هذه الأبيات رثاء بالشيخ بداح بن محمد العبود معرف جماعته في حريملاء وأحد وجهاء المجتمع وأحد رواة التاريخ والأدب والأنساب وهو رحمه الله من حمولة العبود من من بني هزان من عنزة وهم مع قبيلة الظهران من السهول رحمه الله وأسكنه فسيح جنّاته ونظراً لأن هذا الرجل من الأصدقاء الأعزاء فأنه يستحق الأشادة وقلت :

يـا الـلـه يا خـلاّق بالجسم الأرواح ***رب الوجود اللي عـلى الكون ماجود
يالله يالـلي لـبـوب الأرزاق فـتـــّاح *** أنت الكريم مصـرف البيض والسود
طـالبـك يا رب المـلأ ترحـم بـــداح *** عـز الـرفيـق الوايلي خلفـة عبـود
أبـو مـحـمـد لـلــمـراديــم ذبّـــــاح *** ريف النضى موصوف بالفهم والجود
به طبع يشعر بالسعادة والأفـراح *** يـفـرح الـيـا زاره هـواشـيـل ووفــود
راعي الدلال اللي بها البن فـوّاح *** يـنفـح بـهـاره باشـقـر الهيـل والعـود
والنجـر صوتـه للمسايـير ضبّـاح *** يجذبـك صوتـه بالمساء يـبـعـد النـود
من روس لابة لابدأ صوت صيّاح *** عـاداتـهـم عـنـد اللقـاء فـكـت الـذود
هزازنة لهم عـلى الخيل مشواح *** لاصـار بالسربـه طـوابـيـر واحشـود
نبكي على خطو الوليده اليا راح *** ولا الـردي كـوبـان مـا عـنـه منشود
أبو محمد بالفخـر يلبس وشـاح *** وكل الرجال اللي تعرفه له شهـود

اللي لربعه يبذل الجهـد بأنصاح *** مخلص ولا يذخر عن الربع مجهود

ليته فداه اللي من الهذر جـمّـاح *** ما يدرك الطوله ولا حصّل الفـود

والحمد لله واسط البيت ما طاح *** عـقـّب رجـال كـلهـم نقـوة فهـود

عسى العوض باللي للأثقال نطّاح *** أعني محمد ما مشى درب منقود