تابع
* وقال عبدالله بن دهيمش بن عبار هذه القصيدة رثاء بالشيخ رشيد بن محمد ( سعران) المجلاد شيخ قبيلة الدهامشة رحمه الله 14
صوت الحزين بهاتفي قـال أكلمـك *** عندي علوم وقلت عطني علومـك
قـال الخبـر يمكن يغثـك ويصدمـك *** ويسهـر عيـونـك مـا تلـذذ بنـومـك
مع القبيلة خذ من الحزن مسهمك *** غاب الزعيم رشيد كوكب أنجومك
قلت أبك يا موقي عبايـر مرازمـك *** وهـل العبايـر من سحايـب غيومك
يالسان وش اللي عن النطق بلمك *** بـلاك قـو الـفـاجـعـه مـن يـلـومـك
ملزوم منظوم الرثاء ينطقـه فـمـك *** لـو المـراثـي مـا تخفـف أهمومـك
أرث الـذي يـدرك مرامـك ويفهمك *** ويسـد بـاب الـلـي يـدور أثـلـومـك
اللي إلى جيته فـرح بـك وحشمـك *** وأن جيت له ملزوم يقضي لزومك
يا أبو محمد ليت ما شفت مأثـمـك *** تبكي عـلى فقدك أصحابك وقومـك
رب المـلأ يلطـف بحالـك ويرحمـك *** وفي جنة الفردوس يجعل قدومك
بالخـلد تسكن والحـواري أتنادمـك *** ومن سندس الجنة تفصل هدومك
ليت الولي من سهم الأقدار سلمـك *** وليت الزلايب يومهـم قبـل يومـك
حتف المنية عـقب سبعيـن داهمك *** ومن طلعتـك رمح المنايـا يهومـك
سيف العـدو مهما تلقاه ما أعدمك *** وتبيع عمـرك باللقا لمـن يسومـك
وتظلم عدوك بالخطـأ قبـل يظلمـك *** ما تقـبـل العيلات مـن كبـر زومـك
زومك على اللي بالعداوات قاومك *** للخـصم ضـد وللـقـرابـه أنعــومـك
تضد مـن حـاول يضدك ويـزحمـك *** أنت الشجاع اللي تهابك خصومك
من صافي الفولاذ مـولاك صممـك *** مـا ينكسر بـاسـك وقـوة عـزومـك
زبن الذي بالضيق يا شيخ يزهمك *** دونـه تفسر عن سواعـد أكمومـك
ثـنيـت لـه قبل العـدو يدمكـه دمـك *** والكـل بالجـولان يـذكـر هـجـومـك
كنـك تدافـع عـن دوانـي محارمـك *** وغرسات حيفا عدها من أكرومـك
ما أظن هبت من العدو لو تجشمك *** عـلى الهـزيمـة ما تـوجه يمومـك
فعلـك هـو اللي بالرجاجيـل قـدمـك *** وأورثـتهـا لـلي يحـقـق أحـلـومـك
أنجال من صلبك يشدون محـزمـك *** بالفعـل والحليـا عـليهـم أرسومـك
عـلمـتهـم بالـلي بـه أبـوك عـلـمـك *** والحـمـد لـلـه حافـظيـن أسلـومـك
بيت المعزة والفخـر عالـي السّمـك *** عليه بصمه من محابـر أخـتومـك
* وقال عبدالله بن دهيمش بن عبار يرثاء بالشيخ فواز بن راكان المرشد ويعزي أخيه الشيخ طراد بن راكان المرشد وأخوته : 15
سميت بسم اللي شمخ شم الأطواد *** مجـري سفينة نوح بأفلاك طوفان
خـلاق آدم مـن صلاصيـل وأجـمـاد *** رب العباد اللي خلق روح الإنسان
ومن بعد ذكـر الله نعزيـك يا طـراد *** وانعـزي الأنجـال مـن نسل راكـان
سلايـل المـرشـد شغاميـم الأجـواد *** خلفت بشير ومن نضايض سليمان
مضاحيه ساروا على سلم الأجـداد *** حصن الطلايب من قديم لهـم شـان
تمـلأ مكارمهم عـلى جيـل الأحفـاد *** ما غيـروا عاداتهـم عـبـر الأزمـان
راكان ساد وفي رفيع الفخـر شـاد *** يصعـد سناد وفوق راس العلا بـان
صينيتـه لـهـا مـقـايـس مـن الـزاد *** كوما من البل ثم عشرة من الضان
وبالمرجلـه راكـان للخصـم ضـّداد *** شهم وكريم ودوم يذكـر بالإحسـان
يا الله عسى لـه عـند مولاه مخلاد *** يا رب تجعـل منزله عـنـد رضـوان
وكان أرتحل فواز ما تفيد الأوجـاد *** لكن عـوضنـا في صواريم حـوران
ولا ظنتي من زال عقـب الفنـا عاد *** نطلب له الرحمة من الله وغفـران
ودنياك ما تأتي على شـف وأمـراد *** ولا باقـي الا الرب خـلاق الأكـوان
كل الملأ تمشي على الحوض وراد *** روح البشر يا طراد للموت نيشان
الـلـه يكفيكم مـن حسـد كـل حسّــاد *** ومن سبكم يطمـن مقامـه وينهـان
يفخـر بكـم مـن كان بالشعـر حمـاد *** وتشهـد لـه الأفعـال ما قـال بهتـان
لو يزعلون أهل الضغاين والأحقاد *** تاريخكم معروف في كـل الأوطـان
وصلـوا عـلى بالهـدى زال الألحـاد *** الهادي المبعـوث من نسل عدنـان
* قال عبدالله بن عبار يرثاء بالشيخ مرشد بن عايش الشريفي رحمه الله : 16
جـاني خـبـر خـرب مزاجـي وكيفـي *** عاد الكدر عقب الفرح والمسـرات
وقع الخبـر هيـّض خـيالـي وطيفـي *** وفاضت عبارات المراثي وعبرات
قـلتـه ودمع العيـن يـنـزف نـزيـفـي *** خطو الرجل فقده خسارة إلى مات
نبكي عـلى الشهـم العـديـم العفيـفي *** ما دور الخـملات عنـد القصيـرات
قـرم الـرجـال الـلي ضميره نظيفـي *** الـلي أهـدافـه بالـمـراجـل بعـيـدات
الـوايـلي شـتـاح كـسـر المـضيـفـي *** راعـي الدلال المكـرمـات العـذيـات
الـبـاسـل الـلـي لـلـرفـاقـه سعــيفـي *** مرشد عزيز الجار ستر الخونـدات
عسى الخـيـال الـلي لبـرقـه رفيفـي *** يسقـي ثـرى قـبـره بـدار القـريـات
بحسنـاك يـالـرب الكـريـم اللطيـفـي *** تغفر ذنوب الشيخ عـن كـل مافـات
العبـد يفـنـا عـقـب جـري وهـريفـي *** والعمر يمضي في دقايق وساعات
مرحـوم يالقـرم الشجـاع الشـريفـي *** مرشد سليل المجد نسل الشريفات
الـنـادر الـلـي بـالـلـوازم يـقــيــفــي *** يوم الحروب الطاحنة لـه بطـولات
مقـدم جمـوع الـلي سلفـهـم يخيفـي *** حمر النواظـر يـوم للخيل صـولات
كـواكـبـه داهـوم جـمـعـه عـنـيـفــي *** خامس جموع رويل يوم القوامات
عـز الـقـرايـب والصديـق الحليـفـي *** قصيرهـم مـا يشكي الظيم هيهـات
مـن يعـتـدي خـلـوه مـثـل العسيـفي *** وخلـوا خيوله للمحاريف طوعـات
لهم قرى الغوطة مقيض ومصيفـي *** ويشتون بالريشة وحول الدميثـات
مـن حـد تـدمـر للحسـا والقـطـيفـي *** ومـن ديـرة البلـقـا إلى حـد أبانـات
ومـن قبلي الشعبـة لشرقي طريفـي *** تـرعى بها العـليا عشاير وخلفـات
يتلـون عـقب غـريـر صفـوة منيفي *** الشيـخ ابـن شعـلان زبـن الونيـات
* قال عبدالله بن دهيمش بن عبار رثا بالشيخ زيد العليق الرويضان رحمه الله : 17
قبـل أبتـدي بالقاف وأنظـم قوافيـه *** ابـداه بسـم الـلي جـزيـلـه عطـايـاه
نـرجي ثـوابـه والمخـاليـق تـرجيـه *** رب المـلأ نخشى عـذابـه ونخشـاه
مـن طـاع ربـه والفرايض أيصلـيـه *** نـال الثـواب وخالقـه فـاز بـرضـاه
الرابح الـلي الله عـلى الحـق مهديه *** والخاسر اللي طاع لبليس واغواه
الـواحـد الرحمـن بـاسـمـاه نـدعـيـه *** نبي العفو عـن شيخنا اللي فقدنـاه
يامن على المخلوق تضفي حسانيه *** ألطـف بحالـه يالولـي وأنت مـولاه
أبـو محمـد ريـف ضيـفـه ونـاصيـه *** ليت أخو سلمى عاش والنذل يفداه
بـالـجـود مـا وفـر حـلالـه أيـنـمـيـه *** لا زال يندى من الصخى كف يمناه
جـاد وتـجـمـل يـوم ربـه مـعـافـيــه *** نطلـب عسى الجنـة مقـره وسكنـاه
والشاهـد الـلـه لـه عـلينـا مشاريـه *** عسى الكـريـم بجنـة الخـلـد يجـزاه
حان القدر والعبد وش عاد بأيديـه *** وأكبـر خساره يوم عـلم الخبـر فـاه
يعـذرني الـلي مـا تـمـكنـت أعـزيـه *** لومي على اللي عنده العلم وأخفاه
مـا يفـقـدونـه بـس دانـي بنـيـخـيـه *** عنـاز تجـزع مـن رحيـلـه وفـرقـاه
أبكيـه بـالـدم الحمر كيف ما ابـكيـه *** وأرثاه بالقيفان وش لون ما أرثـاه
حـزنٍ شكيتـه يـا ولـد زيـد نشكـيـه *** تـنعـاه يا محمـد وأنـا مـثـلـك أنعـاه
تغـليـه يا محمـد وأنـا مثلك أغـليـه *** عندي وعندك لـه كرامـة ولـه جـاه
لو مات ما يمحى عن البال طاريـه *** ما أنساه والله دام أنـا حي ما أنساه
ودنيـاك هـذي كل مخلـوق تسقيـه *** الموت حوض وتنهل الخلق من ماه
صحف المنايا خالق الكون يطويـه *** ومن طال عمره لازم المـوت يقفـاه
عـمـر الفـتى لـو طـال لا بـد تالـيـه *** خـام الكفن لازم عـلى الجسم يقـداه
مـن عـاش بالدنـيا تشيّب نواصيـه *** وغـبـر السنيـن تقـربـه مـن منايـاه
ومن يرتحل ماله مرافـق أيخاويـه *** غـيـرالعـمـل ما يعـمـل العـبـد يلقـاه
ومن عـاش بالدنـيا تغـره وتغـريـه *** خـسـران مـن غـره مبـاهيـج دنيـاه
لـو هـرفـت لـه يـوم لا بـد تشـقـيـه *** ولـو أستـقـر بـجـالهـا كـود تجـفـاه
طـرادهـا بـوسط المهـافي أتهـلفيـه *** ونـدمـان من يطـرد حطـام المهبّـاه
والـلي بـهـا مفـتـون تكثـر بـلاويـه *** تـعـززولـه مـن مـصـابـه وبـلـــواه
قـبـل يـدز بحـفـرتـه مـع عـلابــيــه *** يا ليت لـو صحح مسيـره ومسعـاه
وش فاد من كثر السفـر والمناويـه *** ما جـت لـه الدنـيا عـلى مـا تمنـاه
مثل السراب اللي الظهيرة اتسويـه *** ضحاح يزمي لك على راس زيـزاه
وأختم كلامي مثل ما ابـداه وأنهيـه *** وصلوا على اللي طـاع ربـه ولبـّاه
* قال عبدالله بن دهيمش بن عبار هذه القصيدة رثاء بالشيخ معضد بن خرصان الشامري وتعزية لأنجاله الشيخ حزام والشيخ فيصل رحمه الله : 18
الـبـارحــة مـانـاد جـفــني ولا نـــام *** أسباب علمٍ زاد هاجوس والأحزان
مات العريب الشامري نسل الإكرام *** الشيخ معـضد من شغاميم شيخـان
مقـدم بـني شـامـر للأبـطـال مـقـدام *** شيخ مسمى مـن مقـاديـم عـربـان
الشيخ اللي فقـده مصيبه عـلى يـام *** تـنعـاه مـعـد ومـن تـكـنى بقحطـان
كـل البشـر يفـنون والعــمـر مـا دام *** عسى الكريم ينزله عـند رضـوان
بأمـر الولي تجـري مقادير الأحكـام *** بتصريف خلاق الملأ عالي الشـان
يـاالـلـه يـالـلـي بـالـخـفـيـات عــلام *** تلهم ذوي المرحوم صبرٍ وسلـوان
وتـزيـل عـنـهـم شـر مـرات الأيــام *** يـا رب لطفـك وأنـت للخلـق رحمن
جعل الخلف بعد السلف فيك ياحزام *** أنت الخلف بأبوك يا نسل خرصان
مـا مـات عـود مثـلكـم عـقـب غـلام *** تحيـون ذكـره يا صواريـم حـوران
يشهـد لكـم بالمجـد تسطيـر الأقـلام *** وبخلاص جـدك شاهدٍ يـوم عجلان
راعي الركايب من مشاهير وأعلام *** مثـل القمـر بـه يهتـدي كـل تيهـان
مـن لابـة تـدحم عـلى الخـصم قـدام *** أولاد شـامـر بـالـمـلازيـم شجـعـان
شجعـان باللقـوات كـان السعـد قـام *** والنعـم والله كـل ما قـيـل عجـمـان
يـوم المـراجـل والفخـر فعـلهـم تـام *** ويشهـد بماضيهـم مفاعيـل راكـان
وصلوا على بالهدى يهـدي الإسلام *** المصطفى دينـه خـتـم كـل الأديـان
* وقال عبدالله بن دهيمش بن عبار يرثاء الشيخ فيصل بن معضد الخرصان الشامري رحمه الله ويعزي الشيخ حزام بن معضد : 19
يا حـزام في جـل المصيبه نعزيـك *** أنت الخلف باللي عسى الخلد له دار
ربـك عـلى جـل المصايب أيقويـك *** أصبر على الشدات يا وافي الأشبـار
يالقرم قلت القاف بالصبر أوصيك *** خـذ النصيحـة مـن كـلام ابـن عـبـار
عسـاك ما تشوف المكاره بغاليـك *** وعساك محمىٍ عـن العـوق وأمجار
جينا بحزنـك والفجيعـة انـواسيـك *** خــلـك عــلـى مـا قــدر الـلـه صـبـار
أنـت الشجـاع ولا بطيبك تشاكيـك *** وأنت الخلف ياحزام في مكرم الجار
الموت حق وماضي الأدوار ينبيك *** والعـمـر صيـوره معـرض للأخطـار
مرحـوم يـا مـن قـلـت للـرب لبيـك *** نـاداك لـجـواره وخـاويـت الأبـــرار
لـو تنفدي ربعـك بالأرواح تفـديـك *** دونـك تبـاع الـروح يا نسل الأخيـار
والخاتمـة نطلـب مـن الـلـه واليـك *** عساك ما تعرض على واهـج النـار
* قال عبدالله بن دهيمش بن عبار يرثاء الأسمر بن خلف الجويعان وفريح بن رحيّل الصخي رحمهما الله : 20
يا من يعزيني ترى القـلب مفجـوع *** عـلى الـفـقيـدة مـن خـيـار الرفاقـه
على أبو شايم هلـت العيـن بدمـوع *** وعـلى فريـح القـلـب زاد أحتـراقـه
سهـم المنايـا خـم الأثـنين بأسبـوع *** كيف الوسيعـة عنـدي اليـوم ضاقه
اللي غلاهم داخـل الجـوف مطبـوع *** غـاليـن والغـاليـن يصـعـب فـراقـه
لـو ينفـدون الـروح لا بيعهـا طـوع *** كلـه وفاء لأهـل الوفـاء والصداقـه
والله لـو هي في مصاويل وأفـزوع *** لكـود نـثـني دونـهـم هـوش سـاقـه
يجـونـك الـويلان زافـات وأجمـوع *** حـتـى أعـداهـم يـظـفـرون بـلحـاقـه
لا شـك أمـر الـلـه منـفـذ ومطيـوع *** والـعــمـر يـفـنـا كـان كـمـل غـلاقـه
المـوت حـق وبالمخاليـق مشروع *** والـلـي رحـل لابـد نـسـلـك مـسـاقـه
ليت المنايـا مـا تجـي طايـل البـوع *** ولا تأخذ الا الـلي من الغوش عاقـه
يا الـلـه يا رحمن يا مهون الـروع *** تجبـر عـزا اللي جايـر الوقـت باقـه
لاشك بهـم أعـزاي ما هو بمقطوع *** وحـبـل الرجـاء بالله قـويـه أحلاقـه
عسى ذراريهم لهم صوت مسموع *** وعسى لهـم فـي كـل طايـل علاقـه
وعسى يدوم العـز والراس مرفوع *** والـبـيـت مـا يـذري بـلـيـا رواقــــه
غـرست نمـاهم بالبساتين مـزروع *** والـورد مـثـلـه ورد تـثـمـر أوراقـه
والخاتمـة في خـاتمة كـل موضوع *** صلـوا عـلى الـلي ما بطبعه حماقـه
* وقال عبدالله بن دهيمش بن عبار يرثاء أخيه حمدي بن دهيمش بن عبار رحمه الله المتوفي 21
في صبيحة يوم السبت 22/10/1417هـ ويسند على صفوق بن حمدي بن دهيمش :
نشكي على الله جايح الحزن يصفوق *** نصبـر تجـلـد والضمايـر جـزوعـه
حاولت كظم الغيض والقلب محـروق *** جـض الخفـوق وجاوبنه اضلوعـه
أعول عويـل الـلي تهوبـل مع النـوق *** تـخـلج حـنيـن وكـل خـايع تبـوعـه
حـن الـفـواد ولايـعــه كـل مـعـلـــوق *** والفكـر هاجـوس الروابع تـلـوعـه
هاضت كوامن لاعج الوجد والشوق *** عـزي لمـن نومه على عظم كوعـه
والدمع من عيني على الخـد مدفـوق *** مفجـوع والناظـر تهاشـل ادموعـه
وش عاد لو دمعي تحـدر من المـوق *** فـي مهجتي حسره وبالقلب لوعـه
دنياي عـقـب غيبتـه صـابـهـا ضـوق *** وقع الخبر غـث الضماير شيوعـه
يشكى من اللي سبب الوهن والعـوق *** ولا عاد نرجي من سريره طلوعـه
من شفت تقريره بـه الـورم مرفـوق *** زاد الخـطر تحديـد حجمـه ونـوعـه
صابه خبيث العـل والجنـب مشقـوق *** ومـن حـر ما صابـه تكدر اطبوعـه
الـزاد عـافـه مـا يـمـالـح ولا أيـذوق *** والـلي يذوقـه من طعـامـه يـتـوعـه
ولا باقي الا هيكــل العظـم واعـروق *** والنفس في رجوا شفـاه امخدوعـه
نادى منادي داعي الحــق مـن فـوق *** جاه المصير وحان موعد أسبوعـه
جـتـه المنيـة والأجـل ليـس مفهـوق *** ومـن عـاش فنجال المنيـه قـدوعـه
والعبد لا بده عـلى الحـتـف مسيـوق *** ينقـاد مـا هـو باخـتـيـاره وطـوعـه
المـوت بـرقـاب الملأ كــنـه الـطــوق *** المـوت منجـل والخـلايـق زروعـه
المـوت ما وفـر مـن النـاس مخلـوق *** وكل البشـر سيف المنايـا يصوعـه
ما أظن يوجد بـاب ما قـيـل مطـروق *** ودنيـاك لـو تصفـي تـبـدل وقـوعـه
والعمر لو يزهر تقـل عـود زمـلـوق *** عـقـب الطـرى لا بـد تذبـل جذوعـه
والعـمـر كانـه زال مـا هـو بملحـوق *** وخـطـو الفـقيده يفـقدونـه ربـوعـه
واخـوي الـلي يـكـره الغـدر والبـوق *** قـرم العـيـال الـلي بـعـيـده رمـوعـه
ما يـوم بهـروج الخطأ قـال منطـوق *** وجـهـام ربـعـه مـا يفـرق نـجـوعـه
ودعـته بغـرفـة تقـل جـوف صندوق *** والنـفس بالـلي قـدر الـلـه قـنـوعـه
وسـط اللحد فـوقـه صلافيح طابـوق *** وصار العـزا فقد الأمل في رجوعـه
يا الله يا اللي غيـث مزنـه لـه بروق *** تسقي ثرى جرد السهل مع فروعه
نطلبـك يا مـن كـل مـا قـلت مصدوق *** يـا رب في يـوم الفـزع لا تـروعــه
نطـلب لعـلـه عن سنـا النـار معـتوق *** بالخـلد عـن ظامي عذابك وجوعـه
والحمد للمولى له أنجـاب وأعمـوق *** أنجال من عـقبـه تضافـر ادروعـه
ما بهم قاصر عن مواجيب واحقـوق *** درب المراجـل ما تخفاهم اسنوعـه
أنجالـه الـلي ما ذكـر فـيهـم أعـقـوق *** ولا ناشهم عرق القلوب القطوعه
ولا فيهم اللي بـه سفاهـه ومطـفـوق ** ولا فيهم الـلي قـيـل نفسه دنـوعـه
وصلوا عـلى من نـور الحق بشروق *** وضّح منـار الحق تضوي شموعه
* وقال عبدالله بن دهيمش بن عبار يرثاء الشيخ حمود بن شافي بن شامان شيخ قبيلة البجايدة من السلقا رحمه الله : 22
يا كريّم ابن خضير قافـك امسويـه *** مـن صافي النقـروح مابـه احثالـه
تبغـي عن العبرة ضميرك اتسليـه *** محـزون والمحـزون عـزي لحالـه
ما الـوم قلبـك لـو يجـود بمـراثيـه *** مـن فجعـته ما هو عن الشيخ داله
شيـخ الـيـتـامـا مـا تعـدد حسانيـه *** أجهـد عـلى فعـل المـراجـل ونـالـه
مقـدم هـل البلهـا بعيـده مـرامـيـه *** يحـري بكسـب الغـانمـه والجمـالـه
أبـو مـنـوخ مـن بـعـاد الـمـدالـيـه *** مشكـل ويـزهـاه الـفخـر والشكالـه
ما كـان طيـب حمـود بس لدوانيـه *** مـن جـاه في لازم بجـاهـه مشالـه
للخيـر يسعى وحقـق الله مساعيـه *** حـتى قـضى نحـبـه وتـمـت ليـالـه
ويـوم أستمع داعي المنيه أيناديـه *** لـبى نـدا الخالـق وشـدت رحـالـه
قـدامـه الـكـوثـر تجـارى سـواقـيـه *** يجـزاه ربه عـن محاسن اعـمالـه
رديـت لـكـريّـم بـالأشـعـار أجـاريـه *** وأرثـا سليـل المرجـلـة والبسالـه
النـادر الـلي حصـل الفـعـل بأيـديـه *** واللـيـث مـا ظـني يعـقـب أثـعـالـه
مجده عريق وحاضره مثل ماضيه *** مـا حـاد عـن تعـليـم جـده وخـالـه
كـل المراجـل حاشهـا فـي مماشيـه *** وعلـّم على فعـل المراجـل عيالـه
أدناهـم الـلي يحـتمـي دون عـانيـه *** يحماهم الـلـه عـن دروب الرزالـه
يا كريّـم المكـنـون بانـت خـوافـيـه *** وسجلت من نظـم القصايـد مقالـه
وأبن مسيـّب ما بخـل فـي قـوافيـه *** قـرم العيال الـلي بهـرجـه جـزالـه
قـريـت قـافـه وأعجـبني مهـاجـيـه *** وضح عن اللي في زمانـه جرالـه
صبر على الشملي وباحت عزاويه *** يـوم الـرجـل يعـوز جيـبـه ريـالـه
وصلوا على اللي طاع ربه وباريه *** المصطفى زال الجـهـل والضلالـه
* وقال عبدالله بن دهيمش بن عبار هذه القصيدة رثاء بالشيخ العلامة حمد بن محمد الجاسر رحمه الله : 23
الـلـه وأكـبـر ولـي الـكـون مــولانــا *** تـدور الأقــدار بسنـيــنـه وأيـامــه
الـلـه وأكبـر عليم الجهـر والنجـوى *** رب الخلايـق عـلينـا تنفـذ أحكامـه
الـلـه وأكبـر رضينـا بحكـم تـدبـيـره *** والعـبـد مـا قـدمـه يـلـقـاه قـدامــه
الـلـه وأكبـر مصيـر الـحي للبـرزخ *** لابـد الأكـفان ما تـقـدا على القامـه
الـلـه يحـمد عـلى المكروه لا غيـره *** نستلهـم الصبر من فضله وإنعامه
الـلـه وأكبـر سهـرت الليل ما نمتـه *** ولا تلـومون كـان الـليـل مـا نـامـه
الـلـه وأكبـر جدانـا الحزن والدمعـة *** مـن هـل دمعـه يلوم الله مـن لامـه
الـلـه واكـبـر فقدنـا شيخنـا الفاضـل *** الـنـادر الـفـذ بـالــتـاريـخ عـّلامــه
الـلـه وأكـبـر تـوفى الباحـث العـاقـل *** والعـلم يعـتـز فـي تخـليـد خـدامـه
الـلـه ربـي سـألـتـه يـلـطـف بـحالــه *** العـادل الـلي ما سلك طرق هدّامه
عـسى مـقـره مـع الأبـرار بـالـجـنـة *** يقبـل صلاته ولـي الكون وصيامه
قـلتـه وأقـدم لنجـلـه معـن وأحـفـاده *** واجب عـزاي لكل الربع وأرحامه
* وقال عبدالله بن دهيمش بن عبار هذه القصيدة يرثا شهاب الأحمد رحمه الله احد وجهاء قبيلة الفدعان : 24
البارحـة من هاجـس الهـم منصـاب *** والدمع من عيني على الخد سالي
ما نمت طول الليل حتى القمر غـاب *** بس أقتلب عـدي عـلى حـر صالي
العلم اللي جابـه من الغـوش نجّـاب *** محـزن وفجعـني عـلى فـقـد غالـي
مالي جدا ألا أقول مرحوم يا شهاب *** الـنـادر الـلـي مـن نـوادر خـوالــي
الـولـد يـنـعـونـه شـبـابـه وشـيّـــاب *** وضنـا فريض بشرقهـا والشمالـي
الـلي كـمـل بالمرجلـه كـل الأوجـاب *** الـلي مـقـامـه بالـرجـاجيـل عـالـي
عـوايـد الشغمـوم مـا يـقـفـل الـبـاب *** ولا صد عن ضيفه بعيـد المـدالـي
وعـوايـده نطـح الهـواشـل بترحـاب *** ويذبح لهم عيت الكباش الجزالـي
ألا وتخـشى سطـوته عصم الأشناب *** وجيـران بيتـه مـا لحقهـم خمالـي
من راس لابـة ما يهابـون الأسبـاب *** وقـت اللـزم يرسون مثـل الجبالـي
القرم أبوأحمد ريف ربعه والأقراب *** للخـصـم مـر وللأصـاحيـب حــالـي
قـلـته وتشهـد لـه شغاميـم الأجنـاب *** واللي سمع به من جميع الرجالـي
ليتـه يعـف الموت عن كل من طاب *** يعـفـي الكـرام ويكـتـفي بـالـنـذالـي
والخاتمه مرحوم يا ريف الأصحاب *** عسى العوض باحمد عديم العيالي
ونرجي من اللي من ترجاه ما خاب *** يشملـك بالرحمـة عـزيـز الجلالـي
* قال عبدالله بن دهيمش بن عبار هذه القصيدة يرثا سعود بن حمد البردي رحمه الله احد نوادر قبيلة الفدعان : 25
قـال الـذي هجس الروابع بـدت لـه *** غزر الدموع من المحاجر مسحهـا
نادى المنادي مـا قـدرت ألتفـت لـه *** مهمـا كتمـت الدمع عـيني فضحهـا
عـلى الفقيد الـلي عيـوني بكـت لـه *** فـقـده فجـيعـه والضمـاير جـرحهـا
والـعـبـد كـانـه حـان مـيـعـاد قـتـلـه *** الـروح بـسـهـوم الـمـنـايـا ذبـحهـا
مـات الـذي دنـيـاه مـا مـهــلــت لـه *** الـلي خصـالـه مـن عـرفها مدحهـا
أبـو حمـد مـا بـار يـوم أستـوت لـه *** بـيـبـان بـيـتـه لـلهـواشـل فـتـحـهـا
سعود اللي سـود الليالي طـوت لـه *** اللي المصاعب دون ربعـه نطحهـا
دنيـا الشقا كـان البنـادم صفـت لـه *** لابـد عـقـب الكـيـف يـظهـر تـرحهـا
من تضحكه تبكيه كان أضحكت له *** طـول الـزمن مـا يـوم داوم فـرحهـا
والعبـد بالـدنيـا كمـا غـرس شتـلـه *** لـو أخضـرت لابـد يحصـرم بلحـهـا
يـسـوح والـدنـيـا الـدنـيـه تـخـتـلـه *** والـرابح الـلي دوم نفسـه نصحـهـا
لو كان يدري بالخفا وش عبت لـه *** دنـيـاه صـد وكـبـهـا مـا شـبـحـهـــا
يا سعود لـو عمرك يعـود فـدت لـه *** أرواح ربـعـك كـل مـنـهـم سـمحهـا
* قال عبدالله بن دهيمش بن عبار يرثاء محمد بن يحيى البوهي الجعفري احد وجهاء قبيلة ولد سليمان رحمه الله : 26
عـلم سمعـتـه حـط بالقـلـب ولـوال *** يا ليت يا عايـد لي العلـم ما جيـب
يا ليت أبو عدوان بالشعـر ما قـال *** غدي الكلام اللي سمعناه مايصيب
سهم القدر مـا طـاع شاير وعـذال *** الموت برقـاب البشر ما بهـا ريـب
لـيـت الـمـنـايـا للـهـلابـيج الأنـذال *** ما تاخـذ اللي ينطحون المصاعيب
مرحوم من يدرك صعيبات الأنفال *** يـوم المراجـل يحتفـظ بالمـواجيـب
يقول أبو عدوان به خمسة خصال *** بمحمـد البـوهي قـليـل الـعـذاريـب
الأولـه بـالـجـود لـلـمـال بــــــــذال *** ريف الهواشل بالسنين الشلاهيب
والـثـانـيـة عـنـده مـعـاميـل ودلال *** يفرح بها اللي ما حناسه معـازيب
والـثـالـثـة فـيـه الحـمـيـة ولا زال *** يذكـر مع الأصحاب هـم والأجانيب
والـرابـعـة مـا قـيل للهـرج نـقـّال *** حاميـه عن حكي الخطأ عالم الغيب
والخامسة عنـد اللزم يبذل الحـال *** وإلى تطـاروا عادتـه ينفض الجيب
قـلته مثـل من قـال قبلي بالأمثـال *** ويستاهل التمجيد من يفعل الطيـب
الـلـه يعـوضنـا بـذربـيـن الأفـعـال *** اللابـة الأدنـيـن حصـن المـطـاليـب
* وقال عبدالله بن دهيمش بن عبار يرثاء عبدالله العلي المنصور الزامل من أهالي عنيزة رحمه الله : 27
علم سمعته غاضني وأبعـد الكيـف *** ولا ينفع المحـزون لو قـال ويـلاه
قالـوا توفى صاحبـك قـلت ياحيـف *** والـعـبـد ما داوم سـروره بـدنـيـاه
أديبنا المعروف من غيـر تعـريـف *** عبدالله الزامل عسى الخلد سكنـاه
عـز الله أنـه عادتـه يكرم الضيـف *** ما راح ضيفه عابس الوجه يشناه
وعـز الله أنـه مـا يهـاب التكاليـف *** أيضـاً ويـفـرح بالمسيّـر إلـى جـاه
تلقـا الـوقـار بمجلسه والسواليـف *** لـولا المشـاغـل زايـره ما ايتعـداه
وتـلقـا المهيّـل بالـدلال المهـاديـف *** والكبش لا جاء لازمه ما أيتغـالاه
طيبـه بـري مابـه تصنع وتزيـيـف *** بعيـد عـن فعـل الريـاء والمحابـاه
ولا دوّر البلـغـة بكـثـر التـواقـيـف *** شهم وعفيـف ومقنعـه مـد مـولاه
أبـو عـلي صـالات بيتـه متـاحيـف *** لـم الـتـراث الـلي يحفـظـه ويقـنـاه
حاشه وجابه من جميع الأطاريـف *** والـفـن مـن منتـوج فكـره ويمنـاه
يجمع نوادر ما توصف بتـوصيـف *** ماضي علوم الجيل يفخـر بذكـراه
عسى مـقـره بالبساتـيـن والـريـف *** يـنعـم ويـدرك كـل مـقـصـد تـمنـّاه
هـذي تدابيـر الزمـن والتصـاريـف *** يـزول جيل وجيل بالـدرب يـقـفـاه
المـوت يـدنـي والمنايـا خـواطيـف *** والكـل فـي دنيـاه تـقـفي مـطـايـاه
تـم الجـواب ولا تـفـيد التحـاسيـف *** على الذي لو غاب ما غاب طرياه
عسى عيالـه ما تجيهـم صواديـف *** عاشوا وداموا بأوفر القدر والجاه
* ومن شعر العزاء قال عبدالله بن دهيمش بن عبار يعزي أحد الأشخاص : 28
يجبـر عـزاك الـلـه يـا بنـت الأجـواد *** الصبـر مفتـاح الفـرج لا تـنوحيـن
ما لوم لو تشكين من حـزن واحـداد *** كله من أسباب الوفى تدمع العيـن
مات الرسول المصطفى خير الأفراد *** والـمـوت مـا وفـر خـتـام النبيـيـن
تمضي حيـات العبـد في كـد واجهـاد *** ودنيا الشقـا دايـم تـلـوّن تلاويـن
الــعـمـر صـيـوره عـقـب جـدتـه بـاد *** الـلـه يـكافـينـا غـثـا الهـم والبيـن
مـا دام محـمـود السـجـايـا لــه أولاد *** يجبـر عـزاك الـلـه وفيهم تعـزيـن
أمـر الـكـريـم ويـفـعـل الـرب مـا راد *** والكـل منـا لـرحمة الـرب راجيـن
مرحوم من حطوه في وسط الألحـاد *** عساه بالـفـردوس بيـن البساتيـن
* قال عبدالله بن عبار يرثاء زميله خلف بن عبيد الخمعلي رحمه الله : 29
البـارحـة جـانـي عـن النـوم لادود *** والقـدر صـار ولا تـفيـد التـواجيـد
قالوا خلف من دونه الباب مـردود *** وأصبح مقـره بالرموس الهواميد
الله يرحم صاحـب الطيـب والجـود *** عـسـاه يـنـعـم بالثـمـر والعنـاقـيـد
في ما مضى بزيارته كنت موعود *** مار القـدر يخلف جميع المـواعيـد
جيته بعرعر قيل لي غيـر موجـود *** ولا صح لي شوفه بحزم الجلاميد
ودنياك هـذي فـانيه ما بهـا خـلـود *** أقـفـت بعنتر والـزناتي وأبـو زيـد
دنيا الشقا ما بيـن سارد ومسـرود *** يـا مـا هفـابـه مـن كـرام الأوالـيـد
أيامهـا يأتي بهـا نحـوس واسعـود *** يوم عـزاء واليوم الآخر بها عيـد
فيها ليالي بيض وأيضـاً بهـا سـود *** نـوب فـرح وسرور وأحيان تنكيد
سهم القدر ماهـو عن العبـد مردود *** ترمي سهوم الموت مثل العباريد
وحـوض المنايـا للمخاليق مـورود *** وكثر البكا والنوح والحزن ميفيد
* قال عبدالله بن دهيمش بن عبار في رثاء الشيخ راشد بن ناصر الجدوع احد وجهاء مدينة الحريق رحمه الله : 30
عـلمٍ لفـانـي ليـت مـا جـيـب طـاريـه *** قـالـوا توفـى الشيخ زبن المداليـه
الفـاضـل الـلـي مـا تـعـدد حسـانـيـه *** فـقـده فجـيعـة خبـث الفكـر والبـال
راشـد نـبـغ بـالـمـرجـلـة والحـمـيـه *** مـرخـص حلالـه للـنـفـايـل هـديــه
عـنـده يـقـيـن أنــه يـزور الـمـنـيــه *** ما حالف الدنيا مثـل بعض الأنـذال
مرحـوم يالشهم الكريم أبـن جـدوع *** الـقـرم بـابـه للهـواشيـل مشـروع
شـاف الحيـاه الفانيـه كنهـا أسبـوع *** وبـدد حلاله ما تشافى عـلى المـال
يوهـب جـزيـل المـال يـرجي ثـوابـه *** يمشي على منهاج سلم الصحابـه
مـالـه فـنـاه ولا يحـســب أحـسـابــه *** عساه له عن واهج الشوب مقيال
مرحـوم يا شهـم الرجـال أبـو ناصـر *** عـز اليتيم وريـف من كان قـاصر
يـلجـأ لـه الـلي مـن زمـانـه محاصـر *** كـفـه كـمـا الهـداج لـلـمـال بــّذال
يا كثـر الـلي وقـت الملازيم يـنصـاه *** حـيثـه كريـم وتبـذل الجـود يـمنـاه
بـالـذكـر ولا مـنـزلـه مـا وصـلـنــاه *** من فضل خلاق الملأ بحسن الحال
مدحـت كفـو المـدح مـالي مقاصيـد *** لا شـك نفخـر فـي مديـح الأجاويـد
ومن حاش علم الطايلة والتحـاميـد *** ترفع له البيضا على روس الأقذال
عـلم الفخـر ما كـل مجـهـد يـطـولـه *** ما نـالـه الا الـلي يهـوم الـرجـولـه
الـنـادر الـلـي نـفـتخـر فـي فـعـولــه *** نعـم بخوالـه زاكـي العــم والـخـال
ساسـه تميـمي والخـوال الهـزازيـن *** نسـل القـروم النـافـليـن المسميـن
هـزازنـة من صلب وايـل عـريبـيـن *** تاريخهم ينبيك عن ماضي الأفعـال
كـم واحـدٍ لا زاد ظـيــمـه شــكـالـــه *** وقـت اللـزم يفـزع بجـاهـه ومالـه
والـيـوم سـلـمـه مـاسكيـنـه عـيـالـه *** مشموخ مجـده بالمعـالـي ولا زال
سلمه عـلى طـول المـدى ماسكـينـه *** وعـلى المكـارم جهـدهـم بـاذلـينـه
وكـل العــلـوم الـغـانـمـة عـارفـيـنـه *** نسل الـذي بـيتـه للأجنـاب مدهـال
يا الـلي عـن الأجـواد بالقـول نـاشـد *** لو زال راشد ما محى ذكـر راشـد
مجـلس أنجـالـه بالـرجاجيـل حـاشـد *** يحيون ذكـره بالفضايـل والأنفـال
يحـيـيـون ذكـره بالعـلـوم الحـمـيـده *** وتصبح مساميـل المفاخـر جديـده
ومن طـاب يـذكـر بالـديـار الـبعـيـده *** والمجد يبقا والفخر عبـر الأجيـال
الـلـه لا يـقـطـع ذراري هـل الـجــود *** والله يصبرهم على العسر والكود
زبن الذي من جايح الوقت مضهـود *** يـزبـنهـم المـظـيـوم لا حـده الـلال
قـدمـت شـعـري تـعـزيـة لـلـكـرامـي *** مع جـل تقـديـري لهـم وأهتمامـي
جـميعـهـم مـن دون ذكـر الأسـامــي *** وأهدي تحياتي عـلى كـل الأنجـال
والـمعـذرة يـا طـيـبـيـن الــفـعــايـــل *** قصرت عن تمجيد واف الخصايل
وضحـت منظـوم الـعـلـوم الصمـايـل *** ولا لي مقاصد يوم نظمت الأمثال
وأختامهـا صـلـوا عـلى سيـد النـاس *** الـلي أشـاع العـلم للخلـق نبـراس
عـد الحـجـار وعـد ذرات الأطـعــاس *** وأعـداد ما يمطر من الغيث همال
* وقال عبدالله بن دهيمش بن عبار هذه القصيدة رثاء بالشيخ راشد بن جدوع والشاعر لويحان العنقري التميمي رحمهما الله : 31
قـال الـذي كـنـه عـلـى جـمـر الأوقــاد *** كـن الوقـايـد شاعـله فـي فـواده
سهـران ليلي مـا هـوى جـفـني أنـواد *** ومن باح سده ما يطيق الوساده
ومـن بـه محسـه ما تـنـقـذ مـن الـزاد *** يجـزع من غبون الغثـا والنكاده
مـا قلت توجيدي عـلى غـض الأنهـاد *** ولا همني لـو عرضت كـل غـاده
وجدي عـلى نسل الحمايـل والأجـواد *** يالـلـه عساهم فـي مقـر السعـاده
راحـوا هـل الطـولات زاكيـن الأجـداد *** هـل الـمكـارم والفخـر والجـواده
خـذاهـم الـرحـمـن بـايـام الأعــيــــاد *** الروح زرع وحان موعد حصاده
وش عاد لو ننعى الأجاويد وش عاد *** الـخـلـق تـالـيـه الـفـنـاء والإبـاده
الـمـوت حـق وللـمخـالـيـق مـرصـاد *** مـار البخيـت الـلي ينـال الشهـاده
لا شـك مـا تـفـيـد الأمـاني والأوجـاد *** مـا قـدر الـمـولـى تـعــدى الأراده
مـرحـوم يا الـلـي لـلجـمـالات صـيّـاد *** وهـاب مـالـه ما خشي من نفـاده
الشيـخ ابـن جـدوع لـلـطيـب معــتـاد *** المحسن اللي عنـده الطيب عـاده
راعـي الكـرم يـدوم عـلمـه ولـو بـاد *** يرحمهـم الـلي يـرتجـونـه عـبـاده
وثـانـي فـقـيـدتـنــا مـفـكـر وقـصّــاد *** وقـدوة لنـا في منهجـه وأجتهـاده
الـلـي تـعــرفـه بـالأدب كـل الأفـــراد *** عبدالله لـويحـان من روس سـاده
عسى خـلفـهـم فـي شـغـاميـم الأولاد *** ولا خاب من يتبع مكـارم أجـداده
أسـلافـهــم كـانــوا مــقــــادم و رواد *** لـهــم بـتـاريـخ الحـمـايـل أشــاده
بـني تـميـم أهـل المفـاخـر والأمجـاد *** لهم المكـارم مـا حـصـينـا أعـداده
والخاتمـة صلـوا عـدد رمـل الأنـفـاد *** على الرسول أعـداد نبت الحمادة
* وقال عبدالله بن دهيمش بن عبار هذه الأبيات عـزاء ومواساة لأسرة الروسان بوفاة عايش بن عيد أبو الروس رحمة الله : 32
أصبر لعـل الله يا أبـو عيـد يأجـرك *** عسى ولـي الكـون يجـبـر نصابـك
كان الحزن كدر يا أبو عيد خاطرك *** أصبـر عسى مولاك يجـزل ثوابـك
أصبر على المقدور والرب يسترك *** أنت الخلف أنت العـوض والبقابك
أصبـر وشجّـع يالسنـافي ضمايرك *** اكظم غضب قلبك وأملـك أعصابك
وأنـت الـذي كـل الحمولة تناظـرك *** بالصبـر عـنـد الجـايـحـة يقـتـدابـك
ويا أبو فهد يا القـرم ربـك يصبرك *** صبرك عـلى حكم القدر واحتسابك
يا من فقد عايش بحزنـك نشاطرك *** مصـابـنـا يـا مسنـدي هـو مصابـك
جـينا نضم شعـورنا مـع مشاعـرك *** ولا الـمـقـدر مـا تـرده أصحـابــك
مرحوم يامن ماسلك مسلك الشرك *** بالحـل لك يدعـون جملت أحبابـك
نفسـك زكيـه دوم بالخـيـر تـأمـرك *** ونـزهـت عـن كـل المعايـب جنابـك
يالزاكي الـلي مـا تـناظـر قصايـرك *** ولا يـوم جـارك بالـمـذمـة حكـابـك
يا اللي بفعـل الخير طابت مخابـرك *** فعـل المـروه والصخـى يلـتـقـابـك
وإلـى لفـاك الـلي مـن البعـد زايـرك *** من زار بـيتـك قـلـت له يا هـلابـك
كنه بياض الشاش ناصع ضمايـرك *** عـنـد البعيـد وعـنـد داني اقـرابـك
يلطف بـك الـلي مطلع في سرايـرك *** نطلب عسى المولى يخفف عذابك
عـسـاه بـالـجــنـة ولـيّــك يـبـشـرك *** وعساك تحمــل فـي يمينـك كتابـك
* وقال عبدالله بن دهيمش بن عبار هذه الأبيات تعزيه للدريس والحويلا : 33
الـلـه وأكـبـر والـزمـن بـه عـبـايــر *** يا ما فجـع غـالي عـلى فقـد غالين
يـا الـلـه يـا الـلي مطـلع بـالسـرايـر *** يـا رب لا تـفـجع قـلـوب المحبـيـن
مهـمـا نعـبـر مـن خفـايـا الضمـايـر *** ما تنفع الدمعـة على محجر العيـن
فـي مهجـتي شبـت لهـوب السعايـر *** جـاني خبـر نسل القـروم المسمين
اكـتـب عـزاي لـطيـبـيـن الـعـشـايـر *** نسـل الحـويلا والدريس العزيزيـن
بفـقـد القـروم الـلي عـلينـا خسـايـر *** لا شك ما نملـك لـرد القضاء شيـن
والحتف دولابـه عـلى الخلـق دايـر *** مـن لا يجـيـه اليـوم يأتـيـه بعــدين
ما قـدر المـولى عـلى العـبـد صايـر *** من عاش وافاه القدر لو بعد حيـن
نعــزي ذويـهـم طيـبــيـن الخـبـايـر *** عسى الخلف باللي من الربع باقين
يتبع
الإهداءات
03-20-2022, 07:09 PM
العرض الشجري
