يا أبو عمر موقع العبار نـّور ** يوم وافيته يا أبن صنعا مسيّـر
التقي لو هو من الجوع أيتضوّر ** ما ترجىّ لا بشير ولا بشيّر
من طمر خطيـر يكسر ويتعـوّر ** ومن وقع من طيحته خلّي متيّر
مـن جهـل مجنـاه للتاريخ حـوّر ** ولا ينال العـلم من عقله صغيّر
ما نـقـر الزيـف والقول المزوّر ** حيث حبل الكذب يا عالم قصيّر
من جهـل ملـزوم يقـرأ ويتـنوّر ** ومن تجاهل عـزوته يمكن يعيّر
مهمـا زاد العـلم والعالـم تطـّور ** النسـب ثـابـت ولا ظـن يـتغـيّـر
مـن تكهّـن أو تخـيّـل أو تصـوّر ** لـو طـلـب دليـل يبلش ويتحيّـر
أنصح اللي قل عـرفه لا يتهـوّر ** بالجدود الفـانـيـه كيـف ايتخيّـر
يجحد اللي كان قبس الملح ثوّر ** من يشاهد جمعهم هاب وتذيّـر
هـم عنـزة كـان قدر الشر فـّور ** بالمعـامـع يحتـمون أم الحويّـر
الفخـر بـه طايلـه مبـطي يـدوّر ** مثل فعل الباز بالسرب المطيّـر
لـو زمـان اليـوم للسادات بـوّر ** يقلط الخايب ويفهق كـل خـيّـر
أستوت لأهل التملّق والمجوّر ** والردي كوبان بالمجلس مزيّر
يفتخر من فاز بالجلد المكوّر ** والصويتي باللـزز فـاتـه خضيّـر

وقلت أوضح لمن يحوّر الجد ويعتقد أن عنزة ليس لها تاريخ قديم :
يـا جـمـاعـه مـا بـدا الـتـاريـخ تـوّه ** ولا أخبـر جـد القبيلـه صار سلعـه
ساسنـا عـنـزة ويـا نـعـم الـسـمـّوه ** مثـل حـيـد طويق ما يهـتـز ضلعـه
ذكر عنـزة مـن قبـل عصـر النبـّوه ** والعـروق الثـابـتـه مـا جـاز شلعـه
عـزوتـي تـاريخـهـا مـا هـو مشـّوه ** نترك الحلف الضعيف بألف قـلعـه
الـقـبـايـل بـيـن ضعـف وبـيـن قـّوه ** والـزمـن يأخـذ بهـم نـزلـه وطلعـه
بعـنـزه تـلـقى الشجـاعـة والمـرّوه ** بالـمـلاقى خصـمهـم يـزداد هـلـعـه
مـن صعد راس الطويله مـا تـمـوّه ** يرقـب المـرقـاب مـا يخـمـر بتلعـه
مـا أنـتسمى بالـجـدود ولا انـتـفـّوه ** وحنا ستر الـلي لبس بالجيد دلعـه
وأن عـلا صوت المنـادي والمـدّوه ** باللقـاء والـريـق مـا ينطـاق بلـعـه
كـان نـيـران الـمعـامـع شـب ضـوّه ** نـقـتـرب منهـا وتطـفي كـل ولـعـه
نـرشـد الـلي تـاه عـن منهـاج نـّوه ** لا يـقـطـّع عـزوتـه تسعـيـن مـلعـه
لـيـت من حـرف نسـبنـا كـف سـوّه ** ما نبي يظهـر براس المجد صلعـه
عـن لـغـا الشامـت نسـدد كـل هـوّه ** والمغطى نـتـركـه مـا نـريـد جلعـه
والرجـل يعـرف صديقه مـن عـدوّه ** مـا يصادق من جفـاه يـريـد خلعـه

وهذا مقطع من قصيده أخرى :
أفخر بربعي لـو المخلوق من تربه ** من نال علم الفخر للغوش مهزابه
مجهد ولا مقصدي علمي يشهربّه ** ولا هـمني قـولهـم شاعـر ونـساّبـه
والـلي طمـن للوطـأ ربعـه تعيّر به ** يجلب عـلى عـزوته عـارٍ ومعيابـه
مـن بار بك جنبه لا تشفـق لقربـه ** هـذاك لـو تـزبنـه مـا فـيـه لـك ثـابـه
لا صار ما ينتخى في حزت الكربه ** وقت الرخاء قلعته وش عاد يبغابه

وهذا مقطع من قصيدة أوضح لمن يريد أدخال عنزة بوائل بن قاسط :
عندي دليل الصدق والجد ما أيعار ** أنـا خصيـم الـلي يـريـد الـطـلابـه
عيب أنتحال الجـد نقـولهـا اجهـار ** أقـولـهـا عـن لابـتـي بـالـنـيـابـــه
من اعتزا بعزوة ربيعه لنـا أنصار ** أما النسب ما فـيـه مـزح ودعابـه
كثّر التخبط بالنسب يجلب اضـرار ** ويلـزم لمـن زوّر نـسبـنـا مجـابـه
والـلي تخبـط بالنسب منهجـه بـار ** وايـل أبـن قاسط لنـا كيـف جـابـه
وايل بن قاسط بالأنساب مـا صـار ** مـا هـو لـعـنـزة جـد لـكـن قـرابـه
جـد عنزه مشهور من قدم الأدوار ** والجـد الـلي بالحلف مـا يعتـزابـه
الحلف ما نرضاه واجدودنا احرار ** حلـف الضعافه نـتـركـه مـا لنـابـه
حنا عنزه نحشم عن العيب والعار ** نـنسب لـوايـل والأسـامي تـشابـه
حـنـا لك الـلـه ما عـن الجـد نختـار ** لا حـلف يجمعنا ولا هـو عصابـه
الـحـمـد لـلـه جـدنـا عـامـر اخـيـار ** سليل من سمي عـلى ليـث غـابـه
نسـل ربـيـعـة مـن صماصيم نـزّار ** وأحـفـاده التـاريخ سلسل أنسابـه
بـشـر ضنـاه عبـيـد وعيـال عـمـار ** هـم الـذي منهـم تسلسل اعقـابـه
ومسلم ضناه قـروم وافين الأشبار ** أنجب وهب وجلاس يا نعـم لابـه

وهذه الأبيات ضمن رسالة لتوضيح الحقائق عن النسب الصحيح :
يـا نـديـبي جهـز الخـط المـزرّف ** وارسله يالقـرم لرجال الشهامه
وزعـه لـعـيـال وايـل لا تـطــّرف ** من عموم الربع أومقدم جهامه
بـلـغ الشيّـاب والصـبي المتـرّف ** وقـل أبـن عـبـار يهديكم سلامه

مـن تدّنت شوفتـه مجـده تـقـرّف *** ومـن ترفع نـال قـدره واحترامه

عـيلـم الهـداج نـبعـه مـا يـغـرّف *** والحسو والرس ما غزوا مقامه
من حبى يا لابتي كوعه تجـرّف ** ومن يدلبح ذل يوصف بالرخامه
المجالس تهترش مثل المهّـرف ** مـن يـرّوج للدعايه وش علامـه
من تمسك بالخرافـة قيـل خـّرف ** ومن جهل مجناه تغشاه الملامه
كـل جاهـل قـام يكتب وايتصّـرف ** والتعبّـث بالنـسب يـرث نـدامـه
العلوم الزايفه توضع على الرّف ** والنسب مايتقنه من به غشامه

أورق أغصان المشجّر ثـم ورّف *** منبته ثـابت وجـذعـه لـه دعامه
أفـخـر بتـأليـف كتـبي واتـشّـرف ** وأحمد الله منهجي عـز وكرامه
لـوبهـا تـزويـر أو قـول محـّرف ** والـلـه أنـي لا أحذفهـا بالقمامـه
جدنـا وايـل ما هـو نكره معـّرف ** مـا مكانـه لهـزمـه لاشك هـامـه

وهذا مقطع من قصيدة أوضح أن عنزة لا تسمى بغير جدها :
حـنـا بـغـيـر اجـدودنـا مـا انـتسّـمى ** حنـا عنـزة ما ننـتحل نسب قاسـط
يالـلي مسامعـكم عـن الحـق صـّمى ** ما تعـرض جدود العرب بالمباسط
الـزيـف يـبـطـل والحـقـايـق تـنـمّى ** والبيـت ما يبنـا عـلى غـيـر واسط

وهذا مقطع من قصيدة أوضح الحقائق لمن يحاول تغيير جد عنزة :
من شـوه التـاريخ مـاني مـداريـه ** حيث الخطأ بالجـد يحتـاج تعـديـل
من خالف الواقع عسى الله يهديه ** بالأصـل مـا نقبـل تـدلس وتضليـل
يا ليـت لـوهـم ينصحونـه بنيخيـه ** عـن الخطـأ لا يـبـدّل الجـد تـبـديـل
الـلي تمـادا ولا سمع قـول نـاهيـه ** غـروه قـوم يـنـصبـون المحـابيـل
والهرج الـلي مالـه براهين مابيـه ** أبي أذكـر الواقع قبل يطفح الكيـل
ما جـدنـا سلعـه يبـيعـه ويـشـريـه ** صفوة ربيعة من سلايل إسماعيل
حلف الضعافة مـا نـبي دوم نتليـه ** حنا عنزة والراس ما ينتكس ذيـل
حنـا عنـزه والجـد نفخـر بماضيـه ** لـنـا عـلى روس الشوامخ منازيل

وهذا مقطع من قصيدة تخص التأليف ومعانات الكاتب :
مـادام لـتــراث الـحـمـايـل شـريــده ** نـجـمع شتـاتـه عـن دواعـي نـفـاده
مـا ودنـا يـذهـب ضـيـاع وفــقـيــده ** حـيـثـه فـخـر تركت مشايخ وسـاده
أهـل الـفعـول المسـمـلات الجـديـده ** مـن طـاب منهـم ينـتـبـونـه أجـداده
مـثـل الـحـيـود الـراسيات المحـيـده ** عـنـهـم سجـل الـعـز ثـبّـت اسـنـاده
بالعـصر اللي عسى الولي ما يعيـده ** لـهـم بـجــزلات الـفـعــايـل ريــــاده
الـلـي لـهـم عـز ومـفـاخـر تـلـيـــده ** وضــحـتـهــا لـلـي يـبــون الأفـــاده
جـمـعـتهـا مـا أريـد دخـلي تــزيــده ** ولا لـي طـمع مـقـدار حـبـة رشـاده
قصدي فخـر بأهـل الفعـال المجيـده ** نـعـتـز بـالـطـيـّب ونـذكـر أمـجـــاده
نـفخـر بـذكر أهـل الخصال الحميـده ** ونـشـيـد بـالـلـي يـستحـق الأشـاده
وكـم واحـدٍ فــن الخـطــابـه يـجـيـده ** وربـه عـطـاه المـوهـبـه والجـواده
لـكـن عــن الـلابــه أقـلامــه بـلـيـده ** مـا سـال فـي ذكـر القـبـيلـه أمـداده
والـلي تـجـاهـل خـدمـتي لـلـبـديــده ** الجـهـد يشـكـر مـا تـفـيـد الجـحـاده
يـبغـي يعـوق الـلي يـواصل فـديـده ** والمرجـلـه تـحـتـاج صبـر وجـلاده
يـفـرح بغـلطـات الـرفـيـق الـزهيـده ** يشمـت عـليـه ولا يشوف أجتهـاده
شبـحـه قـريـب ولا أهـدافـه بـعـيـده ** عينه على الصاحب سوات الجراده
جـوده عـلى خطـو القرابـه عضيده ** وأن جـت مـن الأقصين يلز م حيـاده
كـانـه غــيـور ودون حـقـه ولـيــده ** يـذود عـن حــد الـحـمى والـسـيـاده
لا خـيـر بالـلي مـا يـنـاطح ضـديـده ** مـا يـطـول العـمـر القصير الشـراده

وهذه الأبيات رد على الذين يبثون الإشاعات ويغيرون الواقع :
افـتـهـم يالـلي تـكـهـن وتـحـزي ** ما بـقي جاهـل غشيم ولا غـبي
لا تـعـجـرف لا تـهـكـم وتـهـزي ** لا تـهـاون في جـهـودي وتعـبي
أنـظـم اللابـة مثـل نـظم خـرزي ** في نسب به يفتخر كهل وصبي
أنـا عنـزي وايـلي نسل عـنـزي ** أتـشــرف وأتــفـاخــر بـنـسـبـي
افـتخـر بسهيل وبعبيـد اعـتـزي ** وأستـعـز بكـل جـلاسي ووهـبي
وأفخـر بهـزان ما ساسه خـزي ** وعـنـز وعميـرة وبكـر وتغـلبي
وعن ذكر طاري ربيعه ماعزي ** قيسي وضبعي ونـمري وأكـلبي
يوم كسرى على ذي قار يغـزي ** نصر قومي شاد بـه حتى النبي
صـار بالـمـيـدان للخـيـل لـززي ** والهامرز اقبل على مثـل الظبي
صاح يطلب من يبـارز مـا لـزي ** قال أبن مسعود أبشر وش تبي
رمح حارث حط في جوفه مزي ** وأرتـمى من فوق صفراه يحبي
بالوغى الباغي على فعله جـزي ** وفي ربيعـة يفتخـر كـل عـربي

وقلت رداً على الذين يزعمون أن عنزة تعتزي بوائل بن قاسط :
الـلي يعـود أربع عشر قرن للخلف ** يبي عنـزه تدخل مع الحلـف لازم
حنـا عنـزة مـا ننتحل جـد بالحـلـف ** هـامات مـا حـنـا لـك الـلـه لهـازم
حنا عنزة لا غـط بالغـارب الضلـف ** حـنـا مدابـيس الـوغـى بالمـوازم
حنـا سطام الضـد بالموقـف الكلـف ** لـنـا الفخـر عنـد اكتـراب المحازم
اليا سمك عج الرمك بالهوا الصلف ** والخيـل تـرهـم والعشايـر تـرازم
اليـا تلاقوا عصم الأشنـاب بالشلـف ** قمنا على حدب السيوف انتعـازم

وقلت هذا المقطع من قصيدة :
أنا عنزي وأعتـز بأصلي ومجنـاي ** ولا كـل مـن رام الـفخـر نـال تاجـه
أخـبـرك يالـلي مـا تـثمـن أحـميـاي ** ربع الرجـل عنـد اللزم هـم سياجـه
افخـر بهم عند الأصاحيب واعـداي ** فـرسان يـوم الجـو يكتـم عـجـاجـه
زمل التخوت اليـا بـرك كـل رغـاي ** لا غـط بالغـارب ضلـوف الحداجــه
مـلاذ مـن جاهـم مـن الظيـم شكـاي ** أرداهـم لضيـفـه تـبهـلـل حـجـاجـه

وهذا مقطع من قصيدة أخرى :
قـال مـن يـفهـم مباهيـم الرمـوز ** يدرك المقصود والغايات ماهي
مـا يعسره حـل صعبـات اللغـّوز ** والخـفا والسر يعـلـم بـه إلاهي
ما نصرّب يابس الضرع الغروز ** قـانع بمـد الولي والخيـر راهي
من تفكـر شاهد الوضع مهـزوز ** منـوة الـلي دالـهٍ والقلـب لاهي
كم شهم من العرب جنسه يعوز ** من زمانه ذاق لوعات الدواهي
صـارت الهـزلـة وسيلة للبـروز ** وأزدهر دور المهرج والفكاهي
شاطر الملسن على المنبر ينوز ** كنـه الصنديد خـواض الهيـاهي
الشرف والعـز اغـلا من الكنـوز ** والرذيلـة للفضيلـة مـا تضاهي
مـن حفـظ عـزه مكـرم ومعـزوز ** مستقيم ولا يهمـه هـرج واهي
النبيل الـلي على الجـزله يحـوز ** والدروب العوج ما فيها تبـاهي
من طمن ممشاه ما ظـني يفـوز ** يدرك الطولات من هام المناهي
الدروب العايـزه عنهـا محجـوز ** ولا خبـر للحيف يممت اتجـاهي
قلـتها وأعـتـز فـي عـز العـنـوز ** عنـد ربعي عارف مقدار جاهي
دام معي مـن الـرجال ثـقال روز ** ما يهم الكذب لو بالناس فـاهي
الحـذر يالـربع مـن نـفخ القـزوز ** نافخ الظرمة لقدر الشر طاهي
الهمـوز الـلي لخـلق الـلـه لمـوز ** وش علامه ما يطاوع كل ناهي
الـمـنـاكـد والمـجـادل مـا يـجـوز ** المجادل عيب مالي به مشاهي
أنـذر الـلي يـودع اللابـه حـزوز ** ولا بعض القول ماثار انتباهي