تابع
* قال عبدالله بن دهيمش بن عبار العنزي هذه القصيدة يثني على الشيخ
زيد بن ناصر المليحي السبيعي شيخ قبيلة مليح من سبيع: 90
سـار القـلم يكتب من الشعـر بالقيـد *** والفكـر يملي من قـرايض قـريحـي
نقطف زهر نوار من صحصح البيد *** شـذا عـبـيـره بـالـنـفـل لـه نـفيحـي
بديـت واسنـدت القـوافي عـلى زيـد *** الشـهـم منعـور الـرجـال المـلـيحـي
الحـر الأشقـر مخلبه يعطـب الصيـد *** شنكـار كـفـه مثـل رمـح السـريحي
يشـوم عـن فـرق الحـمـام الملابـيـد *** هـيـق النعامة صيـدتـه والوضيحي
يا ستر ملهوف الحشى ناسع الجيـد *** الـلي زهـا بصـدره مصاغ الفتيحي
شمـا عفيفة تستوي لـك مـن الغـيـد *** كـريـمـة الـلـي يحـتمـون الطريحـي
الشيخ أبو ناصـر سـطام المعـانيـد *** ريف الصديق اللي ضميره نصيحي
زرنـاك يـالمـنعـور فـي سنـة العـيـد *** يا صاحب الوجه البشوش الفليحي
وقالوا طلع عنده اشغـال ومواعـيـد *** قـلـنـا عـسى رب الـملأ لـه يـبيحـي
مجناك من صلب الرجـال الصناديـد *** من راس لا بـه ينطحـون النطيحـي
سبعان يسقـون المعـادي من الكيـد *** غـلـبـا إلـى حـل الـنـهـار الـقـبيحـي
وأن صار بالسربة نخاوي وتهـديـد *** نـطـيحـهـم بـالـكـون لا زم يطـيحـي
يـوم الـسبـايـا حـادرات ومـسـانـيـد *** هـذا صـويـب وذاك خـلـي ذبـيـحــي
تـعـاقـبـوا بـمشــوكـات الـعـبــاريــد *** وحس الفرنجي باللحم لـه ضبيحـي
خـصيمهـم يـلـقـا خـسـاره وتـكـبيـد *** كـان اعتدى خلـوا حريمه تصيحـي
ما احصى فخركم يا سليل الأجاويـد *** يالماجـد الـلي بالمنـاسب صـريحـي
تـقصـر عـن افعالـك قـروم الأواليـد *** وأنـت الـذي طيبـك مجالـه فسيحـي
يـا زيـد مـا طيـبـك تصـنع وتـقـلـيـد *** تبـذل إلـى كـن البخـيـل الـشحـيحـي
من شح ما حاش الفخر والتحاميـد *** لـو حـاز كنـز الراجحي والجميحـي
حـاتـم بـجـوده بــدد الـمـال تـبـديــد *** ولا زال له طاري وهـو بالضريحي
وكـم راسمـالـي مـا لمـالـه تـعـاديـد *** وصـدره يفوح من الشقا له فحيحي
عـلـم الفخـر تاريـخ بالمجـد تخـليـد *** والمـال يـذهـب مع هبـوب اللفيحـي
أن سانعت دنياك تضفـر بمـا اتريـد *** وأن عـاضبت لـلي ملـكـتـه تـزيحـي
راعي الفخر يصعـد على قمة الحيد *** ومـن دور الطـولات مـا يستريحـي
علمـك ظهـر يا زيـد بالطيب تـوكيـد *** من شاد في مدحك كلامه صحيحـي
وأنـت الـذي تـثني عليـك القواصيـد *** كـلـن يـعـبـر بـالـلـسـان الـفـصـيحي
يا من خذيـت الطيب منهج وتعـويـد *** ينبـوع كفـك سيل مـا هـو نضيحـي
يكفيك فخـر أنـك تغيض الحـواسيـد *** ومن فعلك الحاسد ضميره جـريحي
ما دحـك فعلـك ما تـبي قـول تمجيـد *** قـلتـه ولا اظـنـك بحـاجـت مـديحـي
وصلوا على اللي زال دين الملاحيد *** اعـداد مـا طـب الكنـايـس مسـيحـي
* قال عبدالله بن دهيمش بن عبار يثني على أبو سلطان مزعل بن لافي
الجعفري العنزي لما له من مواقف لا تنسى : 91
الشكـر يرفـع والثـنـاء لبـو سلطـان *** مزعـل زبون الـوانيات ابـن لا في
عـزالله أنـه عـند الأجـواد لـه شـان *** حـيثـه مـن قـروم النشامـا سنـافـي
وعـزالله أنـه مـن طويليـن الأيمـان *** وعـز الـلـه أنـه يحـتـفي بالـملافـي
يجهد على المعروف ما قـال تعبـان *** فيـه الصخى والمرجلـة والعـفافـي
الحسـد مـا دب بـضـميـره ولا خـان *** قـلبـه مـن الأحـقـاد والغــل صافـي
كسب الفخـر حطه وسيله وعنـوان *** الصـادق الـلـي بالـمـواعـيـد وافـي
مـا قـلـت تـمجـيـده تـملـق وبهـتـان *** سجلـت من مـدح اللبيب اعـترافـي
ربعه هل الجدعاء مدابيس الأكوان *** عـدوهـم بـالـكـون مـنـهـم يـخـافـي
من فضـل بن عـلي سلايل سليمـان *** افعالهم عـن وصف الأقـوال كافـي
وش قـال عـنهم بالكلام أبن هـبدان *** جعـافـرة مـا يـشـتـهـون الـعـوافـي
بالكـون يسقـون العـدو سـم ثعـبـان *** ويـروون حـد مصقـلات الـرهافـي
لأ صحابهـم أحلا من الشهد بدهـان *** لـكـن عـلى الـعـدوان سـمٍ زعافـي
والنعـم فـي مزعـل سلايـل كحيـلان *** دايـم نـقـولـه بـالـخـفـا والـكشافـي
القـرم أبو سلطان يمـدح بالإحسـان *** يتعب على الطولات والنـذل غافـي
المكـرم الـلي عـادتـه يذبـح الضـان *** عيـت الربايط والخـراف الهـرافـي
بشوش ما غضلم حجاجه ولا شـان *** ولا بـار بالصاحـب بعـيد الهـدافـي
مـواقـفـه مـا تـنسي عـبـر الأزمـان *** وقـف بصفي فـي لـزومي اوقـافـي
ترفع له البيضاء على راس ما بان *** فـوق الروابي شامخـات الشعـافـي
عـنـدي عـلى طيبه دلايـل وبـرهـان *** واظن ما علمه عـلى الناس خافـي
اظهـر ثـنـا فضـله ولا قـول جحـدان *** واشيد باسمـه وامدحـه بالقـوافـي
مزعل سعى بالطيب والحظ لـه زان *** ما يذخـر المجهود ريـف الضعافي
وقـت اللـوازم يجتهـد قـدر الإمكـان *** ويتعب على كسب الجميل الخفافي
عسى يـفـداه اللاش والنـذل كـوبـان *** الـلي عـن علـوم المراجـل مقافـي
يفـداه الـلي ما فـاد ربعـه والأخـوان *** حـليـف عـدوانـه ولـلـربـع جـافـي
خطو الرزيل اللي من الـزاد شبعـان *** ولا ينظر الصاحب ولو سار حافي
كـب الـردي مالـه مع النـاس خـلان *** ما يعمـل المعـروف والحـظ هافـي
* وهذه القصيدة قالها عبدالله بن دهيمش بن عبار وارسلها إلى الشيخ صياح بن سعد بن غنيم
شيخ قبائل جهينة عندما بلغه أن شعراء من جهينة اشتبه عليهم المثل القائل ( عند جهينة
الخبر اليقين ) وقد ورد هذا المثل في احد قصائد ابن عبار مما اوهم ذلك الشعراء أن
الموضوع يعني قبيلة جهينة مع أن المثل العربي المشهور يطلق على رجل اسمه
جهينة الأخبار لذلك ارسلت هذه القصيدة للشيخ صياح لتوضيح الأمر : 92
شديت لـي هافٍ على الكيف ممتـاز *** إلى مشى يطـوي بعيـد المـراميس
حافة خبير الجمس مـا مثلـه طـراز *** تـوه ورد بمـواصفـات ومـقـايـيس
إلى دعست البنص مثل السهم نـاز *** كـنـه ظـليم وخـارشينه هـل العيس
يطوي الفيافي في مسيره و يجتـاز *** يجتـاز بطنـاج السهـل والطعاميس
عـنـاه أبـن عبـار مـن نجـد لحجـاز *** يلـفي جهـينـة كـاسبين النـوامـيس
ينصى جناب الصيرمي خلفت الباز *** صقر الحرار اللي يفـوق القرانيس
الشيخ أخـو سنيدا بعلم الفخـر فـاز *** مـودع عـراجيـد السبـايـا كـراديس
مقدم جهينة ريـف مـن جـاه معتـاز *** نسـل الغـنيـم مطلـقيـن المحـابـيس
نسل الغنيم اللي شريفيـن واعــزاز *** ريف الهواشل محرقين المحاميس
صيتـه وصـل للهنـد وبـلاد شـيـراز *** للـصـيـن لـلـيـابـان لـديـار باريـس
مـا اسبكـم بالقيـل يـا ثـقـال الأرواز *** لا واللي انجا نوح وشعيب وإدريس
ماني كما الـلي يشعـم النـار بالـقـاز *** الـلي لـنـار الشـر صـاروا مقابيس
مـا اسبكم يا شيخ والسـب مـا جـاز *** واللي يسب الناس هيسٍ ولد هيس
والـحـمـد لـلـه مـا نجـح كـل لـمــّاز *** والظلم حطم عرش قيصر وبلقيس
والقصـد يـا حـلال صعبـات الألغـاز *** كلمة مثل تضرب بوسط المجاليس
نخبرك بالموضوع يا شيخ بإيجـاز *** واللي فهـم قصـد المثل قال لا بيس
نسهج جواب اللي بقولـه استفـزاز *** اسند على الطيب واعاف الهلابيس
رد اللنقـا مـا هـو مطـارد بـجـنبــاز *** وعـلم الفخـر للمدرعين الملابيـس
قـلته وأنا يا شيخ مـن صلـب عنـاز *** اللي حموا ديرة بنو طسم وجديس
يـشـهـد لـهـم ذيـقـار وجبـال خـزاز *** يذكر فخـرهم يوم عصر المتاريس
من راس لابة ما بها ثلـوم واعـياز *** تشهد لهـم كنده وتشهـد لهـم قيس
وتشهد لهـم لا بت قضاعـة ومعـاز *** وبني صخر تشهدلهم والسناعيس
من قبـل عصر جديع والشيخ فـواز *** من وايـل الكبـرى حمايـل وفـريـس
والناس مثل الزرع به قطف وفراز *** غـرسه ولا بد الغـرايس بها خيس
والـلي يـقـول أنـه لكـل الفخـر حـاز *** غلطان وهروجه على غير تقييس
وصـلاة ربـي عـدد مـا قـال رجـــاز *** عـلى النبي عـدد هبـوب النسانيس
* قال عبدالله بن دهيمش بن عبار هذه الأبيات يبارك لعلي بن محمد المنديل
الزناتي التويجري احد وجهاء مدينة رفحاء ومن أفاضل أسرة التواجرة
بمناسبة افتتاح قصره العامر في مدينة رفحاء حيث وجه دعوة لحضور
هذا الحفل ولم يتسنى الحضور فأرسلت هذه القصيدة بالفاكس : 93
من عـلي بن محمد لفاني مراسيـل *** وجـه لـي الـدعـوة وخطه قـريتـه
يـبي اتـوجـه بالعـجـل دون تمهيـل *** والسفـر صـوبـه يعـلم الله نـويتـه
جـهـزت كـامـل عـدتـي بأول الليـل *** واحضرت جمسي والتوانك مليته
لولا الظروف الطاريـه قاسيه حيـل *** حاولـت ظـرفي ينتهي مـا قـويتـه
وأن يسر الـلـه بالسنين المقـابـيـل *** لازم نزورك والـوعـد مـا نسـيتـه
يا عل رفحا بارضها يـدرج السيـل *** يفـرح ضميـري بـرهـا لا مشيـتـه
حيث أن اهلها يكرمون الهواشيـل *** الـكـل يـدي واجـبـه كــان جـيـتـــه
عساه عامر قصركم يا أبن منـديـل *** الـلي بـرفـحا يـالـسنـافـي بـنـيـتـه
قصـر الزنـاتي بـه ملـم الرجـاجيـل *** ما صك عـن ضيفـه دراويـز بيتـه
قـصـر التواجـر طيبيـن المفـاعـيـل *** ادناهـم اللي بالعـرب شاع صيتـه
مـن نسـل جـبـارة نـوادر مشـاكيـل *** والكـل منهـم يـنـتـخـي لا نخـيـتـه
ولادعـة تشهـد لـهـم سبـق الخـيـل *** يـوم المـغـازي والـقبـايـل فـلـيتـه
مقـدمهـم الطيـار شيـخ الحـلاحـيـل *** ومقدمهم ابن سمير ما هو نبيتـه
والشيخ مدباس الوغى خازم الفيل *** يـديان مـن اهـل الحظوظ البخيتـه
الشيخ أخـو بقشه تجيـه المحاويـل *** ولو ابي اعـد افعالهم ما حصيتـه
قـلـت الصحيح ولا بقـولي ابـاطيـل *** ومن غير خلاق الـملأ مـا رجيتـه
لثم اصلاة عـلى النبي نختـم القيـل *** وبسم الـولي رب الخلايـق بديتـه
ا* قال عبدالله بن دهيمش بن عبار هذه القصيدة يثني على علي بن منديل الزناتي
التويجري أحد وجهاء مدينة رفحا للمجلس البلدي 94
بالقـاف جـودي يالقـريحـه وهـاتي *** نظـمٍ مثـل نحـت الحجـر بالمنـاجـر
قـلتـه ثـنـاء فـي كـاسـب الطايـلاتي *** حيثـه عـلى درب المكـارم مهاجـر
الـقـرم ابـن منـديـل نسـل الـزنـاتي *** علي وجيه ومن شخوص التواجر
نـزه الشوارب مـا يطـولـه شمـاتي *** عـن الـدنس والعيب للنفس زاجـر
مـن صلـب لابـه ذلـلـوا كـل عـاتـي *** عوق المعادي يوم طعـن الخناجـر
أولاد وايــل يـرخـصـون الـحـيـاتي *** يا ما اعتقوا محجورة عقب حاجر
فـوق المهـار معسكرات الحـذاتـي *** بالسيـف الأملح يقطعـون الحناجـر
شجعـان يـثـقـل روزهـم بـالـثبـاتي *** اليـا ثـار مـلـح مفـوهـات البنـاجـر
وكـل الـقـبـايـل تـفـعـل المكـرمـاتي *** يوجد بهم مـثـل الدريعـي وساجـر
يـوم السنين مـن الجهـل مظلمـاتي *** عصر الظـلام ودامس الليـل داجـر
واليوم عصـر مطوعيـن العصاتي *** عـاد لصـوابـه واهـتـدى كـل فاجـر
في حكم أبـن مقـرن مبيـد الجنـاتي *** كـم واحـدٍ عـقب الحفـا صار تاجـر
والـشكـر لـلـه خـالـق الـكـايـنــاتـي *** رب الـمـلا يـرحـم عـبـاده ويـاجـر
وارجو السموحة كان قلّت ابـياتي *** القاف صعـب وكنت للشعـر هـاجـر
واجب عـلينـا لـدعـوة الشيخ نـاتي *** لـو حال من دونـه جبـال ومحاجـر
بالـديـرة الـلي يكـتسيهـا الـنـبـاتـي *** فيهـا الخـزامـا والبختـري مشاجـر
شوف الربيع وشوفكم هـو شفاتي *** من قبل يصبح منظر العشب باجـر
وعلى النبي ازكى السلام وصلاتي *** اعـداد مـا هبهـب هبـوب الهواجـر
* قال عبدالله بن دهيمش بن عبار هذه القصيدة يثني على العميد المتقاعد
أبو علي عبدالله بن خشان المصلوخي العنزي :
95
سـار القـلم يكتب من الشعـر قيفـان *** خـطه عـلى بيض الصحايـف كتبـه
ما دام فكـري هاض للقـاف شفقـان *** يالجاش هـات الزيـن والشين كبـه
إلى ضاق بالي زرت ذربين الأيمان *** سـجـه لدسميـن الشـوارب وعـبـه
اشفق على الطيب ولا احب كوبـان *** الـلاش لاش وخـاطـري مـا يـحـبـه
اللاش قـربه بالعـرب قـرب ثعـبـان *** ومـن قـارب الأفـعـي بـنـابـه يـلـبـه
سيّرت صوب الوايـلي نسل خشـان *** أبـو عـلي كيـف الـنـشـامـا يـصـبـه
الـقـرم عـبـدالـلـه سـلايـل كحـيـلان *** ساس الفخر من شاف طيبه عجبه
مفتـوح بـاب الـوايـلي كـل الأحيـان *** والـنـار لا جـاه الـمـسـيــّر يـشـبــه
أبـو عـلي من عادتـه يذبح الضـان *** جـزل الـربـايـط مـع وريـده يـجـبـه
أبـو علي يحمل عـلى المتن تيجـان *** وصرح الفخر مبطي اشداده ركبـه
شـال الحمول الكايده بأمـر سلطـان *** يـسـتـاهـل المـنعـور عـالي ارتـبـه
الفاضل اللي ما مشى بدرب حقران *** عسى عـن المـكـروه يحـميـه ربـه
حيثه بفعل الغانمه حـاش الإحسـان *** ومن يزرع المعروف يحصد مغـبه
يفداه من ينسى صديقـه والأخـوان *** عـّـبـاد مـال وعـلــتــه كــاد طــبــه
ويـفـدا جـنـابـه كـل مـن كـان منـان *** الـلـي عـلـى المحـتـاج مـده يـنـبـه
الـمـال مـا يـرفـع تـقـاديـر الإنسـان *** كـم واحـدٍ حـصـل بـمـالـه مـسـبــه
ولا أبـو عـلي ريف من جـاه بلشان *** عـون الـرفـيـق الـلي زمانـه لعـبـه
أبـو عـلي مجـنـاه من ساس ويلان *** من صلب وهـب من سلايـل مـنـبـه
* قال عبدالله بن دهيمش بن عبار العنزي هذه الأبيات يثني على الشيخ فلاح
أبن ذيب الكبرى من كبار قبيلة الجميلات من البجايدة في ليلى :
96
الجاش هاض ورتـب القـاف ترتيـب *** كـزه مـع الـلي سـار للشيخ نـهـاج
إلى ضاق بالي رحت سجه لبو ذيـب *** لولا عريب الساس ما جيت الأفلاج
الشيخ الـلي يمشي بـراي المعازيـب *** الـوايلي ذخـر القـرابـه إلـى احتـاج
النـادر الـلي بالـفخـر يـفـعـل الـطيـب *** حـيثـه كـريـم وربعـتـه مـثـل هـداج
يفـداه من يقـدم عـلى العـار والعيـب *** خطو الرزيل اللي من الناس هلباج
ولا فـلاح الـلـي عـلـومـه تـعـاجـيـب *** بيـن القـبايـل شهـرتـه كنهـا سـراج
فـي مجـلسه صفـر الـدلال المحاديب *** عن صدر ضيفه واهس الهم ينفاج
عـوايـده بـالـمـوس جـذ الـلـغـابـيـب *** يا ما قصب به من مهاجيل وانعـاج
الـقـرم وافـي فـي جـميع المـواجيـب *** يجهد لكسب الغانمه لو بها احـراج
من ساس لابه ينطحون المصاعـيب *** نعـمٍ بـهـم لا صـار للخـيـل مسهـاج
لابـت جميلـة عـزوتـه ما بهـم ريـب *** عـوق العديم اللي عن الدرب ينعاج
من فضل رب الكـون مـالي مطاليـب *** ولا ني مـن الـلي بالمخاليـق هـراج
لا شـك نـفـخـر بالـقـروم المنـاجيـب *** أولاد وايـل بـالـفـخـر لبسـوا الـتـاج
تشهـد لـهـم بالـطيـب كـل الأجـانيـب *** من غوطة الفيحاء إلى بـاب فرتـاج
* قال عبدالله بن دهيمش بن عبار يثني على محمد المتعب العجمي :
97
يـا أبـو عبدالله طيـبـكـم مـا نسـيتـه *** راعي الجمايـل كيف يالقـرم ننساه
أنـت الصديق الـلي لزومي قضيتـه *** ومعروفكم طول الزمن مـا جحدنـاه
مـا يـوم بـار بـواجـبي كـان جـيـتـه *** القـرم لـي عـنـده كـرامه ولي جـاه
يـا مـا ويـا مـا بـالـلـوازم نـصـيـتـه *** من طاب ينصى والردي ما اترجاه
ويا مـا نخـاني من رفيـق ونخـيتـه *** حيثـه من الـلي تفعـل الطيب يمنـاه
مـا مـل لـو بأهـل المشاغل بـلـيتـه *** يصبـر ولا يغـضب رفيـقـه ويـجفـاه
النـادر الـلي يرفـع الـراس صـيتـه *** نـعــتـز بـمحـمـد ونـفـخـر بـطـريـاه
الطيـب وفعـل الغـانـمة بـه هـقيتـه *** وإلى التزمت ازبـن لمثـله وشـرواه
ولا الـردي كـوبـان مـا ازور بـيتـه *** ساس الردا لو كنت ملزوم ما ايتـاه
انـصى الـذي حـزت لزومي لقـيتـه *** الـلي بوقـت المعـضـلـه دوم نـلـقـاه
لـيـتـه تـعـذر صـاحـب الجـود ليتـه *** مشغول واشغلته عسى النذل يفـداه
الـلاش كـن إلـى مـدحـتـه هجـيتـه *** لـكـن محـمـد يـمنـعـه طيـب مجنـاه
من يصنع المعروف عرفه شريتـه *** ولا الردي في بخس الأثمان بعـنـاه
ورد الجـمـايـل كـادنـي لـو بغـيـتـه *** عسى ولـي الكـون بالخـيـر يجـزاه
* وهذه القصيدة من شعر عبدالله بن دهيمش بن عبار العنزي يثني على الشيخ
حزام بن معضد الخرصان من مشائخ قبيلة آل شامر من العجمان:
98
المـدح والـتمجيـد يـزهـا الأجـاويـد *** ولا الـردي واللاش مدحـه خسـاره
يـسـتـاهـل التـمجـيـد قـرم الأوالـيـد *** حـزام الـلـي بـالطيـب يـرفع وقـاره
الشـامـري لأفـعـال جـده شـواهـيـد *** إلـى تـطـاروا فـي مـجـال افـتـخـاره
يا حـزام كسبـت الثنـاء والتحـاميـد *** أنـا اشـهـد أنـك تـستـحـق الإ مـاره
صنديد تنجب من صماصيم صنديـد *** صفـوة سلايـل عـز ضيفـه وجـاره
لو كان دورك في عصور المطاريد *** إلـى ثـار من وقع الحوافـر غـبـاره
مالـك شبيـه باللقـاء كـود أبـو زيـد *** يضرب على الكايد إلى صار غـاره
من لابة تدحم على الجمع ما تحيـد *** عجمـان سـاس المرجله والجبـاره
يتلـون أبـن حثـلين سقـم الأضاديـد *** عـوق الحـريـب وبالـملاقـى دمـاره
أنتـم هـل الطولات رغـم الحـواسيد *** عـدوكـم مـا يـهـتـنـي فـي ديـــــاره
امجـادكـم مـا تـنحـصي بالـتـعـاديـد *** والمعـذرة يا أهـل الفخـر والنمـاره
مـدحـتكـم يـا حـزام مالـي مقـاصيـد *** والشـاهـد الـلـه مـا بـقـولي قمـاره
لـكـن نـعـزك والـضمـايـر مـواديــد *** ولـولا المعـزة مـا نجـي لـك زيـاره
قـلتـه وأنـا من ساس لا بـة معانيـد *** تـاريخـهـم مشهـور مـثـل المـنـاره
وأن قيل منهم قلت ربعي ضنا عبيد *** مـن صلـب وايـل باللوازم اسعـاره
مـن حـد تـيـمـاء للغـزالـة إلى فـيـد *** ومـن قـبلي الحرة إلى غـرب قـاره
ومـا حـدتـه خـيـبر لحـزم الجلاميـد *** ومـن الـزبيـر إلـى شمـال العشـاره
ربعـي لـهـم فـي كـل ديـره مـواريـد *** وتـاريخـهـم مـا ذوبـتـه الحـضـاره
أولاد وايــل حـافــظـيـن الـتـقـالـيــد *** مـا منهـم الـلي ضاع سلمه وكـاره
* وقال عبدالله بن دهيمش بن عبار بالشيخ حزام بن معضد الخرصان :
99
يا راكـب الـلي مـن مديـل الثمـانيـن *** ونـيـت تـوه مـا مـشى بالـتمـاريـن
صنع الخبير الـلي يعـرف القـوانيـن *** من مصنعه تفقده جرج ابن جـرج
ونـيـت هـاف وللـسـريـعـات سـبّـاق *** يركـب عـليه من الشغاميم سـواق
قـم يـا نديـبي مـد عسـاك مـا اتعـاق *** هاك الرسالـة حطها داخـل الـدرج
سافر بحفظ الله عسى الرب يرعاك *** ود الـرسالـة بالـعـجـل لا عـدمنـاك
ملـفـاك بـيـت العـز والـمجـد ملفـاك *** بيت الندى شيّد على مدخل الخرج
تلقـا مضيـف الشامـري بالـرفـيـعـه *** بيـت ابن معضـد للهواشل شريعـه
مـن لا بـة العجمـان ما هـم نـزيـعـه *** من روس يام ودونهم يقصر الهرج
ملفـاك شيـخ مـن مشايـخ بـني يـام *** ساس المروة والفخر حضرة حزام
عـاداتـهـم بـالـكـون يـمـشـون قـدام *** وعـن الهزيمـة خيلهم كنهـا عـرج
عجمـان نعـم الحي لا قـيـل عجمـان *** الـلا بـة الـلي بـالـملازيـم شجعـان
وأن جالت الخيلين بالكـون فرسـان *** يـوم المعـارك ضربهـم للعـدا زرج
واخـص فـي مـدحي صناديـد شامـر *** ادنـاهـم الـلـي فـي حيـاتـه ايغامـر
شروى حزام إلى اعتلا سرج ضامر *** قـرم نطيحه باللقـاء يخلي السرج
سليـل ابن خرصان راعـي الركايـب *** حـامي ونـيـات النضى بالحـرايـب
حافظ على الزرفات عوص النجايب *** لماسمع حس المنادي على البرج
اللي رقى مـن فـوق صرح المعـالي *** سامه بغالي الروح والعمر غالـي
الـعـز الأ قـعـس عـقـبــه لـلعــيـالـي *** صـوارم يثـنـون بالموقـف الحـرج
والخـاتـمـه يـا سامعيـن ابـن عـبـار *** صلـوا على اللي للمخاليق مختـار
عـد الغصون وعـد شتلات الأشجـار *** واعـداد مـا تثمـر بساتين بالمـرج
* وهذه الأبيات أيضاً قالها عبدالله بن دهيمش بن عبار العنزي يسند على
الشيخ حزام بن معضد الخرصان :
100
قـال الـذي شـال الـقـلم بـيـن انـاملـه *** سجـل قريح القول واختار صامله
منظـوم مـا قـالـه عـلى شـان غـايـه *** ومن لا طلب مولاه ما العبد دام له
قـم يـا نديـبي فـوق مـا يبعـد المـدى *** هـافٍ مـعـداتـه لـلأسـفـار كـامـلـه
مـن نـوع فـرت الـلي قـليلـه مثايلـه *** خطـرٍ يطيـر الهـاف لـولا فـرامـلـه
هـاف نجـبتـه نـاجـبـه شـف غايتـي *** سافـر يخـم القـاع والخـط حـامـلـه
مرسول صوب حـزام مقـدام شامـر *** يلقـاك بالترحيـب مـا هـي مجاملـه
صـنـديـد بـاسـل بالـلـوازم مـجـرب *** كنـه هـديـب الشـام يـنقـل محـاملـه
عوص النضى تعرف مفاعيل جـده *** تسـرح بظلـه شمخ النيـب هـامـلـه
راعي الركايب يوم عصر النجايب *** مـا حـاول الطـمـاع يـقـرب زواملـه
إلى هاجت الهيجـا وكتـم غـبارهـا *** خاب العذول وصارت الحرب شامله
من لابة العجمان في حامى الوغى *** نـطـيحهـم بـالـكـون تـكـثـر ارامـلـه
* قال عبدالله بن دهيمش بن عبار هذه القصيدة يشكر ناصر بن صالح العرق
المري حيث له مواقف تستحق الثناء والعرفان :
101
بديـت بسـم الـلي تعلا عـلى الكـون *** رب العباد أمره على الكاف والنون
ادعيه باسمه خالقي واطلب العون *** وارجي الولي ما غيـر ربي رجيتـه
ومن بعد ذكرك يالولي نبدع القاف *** امـثـال مـا هـي مـن هـذاريـم بـلاف
مثل الجواهر صوغها عند صـراف *** نيـروز مـن كـل الشـوايـب نـقـيـتـه
مـا قـلـتـهـا طـلاب بـلـغــه ولا مـال *** الرزق عند اللي على الكون متعـال
قـلتـه فخـر بامجـاد ذربيـن الأفعـال *** ولا الـردي مـذمـوم حـيــه ومـيـتـه
ولا قلت مقصودي على شان غايـه *** اسند عـلى الـلي ما يحـب الدعايـه
ناصـر بفعـل الطيـب فـيـه الكـفـايـه *** سـوى جـميـل وبالمـدايـح جـزيـتـه
يستاهل التمجيـد مـن يفعـل الطيـب *** اللي حفـظ سلم العـرب والمواجيب
قـرم العـيال الـلي مضالـه تجاريـب *** نـادر صوارم يـرفع الـراس صيتـه
نـاصـر ابـن صالـح زبـون الـونيـه *** ساس المكـارم والصخـى والحميـه
ربـعـه بـني مـره عـريـب السـميـه *** الـعـرق بـاشـعـار المـدايـح عـنـيتـه
ناصـر بتمجيـده تفيـض القـريـحـه *** شـرواه يـشـتـاق الضميـر لمـديحـه
نسل العروق أهـل الوجيه الفليحـه *** مجـده عـلى بيض الصحايف قريتـه
منجوب ساسـه مـن صواريم مـره *** ريـف الصحيـب وللمـعـادي مضـره
الصيرمي صـرح الشـوامخ مـقـره *** روس العـوالي يا أبن صالح رقيتـه
ناصر جمع بين الشهامة والأخلاق *** يسعى عـلى العـليا وللمجـد عشّـاق
من عصـر جـده كان للطيب سبّـاق *** ويشهد عـلى ما قـلت من زار بيتـه
جمالته طـول الزمن دوم ما انسـاه *** اطلـب لـه التوفيـق من عـند مـولاه
عـلى خـويـه مـا يـغـظـلـم امحـيـاه *** ويفـزع إلـى منـك زهـمـت ونخـيتـه
نـقـلـت عـنـده حـيـث قـربـه نــوده *** الـقـرم ذخـر الـلـي ظـروفــه تـحـده
الـظـرف لشخـوص الحمـايـل نعـده *** ولا عـلى الخـايـب سكـت و كميتـه
الـلاش مـا نشكي عـليه الظـروفـي *** نشكي عـلى الطيـب إلـى قال يوفـي
الـلـه يفـكـه مـن جـميع الصـدوفـي *** حـيثـه إلـى حـدن زمـانـي نـصيـتـه
عـز الرفيـق الـلي تراثـت اشغــالـه *** من يـزبـنـه ملـزوم يـلطـف بحـالـه
الـشـاهـد الـلـه لـه عـلـيـه جـمـالـه *** فضـلـه ولـو طـال المـدا مـا نسيتـه
شكيـت لـه مابـي مـن المـال عـازه *** لـكـن حسـب ظـرفي طلبـتـه اجـازه
عنـدي عمـل مطلوب مـني انجـازه *** وضحـت مطلـوبـي وسـدي بـديـتـه
قال ابـرك الساعات يأتيـك ما تريـد *** يالوايلي مرخوص من دون تحديـد
وأن كـان ما تكفيـك نعطيـك تجديـد *** ولا ترجع الا أن كان شغلك قضيتـه
واخـبـرك يا سـامع كلام ابن عـبـار *** بسم الكريم ختـام منظـوم الأشعـار
وصلوا على الـلي للمخاليق مختـار *** الـهـادي الـلـي سنتـه مـا عـصيتـه
* وقال عبدالله بن دهيمش بن عبار هذه الأبيات أيضاً يشكر ناصر بن صالح العرق على معروفة :
102
يستـاهـل التمجـيـد والـمـدح ناصـر *** الـبـاسـل الـلي بـالـمـعـالـي مـقــره
مـن روس لا بـه طيبيـن العـنـاصـر *** منجـوب ساسه من صواريـم مـره
من عصر يام إلى الزمان المعاصـر *** خـويـهــم نـال الـفـرح والـمـســره
ستـر العـذارى هـايفـات الخـواصـر *** في ما مضى لهم عـلى الخيل كـره
من رفقت الشغموم ما شفت قاصـر *** دايـم خـويـه مـا تـجـيـه الـمـضـره
غديـت من كثـر المشاغـل محاصـر *** لـكـن كـفـاني طـيـب السـاس شـره
* وقال عبدالله بن دهيمش بن عبار هذه الأبيات تهنئة بمناسبة ترقية الرائد
ناصر بن صالح العرق المري إلى رتبة مقدم :
103
انـسـر بـالـي يـوم قـالـوا تـرقــيــت *** مـبـروك تـرفـيـعــك بـرتـبـة مـقـدم
تسـتـاهـل الترفيع يا طيّـب الصيـت *** ومـن جـاد سـاد ولـلـمعـالـي تـقـدم
لا جيب ذكرك قيل يا نعم ما اطريت *** والـلـي عـنـالـك خـاطـره مـا تخـّدم
يـعـل مـا تشمـت عـليك الشواميـت *** شـروى جـنـابـك مـادحـه مـا تـنـّدم
من روس لابه بالسنين الشحاتيـت *** أهـل صـيـانـي بـالـمـفـطـح اتـيـــدم
تسقي اعداها من شراب الحلاتيـت *** وقـت اللـقـاء بأيـمانهـم ينـثـر الـّدم
واظـن بليـا الساس ما يبـتني بـيـت *** لـو طـال حـيـطـه يالسنـافـي تـهـّدم
وختامها على اشرف الخلق صليت *** عـد الـمـزون الـلـي خـيـالــه تـّردم
* وقال عبدالله بن دهيمش بن عبار العنزي هذه القصيدة يثني على أهل مدينة حرمة في سدير :
104
سر يا قلم واكتب عـلى كيف ماريـد *** مـن قـاف ابن عبـار سجـل مثـايـل
امثـال مـا تـنقـد عـليهـا القـواصيـد *** انـظـم عـذيـات الـبـيـوت الـجـزايـل
مـن خـاطري سجلتهـا عقـب تأكيـد *** اثني على اللي مـا بهـم قـول قـايـل
الربع أهـل حرمـه قـروم الصناديـد *** عـزوة عـقيـل النـافـليـن الحـمـايـل
والمـدلـج الـلي يـدركـون التحاميـد *** عـاداتـهـم بالطيـب حـوش النفـايـل
اخص عقب حسين من دون تفـنيـد *** واعــم بـالـتـمـجـيـد كـل الـعــوايـل
ربـعٍ لـهـم بالـطيـب عـاده وتعـويـد *** ريـف الهـواشـل مكـرميـن النزايـل
مضيـت مـدة بـيـنهـم تـشبـه العـيـد *** بيـن الفيـاض المعـشبة والخـمايـل
وسـط الصياويـن الكبـار المشـاييـد *** فـيهـا النشـامـا كـاسبيـن الـنـفـايـل
يا بـعـدهـم عـن الـردى والـمنـاقـيـد *** ويا قـربـهـم للمـوجـبـه والفضايـل
نـعـم بأهـل حـرمـه قـروم الأوالــيـد *** تاريـخـهـم مشـهـور والـجـد وايـل
يوم السيوف ويوم عصـر البواريـد *** يـروون حـد المـرهفـات الصقـايـل
هـم لبعـضهـم بالـلـوازم عـواضـيـد *** يا ما نحـوا عـن دارهـم كـل عـايـل
لـهـم بمنظـوم الشـويعــر تـمـاجـيـد *** موروث من عبـر السنين السمايـل
أبـن بشـر يـذكـر صحيـح الأسـانيـد *** وتاريخ أبن عيسى يوضح سجايـل
وتاريـخ ابـن لعبـون يـذكـر بتحديـد *** سجـل نسبهـم بالعـلـوم الصـمـايـل
مـا مـنهـم الـلي قيـل مجـنـاه تقـليـد *** من روس وايل من إعـزاز القبايـل
يـوم الظعون اتسيد في نجد واتميـد *** يـوم العـرب ما بيـن صايل وجايـل
حمـوا شتيـل غـروسهم والمعـاويـد *** ولا ساقـوا الخـوات لـو هـم قلايـل
امجادهم مبـطـي عـليهـا شـواهــيـد *** يـوم المراجـل حصلـوا عـلم طايـل
امجـاد ماضيهم مثـل شـامـخ الحيـد *** والـيـوم لا زال الـفـخـر بـالسـلايـل
نفخـر بهـم لـو يزعلـون الحواسيـد *** والـنعـم والـلـه فـي كـرام السبـايـل
مـجـدتـهـم بـالـقـاف مالي مقاصيـد *** إلا الـفـخـر فـي طـيـبيـن الخـصايـل
ثـم اسمحو لي كان للوصف ماجيـد *** والـمـعـذرة يـا كـاسبـيـن الجمـايـل
وصلوا على اللي زال دين الملاحيد *** مرسل من البـاري بخيـر الرسايـل