هذه القصيدة تعتبر وثيقة نسب لقبائل ربيعة العشرة - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

اليوم, 07:32 AM

هذه القصيدة تعتبر وثيقة نسب لقبائل ربيعة العشرة

بسم الله الرحمن الرحيم وبه نستعين
هذه القصيدة تشرح عن أنساب قبائل ربيعة العشرة المعروفة في العصر
الجاهلي وصدر الإسلام وملخص من تفرّع منهم حسب ما جاء بالمصادر
والوثائق وما استفاض واشتهر وعرف لكي يدركون الذين يخلطون القبائل
وينسبونها لبعضها أن النسب ثابت ما يزوّر ولا يحوّر وقلت :

أريـد اعـد أنـسـاب عـزوة ربـيـعـــــه *** هـم أكلـب المشهور وأيضاً ضبيعة
وأسـد أسـد الـغـاب مـا هـو نـزيـعـــه *** خلفـة نـزار ومن صماصيم عدنـان

واقـسـام اكـلـب هـم مـحـلـف وعـامـر *** رجـالـهـم بـالـكـون للخـصـم دامـر
ضـد العديـم اليـار ركـب كـور ضامـر *** وعوق الخصيم اليا تلاقـوا بميدان

أمـا ضبيعـه خـلـفـتـه احـمـس وزيـد *** وجـلي يعـد مـن الرجـال الصناديـد
والـيـوم صـاروا فـي بـلاد الأكـاريـد *** بأرض الحويزه في نواحي عبادان

وعميـرة جـاب من المناعير منـعـور *** انجـب مبشـر خلفته صايب الشور
ومبشر جـاب انمـار نجـلـه ومنصـور *** وعدي من نسله له القـدر والشان

أمـا عـنـزة يــذكـر ويـقـدم عــيــالــه *** نـوادر مـن انـجـال عـامـر سـلالـه
جـد عـنـزة حـاز الـلـقـب بـالـبـسـالـه *** الفـارس الـلي لـلـمـعـاديـن طـعـان

يـذكـر ويـقـدم عقبـوا جسـر وهميـم *** وبنـو سعد مثـل الحـرار الصواريم
وبنو الدول شجعان ما تقبـل الظـيـم *** ومنهـم مقابيس الوغى نسـل هـزان

وطريـف منهـم ثـم عـزوة محـارب *** فـوق النجـايـب مـهـدفـات الغـوارب
لـهـم عـلى فـعـل الـمـراجـل تـجـارب *** وثامـن نسـل عامـر شغاميـم جـلاّن

ومنـهـم ضنـا عـنـاز من نسـل وايـل *** مسلـم وبشـر مـن سـلايـل حـمـايـل
كـان اعـتـلـوا قـب المهـار الأصـايـل *** يـوم اللقاء يثنـون لا صـار مـيـدان

وجـديـلـه انـجـب عـبد قيس وغفيلـه *** والنمـر أبـن قاسأط اعـزاز القبيلـه
وبـكـر وبـني تـغـلـب حـمـات لدبيلـه *** وعنـز بتهامه بيـن خثعـم وشهران

من نسل عبـدالقيس لكيـز مـع شـن *** ومنهـم قـبـايـل مـا بمـفعـولهـا ظـن
مـثـل العـيـونـي مـا تخـاذل ولا كـن *** بـاد القرامط يـوم زوغـات الأذهـان

والنمـر منهـم تيـم مع اوس منّوات *** الـلابـة الـلي يـلـتـقـون الصعوبـات
لـهـم مـفـاخـر سـجـلـت بـالسجـلّات *** ومقدامهم شيخ النمـور الضحيـان

وغـفيله ايضاُ منهـم قسام وفـروع *** مع تغلب الغلبا غدوا حلف وجموع
تاريخـهـم بمسطّـر الكتـب مطبـوع *** وبـلادهـم بـيـن الـجـزيــره وحـرّان

وتغلب منهم بطل الوغى يوم خـزاز *** كليب وايـل فـي عـلـوم الفـخـر فـاز
جـمـع الأراقـم لا بــدأ طـراد ولــزاز *** منهـم هـل الشهبا صناديـد حمـدان

وبكـر منـهم يشكـر وعجـل وحنيفـه *** وتيم وقيس أهل الجموع المخيـفـه
يـوم المطـاعـن بالسيـوف الرهيفـه *** منهم ذهـل عـوق المعادي وشيبان

وعنـز انجب أراشه وأنجـب رفـيـده *** منـهـم عسيـر قـروم نـعـم الـبـديـده
أولاد عـنـز أهـل الـفـعـال المـجـيـده *** أهـل السـراه الـلي بهـا علمهم بـان

هـذي ربـيـعـة فـي جـميـع المـصادر *** عـشـرة قـبـايـل بـالـفـعـايـل نــوادر
ومـن حـرّف التاريـخ مـا كـان قـادر *** يدفـن نسـب عشـر القبايـل بكثبـان

هـذا نـسـب والـكـل يـنـسـب لـجــده *** ماهي عـلى الرغبـة ولا هـي مـوّده
صدق الـحـقـايـق كـل فـاهـم يـعــدّه *** مـاهـي حكـايـة قـالهـا فـلان وفـلان

جمع عنزة من ساس عزوة عريقه *** كـل العـرب عنهـم تـقـول الحقيـقـه
الـعـم مـا يـنسـب لخـلـفـة شـقـيـقـه *** ولا جـاز شلح الجد في كل الأزمـان

كـم جـد فـي ذريـتـه صـار مشـهـور *** لـولا فـخـرهم كان مخفي ومطمـور
هم شهروا علمه وهـو كان مغمـور *** عاجز عن علوم المراجل وكسلان

والـلـي نـزل لـو كـان جـدّه خـليـفـه *** مـع العـرب مـالـه مكـانـه وصيفـه
من لا صعـد روس الجبـال المنيفـه *** يـبـقى مـقـرّه في مهابيط الأطمـان

والـلـي تـخـيّـر بالجـدود المشاهيـر *** مقصـوده لجـده عـيـاف ومحاقيـر
مـا تـاجـد الـلي ينتحـل جـد تـزويـر *** ولا هو بضاعة يجلبونه بالأثمان

وايـل ضنـا عـنـاز اصـل وعـراقـه *** ما هـو حليـف ولا لغـيـره لحاقـه
وايـل جـديـلـه مالـنـا بــه عـلاقــه *** حـنـا ضنـا عنـاز والساس ويـلان

ذكـر عـنـزة دوّن بـكـل المـراجـع *** ولا يغيّـر الأنساب منشـد وساجـع
تـذكـر لهـم فـي كـل ديـر منـاجـع *** من خيبـر الحـره اليا حدود لبنـان

عـنـاز كتّـاب النسب ما اهمّلوهـا *** تـنـاولـوهـا بكـتبـهـم مـا نـسـوهـا
ما تنسب العـزوة عـلى غير ابوها *** واللي يعاف الجد يشعر بنقصان

اصل عنـزة معروف مافيه شكات *** من مصدر التاريخ ماهي خرافات
والـلي يلفـق من خيالـه حكـايـات *** نقـول لـه تـراك مخـطي وغلطـان

جـد القبيـلـة رقـم سبـعـة وستيـن *** مضى عليه قرون بحدود عشرين
وجـود عـامـر جـدنـا قـبـل الفيـن *** حيث المصادر وضّحت كل ما كـان

قلته وأنـا سجـلّت تاريخ وأنسـاب *** حـقايـق يفخـر بهـا الكهـل والشاب
اقصاص تنقـل من روايات شيّـاب *** وعلى البحوث امضي الليل سهران

اطلـب مـن الـرّب الكريـم المعـونـه *** والـلي عـملتـه عـزوتـي يـذكـرونـه
بيـض الضمـايـر جـهـدي يثمنونـه *** ولاني بحـال الـلي يقولـون جحدان

عـزوة ضنـا عـنـاز فصلتهـا بـدود *** بشر وضنا مسلم من الطفل للعـود
انشر صحيح القول من علم ماكود *** مجهـد ولا اسجـل هـذاريـم سردان

جملـة ضنـا عنـاز من دون تفـريـد *** أنساب نسل سهيل مع عـزوة عبيد
وبني وهب وجـلاس نعـم الأجاويد *** وذكـرت فرسـان القبيلـه والأعيـان

سهيل أبن بشـر ضنـاه العـمـارات *** انجـب جبـل شجعـان يـوم القوامات
وسلقا سلامه لهم بالكون صولات *** ودهامشه في جولت الخيـل فرسان

وعبيـد من عقبـه سليمان وسبيع *** ابطـال في عصـر اللقـاء والمفازيع
رجالهـم بطـلٍ صميدع وصعصيع *** وثـالـث قبايـل خلفـة عبيـد فـدعـان

وجلاس عقّـب فـارس الخيـل زايد *** وزايـد مـن اعقـابـه ثمـان البـدايـد
رويـل الـلي لهـم المراجـل عوايـد *** قعاقعـه ورجـال مرعـض ودغـمان

وفـرجـه والكواكبـه علمهـم شاع *** وأشاجـعـه لابـه طـويـليـن الأبـواع
سوالمه يوم الوغا اسود واسباع *** وعبادل اللي تروي السيف والزان

من وهب الشراعبه ضد من عـال *** وولادعـه بالكون شجعان وأبطـال
وعـزوة مـنبـه لا بطـل كـل عـذال *** سـت الجمـوع الـلي تكـنّى بنبهـان

فصلـت وايـل بالسجـلات تفـصيـل *** وذكـرت ذربيـن الرجـال المشاكيـل
من وقتنا الحاضر لياماضي الجيل *** ولا قـلت قـول بـلا دلايـل وبـرهـان

جـمـعـت كـل تـراثـهـا والـحـداوي *** وسـومـهـا والـقـابـهـا والـعـزاوي
آخـذ صمال العلـم من هـرج راوي *** وانقل من الشياب في كـل الأحيان

يا ما أخـذت من المشاوير جولات *** ادوج خمس عقود واجمع روايات
بعد مجهود ألفت عشرة اصدارات *** وحاولت اكمّل سيرتي قدر الأمكان

والحـمـد للـرحمـن كـتـبي مـفـيـده *** فيـهـا ذكـرت انـسـاب كـل الـبديـده
وآخـر كـلامي فـي ختـام القصيدة *** صلّوا على اللي سار في هدي قرآن

مع تحيات عبدالله بن دهيمش بن عبار الفدعاني العنزي