيرهـم يمشي بطـول أمـتـداده
والـواو والـلـه مـا مقـامي امخـليـه *** اليـا بـار في زين التنافيق راعـيـه
قـافـي عـلى سـاس طـوال مـبـانيـه *** مـاني مـثـل ثـور بـوسـط الـثمـاده
والهـاء هموم القـلب قامت تلـوفـه *** من جـور وقـت كـاثـرات اصدوفـه
فـيـه الـردي متسـاويـات اصفـوفـه *** يـضـحـك زمـانـه دب الأيـام عـاده
والـيـاء يـا الـلـه بالحيـاه السعـيـده *** وعصـر الرخـا طالبك ياالله تعـيـده
حـتـى نحـصـل كـل مـطـلـب نـريـده *** وكـلـن عـلى كـيـفـه ويتبع أمـراده
* وقال عبدالله بن دهيمش بن عبار هذه القصيدة الألفية رداً على الشاعر جريّد بن عوض : 107
الألـف ألـفـيـن مـرحـبـا بـالـمـزرف *** أنــا عـلـى رد الـجــواب أتـشـرف
والقيـل من صدري نقيتـه مصـرف *** مـن جـم فيضه مـا حصينا أعـداده
والبـاء بديـت أدقـق القـاف تـدقيـق *** من خـوف لا تنقد عليه المخاليـق
وإلى نظمت القاف بالحال ما يعيـق *** مـن قيـل أبن عـبـار عـبّـر افـواده
الـتـاء تـرى رديـت لـك رد الأشعـار *** دونك مرد القيل يا وافي الأشبـار
منظوم ابن عبار يحضر به أحضار *** مـيـراث جـده وارثـه عـن أجـداده
والثـاء ثمـرت القيل بـوح السرايـر *** وهـرج فقـد معـنـاه يذهب خسايـر
يا أبـو عوض ماني عليكـم مخـايـر *** وكلن يقول القـول حسب اعتقـاده
والجيـم جـاني مـن قبلكـم جوابـات *** وأهـديـت لـك ردي سلام وتحـيـات
وعبرت من مكنون فكري عبـارات *** ومن حاد عن خصمه يعده شراده
والحـاء حيـرني جـوابـك والأمثـال *** دنياك هـذي يا فتى الجـود غـربـال
لا تامـن الـدنيـا تـرى الوقـت ميّـال *** عسى الـولي يكفيـك شـر أضتهاده
والخـاء خـل الـقـول مـعـنــاه قـيـّـم *** وأفطـن تـرى وقـت المغـره ايهيّـم
وأنـا عــلى خـلـي كــذلــك مـتـيّـــم *** وعـزي لحـالي كـان طـال ابـتعـاده
والــدال ديــانـك دهـتــه الــدهــيــه *** شاف الجفا من غيـر ذنـب وجنيـه
يـوقف معـك بالضيق لو جتك سيه *** وإلـى حـداك الـظـيـم أنـخـه ونـاده
والذال ذم اللي عمل صوج وأذنـب *** وأن كان مخطي كل عـله لها طـب
ولا عـمـيـلـك مـا تـمــادا ولا ســب *** من صغر سنه ما ذكـر بـه اعـراده
والـراء روم الـمـجـد مـابـه تـونـي *** ودنـيـاك هـذي مـا تـجـي بـالتـمني
راعي المنـا مـا فـاد غـيـر الهـبني *** والشخص ما بين السعـد والقـراده
والــزاي زمــانــك لـلأجــواد خــزّا *** وكـم واحـداً يا الـقـرم قـام ايـتـلـزا
والـقـلـب مـا بـيـن المعـالـيـق فـّـزا *** كـمـا يـفـز الـلـي عـثـر بـه جـواده
والسين سمج الهـرج مالـه مقاسي *** والـلي يعاند يا فتى الجـود خاسي
جـاوب وأنا لـك كـني الحيـد راسـي *** والمـرجلـة تحـتـاج عـزم وجـلاده
والشين شين الهرج به غم وهموم *** ولا يفلح الـلي حـط بالناس مثلـوم
فاتن ثمان اشهـور والتـاسع التـوم *** والعـاشـر الحـالي عـلـينـا جـمـاده
والصـاد صـدتنا الضروف العظيمه *** يـا مـا رديـنـا للخـطـوط الـقـديـمـه
وأن جاني خطك لـه مكانـه وقـيمـه *** عـجـل بـرد القـاف وأبـي الـزيـاده
والضـاد ضـديـدي هـجـومـه أصـده *** جـمعـت لـه يـا الـقـرم قـوه وعـده
ومـن يعتدي يا مسندي خـاب سـده *** والـلي يجـاهـدنـا نـويـنـا أجـهـاده
والطاء طالب سامك العرش ينجيك *** يا اللي على العدوان طالت أياديـك
أنـت الـذي يا القرم ما فيك تشكيـك *** ولا كل من صادق وفاء في اوداده
والظاء ظرفي حـال دون الجـوابي *** ولا خير باللي من خصيمه يهـابي
ومـن بـاد حيلـه مـا يـنـط الـروابـي *** رقي الحزوم ايريـد عـزم وجـلاده
والعـيـن عـاتـب بالرضى يا ظنيـني *** جنب غـثيث الهرج وأمش بيقيني
جـاك الجـواب مسجـلـه فـي يمينـي *** مـا فيـه ظـلم ولا حكي بـه اربـاده
والغـين غـرات الملأ كشفها حـيـف *** الصدق أخير من العلوم العجاريف
دنياك ما ظني تجي لك على الكيـف *** ما وفرت من نقوة الغـوش سـاده
والفـاء فهـمـت أقـوالـكم والمثـالـي *** وأنـا عـويـن الـلي بظيمـه شكالـي
كـان أنـهـا بالـمـال مـا أكـن مـالـي *** وعندي على قولي لك الله شهـاده
والقـاف قـافـك يالسنـافـي نيـاشيـن *** حيثـك فهيـم ولا تخفـاك القـوانيـن
وأن كان حنا يا فتى الجود مخطين *** أرجـوك عطني عن خطاي الأفـاده
والكـاف كـل اخـطـوطـكـم يـوصلنـا *** والــلـي لـفــنـا بـردهـن مـا اتـونـا
لا شـك كـان أن الـعــلـوم أزعـلـنــا *** فكـري عـن الهزلات يلـزم احيـاده
واللام لمني كان أهملت الرجوعـي *** وأنا بهـرج الحـق ماني جـزوعـي
وأظـن بعض الهرج مالـه اسنوعي *** مــا قـــل دل ولا تــفــيـد الـنـكـاده
والـمـيـم مـنـي جـاك رد الـسـلامـي *** مـرسـول مع تحـيـتي وأحتـرامـي
يا أبن عـوض افهـم معـاني كلامـي *** الـسيـف مـا يـحـمـل بـلـيـا جـنـاده
والنـون نبـدي فـي مـردك بسـاعـه *** فيـض الـروابع قـال سمع وطاعـه
ومن كال لي بالصاع رديت صاعـه *** ومن يدعيني ديـن عـنـدي سـداده
والواو واجـب صاحب القـدر نديـه *** وهرج الخطأ والعيب ماحب طاريه
منظوم لفض القـاف نفهـم معـانيـه *** والخـصم ما نـقبـل تمـادي عـنـاده
والهـاء هـذا القيـل نرسـل أزروفـه *** أفـهـم مـواضيعـه وميـّز احـروفـه
قـلـتـه ونظـم الـقـاف مـابـه كلوفـه *** حيث أن بدعه يا فتى الجـود عـاده
والـيـاء يـمـك مـرسـليـن الجـريـده *** سجلت لك يا القرم صفحة جـديـده
نهديـك يا راعـي الخصال الحميـده *** قـافـي تـمـيـز جـمـلـتـه مـن أحـاده
يتبع