قال عبدالله بن دهيمش بن عبار هذه القصيدة يسند على الشيخ متعب بن عبدالهادي الفققي حيث له مواقف مع الحق وأفهام الذين يبثون الدعايات المضلله : 240
يا الـلـه أنـي طالبك نصري وعـوني *** بـك نعـوذ مـن الدواهـي والبـلاوي
أكـفـنـي يـا رب شـر الـلي ابلشـوني *** بالـدعايـات الـرخيصـه والشكـاوي
خـاب سـعي الـلي يـبـون يعـيـبـوني *** أحمـد الـلـه ما لقوا عيب ومساوي
العـفـوا يا أهـل الفخـر لا تواخذوني *** أبـي أفيـد الـلي عن الواقع عماوي
قـصدي أصحاب الجهالـه يفهموني *** بالـوكـاد ولا نـبـي جـلـع الغـطـاوي
مـالـهـم مطـلـب ولـكـن هـم يبـونـي *** اكتـب بحـوثي خـواريـف وحجاوي
عـن ذكـر صـدق الحقايق ما ثنونـي *** ولا يجيـز الشّـرع تغيـيـر العـزاوي
أرفـض التـزويـر مـهـمـا يشمتـوني *** قـلـتـهـا ولا هـمنـي كـثـر الشنـاوي
أسنـد الـقـول الصحـيح وصـدّقـوني *** بالمصادر ماهـي ظنـون وهـقـاوي
وش يبون الظالمين الـلي اظـلموني *** يـشهـد الـلـه مـا تلقـيـت الـرشاوي
الـرجـال أهـل الضمايـر يـبخـنـونـي *** شيمتي مـا بـعـتـهـا ولاني حـراوي
وكان بادت عن نقـل حـملي متـونـي *** أعـتـزي بأهـل الحميـه والنخـاوي
عـادت أصحاب الذّمم يثـنـون دوني *** ومن يـعـد الحـق يـردع كـل غـاوي
شروى متعب فـيه مـا خابت ظنوني *** أبـو عبدالله مـثـل وصـف الـنـداوي
رد قـول الـلـي لجـهـدي يجحـدونـي *** حيثه من أهل القهاوي والصهاوي
الشخـوص أهـل الحـميـه يمدحـوني *** وأهـل النمّـه عساهم بألـف هـاوي
كـل هـدانـي مـن هـلابـيـج العـفـوني *** عـد نفسه مـثـل شليويح العـطاوي
قال عبدالله بن دهيمش بن عبار هذه القصيدة رد على قصائد الأخوين حسين بن عوده القراري ومحمد بن عايد الدوهان : 241
اسمحـولـي يالـرفـاقـه وامـهـلـونـي *** أبـي أرد أن كـنـت أنـا لـلـرد قـاوي
أكـتـب المنظـوم من صـافي فـنـوني *** تـحـيـات معـطّـره فـي ريـح جـاوي
لأبـن عـوده وأبن عايـد مـا يهـوني *** خلفة الشجعان في عصر الحـداوي
واشكـر الـلي فـي بحـوثي شجعوني *** وعلى عدواني كما النجم السماوي
يـرجـمـون الـلي هدفهـم يرجـمـوني *** ولا يقـر الجـور من طبعـه حماوي
يـوم بـعـض الحـاقـديـن يحـاربـونـي *** بالسوالف بـان كيد أهـل الـزراوي
نـاس تطعـن بـي ونـاسٍ يشتـكـوني *** ومن مرض قلبه وجدنا له مـداوي
طـبّـه الـلي بالشـريـعـه يحـكـمـونـي *** حكـمهـم بالحـق تـملـيـه الـفـتـاوي
الـزعـيـم الليّـث لشعـوبـه يصـونـي *** يـردع الـظـالـم ولـلـمـظـلـوم يــاوي
أخـو الأنور ضـد من صابه جنـوني *** يـربـط الـلي بـان غـلثـه مـا يـلاوي
الغـضـنـفـر كـان كـشّـر بـالـسنـوني *** مـا قـدر يقـرب عـرينـه كـل عـاوي
دام صافـيـن الضـمـايـر ينصفـونـي *** مـا يـهـم الـلي لأخـو مـرّه مـخـاوي
الـرجـال أهـل الحـمـيـه سـاعـدونـي *** مـن فضـل رب الملأ ماني خـلاوي
هـل العرفا وعزوتي حـمـر العيـوني *** باللّـزوم رواحـهـم تـهـدى هـداوي
وعـزوة سلـيمـان حّـزت يعـتـزونـي *** تصـرخ العـدوان بصيـاح ونعـاوي
وربعي الـويـلان ضـد الـلي يخـوني *** كـل عنـزة عـزوتي مـاهـي حكاوي
عـن بعـضهـم دايـمـاً مـا يخـتـفـوني *** يوم جلد الشلف كـنّه صوت مـاوي
هـم كـبـار الجـاه وكـبـار الصحـوني *** وستر اللي لباسهن عذي المزاوي
لأنتخـوا بالكـون في شقـر القـروني *** بالـمـعـاره خـصمهـم تـلـقـاه ثـاوي
قال عبدالله بن دهيمش بن عبار هذه القصيدة جواب لقصيدة الشاعر خضير بن هليّل المدعج المضياني أبو بدر ونظراً لأن هذه القافية
سبق وأن قيل على طاروقها عدة قصائد فقد غيرت القافيه وأسندت له هذه القصيدة شاكراً ومقدراً حسن الثناء وقلت : 242
نـويـت أوجّـه وافـر الشكّـر لخضيـر *** القـرم أبـن مـدعـج سـلايـل هـلـيّـل
أزكـى سـلامي مـع تـحـيـه وتـقـديـر *** اعـداد مـا يـنبـت عـلى القـاع ثـيّـل
واعـداد منبـوت الـزهـر والنـواويـر *** وعـد الحصا واعـداد رمـل السليّـل
القـرم الـلي عـبّـر من الشعـر تعبيـر *** ولفضـه مثـل منطق حمـود السبيّل
لـك الشّكـر يا مسطّـر القاف تسطير *** قافك شبيه اللي على الروض سيّل
تثني عـلى جهدي عسى فالك الخيـر *** وشكري بحقّك يا أبن مدعج قـليّـل
يشهـد عـلي الـلـه مـا جبـت تـزويـر *** أكتـب وأوضح مصدري مـا اتخيّـل
وضحّـت لـلي مسلكه خـالـف السيـر *** خطو الـذي عن منهج الـحـق ميّـل
ومـن زوّر التـاريـخ ضيّـع جماهيـر *** لاشـك هـو مكشـوف مهـمـا تحـيّـل
لـو كان مخطي ما يطاوع من يشير *** والـيـا نصحتـه زاد غـيض وتشيّـل
عـزالـلـه أنـك ما حصل منك تقصير *** يـوم الـردي كـوبـان وجـهـه مـنيّـل
البـحـث والـتـألـيـف يـبغي مشاويـر *** مـا طـالـه الـلـي فـي مـقـرّه مـثـيّـل
ولا يـدرك ألا بـالتـعـب والمخاسيـر *** يصعب عـلى الـلي منزوي بالضلّيل
ويوم أبذل المجهود وأواصل السير *** الـجـاحـد الـلـي يـنـتـقـد كـان عـيّـل
وأشـكـر جنـابـك يا سليـل المناعيـر *** لـكـم الفـخـر قـبـل مـغـازي عـقـيّـل
ربعـك هـل الصّبحـا قـرومٍ المشاهير *** الطيّـب مبطـي فـي حـمـاهـم مقيّـل
يـوم الملاقـا بـمـرهـفـات الـبـواتـيـر *** يخلـون سرج الـلي سوات الغـزيّـل
عـدوهـم عـنـد اقـتـحـام الـطـوابـيـر *** كـان أعـتـدى خـلـّوا حـريمه تـويّـل
بالوقـت الـلي يـلـوذ بـه وافـر الميـر *** والـزاد شـح ومـن سفـر مـا تكيّـل
أولاد سـوي يـكـرمـون الخـطـاطـيـر *** وبـرباعهـم تـلقـا الـدسـم والمهيّـل
قال عبدالله بن دهيمش بن عبار هذه الأبيات من الهجيني جواب للأخ الشاعر مشوّح الجعفري : 243
يـا مشـوّح يـا نـادر الأحـرار *** جـزلات الأبـيـات وصـلتـنـا
اشـكـرك يـا مسنـدي تـكـرار *** حـيـثـك تـفّـهـمـت غـايـتـنـا
يالجعـفـري يا عـزيـز الجـار *** مـا فـاد الـلي راد يـبـهـتـنـا
ياراعي الجدعا عساك مجار *** لا تــعــتـذر يــا قـــرابـتـنــا
كــانـي تـصـديـّت لـلـشّـعــار *** هـاك السنـه يـوم فـزعـتـنـا
حـنـا قـرايـب مـافيـهـا أنـكار *** عـزوة ضنا عبيـد عـزوتنـا
يـالـقـرم مـن مـاضي الأدوار *** من يعتدي عـنـه وش نـتنـا
قال عبدالله بن دهيمش بن عبار مجاوباً الزميل الشاعر مشوّح : 244
جـاني قرايض كمـا المرجان *** أو فـل من روض مقطوفي
القـرم مشّـوح نـظـم قـيـفـان *** وعـن ردّه ما تمنع ظروفي
يا مشّوح يا خلفـة الشجعـان *** عساك ما تشوف صادوفي
مشكـور يا مقـلّـط الخـرفـان *** تـكـرم اليـا جـولك ضيـوفي
يـفـداك الـلي منطـقـه بهتـان *** عـايـل وللحـق مـا يشـوفي
نـقّـال هـرج وبــذي لـســان *** وصاحـب مكـايـد وملقـوفي
يامشوّح شفت العباد ألوان *** لـهـا تـشـاكـيـل وصـنـوفـي
بالناس من تشبه الغـربـان *** صدره من الحسد ملهـوفي
خطـو الـذي بالبشـر بلشان *** تـقـول بـالخـلـق مـكـلـوفي
أن جيت رحّـب تقـل شفقان *** وأن رحـت شلفاه بكتوفـي
قال عبدالله بن دهيمش بن عبار هذه الأبيات من الهجيني جواب لأبيات مشوّح بن سعيّد أبو نواف الجعفري : 245
جـتـنـي قــوافـي كـمـا الـمـحــار *** مـن القـرم الـلي عـنـدنـا غـالي
الـمـنـصـف الـلـي لـنـا شــكّـــار *** لـي عــنــده الـمـنـزل الـعــالــي
الـقـرم مـشـوّح بـنـا فــخّـــــــار *** الـجـعــفــري يــذكــر اعــمـالـي
أخــذت مـسـهـم مـع الـشّـعـــار *** وألـــفـــت لــلــعــزوة لــحــالـي
الـربـع الـلـي ترخـص الأعمـار *** عــنــاز ذربــيــن الأفــعــالــــــي
جهدي عند أهل الفخـر مـا بـار *** ولا تـجـحـده كــود الأنــذالــــــي
قال عبدالله بن دهيمش بن عبار هذه الأبيات يجاري أبيات أحمد بن عايد الدهيم : 246
اشكـر جنابـك يالزميـل أبـن عـايـد *** تـعبـيـر لفظـك يالسنـافي فهمنـاه
يـا أبـن دهـيم أخبـرت كـل البـدايـد *** بالـلي عـن أمجاد القبيله قـرينـاه
حـيـث عـنـزه تاريخهـا لـه شهايـد *** تاريخها من دور عـامـر ذكـرنـاه
والـلـي يـبـي عـن الحقيقـه يحـايـد *** جـبنـالـه العـلم الـوكـاد ونصحناه
يا نسـل مـروي مرهفـات الحـدايـد *** وشيوش الـلي بالفعايـل مـدحنـاه
عطف عـلى العطفه بـيـوم الشدايد *** في حـرب خيبر قـد عكلي بشلفاه