قال الشيخ متعب بن عبدالهادي الفققي هذه القصيدة يثني على عبدالله بن دهيمش بن عبار :
ودّوا تـحـيـة خـالـصـة لأبـن عــبـار *** سـلام ياصـل بالحـروف السـريـعـه
جهـدك تـعـدى المنطقة يـم الأقـطـار *** ألـفـت بالأنـسـاب عـبـر الشـريـعـه
ابحـرت بالتاريخ مـن قبـل مـا صـار *** ومـن دوّر الـغـرات مـالـه ذريـعـــه
حـامـي نـسـبـنـا مـن مـزوّر وغـدّار *** والـلي غـلط ضاقت عـليه الوسيعه
عنـدك مصادر معلـنه مابهـا اسـرار *** عـن عـنـزة وأيضـاً قـبـايـل ربيعـه
وعنـدك اجـازه من طويلين الأشبـار *** حـكـامـنـا الـلي حافـظيـن الوديـعـه
سطـرت بالتـاريـخ زيـنـات الأخـبـار *** عـن القبيلـة يـا أبـو مشعـل بـديعـه
ومـن قـام بالتزويـر خايب ومحـتـار *** ومـن زوّر الأنساب مـا أحـد يطيعه
قال عبدالله بن دهيمش بن عبار هذه القصيدة جواب لقصيدة الشيخ متعب بن عبدالهادي الفققي :
الشيخ الـلي من صافي الشعر يختـار *** الطيب سلمـه والوفـاء لـه طبيعـه
متعـب يـعـلّـه مـن طـويليـن الأعـمـار *** مجنـاه مـن نسل الرجال الشجيعه
متـعـب سلايـل مـدّب الجـمـع لا سـار *** قـدّام ربـعـه مـوقـعـه بـالـطـليـعــه
حـفـيـد مـفـلـح طـيّـب السّلـم والـكـار *** لـه مـنـزلـه عـنـد الحمايـل رفيعـه
يا أبـو عبـدالله مـن بـدأ عـنـده انكـار *** واستعمل اسلوب الدجّل والخديعه
وش عاد لو هو غـر عميان الأبصار *** سود القلوب أهل العلوم الوضيعه
نـسـب ضنـا عـنّـاز مـن قـدم الأدوار *** بـاقـي ولا مـرّت عـلـيـه القـطيـعـه
والـجــد وايــل مـا يـبــدّل ولا أيـعـار *** مـاهـو بسوق المشتـرى والمبيعـه