قال عبدالله بن دهيمش بن عبار من قصيدة : 103
سميـت بسـم اللـه محـصي عبـيـده *** رب الملأ عرشه على الكون عالي
أرسـل رسولـه في صلاح العـقيـده *** يرشد ويهدي عن دروب الضلالي
نـعـوذ بـه مـن شـر خـلـقـه وكـيـده *** وإبليس أخـو مـره خبيـث العمالي
مـا كـل مـن يـبـي الجمـالـه يصيـده *** ومن لا لـه أول مـالـه اليـوم تالـي
وين الذي يصدق إلى أعطى وعيده *** بعض العرب يالقرم هرجه خيالي
السيـل يـنـقـع بالصـفـاة الـصـميـده *** والرمل ما يصمد لـو السيل سالي
الـزرع يـفـرق سنبـلـه من حصيـده *** وأرض الصبخ مابه لذودك مفالي
والـنـاس كـلـن فـوق متنـه نضيـده *** والكل يشكي مـن ظـروف الليـالـي
جـور الـزمـن فجـع ضمايـر زبيـده *** مـال بـولـدهـا وهـو خليفـة أوالــي
جتـه المصايب من شقيقه عضيـده *** وعقب الخلافـة هـام في دو خالـي
ومن قصيدة قال عبدالله بن عبار : 104
يا الله يا منـزل من المـزن هملـول *** يا رب يا مغيث الثـرى عـن جفافـه
تلطف بحال للي من الوجد منحول *** عـده عـلى جـمـرٍ تلاهـث أرضـافـه
جميع خلق الـلـه لها الباب وعقول *** والـكـل مـنـهـم يـدعـي بـالثـقـافــه
من لا يحوزالمال والضان والشول *** يـمـد رجـلـه قــد طــارف لـحـافــه
ما كـل سيف مشذر الحـد مصقـول *** ولا كـل ضخـم من الخلايـق تخافـه
الطـول مـا يرفـع هلابـيج وأخبـول *** أيـضـاً ولا ضـر الشجـاع النحـافـه
كبـر الهياكـل مع خـراتيت وأفيـول *** والجسـم ما فـاد الجمـل والـزرافـه
قال عبدالله بن دهيمش بن عبار هذه الأبيات مطلع قصيدة : 105
بـديـت بـالـلـي زال داجـي ظـلامــــه *** رب الملأ يفعـل عـلى كيـف مـا راد
الـقـاع مـهـدهـا سـهـول وعــدامــه *** وأرسى قواعدها على شم الأطواد
يامـن نـصـر بأمـره سـريـة أسـامـه *** وعانه على اللي دينهم كفر وألحاد
يـا رب ثـبـتـنـا نـهـار الـقــيـامــــــه *** يوم الحشروالخلق عـارين الأجساد
بحسنـاك لا تجـعـل اعـمـالي نـدامـه *** طالبـك حسن الخـاتـمه بآخـر المـاد
الـحـر يـنـدر والـحـمـامـه حـمــامــه *** ولا كـل بـاز ولـه جـنـاحيـن صيّـاد
والـنـاس كـلـن يـدعـي بـالـفـخـامــه *** ولا هم سوا من دور شداد بن عاد
ومن قصيدة بالرثاء قال عبدالله بن عبار : 106
دنيـا الشقا كـان البنـادم صفـت لـه *** لابـد عـقـب الكـيـف يـظهـر تـرحهـا
من تضحكه تبكيه كان أضحكت له *** طـول الـزمن مـا يـوم داوم فـرحهـا
والعبـد بالـدنيـا كمـا غـرس شتـلـه *** لـو أخضـرت لابـد يحصـرم بلحـهـا
يـسـوح والـدنـيـا الـدنـيـه تـخـتـلـه *** والـرابح الـلي دوم نفسـه نصحـهـا
لو كان يدري بالخفا وش عبت لـه *** دنـيـاه صـد وكـبـهـا مـا شـبـحـهـــا
والـعـبـد كـانـه حـان مـيـعـاد قـتـلـه *** الـروح بـسـهـوم الـمـنـايـا ذبـحهـا
وقال عبدالله بن عبار من قصيدة : 107
ما شفـت فـي دنياك مكتـوب بالقيـد *** يجـري عـلى كـل الخلايـق سـراهـا
دنيـاك لـو كـانـت مـثـل ليلـة العـيـد *** عقـب الفـرح لا بـد تـكـدر صفـاهـا
ولا أظن به مخلوق ما جـرب الكيـد *** الـكـل يشـكـي مـن بـلاوي غـثـاهـا
يشيب من جور الزمن راضع الديـد *** ولا تـاجـد الـلي لـه حوايج قضاهـا
قال عبدالله بن دهيمش بن عبار هذه الأبيات من قصيدة : 108
قال الذي يختار من عـذب الأشعـار *** عـذي القوافي من ضميره نطقهـا
وعندي نصيحة كان تسمع للشـوار *** كـب الـهـلامـة مـا يسـرك مرقـهـا
وأفـطـن تــرى مــا كـل نـوار نـوار *** عشـب الدمانـة عـافها من نشقهـا
لا تنخـدع وأحـذر ترى الزين غرار *** راعي الولع لا شاف صيده درقها
وقال أيضاً من قصيدة : 109
المرجـلـه مـن رامـهـا سـار مسنـاد *** رقـط الأ فاعـي دونهـا والحضوفي
مـا يشتهـر مـن كـان لـلـمـال عـبـّاد *** بالناس لا عارف ولا هو امعروفي
كب البخيـل الـلي مـن المـال ما فـاد *** مـا ينفـعـه كـنـز الـذهـب والألوفي
وقال عبدالله بن عبار من قصيدة : 110
لاطـف صديقـك واحشمـه لا تـضـده *** واحفـظ لسانـك لا ايتجاوز احـدوده
بعض السوالـف مثل حشـو الـمخده *** ولا لك بكـثر الهـرج نقـصه وزوده
ومن شذ عن ربعه تـرى خاب سـده *** عنـد اللوازم هم سـواعـد اعضوده
ربـعــك بهــم رفـــده وهـــده ورده *** يـوم بـه الشيطان يـبـرز وجـوده
ومـن لا يدور العـز في عـقـب جــده *** عـنـد الـلـزم مـا يـنـفعـنـه انـقــوده
ومـن لا يــــودك تــركـه لا تــــوده *** ولا يـنعـذل قــلـب تـراثـت لهــوده