تابع
* هذه القصيدة بسمو الأمير فيصل بن فهد بن عبدالعزيز الرئيس العام لرعاية
الشباب رحمه الله شعر عبدالله بن دهيمش بن عبار: 44
مـطـلع كـلامـي بـالـولي والـبـدايــه *** رب الـمــلأ مـنـزل هــمـالـيـل نــوه
الـلـه يـديـم الـلـي لـوطـنـا حــمـايـه *** انـصـار شـرع الـلـه وللـديـن قـوه
قـوة يـقــيـن وتـابـعـيـن الـهــدايـــه *** يـمشون في تـوجيه هـدي النـبـوه
ضـد العنيـد الـلي مـن البغـي تـايـه *** عـوق الـلـدود أن كان هـام وتـنـوه
سـقـم الحـريـب وللمعـاديـن سـايـه *** كـعـام المـعـانـد كـل مـا ازداد سـوه
وأشكر مقام الـلي يروس الـرعايـه *** فيصل عريب الساس مرهب عّدوه
شبل الفهد ينجب عـلى خيـر غـايـه *** مقدم شباب الجيـل واهـــل الفـتـّوه
الفيصـل أولـى بالـمـواهـب عـنـايـه *** نـال الفـخـر والمجـد حـازه سمـوه
حـيـثـه رفـع لـلـعـز والـمـجـد رايـه *** ساس الشهـامـة والفخـر والمـروه
أسـس وشـيـّد لـلـثـقــافــه بــنـايــه *** بـدر الـدجـى زال الديـاجـي بـضـوه
ونمـى مواهب كـل مـن لـه هـوايـه *** وايـشجـع الـنـاشـي بالأ فـكـار تـوه
ويسند عـلى شغموم فـيـه الكفـايـه *** محـمـد الـشـدي عــريـب الـسـمـوه
يمـشي بـتـوجـيـهـه وعـنـده درايـه *** الـخـالـدي عــنـده وقــار ومـخــوه
الـنـادر الـلـي بـالـفـخـر لـه فـوايـه *** مبـطـي بـجـزلات الـمـعـانـي تـفـوه
* وهذه القصيدة بصاحب السمو الملكي الأمير الوليد بن طلال بن عبدالعزيز
آل سعود حفظه الله شعـر عبدالله بن دهيمش بن عبار : 45
بـديـت بـالـلي مـا لـغـيـره تـوسلـت *** رب الـمـلأ مـن مـد جـوده سـألـتــه
باسمه بديت انظم جوابي ولا عـلت *** وعن الزلل صنت اللسان وعـذلتـه
نقحـت منظـوم القرايض وغـربلـت *** والقـاف عـن كل الشوايـب نخـلتـه
اعـرض مجـال وبالمعـاني تـمثـلـت *** والشعـر من صافي قريحـه نهلـتـه
سمـرت مع بـدع البيـوت وتعـلـلـت *** ونظمت قافـي من ضميري وقـلتـه
قلتـه فخـر باهـل الفخـر ما تغـزلـت *** جنبت عـن شعـر الغـزل واعتزلتـه
كتبت من فيض المشاعـر وسجلـت *** نفح العواطف عبـر شعـري نقـلتـه
ذكرت مجد اهـل المفاخـر وحاولـت *** اكتب عـن الـلي فعلهـم مـا جهـلتـه
فعل الوليد اكبر من المدح اللي قلت *** اعـتـز في مدحـه ولـو مـا وصلتـه
ما ادرك التوصيف مهما استرسلت *** لـكـن عـن التطويـل قـولي جملـتـه
قـلـت الصحيح ولا بهـرجي تخيّلـت *** والـلي ذكـرتـه فاهـمـه ما ارتجلتـه
يا أبن طلال الجود يقبل إلـى اقبلـت *** وينـزل معـك فـي كـل موقع نزلتـه
ويصحبك في ممشاك كل ما تجولت *** ويدخـل معـك في كـل بـاب دخـلتـه
ويميل ميزان الصخى حيث ما ملت *** هـو الخـلـيـل الـلي قـبـلـك وقـبلـتـه
أنـت الـذي يـامـيـر لـلـطـايـلـه نلـت *** والجود في صدرك وسـامه حملتـه
سـرت وعـلى رب الخلايـق توكلـت *** واسـم الـكـرم ملـيـون مـره دبلـتـه
تـممـت عسـرات المـراجـل وكملـت *** وشـبـهـت لـلـهـداج لـكـن نـفـلـتــه
تجـود حتى لصاحب الجـود خجلـت *** والـلي يـبي تـقـليـد فعـلـك فـشلـتـه
عجبـت من زايـد صخـاك وتهـولـت *** ومـن شاف مـدك للهواشـل هبلتـه
زهـدت بـالـدنـيـا ولـلـمــال ذلــلـــت *** وقاومت شح النفس حتى اعتقلتـه
تـبي الـثـواب لـغـالـي المـال سبلـت *** وفقـر الفقارى بسيف جودك قتلته
يـا مـن بمصـروف اليتـامـا تزهلـت *** ومـن يفـقـد العـايـل بمالـك كفـلـتـه
عـن العـلـوم الغـانمـه مـا تـكاسلـت *** وغرس الكرم في كل موقع شتلتـه
يا ما عطيت من المحاويج واجزلت *** ولـو شاف حاتـم مـد يمناك هـلـتـه
يا ما على اصحاب المغارم تفضلت *** وكـم غـارمٍ معسـر بعطفـك شملتـه
تمـد مـن جـزل الـوهايـب ولا زلـت *** والبـاب دون المحـتـري مـا قـفلتـه
حيثك مشيت بواجباتك ولا اهـملـت *** ومن جاك يطلب فزعتك ما خـذلتـه
وإلـى دعـتـك المـوجبـه مـا تمهلـت *** ومن مال وقته واشتكى لك عدلتـه
والعـاني المحتـاج لـه مـا تجـاهلـت *** والضيف والجـار المـوالي حفـلتـه
والـمـن مـا تـطـريـه مهمـا تجملـت *** وتنسى الجميل اللي بغيرك عملتـه
يامـيـر لـو شـان الـزمن مـا تبدلـت *** جهـدك عـلى فعـل الحسـاني بذلتـه
شلـت الحـمـول الكايـده مـا تملـلـت *** كـم واحـدٍ حـمـلـه بـرك بـه وشلتـه
عـن رقي مشموخ العلا ما تنازلـت *** ومجدك على صرح العوالي شهلته
ولا هـو غريب من المكارم توهلـت *** الطيب مبـطي وارثـه مـا انـتحـلتـه
جـدك وابـوك إلى ذكـر فعلهم طلـت *** والمنـهـج الـلي يـفعـلـونه فـعـلـتـه
وخالـك بفعـله تفـتخـر كـان جادلـت *** مجـدك عـلى بـرج الـثـريـا جعـلتـه
يـامـيـر مـن كـل الفـضايـل تمـولـت *** وطبعك عـلى كسب النفايـل جبلتـه
الـمــال بــددتــه وللأ جـر حـصـلـت *** بالبـذل والإحسـان وقـتـك شغـلـتـه
بـالـقـاف عـديـت الثنـاء مـا تحيلـت *** ما قـلـت زور ولا بـمـدحي ختـلتـه
وصلوا على اللي تذكره كـان هللـت *** الـلي هـدا الأمـه وهـي قبـل فـلـتـه
* وهذه القصيدة بسمو الأمير سلطان بن سلمان رائد الفضاء شعر عبدالله بن عبار : 46
عاش المليك اللي عـلى عـزنـا قـام *** يـتعــب عـلى كـل العـلـوم النفـيـعـه
فعل الفهد يصعب على كتب الأقـلام *** الـلـه يـقـاه مـن الشـرور الشنيعـه
وروادنـا فخـر العـروبــة والإسـلام *** يـبقـا فخـرهـم للعـروبـة جـمـيـعـه
من دار صنعاء للجزاير إلـى الشام *** الـكـل يـفـخـر بـالـهـداف الـرفـيـعـه
يشمل فخرهـم كـل مـن عـقبه سـام *** مـا تفـتخـر بـه بس مضـر وربيعـه
سلطان مجده عاد بـه مجـد بسطام *** ذيـقـار تشهـد لـه هـذيـك الـوقـيعـه
والـرائـد الثـانـي مـن احـفـاد بسـّام *** مـن عصر الأحنف فعلهم بالطليعـه
صـوارم المجـنـا عـزيزيـن واكـرام *** الـلي لهـم فـعــل المـكـارم طـبـيعـه
سلطان بن سلمـان من نسـل حكـام *** ساس الملـوك مقـوميـن الشـريعـه
لابـة هـل العوجاء مشاهير واعلام *** سـلايـل الـلـي مجـدنـا مـن صـنيعـه
عبدالعزيز الـلي عن المجـد ما نـام *** لـه اخـضعـت كـل القبايـل مـطـيعـه
سـاد البـلاد وقـّوم الـشـرع بحسـام *** ولا جامل اصحاب الدجل والخديعه
دانت وطاعت له على كيف مـا رام *** حـتى غدت بـوب المرازق وسيعـه
مـن عـقـب مـا كنـا حفـاة بـالأقــدام *** حـفـا وجـفـا والأم تـذهـل رضـيعـه
اليـوم صرنا بخيـر من كثـر الأنعـام *** عصر الرخـاء اريـف علينا ربيعـه
تحـقـقـت فـي عهـدهـم كـل الأحـلام *** وبجـهـودهـم مطلـوبـنـا نستـطيعـه
نصعـد عـلى الأمجاد عـامٍ بثـر عـام *** واملـوكـنا مثـل الحصـون المنيعـه
سـاروا بـنـا الأبـطـال لـلـمـجـد قـدام *** لـدرب المفاخر والدروب السـنيعه
حـتى بـدأ غـزو الكـواكـب والأجـرام *** وعلـم الفخـر كـل الوسايـل يذيعـه
صــديــقــنــا يــفــرح إذا عــزنـا دام *** وعـدونـا غـلـبٍ عـلـيـه وفـجـيعـه
وصلـوا على هادي الخلايق والآنـام *** المصطـفى نـبـي العـبـاد وشفيعـه
* وهذه القصيدة بسمو الأمير محمد بن سعود الكبير ( شقران ) رحمه الله قالها عبدالله بن دهيمش بن عبار العنزي : 47
الحـر الأشقـر بـان لي مـثـل حليـاه *** الوصـف وصفـه والشقـار بشقـاره
ما تاه من باسمه عـلى الحر سمّـاه *** شقـران عـوق الـلي براسـه نعـاره
شقران حر الصيد بالوصف يشـداه *** لا شـك فـعــلـه يـفـرقـه بـالشطـاره
كان اعتلا صفراء عـزوم امضـراه *** حامي الوغى يخوض غبت اغماره
لا صـار لـقـروم الـنـشامـا منـاخـاه *** وتكاضمـوا بالكـون مـثـل السعـاره
كـم فارس عـند اللقاء شـال عـلبـاه *** إلـى هاجـت الهيجاء وكتـم اغبـاره
إلـى هـجـم يـرهـب عـدوه بـشلـفـاه *** من ناطحـه راحـت حيـاتـه خسـاره
كـم فـارس عـقـب الزعانيـف خـلاه *** يرجع لرشده عـقب جـرع المـراره
فـي مـا مضى تذكـر مفاعيـل يمنـاه *** ضـد الـعـدا لا صـار بالـنـزل غـاره
الـبـاسـل الـلي مـا تسـوى سـوايـاه *** بالقول نسمع عـن سوابـق اخبـاره
بالمرجـله ينـدر مع النـاس شـرواه *** ومن نـال عـلم الطيب يكبـر وقـاره
لا جيب طاري الطيب نفخر بطريـاه *** حـاش المكارم والفخـر في جـداره
زبـن الدخيل وريـف مـن لاذ بحمـاه *** سقـم الحريب وعـز ضيفه وجـاره
ساس النـقـا ربـه عـن العيب عـذاه *** الجـود سلـمـه والـمـكـارم اشعـاره
من صكتـه بقعـا عـن الظيـم ينصـاه *** هو الـذي تـذري عـن الشوب داره
أعـني محـمـد عـالي الـقـدر والجـاه *** فيه الصخى والمرجلـه والجسـاره
مـهمـا بجـزلات القصـايـد مـدحـنـاه *** الـقـاف بـمـحـمـد يـزود افــتـخـاره
امـدح جـنـابـه والـتـمـاجيـد تـزهـاه *** ولا لـي مقاصـد يـوم قـلت العبـاره
والهرج مـا يلفظ عـلى غـير معنـاه *** ولا قـلت مدحـي بـه نفـاق وقمـاره
* وهذه القصيدة بسمو الأمير عبدالرحمن بن عبدالله بن عبدالرحمن آل سعود
شعر عبدالله بن دهيمش بن عبار العنزي: 48
يـامـيـر فعـلـك بالمخاليـق مشهـود *** ويحـق فـي تمجيـدكـم يـنظـم القيـل
ياميـر ابـي امجدك والقـول ماكـود *** ويشهد على ماقول صدق المفاعيل
بالجـود يـذكـر مـد يـمنـاك بالجـود *** مـالـه شـدي لـكـود غيـث الهمـاليـل
الحاضر اللي شيف بالعين ماجـود *** ويشهد بماضي عصركم قّرح الخيل
مجدٍ تسلسل من ربيعة إلى سعـود *** مجد الفخر موروث جيـل بثـر جيـل
متسلسلٍ مـن سـاس والـد لمولـود *** حلحيل ينجب من صماصيم حلحيـل
سـلايـل الـلـي نـافـليـن وبـهـم زود *** صفـوة حمايـل بالـدياجـي مشاعيـل
مثـل الحيـود الشامخه وأنتم حيـود *** شـم الـرواسـي مـا يـهــده زلازيــل
دولة هـل العوجا كما شامخ الطـود *** طـود الشوامخ ينطح الهول ويهيل
والـسنـة الـغـرّاء رفعـتـم لهـا بنـود *** سرتوا بها وزلتوا جميع الأبـاطيـل
والى من شنعات الليالي غدن سـود *** عـاداتكـم حـل العـقـود المعـاضيـل
أنتـم ذخـر مـن حـده الظيم مضهـود *** يا ذخـر باللزمات من ضَدّه الشيـل
ومن تاه ما حوله من الناس ما حود *** ينظـر إمام ويقتدي فيك يا سهيـل
عنيت لـك ما قصدي الكسب والفـود *** ولا اريـد بـلـغـه لا وخلاق جبريـل
لاشـك لـي عنـدك لـوازم ومـقـصـود *** حيثك من اللي يعتقون الرجاجيـل
نـاصيـك بالـلي دونـه الـبـاب مـردود *** افـزع بجاهك يا زبـون المداخيـل
أعطف على الـلي كنهـا ناحـل العـود *** تندب ولدهـا كـل مـا جرهـد الليـل
دلـت تنـوح ولا بـقـا لصبرهـا حـدود *** عـلى جنين فـوادها تزعجـه ويـل
يـاحيـف كـانـه جيـب يـامـيـر مقيـود *** دون الشرف والحر ما يقبل الميل
* وهذه القصيدة ايضاً بسمو الأمير عبدالرحمن بن عبدالله بن عبدالرحمن
آل سعود قالها عبدالله بن دهيمش بن عبار العنزي : 49
القـاف من غايـة ضميري جهـرتـه *** بتمجيد من فعـله بالأعيـان منظـور
طيـب أبـو فيصل مـن قديـم خبرتـه *** القـرم ريف اللي شكاله من الجـور
كـم مجلس يمـدح سمـوه حضـرتـه *** حيـث أن طيبـه بالدياويـن مـذكـور
الطـيـب وافـعـال الـمكـارم حكـرتـه *** وأنـت الـذي يـاميـر للملتجي سـور
الـلي شكالـك من خصيمـه نصرتـه *** الا ورفعت الظيم عـن كـل مضرور
ومن خاطره مكسور كسره جبرتـه *** يقبـل بـهـم وينـثـنى مـنـك مسـرور
وكـم بائسٍ من غيث جودك غمرته *** وعقب الظلام بمنزله يشعـل النـور
ومـن جاك بالحيلات باعـه قصرتـه *** تصعد سنام المجد والخصم مقهور
والـلي عنالـك تكرمـه مـا حـقـرتــه *** اجـرك عـلى مولاك يـاميـر ماجـور
يـاميـر عـلمـك بالمفـاخـر شهـرتـه *** مثـل القـمـر يجلي دجى كل داجـور
وأنـت الـذي علـم الفضيلـة نشرتـه *** نلت الفخـر والعبـد منهي ومامـور
ماضي فعول المجد مهما اختصرته *** يشهـد لـه التاريخ بالكتب مسطور
قصـد الكلام الـلي بـوصفـك ذكرتـه *** قـلته واعـد الصدق ما نلفظ الـزور
ما جيت ابـي تعويض شي خسرتـه *** لا شك أنا ناصيك في عتـق مأسور
* وهذه القصيدة أيضاَ بسمو الأمير عبدالرحمن بن عبدالله بن عبدالرحمن
آل سعود شعر عبدالله بن دهيمش بن عبار العنزي : 50
يا أخو يزيـد القـاف ملزوم ينشـدك *** مـن واجـبـه يامـيـر يلهـج بطـرياك
يا اخو يزيد ابديت بالشعـر امجـدك *** امـدح جـنـابـك والتـمـاديح تـزهـاك
امدحـك لو فعلك مع الناس حامـدك *** لي الفخـر ياميـر في مدح شـرواك
ولا أنـت طيبك دون تمجيد شاهـدك *** ما نـدرك التوصيف مهما وصفناك
الطـيـب فعـلـك والمـكـارم عـوايـدك *** والجـود طبعـك والشهامة مزايـاك
تخـليصت العـانـي تسـرك وتسعـدك *** الصـدق والإحسان سلمك ومبـداك
أنت الذي ربك على الخير مرشـدك *** وأنت الذي ربك عـن العيـب عـذاك
وأنت الذي ربك عـن الشـر مبعـدك *** للمجـد والعـلـيـا مسيـرك وممشـاك
وأنت الذي نلت العلا في سواعـدك *** وادركـت عسـرات المفاخـر بيمناك
يامير يا بحـر النـدى خـاب حاسـدك *** لـك منزلـه بالعـز في بـرج الأفلاك
يا مصعـب افعـالـك عـلى من يقلـدك *** يـبـيـد حـيـلـه ما يسـوي سـوايـاك
يالمكرم الـلي منبع الجـود من يـدك *** كـم اغتنى معتاز من غـيث حسناك
يـفـلج وتـبطـل حجتـه مـن يعـانـدك *** بـك عـز للصاحب وبـك كيـد لعـداك
ياريف من جالك من الظيم قاصدك *** يـزول شـره حـيـن يـامـيـر ينصـاك
حيثـك كريـم بحـزت الظيـم نـاجـدك *** ذخـرٍ لـنـا بـالـمـوزمـة لا عـدمنـاك
امـجـاد مـن جـدك تـورث لـوالـــدك *** مجناك من وكـر الصواريم مجنـاك
أشبـال مـقـرن هـم عـوايـن بدايـدك *** ساس الفخراصلك وبالمجد مرباك
* وأيضاً هذه القصيدة بسمو الأمير عبدالرحمن بن عبدالله بن عبدالرحمن
آل سعود قالها عبدالله بن دهيمش بن عبار العنزي : 51
يـاميـر تـزهـا للمـدايـح خـصـايـلـك *** والمـدح يـا ريف الهواشل زهـالـك
لك الفخر والمجد من عصر اوايلك *** موروث مـن ميـراث جـدك وخالـك
الطيـب والأمجـاد مـن أسرتـك تلـك *** مـنـذ الـقـدم كـانـوا جـدودك كـذلـك
يالمقـرني هـذي طبـايـع حـمـايـلـك *** وتربـي عـلى فعـل المكـارم عـيالـك
الطيب والمعـروف والحكم والملـك *** حـاويـنـه آل سعـود صفـوة رجالـك
يا عـل يبقي عـزهـم مجـري الفلـك *** الـلي بـطـاريـهـم يـطـولـن حـبـالـك
سمعت قول الـلي يوصف جمـايلـك *** وجيـت اتشـرف فـي لقـاك وقـبالـك
بالطيـب والإحسـان تذكـر فضايلـك *** ومـن صكـتـه سـود الـليالي عنالـك
الـقـاف يـقصـر مـا يعـدد فـعـايـلـك *** عـز الـذي مـن جـور بـقـعـا شكالـك
غـيـث الفقارى كان هـلـت مخايلـك *** الـلي اعتنـوا لـك من بعيـد الممالك
تجـذب مسايير الهواشل مشاعـلـك *** إلى جـو هجافى وداجي الليل حالك
تاصل وربك سامك العرش ياصلـك *** وتـدري حـطـام الـمـال لابـد هـالـك
على الصخى تبذل ولا طعت عاذلك *** تـبـي الأجـر عـسى ثـوابــه يـنـالـك
يامـيـر طيبـك شـاد مجـدك وطولـك *** تـنفـق يـمـينـك دون تـعـلـم شمالـك
بالجـود قـالـوا جـود حاتـم يـماثلـك *** تـجـود واخشـرت الضعافـي بمالـك
جـودك يناديهـم عـلى بـاب منـزلـك *** وأنـت الـذي مـن حـده الظيم جالـك
يـالـلي تـدور الفـود وجـه رحـايلـك *** اورد عـلـى بحـر الصخى لا أبـالـك
عبدالرحمن أن كان ضاقت محايلك *** انـصـه إلـى قـلـت عـليـك المسالـك
طـلـق الـمـحـيـا بالبشاشه ايقـابلـك *** ومن قبـل ما تطري لزومك يسالـك
لا جيـت أبـو فيصل بطيبـه يعاملـك *** مـن حـيـن مـا تلـفيـه يـنساح بـالـك
انـصـه ولا تـنصى بـخـيـلٍ يخجلـك *** عنـده تجـد قـدرك و يـرفى خمـالـك
يامـيـر جـيتـك يـا مـزبـن دخـايـلـك *** افـزع بجـاهـك ما نـبي مـن حلالـك
* وهذه القصيدة أيضاً بسمو الأمير عبدالرحمن بن عبدالله بن عبدالرحمن
آل سعود قالها عبدالله بن دهيمش بن عبار العنزي : 52
سـر يا قـلـم واكتـب سـلام وتـحـيـه *** للباسـل الـلي مـا يـهـاب الـمنـايـــا
تـرفع لبـو فيصل عـريـب السـمـيـه *** الصيـرمي نسـل المـلـوك الشـفـايـا
ساسـه عـريـب وعـزوتـه مقـرنيـه *** الـجــد وايــل والـخــوال الـطـنـايــا
هـل الصخـى والمـرجـلـه والحميـه *** حـمـايـة السـاقـه حـمـول الـسبـايـا
يـامـيـر جـيـتـك يـا زبـون الـونـيــه *** باغيـك ذخـر بوقـت عظـم الـرزايـا
يـامـيـر جـيـتـك حـاجـتـي معـنـويـه *** ناصيك واشـرح لـك جميع الخفايـا
نبـدي يا أبـو فيصل عليـك الشكـيـه *** يـعـبـأ لـهـا شـرواك ذيـب السـرايـا
ناصيـك يا مشكـاي عـنـدي قـضيـه *** نـاصـيـك يـا حـلال صعـب القضايـا
ينخـاك مـن صـارت عـليـه الـدعيـه *** يـالـنـادر الحلحـيـل سـتـر الصبايـا
زبـن المجـنى الـلي عـليـه الجـنـيـه *** مـدمـي ورمـاه الـقـدر بـالـخـطـايـا
نـطـلـب عـسى يـاميـر تـقـنع ولـيـه *** وتـفوز بأجـره حين تصفي النوايا
عـنـيـت لـك مـا مـقــصـدي مـاديــه *** ولاني من اصحاب النفوس الدنايا
ولا جـيـت مقـصودي ادور العـنيـه *** ولا اريـد بـلـغـه يا جـزيـل العـطايـا
الـنـفـس عـن مـد الـخلايـق غــنيـه *** ورزقي عـلى رزاق عـمي الحيـايـا
ولا أنـت كـالـهـداج شـيـخ الجـويـه *** مـنـاهـلـه تـورد عـلـيـهـا الـظمـايـا
يـلـفــونـه الـوراد صـبـح ومـسـيـه *** ويردون جـالـه مـن بعـيـد النحـايـا
وأنـت الـذي تـعـطي بنـفس رضيـه *** فـضلـك شمـل يـامـيـر كـل الـقـرايـا
تـعـطي ولا تـبغـي عـلـيـهـا جـزيـه *** ومـن خـيـركم كـلـن جـيـوبـه ملايـا
عسى الـولي يـا قـاك من كـل سيـه *** نـطـلـب عسى يحميـك رب البـرايـا
* وهذه القصيدة بسمو الأمير تركي بن سعود الكبير آل سعود رحمه الله شعر عبدالله بن دهيمش بن عبار : 53
يـا اخـو محمـد جيـت للبيـت مـرات *** قـصـدي اشوفـك يا سطام المعانيـد
مـا جيـت لـك يـا مـيـر دوار بلغـات *** لا والـلـه اللي يبـدي الخلق وايعيـد
شـفـي قـبـالـك يـا زبـون الـونـيـات *** ولا فلا لـي غـيـر شـوفـك مقاصيـد
أنـت الـذي تعـبـأ لـشيـل الـمهـمـات *** وأنت الذي تزبن عن الكود والكيـد
حيثـك من الـلي نذخـره للصعيبـات *** أنـت السند في وقـت قـل المسانيـد
تـذري كمـا تـذري شواميخ ابانـات *** وتوفي إلى باروا خطات الرعـاديـد
هـاك الجـبـال العـاليـات الـرفـيعـات *** ماهزهـا عاصوف مـزن الرواعيـد
مـن لابـةٍ تـرمـي العـدا بالحـرابـات *** نسل السعـود الـلي كما نايف الحيد
أمجـادكـم مـن دور وايـل قـديـمـات *** فـوق العـلا شيدتـم الـمجـد تشيـيـد
عن خيلكم خيـل المعـادي معـيفـات *** تقـفي هـزايـم كنـهـا شّـرد الـصـيـد
أنـتـم حـمـاهـا يـوم للخـيـل لـكـدات *** تـدعـون كردوس السبايا عـراجيـد
وانتـم رواسيهـا بـدور السيـاسـات *** ترقون صرح العـز رغـم الحواسيد
تاريخكم مشهود بالدور الـلي فـات *** الـفعـل يشهـد والخلايـق شـواهـيـد
أوجـزت بالأمثال لـمحـة واشـارات *** والا الفضايـل ما حصاهـا التعـاديـد
وختـامهـا نهـدي جـزيـل التحـيـات *** لـك يـالأميـر نـجـدد الـعـهـد تجـديـد
* وهذه القصيدة مسنده على سمو الأمير تركي بن سعود الكبير رحمه الله قالها عبدالله بن دهيمش
العبار قالها يصف الجمل كلاس عندما فاز بالسباق وطلب سموه من الشعراء وصفه : 54
ضمن الركايب شاقني شـوف كلاس *** حـرٍ هـميـم وينـتبـه عـشـرة اجـدود
ساسه عـريب وبالسبق تقـل قرناس *** ينـزع وسبقه بأوسط الكف مشدود
إلى شاف له جولٍ خلي من الأوناس *** يخـوي ويودع ابرق الريش ممدود
مـثـل الـغــمـام الـلى تـولاه نـسنـاس *** وأنـا اذكر الله سرعتـه تقل عبـرود
عندالسبق يأخذ على الهجن نوماس *** مـا لـه مثيل بسبّـق الجيش والقـود
عوايـده وقـت السبـق يـاخـذ الكـاس *** حـر الأميـر الصيرمي صفوة سعود
تـركي زبـون الجاذيـه طّيـب الساس *** خـلفـت ملاذ الملتجـي ماكـر الجـود
الـلي جـمع كـل المراجـل بلا أقيـاس *** زودٍ عـلى رقـي العلا يطلب الـزود
فيه الصخى والجود مع قـوة البـاس *** نـال الفخـر والمرجلـه مالها احدود
فعله ظهـر بيـن الملأ واعجب الناس *** عندي على قولي براهين وأشهـود
فعـله مسجـل فـي سجـلات قـرطـاس *** ضد الـذي خـان المواثيق واعهـود
الفارس اللي إلى أعتلا قب الأفراس *** الخيـل تقـفي عـن نواحيـه عرجـود
وانـجـالـه الـلي يـوم الأريـاق يبـاس *** يروون لدنـات القـنا وشـذرة العـود
منهـم محـمـد يـوم للحـرب مـقبـاس *** البـاسـل الـلي باللـقـاء ينطـح الكـود
وعبدالعزيز أن صار بالعـقـد لولاس *** حـلال بـالـقـالـه لـواليـس واعـقـود
والكـل منهـم سمعتـه تـرفـع الـراس *** حـازوا على الطولات والفعل ماكود
من خاطري عبرت بشعور وحساس *** بهم افتخـرمالي من القـول مقصود
وصلوا على اللي تتبعه كل الأجناس *** عـد الـرمل واعداد ما يصفق النـود
يتبع