تابع
* - هذه القصيدة تبلغ مائة بيت سبق وأن نشرت بصحيفة الجزيرة مرفوعة إلى مقام خادم الحرمين الشريفين الملك
عبدالله بن عبدالعزيز آل سعود رحمه الله بسبب اعتاقه رقبه شعر عبدالله بن دهيمش بن عبار : 20
الفـكـر شـد مـعـّرب الـقـاف بـشــداد *** وأرسـل خـياله مع هبـوب الذعـاذيع
منصاه أبـو متعب وهو منتهى الماد *** لو ضعت عن بدر الدجا عنه ماضيع
نـاخـت عـلى بـابـه تناظيم الأنـشــاد *** فـي وصف طيبه تلفظ القـول وتـذيع
زاكي الجناب بمدحـه الشعـر يـنـقـاد *** جـوده جـعــل كـل القـرايـح مطاويـع
ومـن يمـدحـه مـا يـنـقـده كـل نـقــاد *** مدحـه فخـر مـا هـو تـملـق وتصنيع
فعلـه عـلى وصف الشواعيـر يـزداد *** وعن حصر مجده قوّع القاف تقويع
مـن طلعته لـه بالفـخـر شـف ومـراد *** صعـد عـلى العـليا بعـيـد المـرامـيـع
حـط المراجـل منهجه قصـد واعمـاد *** والعز الأقعس غايت الكسب والريـع
مجده برز علمه على روس الأشهاد *** يبـقى دهـر مـا هـو ليـالـي وأسابيـع
الليـث عبـدالـلـه لمجـد الـفـخـر شـاد *** طـاريـه تطـرب لـه جـميع المساميع
مـكـارمـه مـا تنحصي مـالـهـا أعـداد *** ما تنوصف زادت على كـل مـا شيع
عاشـت عـلى خيـره مخاليق وعـبـاد *** وعـلى الفقـارى وزع المـال توزيـع
عرق الندى وبل الحيـا غيـث الأكبـاد *** مـن جـود كـفـه مـا يضـم الأصابيـع
شـط الـفـرات الـلي لـه الـنـاس وراد *** مـن صافـي النقـروح تنهـل قراطيع
هـاشـل يـمـيـنـه كـنـهــا ديــم رعــاد *** وكـفـه يفيـض مـن الحساني ينابيـع
ديـوان بـيـتـه يـدهـلـه كــل مـرتــــاد *** ويـمنـاه طبعـهـا عـلى الـبـذل تطبيع
بحر الصخى جزل المواهب والأمداد *** ومـن مـده المحتـاج سوى مشاريـع
كـفـه مـثـل ديـم السحايـب إلـى جـاد *** يحـيي الـديـار المـمـحلات الـبلاقـيـع
هـو مربـع الوافـد إلـى نـوشح الـزاد *** مـقـري محـاويـل الـبـداة المجـاويـع
دايـم ولائـم كـرمـتـه مـثـل الأعـيــاد *** والـزاد بـالـجـفـنـه اشكـال وتـناويـع
يعيش أبو متعب بصرح الفخـر سـاد *** ثـنـاه مـا يـحـصـاه نـظـم الـمـبـاديـع
الـلي حفـظ سلـم الحمـايـل والأجـواد *** مـفـني حـلالـه لـلـمحـاويـج تـبـريـع
شبـل الأسـود الوايـلي نمـر الأفـهـاد *** الليـث الأروع مـا يهـاب الصعاصيع
الـبـاسـل الـصنـديـد تـدراه الأضــداد *** بـزاع ما يـرضى العـوج والمهازيـع
الـنـادر الـلي للوطن عـضـد واسنـاد *** شبـحـه بعـيـد وبـالعـلا لـه مـطـاليـع
ريـف الـوطن عساه دايـم بالأوجــاد *** لـه بالعـلا الصنديـد منصـب وتـرفيع
عبـدالـلـه الـمنعـور مـن قـاربـه فـاد *** مـن يـلـتـجـي لـه نـال عـز ومنـافيـع
زبـن الطـريـح الـلي تكبـل بالأصفـاد *** ذخـره إلـى ضاقـت عـليـه المواسيع
يا ما عفا عن نفس سيقت على قواد *** وعـاد الأمـان لروعها عقـب تخريع
وكـم واحـدٍ جـاه الفـرج بعـد مـا كـاد *** يحمـل ويـدخـل برزخـه دون تشييع
أمـه تنـوح وخفـرتـه حـزنهـا أحـداد *** مـن لوعـت الحسـرة تهـل المداميـع
حـول بكـاهـا وحزنها كيـف وإسعـاد *** مـن عقـب مـا ناحت تحسر وتوجيع
وعادت لـه البشرى تقـل يـوم ميلاد *** نـور الأمـل فـي نـاضره لـه شعاشيع
انجـاه أبـو متعب عـقب سيف جـلاد *** لـه تـنحـني عـلـط الـرقـاب المتـاليـع
يـا مـا دعـوا لـه تـالـي الليـل سجـاد *** وقـت الـتهـجـد والخـلايـق مهـاجيـع
عـاش الزعيـم الفـذ كسـاب الأمجـاد *** مـقـدم طـوابـيـر الـرجـال الـمـداريـع
مـن صلـب لابــه لـلشغــامـيــم روّاد *** أشـبـال مـقـرن بـالحـرايـب بـواتـيـع
المجد له موروث من عصر الأجداد *** ساس الفخـر عاداتهـم بوجت الريـع
منجوب ساسه من سلاطين واسيـاد *** فخر العرب عن فعلهم يقصر الصيع
قـايـد ومـن صـفـوت مـقـادم وقيّـــاد *** سقـم العـدا إلـى صار للحرب تقريـع
سلـم الـجـدود مـعــقـبـيـنـه للأحـفـاد *** وتـربـى عـلى العـز التليد الرواضيع
نسـل الـذي سنّـد مـع المجـد مسـناد *** الـلي لـه رقـاب المشايـخ مخـاضيـع
صـقـر الجـزيـرة لـلجـزيـلات صـيـاد *** مـن هـدتـه خـلاّ الحبـاري مخـاشيـع
شيخ العـرب بـه تفـتخـر أمـة الضـاد *** عـقـب التـفـرق عـاد شعبـه مرايـيع
لاصاح داعي الحـق يطلـب استنجـاد *** فرحت ضميـره بالطلـب والمفـازيـع
إلـى اعتزى كفـّه عـلى السيف جبـّاد *** ستـر العـذارى لابـسـات الـبـراقـيــع
لا طـار ستر البيض غضـات الأنهـاد *** وتـوايـقــن بـيـن الـحـنـايـا مـدالـيـع
عـبـدالعـزيـز الـوايــلـي دونـهـن ذاد *** حـتـى أرتـدن شيلاتهـن والمـقـانيـع
وحّـد جزيـرتـنـا عـلى هجـن واجيـاد *** وجمع شمـل بدو العـرب والزراريع
يصول من صنعـا إلـى حـدود بـغـداد *** قـلبـه تـولـع بـالمـطـاريـش تـولــيـع
قـاد الجـيـوش وحــرر ديـار وابــلاد *** وعـاد الحقوق ووسّع الملـك توسيع
بـالـقـايـلـه يـجـري وبـالـلـيـل هـجـاد *** وحصن بلاده عـن تشتـت وتصديـع
جاهـد ووحدها عـقب حـرب واجهـاد *** وعـذا جنـاب الـدار عـن كـل تشنيع
الفارس اللي لـه عـلى الخـيـل ملكـاد *** روس الأعـادي كسـره بـالـفـواريـع
الخـيـل تـقـدح بالصخـر كـنـهـا زنـاد *** والعـوص يـرقـع خفـّهـا بالمـراقيـع
يمشي جـهـار بـدون مكـمـن وملـبـاد *** ويـروم مسلاك الوعـر والـقـراشيع
يـوم السنـيـن الـلي بـهـا كـر واطـراد *** يتعب صهات مكاضمات المصاريـع
عـلى العـدو صب الذخايـر والاعـتـاد *** وشـب الفتـايـل بالتـفـق والمقـاميـع
لا جـاء نـهـارٍ بـه يـشـيبـون الأولاد *** وتذهل عن الطفل الصغير المراضيع
إلـى قـال عـوجا راحت الخيـل شـرّاد *** السيـف شـرّع والجمـاجـم مصاليـع
حذف الجماجم من عناتيـت الأجسـاد *** يشبـه لمحذوف الحصى بالمقـالـيـع
مـن نـاطـح الصنـديـد حـدّر مع الـواد *** يكدي عـدوّه عنـد خوض المعـاميع
مـا يـنطـح بـالـكـون وأن صـال هـدّاد *** ينطح خصيمـه ما ثـنـوه الفـراريـع
يقضى عـلى البـاغـي وللمعـتدي بـاد *** ويـروي حـدود مصقلات القـواطـيع
يـفعـل كـمـا فعـل العـديـم ابـن شـداد *** مزع قـلـوب شخوص الأبطال تمزيع
صمع القـلـوب قـلوبهـم كنهـا جـمـاد *** فـدع بـهـم ذيـب الرجـاجيـل تـفـديـع
مـن حـاربـه مـا نـام جـفـنـه ولا نـاد *** تـوشعـه طـيـفـه بـالاحلام تـوشـيـع
وش لـون عيـنه تقبـل النـوم ورقـاد *** مـن صولت اللي روّع اعـداه ترويع
وخضع له العاصي عقب كيد وعنـاد *** وخـلا المعانـد يسمع الـقـول ويطيع
وحتى الذي ما فادهـم نصح ورشـاد *** طـوّعهم الصنديـد بالسيـف تطـويــع
ولولا العوج ما يطـرق السيف حدّاد *** لاشـك لـلـعـايــل حـنـوه الصـنـانـيــع
والمعتدي دونه عـن الشـف مرصـاد *** عـن الهـدف قـدّام دربــه مــوانـيــع
خـلاه مـدبـاس الـوغـى ينـتحـي غـاد *** واركى عـلى كبـده رضاف وملاكيع
صنديـد مـا يجـامـل منافـق وسرمـاد *** ولا ينحـني لأهـل الدجـل والمخاديع
يا مـا جدع من راس فاسـق وحسـاد *** وطـمـن رقـاب المخـبثيـن الرواثيـع
واخـلا مكان أهل الضغاين والاحقـاد *** سـود الضمايـر بالغـلايـل مضـاريـع
وأهـل العـيـا والـزّوم قـيـدهـم اقـيـاد *** وصـان الحمى بالمرهفـات اللـواميع
خـلا الـذي يـبي المشاكل عـلى حيـاد *** يرجع عن دروب الغوى دون تقنيع
عقب الكدر جت له على كيف ما راد *** يـشـرب قـراح ولا بحبـلـه تـقـاطيـع
ممرور ما يقبل عـلى الحيـف مقعـاد *** عـوق الخـصيم إلى تلاقـوا مفـاريع
والحـمـد لـلـه لـه مـع النصـر ميعـاد *** عـاد الـكـرامـة لـلقـلـوب المفـاجـيـع
فـارس ومـن لابـه فـوارسٍ وزهـــاد *** وفي طـاعـة اللـه صايمين ورواكيع
وفي منهجه عادل عن الحق ما حـاد *** عـنـده طـوال النـاس مثـل المرابـيع
سـوّه عـلى الـلي دينهم كفـر وإلحـاد *** وهـدم مـن رمـوز الظلالـة صواميع
وانجـب صـوارم كنهـم شـَمّ الأطـواد *** حـطـوا كـتـاب الـلـه منهـج وتشريع
اهدافهم صوب العـلا شبـحهـا ابعــاد *** يمشون بـدروب الفـضيلـة مساريـع
العـام زرت الليث من ضمن الأفــراد *** ليـث الليوث الـلي يحـل الـمـواضـيع
واهـديـت لـه كتبي قـديمـات واجـداد *** جمعتها مـن تـراث الأبـطـال تجـميع
فـيـهـا ذكـر سـطـام والـشيـخ مجـلاد *** وفيها نسب كنعان وعـقـاب وجديـع
وفـيـهـا تـقـاسيـم الـقـبـايـل والابـداد *** وفـيـهـا لبنـي وائـل بـدايـد وتفـريـع
وفيها الوسوم اللي على جـل الأذواد *** وفيها العـزاوي والحـدا والمشاييـع
وفـيـهـا ترانيـم الـمسـافـر بـالأوهـاد *** وفـيـهـا لـحـن دحـاتـنـا بـالـمصانيـع
وفيها الجـواب لمن عن الربع نشّـاد *** وفيهـا لـلي تخـفـاه الأنـساب تسنيـع
قـلته وأنـا ماني عـلى السعي معـتـاد *** ماجيت اعرض بضاعة الشعر للبيع
اعـتـز بـالـلـي يـمـدحـه كـل قــصــاد *** ولا درت من بدع القصيد المطـاميع
لو كنت شاعر وانظم الشعر وشعـاد *** مـالي بـصنـدوق الـعـطـايـا تـواقـيـع
رزقـي عـلـى خـلاق آدم مـن اجـمـاد *** الـواحـد الـلي يرجـع الخلـق ترجيـع
والخاتـمـة صلـوا عـدد رمـل الأنفـاد *** عـلى الـذي يشفع لمن طـاع تشفيـع
* وهذه القصيدة ايضاً بخادم الحرمين الشريفين الملك عبدالله بن عبدالعزيز
آل سعود والأمير بدر بن عبدالعزيز رحمهما الله وتحتوي على بعض مآثر
قادتنا الكرام شعر عبدالله بن دهيمش بن عبار : 21
بديـت بسـم المعتلي خـالـق النـاس *** مـبـدع كيـان الكـون يعـلـم مقـاسـه
الـلي خلـق خلقه تشاكيل واجنـاس *** محـيي العظـام الباليـه فـي رماسـه
سجلت من عذب القوافي بقرطاس *** والفكر يملي مـن مشاعـر احساسه
ثم اهـدي المنظوم لمعـرب السـاس *** عـبـدالـلـه الـلي مشتهـر بالسياسه
واسنـاده الـلي للوغى دوم مدبـاس *** بـدر الـدجى يجـلي دياجـي دماسـه
نسل الزعيم اللي على قب الأفراس *** الـلـيـث الأروع ضـاري لـلفـراسـه
يشهـد لـه البتـار والـدرع والطاس *** والخيـل تقـفي شارده من حساسـه
الـصيـرمـي يـلـوذ بـه كـل قـرنـاس *** ساس الصوارم من مواكير ساسـه
لابة هل العوجاء شديدين الأمراس *** فخـر العـرب لهـم الفخـر والرياسه
سور الوطن لا صار للجمع حبـاس *** وأن بـان بـوجيـه النشامـا عباسـه
سـور العـروبة يـوم الأرياق يبّـاس *** ريف الوطن والمعتدي هم عماسه
سور الوطن لا شب للحرب مقباس *** وأن صاح دمامـه ودقـت اجـراسـه
لا جـاء نهـارٍ فيـه شربـوك لـولاس *** عـدوهـم شـاف الـنـكـد والـتعـاسـه
يا ملوكنـا أنتـم هـل الفعـل والبـاس *** مـنكـم تـعـلـمـنـا البـطـولـه دراسـه
حـنا الحرس حنـا للأوطـان حـّراس *** نرفـع عـلـمنـا والوطـن لـه قداسـه
نفخربمجد اللي شعاره على الراس *** حـرس وطـنا نـفـتخـر فـي لـبـاسـه
نفخـر ونشعـر في معـزه و نوماس *** حيثـه لباس أهـل الفخر والحماسه
وصلوا عـدد ما هب بالجـو نسناس *** عـلـى الـذي حـّرم كـلام الـبـلاســه
* هذه القصيدة بخادم الحرمين الشريفين الملك عبدالله بن عبدالعزيز رحمه الله
بحفل مدارس الحرس الوطني شعـر عبدالله بن دهيمش العبار : 22
حـي الأمـيـر الـلـي عـزيـز قـبـالـــه *** يا مـرحبا يا صاحب القـدر والجـاه
حـي الأمـيـر الـلـي قـلـيـلٍ امـثـالــه *** صـميـدع بالمـوزمـه يقـهـر اعـداه
يـا مـن بفعـل الطيـب بانـت افعـالـه *** يـنبـيـك عـن طيـبـه ملامـح محيـاه
مقـدم حـرسنـا الـلـه يقـوي رجالـه *** ولا خاب مـن مثله يروسه ويرعـاه
ويسند عـلى اللي بالفخر طاب فاله *** بـدر عضيده يفعـل الطيـب شــرواه
حـنـا لكـم يـا أمـيـر فـي كـل حـالــه *** نـحـمـي وطـنـا بـالـلـوازم ونـفــداه
حنـا الحرس جند الفداء والبسالــه *** نذود عـن حوض الوطـن بالملاقـاه
ضـد العـنيـد الـلي الـمطـامع ابـالـه *** عـدونـا سـحـم الـضـواري تـعـشـاه
عـدوكـم يـا أمـيـرنـا عـنـدنـا لـــــه *** مـدافـعٍ بـالـكـون بـالـنــار تـصـلاه
ومن أعـتدى القانون حنـا نعـبـالـه *** ابطـال ولخوض المعـارك امضـراه
وســواعـد تـعـمـل عـلـى كـل آلـــه *** كل الحرس يا أمير شجعان وارماه
أنتـم أهـل التوحيـد وأهـل الـعـدالـه *** وأنتـم عـمـاد الديـن وأنتـم ركـايـاه
وأنتـم كعـام أهـل الـدجـل والظلالـه *** دمتـم لـنـا يانصـرة الديـن واحـمـاه
الـلـيـث بـلـغ بـالـمـراجـل عــيـالــه *** الـطـاهـر الـلـي مـا تـغـيـّر نـوايــاه
ونال الأجر عـلى محاسن اعـمـالـه *** حيثـه سعـى بصلاح ديـنـه ودنـيـاه
حـكـم بشـرع الـلـه عـزيـز الجلالـه *** ولا خـاب من طبـق تـعـاليـم مـولاه
سـار وعـلى رب الـعـبـاد اتــكـالــه *** وحـد جـزيـرتـنـا بـسيـفـه وشلـفـاه
مـن فضل رب الكـون حقـق آمـالـه *** وخلّف بها اللي ما تناسوا وصايـاه
تـقـلـدوا حـمـل الأمـانـه أنـجــالــه *** فـي سنـة الرحمـن يدعـون دعـواه
يـمشـون فـي سـنـة نـبي الـرسالـه *** مـا تـابـعـوا للشـرق يبـدون مـبـداه
ولا من بلاد الغرب صارت اعتـالـه *** يـتلون ديـن الحـق يمشـون ممشاه
وخـتـامهـا يـا سـامـعـيـن المـقـالـه *** صلـوا عـدد مـاهـل مـزنٍ نـثـرمــاه
عـلى رسـول الـلـه وصحـبـه وآلـه *** المصطفـى ربـه عـن الشـرك عـذّاه
* وهذه القصيدة بصاحب السمو الملكي الأمير بـنـدر بن عبدالعزيـز آل سعـود رحمه الـلـه شعر عبدالله بن دهيمش بن عبار : 23
يا مرحبـا يا صاحب الفضل والجود *** حيـيـت يا نسـل المـلـوك العـواهـل
نهـدي لـك الترحيب مثـني ومـردود *** لك يا الأمير اللي من المجـد ناهـل
بنـدر أبـو فيصل حجـا كل مضهـود *** مـلجـأ الـيـتـيـم وللمحـاويـج زاهـل
نسل الذي فوق العلا يصعد اصعود *** نال العـلا وفـي قمـة المجـد شاهـل
مجده تسلسل من ربيعة إلى سعـود *** مـن روس لابـة للهـواشـل مداهـل
بيتـه كمـا الهـداج بالقيـض مـورود *** هـداج تـيـما الـلي يفـوق المنـاهـل
يـوم الزمان اللي بـه العسر والكـود *** رام المصاعب ما مشى بالمساهـل
ما همتـه لو كانت أثـقـل مـن الطـود *** شـال الحـمـول الـكايـده بالكواهـل
زال الطـغـاة وبيـرق النصر معـقـود *** جـاهــد وذلـل كـل هـادر وصـاهـل
وبـذل لتوحيـد الـوطـن كـل مجهـود *** حتى استقـرت وأرتدع كـل جـاهـل
يلقـا النكـد من كان للفضل جاحـود *** ويكرم بها الـلي للكرامـه استـاهـل
صديقهـم يجـني مـن الـربح والفـود *** وعدوهم عـقـله من الخوف ذاهـل
أمـر مـن العـلـقـم عـلى كـل منـكـود *** وللصاحب أحلا من دريـر المباهـل
يتبع