قال عبدالله بن دهيمش بن عبار العنزي هذه الأبيات أهداء للشيخ عبدالله بن عبدالمحسن المبدل صاحب الوقات المشرفة حفظه الله ورعاه :
اثـني عـلى الـلي بـه حميـه وغـيـره *** فعل الفخـر والطيب من منهله عـل
حـيثـه شبيـه السيـف يـبقى ذخـيـره *** في كـف فارس حزت الكون له سل
المكـرم الـلـي تـشكـر النـاس خـيـره *** هـو السنـد لـلي شكا العـوز والقـل
يـوقـف بـجـنـبـه بالسنيـن العسيـره *** قـدر الـذي ينصـاه مـا ينتقـص جـل
ذاك المـبـدل مـن شخـوص العشيـره *** تـمسـك بصحـبـه وقـل لـلـردي ول
مـثـل بيـاض الشاش ناصع ضميـره *** حـليـم مـا يحمـل ضـغـينـه ولا غـل
أعـني عبدالله لـه مـعي خـيـر سيـره *** الشيخ عـنـده كـل عـقـده لـهـا حـل
عـبـدالـلـه الـطـاهـر نـقـي السـريـره *** عـن المـراجـل مـا تكـاسـل ولا زل
عـون الـرفـيـق وبالـلـوّازم نـصيـره *** مـثـل البليهي شايـل الحمل مـا مـل
مـاهـو كـمـا المربـد ولا تقـل صيـره *** لاشك مثـل الحيـد يـذري ولـه ضـل
يـا مـا نـصـاه الـلـي حـوالـه فـقـيـره *** يسند له اللي من الزمن ساعده كل
كـفّـه مـثـل وبـل الـمـزون الـغـزيـره *** يروي معاطيش الظوامي اليـا هـل
يمشي عـلى منـهـاج فـهـم وبصيـره *** والـلي يسيـر بمسلك الحـق مـا ذل
ماهـو رفيـق أهـل النفوس الشريـره *** ولا هو عشيراللي كلامه خذ وخـل
مـا سـار بـدروب الـردى والمـعـيـره *** ولا تجتمع عنـده عصابات واشلـل
عسى الـولي مـن كـل عايق يجـيـره *** وعساه يـبقى بـعـز يا لـيـت يا عـل
قال عبدالله بن دهيمش بن عبار هذه الأبيات توضيح لمن تجهله الحقايق :
نـويـت أوضح صادق العـلم بإيـجـاز *** عن مصدره ماهو كلام المغاشيش
حـنـا بـنـي وايـل مـن احـفـاد عـنـاز *** ياللي تبون لواضح الأصل تهميش
من نسل الـلي طعـن خصيمه بعكّـاز *** عـامـر ابـن أسـد سليـل المداغيش
حيـث انتحال الجـد بالشرع مـا جـاز *** أقـروا أحاديث النبي صفـوة قريش
جـد عـنـزة يـكـفـي ولا عـاد نـعـتـاز *** وايـل جديلـه ليش لـه ننتسب ليش
اصل عـنـزة ثـابـت ولا عنـه ننحـاز *** والـلي تعبّـث بالنسب مقصده ويش
بشر وضنا مسلم شريفين واعـزاز *** مـرويـن لـدنـات الـرمـاح المراييش
يوم العرب في كون وطراد والـزاز *** تعـرف فعايلهم على الخيل والجيش
حـمـايـة السـاقـه ثـقـيـلـيـن الأرواز *** تقـفي عـداهـم مـن لقاهـم مخاريش
مـا نستـعـيـر الجـد لـو كـان يـمـتـاز *** بالصيت والشهره ولو شاخ حتيش
لـو قـيـل جـدّك مـن تـنـمـّر بـخـــزاز *** أقـول ما أقبـل غـيـر جـد الحناتيش
وقال الشاعر عوده بن عطيش بن حضيري المسيكي هذه القصيدة مجاراة لقصيدة عبدالله بن دهيمش بن عبار :
سـار الـقـلـم والفـكـر للشـعـر فـرّاز *** هلّت سحاب الشعر ماهي رشاريش
من شاعـرٍ ماهـو عن النّظـم عجّـاز *** ايفـصّلـه تفصيـل لـبـس الدشاديش
وهـرج بلا معنـا مع الناس مـا جـاز *** النـاس قـالـوا قالهـا عـوده عطيش
بابيـات شعـرٍ واضحهـا مابهـا الغـاز *** مرسولـه بالجـوال مامن مطاريش
تـلـفـي لـرجـلٍ بالـمـواقـيـف يـمـتـاز *** شاعـر بـني وايـل بعيد المطاويش
صـح الـلـه لسـانـه وبـالغـانـمـه فـاز *** عـبـدالـلـه العـبـار نسـل الحناتيش
وضّـح لـمـن هـو جـاهـلٍ جـد عـنـاز *** ناس حقوده وناس يمكن دراويش
وضّـحـت لـلـجـاهـل ولـجـمـت لـمّـاز *** وفهّمت لمن يلطّش الهرج تلطيش
وصـورتـهـا تـصـويـر فـلٍـم ابتـلـفـاز *** وشافوها العقيّل من غير تشويش
جمع عنـزة يهابـه الخصم مـا أيـهـاز *** وتربـش عـداها بالميادين تربيش
فـي كـل ديـره بفعـلهـم سـووا انـجـاز *** مثبتّـه بالتاريـخ مـاهـي خـرابيش
وقال عبدالله بن دهيمش بن عبار هذه القصيدة جواب لقصيدة الشاعر عوده بن عطيش بن حضيري المسيكي :
مشكور يالـلي لجزل الأشعار كـزّاز *** عوده رفيع الشان من خلفة عطيش
قـافـك مـثـل عـقـد الجواهـر ابـرواز *** كـنّـك تفتّـش غـايـة القـلـب تفتيـش
تمشي عـلى منهج أحاديث ابـن بـاز *** ما سـرت مع الـلي يـدور التباليش
عسى يفـداك مـن العـرب كـل هـمّـاز *** وعساك تسلم طـول الأيـام وتعيش
يالقرم بعض الناس هرجه استفـزاز *** يكتب خـطأ وايخيّش الربّع تخييش
الـلي خـلـط سـكّـان خيبـر والأهـواز *** مثل اللي بغلس الدياجي حواشيش
مخطـر يجيه الـلي إذا اهتاش قـمّـاز *** قوع الشّجر يلقابها حظف وحنيش
عـزوه لهـا من طيّب الأصل مـركـاز *** تاريخهـم معـروف مـاهـم أحابيـش
لاشك بعـض الناس مـا يسمع العـاز *** دايم يطنّش صادق الهـرج تطنيش
تـلخـبـطـت مـابـيـن عـاجـن وخـبّـاز *** وصـاروا يسبّون العبـاد الخفافيش
واللي اعتدى فضخت عينه بمخراز *** خطو الذي مايرعوي غير تجحيش