من قصائد شاعر الدويله
الشاعر / غانم اللميع رحمه الله ..
يالله يامنشـي ثقيـل الهمالـيـل
يارازق القاع المحيلة بالامطـار
قال المصرف فصل القاف تفصيل
قرايـض ماقالهـا كـل بيطـار
ياعيال عقب السولفـة والتعاليـل
الي ببالة دنة النجـر لـه كـار
طب القلوب اللي يجيبـه ولاويـل
شرب من البن الحمر حامي حـار
وادغث لها قيمة سناف من الهيـل
ويجوز كان انك ذعرته بمسمـار
وناسة لافـات ثلـث مـن الليـل
لانام ولد الثور مع بنت الاثـوار
وعندي لك اشوار والاشوار تدليل
وترى الهدى نوبات يلقى بالاشوار
دنوا ثلاث معفيات عـن الشيـل
لاهن من الفطر ولاهن الابكـار
اختر من الجلس ولاهن مواحيـل
حلاة حاصلهن على قد الاكـوار
عقب السري حيل يجفلـن تجفيـل
لا جا نهار به تبا الظـل والغـار
حمر العيون مداحمـات المخاليـل
اكواعهن ماقربن حـول الازوار