تابع
*- وقال ماضي بن صبر النومسي العنزي يسند على عبدالله بن دهيمش ابن عبار العنزي : 331
يا راكب الـلي ما تصـور ولا صـار *** مـثـلـه بـدقـت صنعـتـه وأبـتـكـاره
بنـزٍ مصرح ما وجـد لـه بالأقـطـار *** مثـلـه ينافـس شهـرتـه وأعتبـاره
صدامـه الخلفي عـن المقدم أمتـار *** عشره وتسع أذرع مقاس الغماره
من مصنعٍ فاق المصانع بالأطـوار *** عراقـته هي سر دعـوى أشتهاره
آخـر مـديـل البنـز جهـز بـمـشـوار *** مرسل بخط ويحمل أسمى عبـاره
ينقل على الطبلون عنوان واشعار *** شكراً لمن كان الوفاء هو أشعاره
عـليـه قـرم مـن الرجاجـيـل جـبّـار *** حاز الشجاعة والوفـاء والمهـاره
من لابـة النومس عريبين الأوكـار *** أولاد عـايـد زايـديـن الـضـفــــاره
الـلي لهـم بالمجـد مـورد ومصـدار *** تـاريخهـم يشهـد لهـم بالـصـداره
عـز الصديق وعـز للضيف والجار *** وضـد العـدو الـلي براسـه نعـاره
يا نـاشـدٍ عـن فعلهـم مابهـا أسـرار *** أعـطيـك عـنهـم نبـذة بأختصـاره
عن فعلهم مع عيد ما جتك الأخبار *** يوم أن بن نومس كسرهم كساره
شربوا من السم الحمر حامي حار *** لـعــيـون مـن وجـه نـدالــه وزاره
يقـول شاعرهم عقب عـد ما صار *** نومسك ابن نومس بفهم وشطاره
شهايـدٍ مـن عـندهـم ما بهـا أنكـار *** والعـلـم يكـفي فـيـه رمـز الأشـاره
ورشيـد لـه بالضـد مطلع ومحـدار *** الـلي سمـاهـم طـيّـر الـلـه اغبـاره
ما جاك عن مجـرى تفاصيل للعـار *** الـلي لـبـس ثـوب الـمـذلـه بـداره
يوم أخلف الموعد وغروه الأشرار *** مـنـا خـذا درس الـظـلام ونـهـاره
والطعس يشهد يوم عج الدخن ثار *** مـع لابـة الـويلان يـوم الخـسـاره
يوم أنهم ركبواعلى قحص الأمهار *** اللي يخوضون الوغى بكل غـاره
يوم أن شاعـرهم يقـول أنـه أحتـار *** من بين عشره ضيّع الله أخمـاره
هـذي عناويـن خـفيـفـات وأصغـار *** والـلي جـهـل فـينـا ينشـد أكـبـاره
من ضاحية لبـده قبـل فـج الأنـوار *** قـام النـديـب وثـم واصـل مـسـاره
والتاسعه بالضبط عند ابـن عـبـار *** المكـرم الـلي يجـذب الضيف نـاره
ترفع له البيضا على طيب الأذكـار *** هـذاك أبـو مشعـل عـرفـنـا وقـاره
عبدالله اللي بـان علمـه بالأمصـار *** الـوايـلي عـلى الـفـضـيـلـة مـداره
من لابـة الفدعـان وافيـن الأشبـار *** لابـة مصـوت بالعـشـا فـوق قـاره
أهـل الكرم والطيب والسلم والكار *** تشهد لهم البدوان وأهل الحضاره
ثم أعـلم المندوب يا نجـم الأشعـار *** لـلي بـرع بالمـرجـلـة والجـسـارة
تمشي بدرب الحق يالقرم باصرار *** غصب على اللي ما براسه نمـاره
أنت الذي سطرت بالخـط الأسطـار *** حتى أتضح ليـل الدجـا من نهـاره
هـذا جـميـل وتشكـره كـل الأحـرار *** تـجـارتـك بـالطـيـب نـعـم التجـاره
هذا الذي يبقـا عـلى مـر الأعصـار *** فعـل الجـميـل ومـوجـبته الغـيـاره
يا كاتـب التاريخ يا صافـي الأفكـار *** حيـث العـمـل يحتـاج فـن ونـداره
عـسـاك عـز لـلـقـبـيـلـة ومـفـخــار *** تفخـر بـك الأجيال عـنـد أفتخـاره
وآخـر كـلامـي لـك مـعـزة ومـقـدار *** بنفـوسنـا ما هـو بـمكـر وعـيـاره
أجـمـل تـحـيـاتـي تعـطـر بـالأزهـار *** عـنـبـر وريـحـانٍ وورد بـغــزاره
تهدى لأبو مشعل وتنعم بهـا الـدار *** الـلي رجينـا الـلـه يطـّول عـمـاره
يفـداك يا راعـي الوفـاء كـل ثرثـار *** ولنـا طـلب منـك الوفـاء بالزيـاره
لا تعـتـذر مـا عـاد نـقـبـل بالأعـذار *** تلزمك وأنت الوقت منك أختيـاره
النـومسي مـاضـي يحيـيـك تـكـرار *** واللي حضر يشهـد عـلي بـقـراره
واختامها صلوا عـلى سيد الأبـرار *** نـبـيـنـا الـلـي فـاز بـآخـر بـشــاره
* وقال عبدالله بن دهيمش بن عبار رداً على ماضي بن صبر النومسي : 332
سـمـيـت بسـم الـلي لـلأفـلاك دوار *** رب العـبـاد الكـون يعـلـم أسـراره
يـدري بكم أرزاق عبـده والأعـمار *** مـن مولـده حـتى يحين أحتضـاره
خـلاقـنـا رزاقـنـا مـجـري الأنـهـار *** الـلي من الظالم حما عرض ساره
حمـاه مـن فرعـون حمـال الأوزار *** صـان الخليـل ومـن بلاويـه جـاره
رب المـلأ منـزل همالـيـل الأمطـار *** يسـقي ثـرى البيدا وينبت خضاره
جـل الولي يحيي ميابيس الأشجار *** والخلـق تجني من غرايس أثماره
حـتى الـذي يفلح من القـاع هكتـار *** يقطف حصيله من قـليل الشكـاره
ديـم السحايب هـل بالمـزن مـدرار *** خـمـايـل الـريـضـان يـطـلع بـذاره
حـتى البهايـم تبتهج بـه والأطيـار *** وكـل الكـبـود اليـابسـه بانـتـظـاره
بسم الولي سجلت منظوم الأشعار *** وجنبـت منطـوق الخـطـأ والأثـاره
نعـوذ بـه مـن شـر كاهـن وسحـار *** وإبلـيس أخـو مره عليـه أندحـاره
وخلاف ذا شديت ما يطـوي القـار *** صنع الخبيـر المخترع من أفكـاره
الحـاذق الـلـي بالتصاميـم بـيـطـار *** مـن جرج الأول منسبه وأنحـداره
أصهب أبـش وساعـده تـقـل جمّـار *** أشهب شنب خالط بياضه شقـاره
ما بـاد عـزمه طول وقـته ولا خـار *** هو ريس المصنع وهو مستشاره
خبيـر وأعمالـه صعيبـات وأعسـار *** شغـلـه نـقـي ما مهنتـه مستعـاره
مـرابـحـه بـالـيـوم مـلـيـون دولا ر *** بالشركـه الـلي يستحيـل انكسـاره
بـرع بتصميم الشبح شيخ الأموار *** وهـو السبب في شهرته وأختياره
صار الشبح سعره خيالي بالأسعار *** صنعـه سبايـب قـيمتـه واحتكـاره
مـا يشتـرونـه كـود سـادات وأمّـار *** ولا الوزيـر الـلي يروس الـوزاره
يخـتص بـركـوبـه مشايـخ وتـجـّار *** سعـره عـلى الشراي يبني عماره
كم واحـدٍ سامه وشاف الثمن حـار *** حـيـث أن مصـروفـه قـليـل دبـاره
ولا نشمت اللي من غلو قيمته نار *** عـن قـربـه المفلس جـداه النيـاره
يستاهـله مـن خـزنتـه حول مليـار *** في درجـه الشيكات مثـل الضباره
عـداد طبلونه موقـف عـلى اصفار *** وينـوز حين السلف يقدح شراره
بنـز الشبح تبـارك الـلـه إلـى سـار *** كـنـه كـروز بحيـن تضغـط أزراره
حسب كلام اللي أعتلوبـه بالأسفار *** ولا تــرى مـا يـوم لـفـيـت طـــاره
عـنـاه ابـن عبـار سجــه ومـسيـار *** سار وتوجه صوب ماضي زيـاره
ابن صبر ريـف الـذي جـوه خطـار *** النـومسي فـرحـت خـويـه وجـاره
من ساس لابـه باللوازم له أنصـار *** نـوامسـة تـكـدي العـدا بانتصـاره
عـدوهـم يشـرب قـراطيـع الأمـرار *** وخصيمهم فاجوه فـي عـقـر داره
يـا ابـن صـبـر لا بـد نـأتـيــك زوّار *** ولا من حواجز بين حاره وحـاره
نقـلـط بديـوانـك عـلى بـن وابـهـار *** حيثـك أتـرحـب بالرفيـق ابحـراره
لا شك تمهلني ترى اشغـالي اكثـار *** حتى المـدارس ينتهـون أختبـاره
ولا تـرى ما مـن تكاليـف وأضـرار *** الـكـبـش عـاداتـك تـقـلـط فـقــاره
وصلوا على اللي للمخاليق مختـار *** على الرسول أعداد رمل الزبـاره
*- قال عبيدالله بن جهاد البجيدي يسند على عبدالله بن دهيمش بن عبار : 333
بسم الـذي نركع لوجهـه بالأسحار *** خوف وطمع وأيمان وأخلاص نيه
نطلب رضاه ونستجيـره مـن النـار *** يوم الحساب ويـوم كشف الطويـه
أملي القوافـي بالمضامين وأخـتـار *** ما هـان مـنـهـا بالمـعـانـي غـنـيـه
أبيـات شعـر ومـن مـواليـد الأفكـار *** مضمونها الشكـر الجزيـل وتحيـه
مقـرونـةٍ فـي بـاقـة ورود وأزهـار *** تـفـوح فـي عـطـر الـورود النـديـه
تهدى على قـرم العـيال ابن عـبّـار *** شكـر عـلى ما أهـديتنـا مـن هـديـه
هـديـةٍ فـيـهـا الطـرايـف والأخـبـار *** مـثـل الفيـاض المعـشبات المّـريـه
تسـرد لـنـا تاريـخ وافـيـن الأشبـار *** عـبـر السنيـن المـاضيات القصيـه
قـومٍ لهـم بالمجـد مـورد ومـصـدار *** كـمـا لـهــم فـي كــل مـبـدأ مـزيــه
شاعر وأديب وعندك العرف ينـدار *** وأدلـيـت دلـوٍ بالـمـنـاسـب رويــه
ألـفـت بـالأنسـاب وألـفـت الأشعـار *** بـالـنـص تـثـبــت والأدلــه قــويــه
يا ما رويت أخبار وأحـداث وأذكار *** واطلعت أمورٍ تحت الأنقاض حيـه
وأزلـت مـنهـا كـل تعـتيـم وأغـبـار *** قـد لـفـتـهـا وأدرجـتـهـا بـالـهـويـه
من بين مد وجزر فيك الذكى سـار *** عـلى ضفـاف الـمعـرفـة والـرويـه
جنبت اللي فيها حزازات وأضـرار *** وأحـراج يفسد مـا بـرز من قضيـه
كـم راحـت الأيـام باشـرار واخيـار *** وكلـن بـقـي لـه فـي سجـلـه بـقـيـه
تصـيـر لـه بـالنـاس رمـزٍ وتـذكـار *** فـي سـلـبـها وأيجـابهـا لـه مطـيـه
والـوقـت لـو زانـت ليـالـيـه تـنـدار *** تلـقـح وتنتـج بيـن صبـح وعشيـه
دنيا وأهلها لو بـدوا غـزو الأقمـار *** بين الفضاء والأرض روحه وجيه
مصيـرهـم لا شـك بكفـوف الأقـدار *** عبـر الزمـن مـا بيـن شمسٍ وفيـه
يا حظ من فيها غرس حلو الأثمار *** تعطيـه مـن كـل الصنـوف الشهيـه
فـي موقـف ما فيـه درهـم وديـنـار *** عـملـة بنـوكـه بيـن حسنـه وسيـه
حتى ولا بـه مـن محامين وأنصـار *** كـلـن بشـأنـه تحـت رحـمـة ولـيـه
ولا الذي يغرس بها شوك وأمـرار *** شـرٍ مـقـيـم وغـصـةٍ فـي مـريــــه
هـذا بعـض يـا طيّـب الفـال مـا دار *** في خاطري وأوحى بـه الفكـر ليـه
بغيت أقصر طول شرحي ولا صار *** تـداعـت الأفـكـار غـصـبٍ عــلـيــه
تـواردت في كـل تصميـم وأصـرار *** بـاثـر بعـضهـا مـثـل ورد الـظـميـه
والمعـذرة لـو فيه موجب للأعـذار *** فـي مـا ذكـرتـه يـا كـريـم السجـيـه
أنـت الـذي عندك مقاييس وأعيـار *** والحـرف تكشف مايلـه من سويـه
وختامهـا مـني عـلى خيـر الأبـرار *** أحـمـد شفـيع النـاس خيـر البـريـه
والختـم صلـوا عـد هـتـان الأمطار *** وعـدة نـجـومٍ بـالـمـجـرة مـضـيــه
* وقال عبدالله بن دهيمش بن عبار رداً على عبيد الله بن جهاد البجيدي : 334
بسم الـذي ينزل من المـزن مـدرار *** يـنـقـع مـصـبـه بـالـديـار الفـضيـه
غيث المطر ينبت هواميد الأشجـار *** ويحـيي مغـاريس الفياض العذيـه
واحـد أحد والي عـلى الكون جبـار *** يـعـلـم بمكنـون القـلـوب الخـفـيـه
رب الـملأ عـنـده مقاديـر الأعـمـار *** مـن مـولـد ابـن آدم ليـوم الـمنـيـه
من بعد ذكر اللي على الخلق قهـار *** يـا مرحبـا براعـي الكفوف النديـه
يا مرسل القيفان بخلاص وأصخار *** مشكـور يا راعي النقـاء والحميـه
جاني قوافي صاحب الطيب والكار *** عبـيـد الله بـن جهـاد خـلفـة عبـيـه
اللابـة الـلي تـذري الضيف والجار *** وزبـن الدخيـل الـلي عـليه الجنيـه
ما هاب لو جرمه كبر ضلع سنجار *** عـفـو الضهر ما كن سوى خطيـه
يرقـد قهيدي ما خشي طالـب الثـار *** زبـن سـمـيـة حـي هـاك السـمـيـه
لا بـة هـل البلـهـا من أحفـاد عمـّار *** سـلـقـا كـعـام الـضـد مـاهـم نـزيـه
صوت اليتاما عندهم رمـز وأشعار *** نخـوة عـلى العـدوان في كـل هيـه
لا قــيــل بـلـهـا ثــّوع الــدم نــثـّـار *** حـل القضى عـزي لـراعي الرديـه
نـطيحهـم يـدبـر وبـه كسـر تـعـبـار *** أقـبـل يـدور الفـود وأخلـف نـويـه
يتلـون ابن شامان من عقـب نصّار *** صفـوة زبون الحرد ملحق خويـه
بجايـده شجعـان في ماضي الأدوار *** مـن عـزوةٍ عـن الـمـدايـح غـنـيـه
وأشكرك يا مرسل عذيات الأشعـار *** عـبـر الجهـاز الـلي يروح أنقريـه
عبر الذي يرسل بعد لمس الازرار *** الفـاكس مـا فـي بالـمـراسيـل زيـه
عجبت كيف الخـط من عندكم طـار *** بالثـانيـه يطـوي مسيـر اضحويـه
جاني خطابـك وأثـني الشكر تكـرار *** والنـفس والله من طرفكـم رضيـه
يا من تشيد بما عملت من الأصدار *** كـتـب النسـب بالعـزوة الـوايـلـيـه
لأجل الـذي شرواك وافين الأشبـار *** ولا هـمني أصحاب النفوس الدنيه
جحـادة المـعـروف دقـاتـهـا اكـبـار *** تـرمـي الـتـهـايـم لـلعـبـاد الـبـريـه
حنـا بذلنا الجهـد من ضمن الأنفـار *** ومن واجب المسلم يحفظ الوصيه
نخشى الملامة يابن الأجواد والعار *** وندرى الحسود اللي يدور الدعيه
أكتـب مفاخـر لابـتي مـا بهـا أنكـار *** ولا نـي حـراوي عـنـدهـم للعطيـه
واليـوم أشوف بتالي الوقـت تغيـار *** يـا مسنـدي خـل العـلـوم امغـطيـه
قـلت الوكـاد ولا لـنـا بنبشت الغـار *** أخـاف تـلـدغـني مـن الـغـار حـيـه
وأفطن ترى الدنيا لها أقبال وادبار *** مـثـل المحـالـة فـوق جـال الركيـه
ورب الـمـلأ لمـدور الـستـر سـتـّار *** الـلـه يـكـافــيـنا الـبلا والـبـلـيـــــه
تـمـت وصـلـوا عــدد مـا زار زواّر *** عـلى الـنبي هـادي العـبـاد ونبـيـه
*- وقال عبدالكريم بن فرحان الريّس التميمي من أهل الجوف هذه القصيدة يسند على عبدالله بن دهيمش بن عبار : 335
يقول ابن فرحان بالشعـر لا غاص *** مـن بعـد ذكـر الـلـه رب العـبـادي
مثايلـه مثـل العسـل داخـل أقـلاص *** أبيـات والـلـه من صميم الفـوادي
المال شفته غيّر نفوس الأشخاص *** لوهـم عـلى مشط اللحـا بزديـادي
ما هي مخليتك على منصبٍ خاص *** ولا هـي مخـليـتـك رئـيس لـنـادي
لا تتبع اللي قربهم ضعف وأنقاص *** جعـل ارضهـم ما تنبت الا كـدادي
ولا تـتبع الـلي بالـردا دوم قـنـّاص *** هـذاك مـن بـد الـعـرب مـا يـرادي
خلك مـع الـلي نيتـه كلهـا أخـلاص *** هـذاك قـلـبـه مثـل لـون الـزبـادي
يا راكب من عندنا عـدلت الشـاص *** من مصنع الألمان معطا اعتمادي
بـنـزٍ جـديـده لونهـا لـون الأجـاص *** تطـوي مسافـاتٍ طـويلـه ابعـادي
سـواقـها فـي فـنها عـنـده أبخـاص *** لا كـيّـم الطـبـلـون جـابـه وكـادي
تلفي لأبن عبار في هون وأحراص *** سـلـّم وقـل وش رايكـم بالمبـادي
سـلام مـنـي عـد طـيـات الأمحـاص *** واعداد ما هب الهوى من برادي
سلام أغلى من الجواهر والألماص *** وأخـن وأنوج من غرايس بلادي
تـمـت وصلى الله عـلى سيـد نـاص *** يرشد على درب الهدى كل غادي
* قال عبدالله بن عبار رداً على عبدالكريم بن فرحان الريّس التميمي : 336
يا راكب اللي ما تشبه على الباص *** بنز الشبح منجوب شف المـرادي
من وارد اللي سلعته مابها رخاص *** هيهات ما يخشي عليها الكسادي
لكن قليل المـال لـو سامهـا حـاص *** ما يشتريها بالعرب شخص عادي
ومن يشتريها دين ما فيه مخلاص *** من غلوها يصعب عـليه السدادي
إلى تلامس كهرب السلف بالماص *** تسمع مثـل دن الجـنيـه الرشـادي
بخلافها حذف الحجر تقل رصاص *** تسبق مع الزيـزاه صوت المنادي
ما يسمع المندوب ما لحّن العـاص *** ولا يلتهي مع كـل مطرب وشادي
يسمع لتـرتيـل المثـاني والأخلاص *** بـأذاعـة الـقـرآن عـبـر الــروادي
ما صابته دوخه ولا يحمل أقراص *** سافـر يريد الجوف بأدنا الحمادي
يلفي على قرم له أرماع وأخراص *** منصاه ابن فرحان زاكي الجدادي
عبدالكريم اللي للأضـداد مفـراص *** من روس لابة يقحمون الطـرادي
فندهم ابن صقيه بعلوم وأقصاص *** عـد الأصول ويـفتخـر بـالـمجـادي
ماكر صوارم مااستكنت بالأقفاص *** عكـف المخالب ضربهـا بالثـنـادي
وأن كان تبي الرأي للشعر فحّاص *** قافـك سلـيـم ولا عـلـيـه أنتـقـادي
قافك كما الياقوت من صيد غواص *** سـر لـلأمـام وخـل رايـك سـدادي
مبداك جزل ولا أنت للشعـر خبّاص *** أصدح بقافـك بين حاضر وبـادي
*- قال عبدالله بن دهيمش بن عبار هذه القصيدة وقد نشرت بمجلة شيحان الأردنية الصادرة في 15/ 4/ 1998م : 337
زرت البلاد اللي لها القلب شفقـان *** أحـبـهـا وأرغـب تـقـالـيـد أهـلـهـا
احـبـهـا مـن حـد أربـد إلـى مـعـان *** ودي بشـوف جبالهـا مع سهـلـهـا
أشتـاق لـلـزرقـاء وأفـرح بـعـمـان *** وترتاح عـيني يـوم تـنظـر جبلهـا
أحـبـهـا والـلـه مـن بــد الأوطـــان *** حـبـيـتهـا مـن شـان حـي نـزلـهــا
دارٍ بـهـا نـفـنـوف ريـح وريـحــان *** ريعـانهـا يـا زيـن شـمـت نـفـلـهـا
تزيل عن قـلبي هواجيس الأحـزان *** وتجلي عن النفس الشقيه زعلها
ودي أزور بـلادهــا كــل الأحـيــان *** مـن زارهـا نفسـه تريّض عجلهـا
دار الزعيم الهاشمي نسـل عدنـان *** سبط الرسول اللي الأمانة حملهـا
هو راس فهرهو فخر قيس عيلان *** ولـه منزلـه بالمجـد محـدٍ وصلهـا
هل الفخر من دور هاشم لهم شان *** الـهـاشـمـي كـل المفـاخـر كـفـلهـا
الهاشمي مشهور فعـلـه بالإحسان *** اللي حمى أمجـاد الجدود وحفلهـا
مـن صلب حيدر مابهم قول بهتان *** نجـل الـبـتـول معـربـه مـن بعـلهـا
نـوادر الـتـاريـخ بـالمجـد عـنـوان *** وأفعـالهـم بالطيب ما أحـدٍ جهـلهـا
مدحي صحيح ولـه دلايل وبرهـان *** مـن نظـم ابـن عـبـار فكـره بذلهـا
من فـن بدعي سجـل الفكـر قيفـان *** نـاخـذ جـدايـدهـا ونـتـرك سملـهـا
مـني تحـيـة وانشـروهـا بشـيحـان *** فيـض المشاعـر مـا نـدّور بـدلهـا
* وقد رد الشاعر محمد بن فناطل الحجايا من أهالي سد السلطاني في منطقة معان : 338
حيــيـت يامـن كاتـب زيـن الألحـان *** تجلي عن النفس السقيمة اعللها
نظم أبـو مشعـل يـا بعـد كـل فـنـان *** كـاتـب معاني مثـل صافي عسلهـا
الـوايـلـي يـوزن أقـوالـه بـمـيـزان *** عقـداً من الجوهـر سبايك اجملهـا
عـزيـز نـفـس ولا تـقـّـول ابـهـتـان *** بابيـات شعـر معـذيـه عـن زلـلهـا
مـن لابـة لا شبت الحـرب شجعـان *** كسرى شكى يـوم الملاقى ثـقـلهـا
جـاروا عليـه وعززوا بنت نعمـان *** وذيقـار تخبـر من نشدها وسألهـا
ربع لهـم في هامة المجـد مسكـان *** عـلى سـنـام المـجـد بـنـّوا فـلـلـهـا
هـذا لأبـو مشعـل تشكـر وعـرفـان *** مـن خافقي صدق العواطف نقلهـا
عـواطفي مـا قـلتها مـرتجي شـان *** ولالـي مقاصـد طـامـع فـي مثـلهـا
بالـلي عطـاني خالق الخلق قنعـان *** ونفسي حطام الفانيـه مـا شغـلهـا
الشكـر لك يا نسل عطبين الأيمـان *** حيثـك مدحـت الـلي للأردن أملهـا
مدحت من هـو نال بالمجـد تيجـان *** وذكـرت داره بالـمـكـارم وأهـلـهـا
مدحت صقر قريش ماكنت غلطان *** الهـاشمي روس المعـالـي دهـلهـا
جــده مـحـمـد خـاتـم كــل الأديـــان *** ورسالـتـه فـي عـون ربـه كملهـا
أسمـه مـع أسـم الله يسمع بـالآذان *** وسلالتـه أشـرف سلالـه جعـلـهـا
وريـّث مجـدٍ راسـخ فـوق سيسـان *** ليث العـرب روس الأعادي ركلها
حـر الحرار اللي جمع كـل الأخوان *** وكـل المشاكل ساعـي فـي حللهـا
عـزز وطـنـا عـن طمـع كـل فـّـتـان *** والـدار مـن بحـر المـذلـة نشـلهـا
الهـاشـمي يحـلـم عـلى كـل إنسـان *** وأبـنـاء شعـبـه بالمكـارم شمـلهـا
حكيـم وفـي حـل الصعيبات فهمـان *** وكـل العلـوم بصغـر سنـه نهـلهـا
وأزال نزعـات التخلـف والأضغـان *** وجـروح ما قـد فـات حلمه دملهـا
يشهد عـلى ما اقول حضرٍ وبدوان *** من يمدحه صدق الحقايق صقلها
الهاشمي حـر شهـل فـوق عقـبـان *** والطلع ما هو مثـل شامخ نخـلهـا
ومني تحيـه لأبـو مشعـل بشيحـان *** مثـل الشهد جانيـه طايـف نحلـهـا
والحـمـد لـلـه كـلـنـا ربـع وأعـوان *** والطـيـبـة نـفـخـر بـرجـلٍ فـعـلهـا
وأبـواب الأردن فاتحة كل الأحيـان *** بـوجـه الصديق مرحبـه لا دخلهـا
وأرجـوك تـكـرار الـزيـارة لعـمّـان *** بمـجـالسـك عـن هـم الأيـام نـلـهـا
يا اللي حديثـك ريح عطرٍ وريحـان *** ومسك تخـالـط مـع روايح نفـلهـا
في ديـرة حـزمه مـن الغيث رويان *** سـجـادةٍ خـضـرا مـلاوي رجـلـهـا
نـوارهـا يقـطع ظـمـأ كـل عطشـان *** رويـانـه وغـيـث البـداري هطلهـا
الله سقاهـا مـن غـزيـرات الأمـزان *** ولبست بعون الباري أبهـا حللهـا
والمعذره هاضت خفيات الأشجـان *** والقـافـيـة عـالـفـكـر ركـز هلـلهـا
عـواطـف جتـني وأنـا كنـت بلشـان *** مـا هـو تفنـن مـار ربـك عـقـلهـا
وصلاة ربي عـدد عيدان الأغصـان *** وأعداد ما لعب الهوى في قذلهـا
وأعداد ما يمشي على القاع ركبان *** عـلى رسـول خـيـر سنـة عـملهـا
*- قال الشاعر متعب بن لافي الرويلي هذه القصيدة يسند على عبدالله بن دهيمش بن عبار العنزي : 339
قال الـذي من خاطـره ينظم أقـوال *** أبـيـات تلـفـظ مـن بـديع الكـلامـي
ما قـلت قـافي في عـذيات الأقـذال *** ولا هـمني يا القـرم عدل القـوامي
قـلبي يا أبو مشعل من الهم يجتال *** بين الجنوب وبين شـرق وشـامي
كن الوقايـد بالحشـا تشعـل اشعـال *** اصبـر عـلى حـره ولا زلت كامي
وليلي يا أبن عبار ساعـاتـه طـوال *** وعـيني بهجعـات الملأ ما تـنامي
وجهـت لـك يا مسندي عـدة أمثـال *** وأشكي على اللي ترتجيه الأنامي
قـلتـه ولك بقـلـوبـنـا الـواو والـدال *** نعـتـز فـي طاريـك حيثـك اقطامي
ويا الآدمي دنياك مـا ترحم الحـال *** كـم لـوعـت طـفـلٍ بسـن الفـطـامي
أن أدبـرت بـقعـا تـوريـك الأهـوال *** وأن اقـبلـت تـلـقـا المعـزة شمامي
دنـيا الشقـا تأتيـك بالوان واشكال *** يـومٍ سفـر وأحيان تقـلب ضلامي
أحــدٍ تـجـرعـه الـمـذلـة بـمـكـيـال *** وأحـدٍ تـذعـذع لـه براس العـدامي
وأحـدٍ تسكنـه الخـرايـب والأطـلال *** وأحـدٍ تحـطـه فـوق عـال الغمامي
كسابهـا خسـران لـو يجـمع المـال *** تـقـلب حقـايقها بسرعـة أوهـامي
دنـيـا الشقـا شبهتهـا كـنهـا اظـلال *** ولا السراب بصحصح البيد زامي
وصـلات ربـي عــد مـا هـل هـمّـال *** عـلى الرسول اللي لمولاه صامي
* قال عبدالله بن عبار رداً على الشاعـر متعب بن لافي الرويلي : 340
سميـت بسـم المعتلي ملـتجـأ الـذال *** الخالـق الـبـاري جـليـل الاسامـي
أرسل رسوله بالهدى يرشد الضال *** وقـاد العبـاد لخيـر قصد ومرامـي
بسم الـولي سجلت مـا ينظـمّ البـال *** أبيـات من منبع غـزيـر الجـمامي
أرسل جواب معـّرب الجـد والخـال *** متعـب بـن لافـي رفـيع الـمـقـامي
يشكى من الدنيا وتقـاليب الأحـوال *** ومن صكته سود الليالي يضامي
أصـبـر وخـلـك للصعـيبـات حـمّـال *** خلـك صبـور ولا تصيـر انهـزامي
تـرى الـزمـان الشيـن لا بـد ينـزال *** ومن جاهـد بدنياه سمي اعصامي
لـو كان ما تملك على فلس وريـال *** أخـيـر مـن ملـيـار درهـم حـرامـي
لـو الذهب يا مسنـدي عـز الأنـذال *** وبـه أرتفع قـدر الرزيـل الخـمامي
الله يخـونـه يـودع الهـيـس رجـال *** ويحـط عـفنيـن السجـايـا حشـامي
أحدٍ تشوفه يلبس رثـوع وأسمـال *** ويسكـن بيـوت الزنك ولا الخيامي
وأحدٍ شمخ بيته مثـل نايف الجـال *** وزهـاه بنقوش الحجـر والرخامي
بنزه جديد ومرتدي بشت وأعقـال *** ومـن كبـر نفسه ما يـرد السلامـي
وإلى مشى من زايـد الكبـر يختـال *** مغـويه كثـر المـال والفكـر عـامي
الـلـه يـقـديـنـا عـلى خيـر الأعمال *** وصلوا على المختار مسك الختامي
بتبع