يوجد عدد من أشرطة الشاعر الأسمر بن خلف الجويعان رحمه الله مسجلة بصوته ومن ذكرياته شريط موجه لي يحتوي على قصيدته التي وجهها لي نصيحة وهذه قصيدته :


*قال شاعـر عنزة الأسمر بن خلف الجويعان رحمه الله هذه القصيدة ينصح بها عبدالله بن دهيمش بن عبار

لا تستـمع للطايشـة يـا أبـن عـبـار *** أرفـع مقامـك فـوق يا نـادر القـول


أرفـع مقـامـك للعـلا سـر وأجـهـار *** مالك وراء المخلوق قاتـل ومقتول


يا شاعـرٍ فـي بـدع الأمثـال بـيطـار *** ما قـلت عند المستمع غير مملول


قافـك حكيـم اللفـظ كاعـرم الأنـهـار *** شـط غـزيـر مـاه عـذب وشهـلـول


من عيلـم يـزمي عـلى الـدوم فـوار *** عـرم عـرمرم للمعالي سمك طـول


أنـت الـذي فـيـك الحـمـيـة وتغـتـار *** تنقض شرابيك من الخصم مفتـول


تـثـني ورانـا عـن تـمـاثـيـل شـعـار *** منطوق لفظك صار لـه رد مفعـول


حكيم لفـظ وعـارف قطـف الأثـمـار *** تفهـم وعندك كـل معـنا لـه حلـول


مـا دام وصفـك مثـل لطـام الأبحـار *** رجل كريم الموهبة ماأنت مهزول


لا تستمع للنـاس مفشيـن الأسـرار *** لوجاك منهم يافتى الجود مرسول


اصبر وخلك يا أبن الأجـواد صبـّار *** بالصبرعالج يا فتى ضيقت الجول


هـذي نصيحة وأنـت للنصح شكـار *** فيك الوفا ولا الردى عنك معـزول


نصيحـتي عـسى لهـا منـك تـعـبـار *** وعسى لها عندك نتايج ومحصول


وأنـت الأديب الـلي خبير بالأشعـار *** أحـذر تـطـاول بالتـمـاثيـل مهـبـول


اهديك مني شور يا صلب الأشـوار *** لا تـلتـفـت للنـاس عـاذل ومعـذول


لا تـلـتـفـت لـلـنـاس حــر وصـفـار *** الطيب لأهل الطيب ساس ومكفول


وكـل المـلأ تـلقـابهـم رذل وأخـيـار *** ذريــة آدم بــيــن نــادر ومــرذول


ولا أنـت مـن ربع صواريـم عـقـار *** عـن الخطر يرعابهم راعي الشول


مـن لابـة تشهـد لهـم بوجت الـدار *** ويشهد فخرهم بين سائل ومسئول


من وايل الكبرى هل المجد والكـار *** دخيلهم دونـه عـن الخصم مقبـول


وايل رفيع الشان مـن صلـب نـزار *** دهم الرمك تنبيك عنهم هـل القـول


يا ما توطوا من صعيبات وأعسـار *** أفعالهـم من ساسهم تـارث افعـول


المنـذرية يـوم صـاحـت مـن العـار *** شقت جيوب الثوب والعقل مذهول


استصرخت بالـوايلي وأدرك الثـار *** وفـتح لهـا بـاب مـن الظيم مقفـول


قال أبشري جو لك بني بكر حضار *** كل أبلج يملـك من الخيـل زعجـول


حمي وطيس الحرب واشتبت النار *** وأقفت جحافـل قايد الفرس بفلـول


فوق الرمك يشهد لهم يوم ذي قار *** يوم أنهزم جيش العجم خيل وفيول


دخيلنـا يحـمى عـن الظيـم وأيجـار *** وهـذا فخرنا يـوم ساحل ومسحول


الا ومـع ذلـك بـعـد نـكـرم الـجـــار *** وقبـل كلامـي سابق الوقت مقيـول


يـا مـا تـحـمـلـنـا بـلاويـه لـو جــار *** يفلج قصير البيت لو جـار محمول


ويا ما هفا لأجله من المال واعمار *** بكـر وتغـلـب عطـروا كـل مسلـول


يـوم البسوس وبـادرة حـربها ثـار *** الروح تقطف والحمـر فيـه مبذول


الخيل ترجف وأزعر الموت زجـار *** وتحطـمـت عـنـده ريابيـل وافيـول


يعـلم الـلـه ما واجبـه عنـدهـم بـار *** طـال الـزمان وكايـد السـؤ محبـول


واللي جهل تنبيه صفحات الأخبـار *** عـن مجد وايل بالتواريخ مسجول


وشمر إلى صارت مواقيف وأخيار *** لا جـاء نهـار فـيه ساطي ومذلـول


أن عـزلوا صابورهم مثل الأسـوار *** الموت من كل الخصيمين مدهـول


زبـن الأخـيـذ الـلي وراه الـبـلا دار *** لا صـل صابور وراء كـل عـرزول


نعـم بـهـم وافعـالهـم مالـهـا أنكـار *** قصيرهـم عـن نكبة الوقت محفـول


الناس مثل الناس سوده والأحرار *** كلن عطاه الله من العـقـل واسبـول


أقـولـهـا و بـالـدار يـا الـقـرم ديّـار *** من كال صاع لغيره الصاع مكيول


وأما أنت عندي لك حشيمة ومقدار *** والله هو اللي يعـلم العـدل واميول


الصبـر محمـود العـواقـب بالأذكـار *** والله ما أنت بغايـة الصبر مجهول


الـلـه يجيـرك من تصاريف الأقـدار *** يامن حكيت وقـلت في حـد معقول


دنـيـاك يـارث جـيلهـا جيـل وأدوار *** يفنـا بها نزول وتارث بهـا انـزول


وكـم خـيـّرٍ تحـطمـت فـيـه وأنهـار *** لا بـد مـا تضحي جديداتها اسمـول


لو امطرت عقب المطر عج وغبار *** عـام خصاب وعام مجفاه وامحول


دور مضى يوم العرب شر وأشرار *** يـوم القبايل بيـن غـازي وحنشول


مـا يـنـدب فـعـل مضى كايـن صـار *** حدر الثرى فوقه من الرمل مهيول


ولا يـفتخـر حـي بـوافيـن الأشبـار *** لا صـار بالبرزخ مضاله أمية حول


أقفـا فخرهـم مع دهـرهـم بالأقـدار *** ما فاد لو ركبوا على هجن وخيول


واليـوم عهـد فيـه خـنـات الأزهـار *** جنـة نعـيـم وتـودع الشعـب بقبـول


الـفـعـل لـلـه ثـم لمهـديـن الأشـرار *** ميـزانهـم بـيـن المـوازيـن معـدول


المقـرني مع سنـة المصطفى سـار *** ركز نظام الشرع والسيف مسلول


وعـسى ولـي النفس للنفس عـذار *** ويا الله لا تجعـل لنا بالخطأ اعمول


تـم الكلام وسامـك العـرش غـفـار *** وصلواعلى هادي الملأ خيرمرسول



* قال عبدالله بن دهيمش بن عبار هذه القصيدة رداً على الشاعـر الأسمر بن خلف الجويعان رحمه الله 0


يا أبن خلـف جاني تناظيم الأشعـار *** حي الجواب وحي من ولف القول


مني تحيـة صافيـه مـا بهـا اغـثـار *** أعـذب من الكوثر خليه مـن الثـول


نصحتني بالقـاف يا صاحـب الكـار *** هرجـك تمـام وكـل مـا قـلت مقبول


والله ما قـلت الخطأ يا أبن الأخيـار *** هرج الخطأ يالقرم مامنه محصول


رديت على اللي نـوى يشعـل النـار *** وعندك خبر من غـز للشر مخيول


وذكرت مجد أولاد وايـل والأفخـار *** اللابـة الـلي مجـدهـم ليس منحـول


مضى لهم في سابق المجد مضمار *** ورقـوا مقـام قبلهـم غـيـر مطيـول


كـمـا ذكـرت افـعـالـهـم يـوم ذيـقـار *** حنـو قراقـر كان بالفـرس منـزول


وحرب البسوس وقبلها لاقواابشار *** في موقعة خـزاز والسيف مسلول


لهم العرب تشهد من الغرب لضفار *** من حد صنعا إلى مدينة اسطنبول


أيضـاً ورهبان النصارى والأحبـار *** تعـرف فخر وايـل ولا هو بمجهول


ما أقـدر أعـد افعالهم حيثهـا اكثـار *** مـن سـبـهـم حظـه تـوطـاه بنعـول


قـلـتـه ولا أسـب الحمـايـل والأمـار *** ولا فيـه مخلوق من العيب مكفول


رسمـت منظـوم القـوافـي بفـرجـار *** وعذيت لفظ القاف لا عود مخذول


وإبليس أخـو مره رجمنـاه بحجـار *** ونعـوذ بالمولى من الجـن والغـول


والحمد لـلـه يـوم هب الهوى ودار *** والشر بابـه صـار مغلـق ومقفـول


اليـوم في عصر التطور والأعمـار *** ما فيـه بالمخلوق صـول ولا جـول


جزنا من ركوب النجايب والأمهـار *** متـريحـيـن ولا بـقي شـد مرحـول


زالت بجهـد الـلي لبسنا لـه اشعـار *** خصيمهـم دايـم عن القصد مغـلول


صـارت جـزيـرتـنـا بختـري ونـوار *** والحـمـد لـلـه يـبتـهـج كـل بهلـول


اليـوم صرنـا نلبس قـماش عـطـار *** ما عـاد نلبس لا بيـادي ولا عـدول


تسهـلـت بـأمر الولي كـل الأوعـار *** صارت بحمد الله سماهيد واسهول


واللي حكا بين النسايب والأصهار *** حظـه ضعـيف وبالمخاليق منجـول


ومـن لا يـخـاف الـلـه يأتـيـه دمـّار *** صـواعـق تـرمـي زلازل وحـالـول


لا بـد يجيـه من الـولي صيـت ثبـار *** يثبـر نيـاه ويصبح الجسم منحـول


ويـبـلاه ربـه بالـمصايـب والأكـدار *** مصايبه تركم عـلى متونـه حمـول


من يجلع عيوب الخلايق والأستار *** لا بـد مـا يصبح مـن الـذل مخـذول


خاب الذي يبحث عن العيب والعار *** يعـيش دايـم طامن الـراس مذلـول


يعـيـش مـن زود النكـد دوم سهـار *** ويخلي مكانـه ما يقـرب لـه الزول


من دور الغـرة يـبي كشف الأسرار *** يصير بأمر الله عن الناس معزول


ما أظـن عنده للبشر نـفع واضـرار *** ولا عـنـده القـوة ولا يملك الحـول


ومـن لا يخـاف الـلـه لا بـد يـنهــار *** ما يأمن الغادر من الروع والهول


أمـر الـولي نـافـذ ومـا قـدره صـار *** والـلي كتـب للعـبـد لا بـد مرسـول


ولاهو بخير اللي بدرب الخطأ سار *** والهرج ما يلفظ على غيـر مدلول


واللي لعب باعراض الأجواد دندار *** يـفتـل غـزول ودايـم يـبـرم غـزول


واللي على سب البشر شكل أنصار *** ما يدري أنـه خاتل الناس مختـول


يا أبو شايم يا صاحب القدر والكار *** نصحتني يالقـرم في قـول معـقـول


وجهـت لـي مبـداك من بـد الأنفـار *** والنصح من شرواك يالقرم مأمول


والشاهـد الله ما نبي هرج الأفشار *** ولا لي بخلق الـلـه طايـل ودعبـول


من لا دخل يا مسندي حومة اغبار *** لا بـد يصـبح ضـده الحـبـل مفتـول


ومـن راد حشر الناس يأتيه حشّار *** ومن عال يلقونه عناتيت وصعول


رديت لـك وأسمع كلام ابـن عـبـار *** والحمل يبغي له ياأبو شايم زمـول


من لا نجع ما ظنتي يرعى الأقفـار *** واليـوم كلـن عـن دنـايـاه مشغـول


والـلي سمع سـب الحمايل ولا ثـار *** طاع الذي وصاه عن طبت الضول


يابن خلف نشكرك يا وافي الأشبار *** لا شك تدري يطرف العين سملول


الصبـر مـر وعلقـم الصبر الأمـرار *** نصبـر ولا بـد القضايـا لهـا حلـول


ولا أنت من شرواك مقبول الأعذار *** حيثك ترفع عن حكي كـل مخلـول


والـيـوم حنـا فـي زمان الأستقـرار *** ولا أحـدٍ ذخر يوم اليماني به طول


واليـوم نسكـن بالطوابـق والأدوار *** مـن عقب ما كنـا بخيمة وعـرزول


وأهل الفتن صارت يمانيهم اقصار *** ننعـم بحكم الـلي له الفصل والقول


حـكــام عــدل وذلــلــوا كــل جـبـار *** عن مجدهم أنظر كتاب ابن هذلول


وصلوا عدد ما هـل هطال الأمطـار *** على الرسول اعداد ما هـل هملول