قال عبد الله بن دهيمش بن عبار العنزي هذه المنظومة في المواعظ والحكم من قديم شعري وقد اختصرتها على221 بيتاً : 17
أول مـا قـلـت وبـديـــت *** بسـم الـله ربـي سميـت *** الـلي له صمت وصليت
1- مالـك الملـك الرحمـن
هــو الـرءوف الـرحـيـم *** وهـو الحـكـم والحـكيــم *** وهـو الـواسع والعـليـم
2- يعلـم ما يخـفى وما بـان
الــمـلــك رب الأنـــــام *** هــو الـقـدوس الـســــلام *** ذو الجـلال وذو الإكــرام
3- سبحـان البـاري سبحان
مؤمـن مهيمـن بالكـون *** مـتعـال وعـدل القـانــون *** الوالـي مخرج ذا النـون
4- من مظلم جوف الحيتان
هــو العـزيـز الجــبــار *** وهـو النـافـع وهـو الضــار *** وهـو الـقهـار الـغـفـار
5- نطلـب عـفـوه والغـفـران
هــو الـعـلـي الـكبــيــر *** وهــو اللـطـيـف الخـبـيــر *** وهـو السميع البـصـيــر
6- وهو منزل وحي القرآن
هـو الـعــفــو الـتــّواب *** وهـو الـرزاق الـوهـــاب *** غـني ومغـني بـالأسبـاب
7- هو ضامن رزق الإنسان
ظـاهــر وبـاطـن بـديـــع *** بـاسـط الـبــر الــوسـيــع *** رافــع ســمـاه الـرفـيـع
8- مسموك ولا لـه عمـدان
هـو الصمـد رب البـيــت *** وهـو الحـفيـظ المـقيــت *** وهـو المحيـي والمميت
9- يـدوم ومخلوقـه فـان
خـالـق الـخـلـق ومــولاه *** واحــد لا يـعــبـد ســــواه *** الـولـي عـظـيـم الـجـاه
10- المتكبـر عالـي الشـان
هـو الـشهـيـد الـرشـيــد *** وهـو الـحـمـيـد الـمجـيــد *** وهـو الـمبـدي والمعيد
11- وهـو الـوارث والديـان
هـو الـغـفـور الـشـكـور *** وهـو الحـق وهـو الـنـــور *** وهـو المقتدر الصبور
12- قـادر واللي أيريده كـان
هـو الــواجـد والحسيـب *** وهـو الـمـاجـد والـرقـيب *** وهـو المانع والمجيـب
13- وهـو المعطـي والمنـان
هـو الـمـتـيـن الجـليــل *** وهـو الـقـابـض والـوكـيـل *** وهـو الـهـادي للسبيـل
14- وهو المقسط بالميـزان
هـو الـقــوي الـعـظـيــم *** وهـو الـمـنـتـقـم الحـليــم *** وهـو الـفـتـاح الـكـريــم
15- ينفـق ما صـك البيبـان
هـو الأول في الوجـود *** وهــو الآخـر والـمعـبــود *** وهـو البـاعـث والـودود
16- منجي نوح من الطوفان
هــو الـمـعــز الـمــذل *** وهـو مـقــدم قـــدره جـــل *** وهـو مـؤخـر رب الكـل
17- وهو معطي الملك سليمان
هـو الحـي وهـو قـيـوم *** وهـو الـبـاقـي دائـم دوم *** حـاشى مـا يـأتيـه الـنـوم
18- وحاشى يـأخـذه النسيان
هــو البـر بـيـده الخيـر *** جـامـع وخـافــض قـديــر *** مصـور خـلـقـه تصويـر
19- محصي المخلوق بحسبان
أحـد ولا غــيــره رب *** مـن خـالـف تـعلـيـمـه تــب *** بـيـديـه الحكمـة والطـب
20- - وهـو مبـري سقـم الأبـدان
جـل وتقـدست أسمــاه *** مـالــه مـثـيـل ولا أشـبــاه *** خــلاق الـكــون ومـولاه
21- رب الأنس ورب الجان
خلق آدم مـن فـخـار *** والجـن أوجـدهـم مـن نــار *** وخـلـق ما طـار وما سار
22- أشكال عباده وألـوان
خالق الخلق ومنشيـه *** بـديـع الـكـون وبـاريــــه *** ربــي مـا خــيّـب راجـيـه
23- - للخيـر أيـدل الحيـران
سبحانه ماله وصيــف *** هـو المعـبـود ولا شـيــف *** يـلطـف بـالعبـد الضعيف
24- نطلـب عطفـه والحنـان
هــو الـمتـنـزه بـالـذات *** كـامـل فـي كـل الصفـــات *** هــو فـطــار السمـاوات
25- والأرض أودعهـا قيعـان
مـن نـادا باسـمـه لـبّـاه *** يسـمع صـوت اللـي نـاداه *** نـرجـو فـضائـل حسناه
26- ونشكر فضله والإحسان
كـل عبـاده لـه يرجـون *** وكلن يطلـب منـه العــون *** ومن يعصى ربه ملعون
27- يستاهـل طـرد وحرمـان
يا للـه يـا مديـر الأفـلاك *** يــا مـالــك كـل الأمــلاك *** يـا رازق عـمي الأسماك
28- فـي لـج بحـور وخلجـان
يـا منشي مـردوم الغيـم *** يـهـل السحـب مـن الديــم *** يـنـزل بـالـقـاع الهشيم
29- وتصير فياض وريضان
يا مرسل زعوج الهـوج *** ينشر سحـاب من المــوج *** يـنبـت خمائـل ومروج
30- وأزهار الورد وريحان
يـا ملقـح ريـح الذعـذاع *** مـن غيث البـرق اللمـاع *** تروي به عطشان القاع
31- سهـل وجبـال وشعبـان
يـا مـن نسيم الهبـوب *** تديـره من صـوب لصــوب *** والمزن بقطره مسكوب
32- من سيله يملأ الغـدران
يا فـالـق حـب الحصيـد *** يـا مخضر صحصـح البـيـد *** يا معيد الجـذع الهميـد
33- يا مورق جرد الأغصان
يا رافـع سبـع الأطبـاق *** أعـتقـنـا مـن النـار إعـتـاق *** لك نبتهل من الأعماق
34- من قلبٍ مخلص ولسان
يا الله يا مهـدي من تـاه *** نـطـلـب خـطـانـا تـمـحــاه *** يـا رب العـرش النجـاه
35- من صالي حـر النيران
يـا للـه يـا رب الـثبـات *** نـطـلبـك اصـلاح الـنـيـات *** ايقضنـا عقـب الغـفلات
36- وأشف اللي قلبه مرضان
أرشـدنـا لـدرب اليـقيـن *** ولا تجعـلنـا مـن الـغـاويـــن *** أصلح دنيانـا والديـن
37- وارزقنـا بجنة رضـوان
يـا اللـه يا خـلاق الناس *** بــك نـعـوذ مـن الـوسـواس *** تكـفـينا شـر الخناس
38- ومن سؤ وكيد الشيطان
أطلب عفـوك يا مـولاي *** ولا أبـث لغـيـرك شـكـواي *** لا تشقيني فـي دنـيـاي
39- وأشرح صدري للأيمان
يـا رب لعفـوك مشتـاق *** لا تـجـعـلنـا مـن الـفسّـاق *** أهـد اللـي قـلبه ما فـاق
40- داله في نومه غرقـان
يـا لله فـي حسن الختـام *** راحـت لـيـالـي وايـــــــام *** كـنـهـا طـيـف الـمـنـــام
41- تشبـه خـيـال الحلمـان
يا للـه نـطلبـك الصلاح *** ما عـقـب الشيـب إلـيـا لاح *** ما ظـن يعود اللي راح
42- من شبوا صاروا شمطان
بانـت وضـح المغـاتيـر *** والشـيـب يـسـمـى نـذيــــر *** واللي بـه شيبٍ غزيـر
43- يحسب من ضمن الشيبان
شيب العوارض والروس *** ما نفع به حلق الموس *** ما فاده صبغ الطاووس
44- في قوعه مثل الصيبان
الـشعـر كـان أنـه شـاب *** لو تصبغ صبغك ما ثــاب *** مـا فـاده كـتم وخضاب
45- بياضه يلمع لمعان
أسمـع كـلامي مـن جـد *** مـن نــزل بــالـدنـيا شــد *** عمرك يا بن آدم لـه حـد
46- يوقف في ميد الميدان
عمـرك يا بن آدم قصيـر *** أحـذر لا تـنسى الـمصـيـر *** ما يوجد للعمـر سبيـر
47- ينتهي ولا له ضمـان
عمرك يا بن آدم قصيف *** أحذر من كثـر التسويـف *** له موعد ما به تطويف
48- ولا يؤخـر يوم إلى حان
عمرك يا بن آدم محدود *** لا تنسى اليوم الموعـود *** بين البيض وبين السود
49- لازم قولت مات فـلان
عمـرك يا بـن آدم قليـل *** جـهـز نـفسـك لـلـّرحـيـــل *** لـو طال العمـر الطويـل
50- لابـد يطـويه الزمـان
عمرك يا بن آدم يفـوت *** مـن عمّـر قـافـيـه المــوت *** فـي نعش ولا بـتابـوت
51- صيورك ترحـل عريان
عمرك يا بن آدم محسوب *** ونفسـك لا تحملها ذنـوب *** لازم عن ذنبك تـتوب
52- قبـل تدفـن بالكثبان
سـيـف الـمـنـايـا فـتـّاك *** ومصـيـر العـبـد الـهـلاك *** مـهـمـا تعـيش بـدنـيـاك
53- في جوف الأرض المسكان
أطلـب عسى اللـه يهديـك *** وحـذراك الدنيـا تغـريـك *** ولا تنسى يـومٍ يـأتـيـك
54- تدرج في بيض الأكـفـان
مـن عمّـر بـالدنيـا مـات *** بـــادت حـكـّام وســــادات *** وزالـت قـيّاد وبـاشات
55- وأفنت أمـّار وشيخان
يـا مـا زالـت مـن حكـّام *** لـهــم هــيـبــة واحــتـــرام *** عـقـب الدولـة والنظام
56- ويـن السلطـة والسلطان
ما خلـّت شيـخ ولا أميـر *** ولا منـصـوب ولا مــديــر *** حتى الرّيس والوزيـر
57- والحاجـب والترجمـان
كـم مــن جـبــٍار عـنـيـد *** شـجـاع وبـاســه شـديـــد *** أصبـح بالبـرزح وحيـد
58- جسمه يرعاه الديـدان
صـيـور الـدنـيـا الـزوال *** يـا مـا زالـت مـن أجــيـــال *** شالـت مغاويـر أبطال
59- واقفت بقـروم الشجعان
خــذ العـبـرة بـالفـانيـن *** مـن حـكـام وسـلاطـيـــن *** وين أسكندر ذو القرنين
60- وين النمـرود وكنعـان
ويـن الخـليـفـة هـارون *** ويـن الـمـتجـبـر فـرعـون *** ويـن الـمتكـبـر قـارون
61- ويـن المتبجـح هامـان
الماضـي يعطينـا أخبـار *** عن وضع الدنيا وما صار *** أنظـر وتشـوف الآثـار
62- بديار الحجر ونجران
والحاضر يعطينا درس *** عن واقع دنيانا الشرس *** وش حصل بديار الفرس
63- وش صار بديرة لبنان
مـن هـرّفـت لـه دنـيـاه *** لابــد مـن يــٍوم تـجــفــاه *** أنظر وش سّوت بالشاه
64- ما كنه حاكم بايـران
الـدنـيـا عـبـر وأمـثــال *** تـقّـلـب مـن حــال لحــال *** خلت بعض الـدور أطلال
65- وهـدّمت صرح البنيـان
دولاب الــدنــيــا يـــدور *** لـو تـقـبـل تـعـطـي دبــور *** هـدت عـمائـر وقصور
66- وخرّبت مدن وبلـدان
نـعـيـم الـدنـيـا مـــا دام *** كــنــه أضـغـــاث الأحــلام *** تـجـعـل العـامـر حـطـام
67- وتبـلا شـماخ العمـران
نـعـيـم الـدنيـا تـزيـيـف *** تـكّـدر مـن عـقـب الكـيــف *** مثـل الهبايـب بالصيف
68- ولا الربيع بنيسـان
نـعـيـم الـدنـيـا جـــذاب *** وعــمـار الـدنــيـا خــــراب *** تشبـه ضحـاح السراب
69- ما يروي كبـد العطشان
زوائـد دنـيـانـا نـقـص *** من تمكـر به رزقـه بقـص *** ما بين الحزن والرقص
70- تبهج صدر البهلـوان
ما عن واقعهـا مناص *** ولا هي هقاوي وأخراص *** حاسب ضميرك بخلاص
71- يا للي بالدنيا شقيان
الحقائـق مثـل الشمس *** تـبـيــن ولا تـقـبـل طمـس *** أركـان الإسـلام الخمس
72- فرضها الله خمس أركان
واجـب دينـك لا تنسـاه *** ولا تـهــاون بـالــصــــلاة *** والـشـهــادة والــزكـــاة
73- والحج وصوم رمضان
أد الـواجـب بـالـتمـــام *** ولا تـقـرب مـذهـب هـــدّام *** شـرفـك اللـه بـالإسـلام
74- دينك هو خير الأديـان
أجتهـد وربــّك يـأجـرك *** وأحذر من شك ومن شرك *** أخلـص للـه سـرايرك
75- وأتـقـه قـدر الإمكـان
أجهد في كسب الثـواب *** وأبــذل لـلخـيـر الأسبـاب *** ربـك غفـور وتـواب
76- لا تمـادى بالعصيـان
تـب للمولى عن خطـاك *** وأحــذر تـغـــرك دنــيـــاك *** وأحـذر لا تـتبع هـواك
77- وأبعـد عن كفر وطغيان
أحـذر نفسـك لا ترميـك *** عـلـى الـضـلال تــوديــــــك *** حاذور الغاوي يغويك
78- من طاوع غاوي غويان
أسـتـثـمـر كـل الأوقـات *** والـدقـائـق والـسـاعـــــات *** موسم عملك إلى فـات
79- تعض إبهامك ندمـان
عـصـر بـه قـل التوجيـه *** الـلـه يـسـتـر مـن تـاليــه *** فـيه الواقع لـو نطـريـه
80- صار البرذون كحيلان
المستغرب ينشد ليـش *** كيـف السحلي صار حنيـش *** والعريب اليوم كديش
81- والبغل سموه حصان
واليـوم أشـوف الهليب *** بـالـسبـق خـلا الـعــريــب *** لا عبرة لو شفت الذيب
82- يجفل من شوف الطليان
مهمـا بالواقع نخـوض *** قـول الصراحـة مرفـوض *** الأرنب سادت بالروض
83- والصيرم مالـه جنحان
واللي من مصقر غيمـار *** مـا يـقـنص فـيه الصقـار *** حـول من فوق الأوكار
84- وخلا الماكر للسمقان
الـلـّقـلـق بـالماكـر فـاز *** وصعـد مـن فـوق المركــاز *** السمونـة صـارت بـاز
85- والرخم صارت عقبان
الفاهم يدري بالحيـث *** عن وضع العصر الحديـث *** تساوى الثعلـب والليـث
86- والوبر هو والسرحان
أشوف النمر الفروس *** يشكي من عصره منكـوس *** الكرعان أودعها روس
87- والروس أودعها كرعان
دواعـي خـراب الجيـل *** عـصـر الـموضـة والمـديـل *** وأهل الكورة والتمثيل
88- يدعون نجوم وفرسان
شـبـاب الأمـة يـضيـع *** مـا هـمـه غــيـر الـتـشجـيــع *** يسـمع تعليـق المذيـع
89- ويرقص وسط المهرجان
وأن كانه فـاز الـفريـق *** يـدمـي كـفـه بالـتصفـيـق *** لـه صفيــر ولـه شهيــق
90- يمرح بالبيداء فسقـان
تـّخـرب طبـع الشبـاب *** يـمـشـون بـسلـم الاجـنـاب *** لولا الخوف من العقاب
91- سارو بالشارع ملطان
الـفـتـى قـلـبـه مشطون *** سـلـمـه وتـراثـه يـهــــون *** راح أيقلد مستر جـون
92- ويرطن رطين مريكان
عـز الإسلام المشموخ *** مـا هـو في لستــك منفــوخ *** بـالـدبـابـة والصاروخ
93- وقهـر الطاغي بالأكوان
تغـيّـر بـالناس السلـم *** وكـثـر الـمعـاصي والـظـلـم *** نـزل تـقـديـر أهـل العـلم
94- وعز اللاعـب والفنان
وضع المسلم مالـه حل *** قـالـوا مـبـطـي عصـره زل *** الـعـالـم والـعـابـد ذل
95- مضهود بكل الأوطان
شنوا ضد المسلم حرب *** بالشـرق وبديار الغــرب *** والشاهد مفعول الصرب
96- والشوعي بفغانستان
الوضـع الحالي خطيـر *** السـيخ أفـتـن فـي كشميـر *** وعم الصومال التنصير
97- وجنوب بلاد السودان
الـمـلـحـد شــره يــزداد *** عـمـل بـالـشـرق أسـتـبــداد *** الكافـر يحـتـاج جهـاد
98- بالهرسك أو بالشيشان
يا عرب يا عيب العيــب *** تـحـتـار أفـكـار الـلبـيّـب *** كيف الداعـي والخطيــب
99- يمنع عن رد الرهبان
الأمـة تحتـاج إسعــاف *** واقـعـهـا بـالعـيـن أيـشـاف *** قـبـل يـصيـر انـحـراف
100- ونسير بركب العدوان
طالع من حولك وتشوف *** ظلم وجور وذل وخـوف *** حرب وكوارث وحتوف
101- قحط وزلزال وبركان
أنظر شرق وشف شمـال *** تسمع مصائـب وأهـوال *** من سبب خبث الأعمال
102- العمل بالعالم شـان
أنظر شرق وشف شمـال *** تسمع مصائـب وأهـوال *** من سبب خبث الأعمال
102- العمل بالعالم شـان
أنظـر وأتشـوف الكفـّـار *** مـن طـواغـيـت وفـجـار *** وشـف اللي لدينه يغــار
103- صا به نكبة وامتحان
كـثـر بـالنـاس الـفـجـور *** والـنـكـد وأعـمال الـجــور *** والـتـّـكبــر والـغــرور
104- والقرابـة حقـّه هـان
كـثـر بـالـنـاس الـفـسـاد *** والـضـغـائـن والأحـقــاد *** ساروا مع مبدأ الإلحــاد
105- وكادت تعود الأوثان
كـثـروا بـالناس الطاغيـن *** يـمشـون بمنهـج ليـنيـن *** بالواقع ما هـم داريــن
106- وعن الحقائق طرشان
كـثـر بـالـنـاس الـشـذوذ *** والـعــاقـل مـالـه نــفـوذ *** صـار السافـل والمنبــوذ
107- يقدح زنده بالصـوان
كـثـر بـالنـاس الجحـود *** والـقـطـيـعـة والــصــــدود *** هــذاك لـهــذا حـســود
108- أحسد من سود الغربان
كثـر بالناس العـقـوق *** مـا تـقـــل بـيـنـهــم حـقـوق *** كـلـن يــصــد ويــمـوق
109- ولا يشفق عقب الهجران
كثروا بالناس الأشرار *** وكـثـروا عـمـيـان الأبـصـار *** أدناهم يعطيك أفـكــار
110- أيتفلسف كنه فهمان
الشيمة بيعت بفلـوس *** وضاع من الناس النـاموس *** وأرتـفـع قـدر البلـوس
111- وأعتز الهايف بوقان
ضاع السمت وضاع الكار *** وكلن يمشي بـاستهتار *** راحـوا وافيـن الأشبـار
112- والجيل التالي خربان
صار الماضي مثل الحلم *** ويــن العـادة ويــن السلم *** طاحـوا في تـقليد الفلم
113- وحادوا عن طبع الجدان
تـيـار الـعـصـر الجـديـد *** كـلـن يـمـشي بـالـتـقـلـيـد *** تـلاشى الـسلـم الحـميـد
114- وراحت عادات العربان
حـصـل بالدنيـا تـغـيـيـر *** دمــر واقـعــنـا تــدمــيـر *** أهــفـا الذمـة والضميــر
115- والسالم قلبه وجعان
صـاب المجتمع اهتـزاز *** والمـنـكـر وسـط الـتـلفــاز *** كلـن ركـب دش جهـاز
116- جاب أمريكا واليابان
راحـت عـادات الأجـداد *** وأخـتـلـف سـلـم الأجــواد *** كـلن شبعـان مـن الـزاد
117- مخبـاه وبطنـه مليان
كـلـن تـغـيّــر مـبـــداه *** والـسـلـم الـمـاضـي خـــّلاه *** مـرامـه يــمـلأ مخـبــاه
118- ويرصد بالبنك الميلان
وين سلوم أهل العادات *** ويـن الـنخـوة والشومات *** راحت ما ترجع هيهات
119- مع دور حقوق الجيران
وين الحشمة والوقـار *** راحـت مـع عصر الأبـرار *** الجـار أهـفا حـق الجـار
120- وكلن من جاره زهقان
كـلـن قـصيـره يشناه *** يـشـكـي مـن قــربـه مـــا ذاه *** يـقـول أبنـه مـا ينهــاه
121- ولا يمنع شر الورعان
كلـن يـقـول القصيـر *** مـا يــلــقـى جـــاره تـقـديـــر *** قصرتـه شـر وشـريــر
122- أقشر وعياله قشران
واللي جاره خايب سد *** إلـيا شافـه عـن وجـهـه صـد*** يا كبر الفرحة لـو شـد
123- ينذر لفراقه خرفان
وأبي أنصحك من الصميم *** أبـعـد عـن قـرب الـلـئيـم *** تـرى لـو قدرك حشيم
124- لازم يوريك الحقران
مـن عافـك جـازه بالتـرك *** لــو قــدرتــه مــا قـدرك *** مـا حشمـك ولا وقــرك
125- من صاحب خائب ينهان
عـليـك بـقـرب المأمـون *** كـريـم أخـلاق ومضمون *** صـدوق وطيبه مبخـون
126- لـو شاف الغرة ما خان
خـل الطيّب لـك رفيـق *** تـلقاه بـساعـات الضـيـق *** يظهـر لـك صدق الصديق
127- حزت تحتاج الصدقان
خـاو رجالاً ملتزميـن *** علـى الطـاعـة متصـافيـن *** لـو ما هـم عصبـه دانيـن
128- صاروا بالإسلام أخوان
وإلى صاحبت الأخيـار *** تـسـمـع مـواعـظ وأذكـــار *** حديـث وحكـم وأشعــار
129- تجلي همك والأحـزان
تأخذ بالقول الموثوق *** مـنـقــول بـقــول الــصـدوق *** أبــو بـكــر والـفـاروق
130- والطاهـر علي وعثمان
تأخـذ بالقول المسنود *** عـن مسلم وابـن مسعـود *** هـذا الكسب وهـذا الفـود
131- ما هو فوائد عوجـان
عـن مجلسهم غاب إبليس *** ما معهم نـذل ولا هيس *** ما يشقـا فيهـم جليـس
132- رافقهم وأنت الربحان
وأبعد عـن صحب الأنـذال *** مجلسهم مـا سر البـال *** تسمع طاري قـيل وقـال
133- ومن جاهم يقفي زعلان
بعـض المجـالس شّـلات *** صـجـة وأغـلاط والجـات *** لـو نادوا لك بالأصوات
134- أبعـد تـراهم قـومان
أبعـد عن شيطان الأنس *** ما هو موثوق ولا ونـس *** تـّقلب من جنس لجنس
135- ومن زود النعمة بطران
الـفاسد مـالـه وصـيـف *** يـنكـر ويصنـف تـصنيف *** مـا فـادك لـو داره ريـف
136- من رافق فاسد خسران
أحـذر لا ترافـق مثبـور *** أجعـل لك من دونه سـور *** ترى الخائب مثل الثور
137- مقامـه جـر الفـدان
وأحـذر لا تـرافـق بـّلاف *** مـا نـفـل يـوم ولا نــاف *** لو صعد روس الأشعاف
138- لابـد ينزل للطمـان
وأحذر لا ترافـق الخبيث *** فـكـره مـتـلـوث تلـويــث *** مـثـل المكلـوب الغـليث
139- يهرف هريف الضرمان
وأحـذر لا تـرافـق ملسـون *** سكين لسانه مسنون *** حـكيـه هـقـاوي وظنـون
140- يحسب من ضمن الكذبان
وأحـذر لا ترافـق خـّراط *** هـرجـه معـانـد وغـلاط *** كـان أنـك عـذلـته شــاط
141- مثل العزوم بلا عنان
وأحـذر لا ترافـق مطفوق *** مـا عـنـده شم ولا ذوق *** ما حكّـم لفـظ المنطوق
142- يلوخ بوسط الديوان
وأحـذر لا تـرافـق مـّلاق *** صاحب تمريـخ ونـفـاق *** الأحمق مـا معـه أخلاق
143- يزوم سوات الطنيان
وأحـذر لا تـرافـق مـكّـار *** دائـم بـالـصاحـب غـــّـدار *** مثـل السحّـار الـقـمـار
144- كاهن وأصحابه كهّـان
وأحـذر لا تـرافـق خـّداع *** دائـم بـالصـاحـب طـمـاع *** يكيـل ويبخس بالصـاع
145- ويبيع بغالي الأثمان
وأحـذر لا تـرافـق مذمـوم *** يـفـرح بـالعايـز والـلـوم *** خنجـر لـهاتـه مسموم
146- وفي عرض الغائب طعّـان
وأحـذر لا تـرافـق نمّـام *** مـغـرم فـي نـقـل الـكـلام *** مقـصـده قـطع الأرحــام
147- وتفريق قلوب الخلان
وأحـذر لا تـرافـق لجلاج *** الـلـي بـالغــائـب هــّراج *** مـثـل الـصـراة الهـماج
148- تاليها وحـل وسيان
وأحـذر لا تـرافـق هبيـل *** بـالـك تـحـطـه عـمـيـل *** ترى الجاهـل حاطـب ليـل
149- مخطر من لدغ الديبان
وأحـذر لا تـرافـق هـّذار *** وسـط المجالـس ثـرثــار *** لـه ملسن مثـل المنشار
150- يقول وهرجه هذيان
وأحـذر لا تـرافـق سفيه *** جـنـب دربـه لا تمـاشيـه *** لا تــباريـه ولا تخـاويـه
151 - بذيء لسان ولعان
وأحذر من خطو الشمّات *** دائـم يــدور الهـزعـات *** ولـو تعـمـل بـه جـمالات
152- يعلن جحود ونكران
وأحذر من خطو الغثيث *** لا جـابـه من جـاب الغيـث *** ردي الشيـمـة والديـث
153- أجعل من دونه فرقان
وأحـذر لا ترافـق سكار *** ما يدري من حكي العار *** يـبحث عن منتوج البـار
154- كل يوم تشوفه سكران
وأحـذر لا تـرافـق رزيـل *** ما عـمـره سـوى جـميـل *** حـفـاظ الـمـال البخيـل
155- من ضافه يقفي جيعان
وأحذر من خطو المنبوز ***مـا ينـفـع في وقـت العـوز *** خـلـه يـذلـف للهامـوز
156- هريد وقربه نقصان
وأحـذر يـخدعك الغشّاش *** لا يـغــرك حـيـثـه لاش *** مـا هـو للجـزلة حـّواش
157- ودك ترداه بمهوان
وأبي أملي للعـاقـل درس *** ملحوظـة تكتـب بالطرس *** أحفـظ بـذارك بالغرس
158- وأستثمر طلع البستان
خذ حذرك وقت الــّزواج *** لا تـأخـذ بـنـت الهـلبـاج *** لو يحـمل في متنـه تـاج
159- ما فاده حمل التيجان
ولا تأخذ بنت المدنوس *** خلفـة زلايـب وهدوس *** تلقى عروقـه فيهـا سوس
160- والغصن الناعم خرثان
ولا تأخـذ بنـت الديـوث *** بالـدنس عـرضـه مـليـوث *** عـسـاه بـنـاب مغـلـوث
161- ولا في شوكة ثعبان
ولا تأخـذ بنت المنكود *** متغـاضـي وأعمـالـه سـود *** عـسى يــرداه العـبـرود
162- من عباريـد الفلكان
ولا تأخـذ بنت القطوع *** يـأتـي ولـــدهـا مسبـوع *** ما هـو لأمـر الوالـد طـوع
163- حيثه معامق رديان
ولا تأخذ من عرق العوب *** قويـت رأس ونـصوب *** لازم تـلقـى بـك عـذروب
164- وتترك بحالك ذهبان
لا صارت عوبا وعديم *** مثـــل الشيطـان الـرجـيـم *** عـفـهـا مـن بـد الحريــم
165- لو ما من غيره نسوان
تـرى خـطـات الـمـــدام *** تـطـيـعـك مـا دمـت غــلام *** والـشـايـب مالــه مـقـام
166- لا كبر قالـت خرفـان
وأحـذر شينـت الضميـر *** تـذهـب مـالـك بـالـتبـذيـر *** تــتـرك ورعانـك دشيـر
167- يسعون سوات اليتمان
وأحـذر دنـست الشـليـل *** مـا يـثـق فـيـهــا الحـلـيـل *** عـرضهـا مثـل المنديـل 1
68- لا تـغـرك بالفستـان
لا تغـريـك بكثـر الـزيـن *** بـيـض الخـد ووسع العيـن *** ما فـاد الشكل الحسين
169- لـو شفت المظهر فتـّان
قشـرا المخبـر لا توهمك *** مـا تـقـّدرك ولا تحشّمك *** ما تـوافـقـك ولا تلائمـك
170- لو تشبه ريم الغزلان
وأسـمع قـولـي بـانتبـاه *** الـعـاقـل يـصـلـح ضـنــاه *** كـلـن عـنـد الـلـه جــزاه
171- ومن يمشي بالحق معان
أنصحـك تراقـب ولـدك *** شــانــه يـهــمــك وحـدك *** أن صلـح يكـبـر سعــدك
172- وأن خاب لحقك ما صان
من تيّه منهاج الدرب *** ماعرف الجمع من الضّرب*** واللي خالط عيط الجرب
173- لازم يطلا بالقطـران
خـلـّك فـطين وحسّـاس *** عـلـّم نـجـلـك لـلنـومـاس *** قـبـل تـبـني قــو الساس
174- وجود صبات السيسان
راقـبـه وخلـك حريـص *** لا تـجـلــب عــزك رخـيـص *** عـلـّـم طيـرك للقنيص
175- وأحذر طير ابن برمان
الـولــد وده تــدريـــب *** حـتـى ايـتـعــود لـلطّـيـب *** أبعــده عـن طـرق العيـب
176- كي لا يا قع بالهوان
الـولـد وده تـعـلـيــــم *** حـتـى يـمـشـي مـستـقـيـم *** والـلـي مـا عـقـلـه سليــم
177- قـلبه وعيونه عميان
الـولـد تـركـه مـا جـاز *** سـاعــده ويــأخـذ مـمـتــاز *** وكـانـه بالـدراسة فــاز
178- نال العـز وحظـه زان
الـولـد زيّــن مــربـــاه *** سـنـعــه وعــّدل عــوجـاه *** راقـبـه وأعــرف ممشاه
179- كان أنت لخيره شرهان
الـولـد مـا هـو بـسيـط *** شـجـعـــه وخــلــه نـشــيــط *** لا تــدزه مـثـل مـقـيـط
180- وترميه بوسط القلبان
الـولـد وده مـجهــود *** حيثـك عـن فـعـلـه منشـود *** أرشـد قبـل يـقسي العـود
181- ما دامه عوده ليـان
ولـدك الـله به وكـلّـك *** كـان أنـت أهـمـلـتـه يـهملـك *** وأن مـا ربـيتـه خجلـك
182- خلاك الخايب خجلان
نصح الوالد له مفعول *** أنـصح بـالهـرج المعقـول *** كلـن عـن نجلـه مسئول
183- ترانا مثل الرعيان
أحفـظ نجلك لا يضيع *** وأحسـن لـه فعــل الصنيـع *** يظهــر عطـوف ومطيـع
184- ويصير النشمي ديقان
خـلـه للزينـة يـعـتاد *** ولا أيصاحب خطـو السرماد *** عـن رفـق الفاسد بحيـاد
185- لا يصاحب بعض السردان
راقب نجلك لا يخيس *** لا ايـصاحـب خـطـو الخسيس *** أن فـسد حظـه تـعيس
186- جاه الشر من العشران
أحذر من خطو الخدين *** لا يـصـبـح لأبـنـك قـريـن *** والـلـي رافـق منحرفيـن
187- داس الشيمة بالحذيان
لا تجعـل وقـتـه فـراغ *** يـمشي تفـريـع بـلا شمـاغ *** من لا يخجـل عـقله زاغ
188- أقر الخط من العنوان
كانه رافق هايت هات *** مـن ضمـن شلـل الحـارات *** فتش جيبـه تلـقـاابـكات
189- تعلّم شرب الدخان
وعقبه يقع بالمشروب *** ما بـين مخـدر وحبـوب *** ويصبح للسلطـة مطلوب
190- مقره عند السجان
كـلـن يـشنـاه ويشنـاك *** سـيبـتـه وأحـمـل مـا جـاك *** بإهمـالـك ربــك جـازاك
191- قلبك من فعله حرقان
يا من تجمع سحت القوت *** تـغـيب وبـيـتك مفلـوت *** ولـدك أغـواه السربوت
192- وأنت بحاجاتك بلشان
تركض وملهيك الـمـال *** وضيعـت عيـالـك بـإهـمال *** والـلي مـا ربـوه رجـال
193- يبشر بالكوبـة كوبان
مـا كسبت ولا حصلـت *** كـان أنــت لـولـدك أهـملـت *** خـلـيته بالشـارع فـلـت
194- تمرد وأصبح فلتان
خسـرت وبأعمالك خبـت *** كانــك لأبـنـك مـا أدبــت *** وإلــى كـبـرت وشّـيبـت
195- عن خدمتك أصبح كسلان
كانـك لأبـنك مـا ربـيـت *** سـربـتـه ضـمن الهـيـيـت *** دايـم مـا يجلـس بالبيـت
196- يلوج بظل الحيطان
شفتـه مع خطو الحليف *** يهــرف بـالشارع هـريـف *** أمـا مـوبــز بالرصيف
197- ولا في بـاب الدكان
من صابه فشل وأحبـاط *** يـأخـذ بـالـحــارات أشـواط *** يـحمـل بخـاخ وخطاط
198- وبس أيشخمط بالجدران
شفتـه مع خطـو النـديـم *** يـمشي بـالشـارع يـهـيـم *** يـسـوح ســوات البهيـم
199- رجال وكنه حيوان
كيـف أنـك خـليتـه مــد *** والـلـيــل امـســاه ولا رد *** يـسـرح بـاليـوم وبالغـــد
200- ولا تدي وين أبنك كان
كيـف أنـك خلـيته راح *** ولا تـدري ويـن المسراح *** هـو يمشي حـر ومرتـاح
201- وأنت من غيابه تعبان
كيف أنـك خليته سـج *** ولا راقــبــتــه حـتــى دج *** وأن كبـر عـن قربـك هـج
202- يسهجك وكنك طوقان
وأن مـا راقبته يغـتـر *** ومـع درب الفاسق يـنجــر *** وإلـى رافـق عصبـة شر
203- خلاك الخايب نشبان
عـن مسيره ما تنهاه *** ولا تــدري بـالـلي سّـــواه *** حتى لــو شفـت أخـويــاه
204- شلة فسّاق وزعران
يمشي مع شلة تفحيط *** وأن عــذلـتــه يـستشـيــط *** مغــرم بأنغــام الشـريـط
205- ومن صوت المطرب طربان
لكـن ما تـراقـب عـليـه *** ولا تـنـشـد نجلـك وش فـيـه *** حـتى خــاواه السفيـه
206- وصار من حساب السفهان
شفته في حال الممهون *** غـويان وفـكره مشطـون *** ما تقـل بالـرأس عيـون
207- ولا تشوف حيود الضلعان
شفت الخنافس بالرأس *** ولا عندك بالمظهر بـاس *** لـو شفت شرفـه ينداس
208- حسبته لعب الصبيان
أسمع منطوقي بالقـاف *** مـالـي مقـاصـد وأهــداف *** أهـدي شعــري للعـراف
209- يفهـم مضمون القيفـان
بـديتـه بسـم الجـبـار *** بـسـمـه نـظــمـت الأشـعــار *** هــّداج الـنـبـع الـفـــوار
210- ما يشبه نضح الحسيان
الـحسـو نـبـعـه قـليـل *** مـا يسقي لـو جـاه السيـل *** نضحـه ما يـملأ الصميـل
211- رس ولا يروي ظمـيان
أفهـم كلامي يـا صـاح *** مـا قـلـتـه قـصـدي قــداح *** ولا نــي لـلعــالــم مــداح
212- أرشد من عنـده وجدان
أسمع وأعطيك أرشادات *** وأفهـم مقصود الغايـات *** تـحـل بـصبـر وسكـات-
213- ولا تنسى حكمة لقمـان
قلـت وسجلـت المنظـوم *** قـولـي وضحـتـه مـفهـوم *** ما قـلتـه سـر ومكتـوم
214- عذروب الحق الكتمان
قـلـتــه لـلغـافـل تـنبـيـه *** شهـرتـه مـا نـي مخـفيـه *** أدعـيـه بصـوتٍ يـوحـيه
215- وأعلتنه بالقول إعلان
الـقـاف أوضـح مـعـنـاه *** لـلـي يـفـهــمـه ويـقــراه *** قـلــتـه لـلعـاقــل وصــاه
216- وعندي دليل وبرهـان
قلتـه مـواعـظ وأرشـاد *** مـا هـو سب ولا انـتـقـاد *** تـوصيف لبعـض الأفـراد
217- منظومة مثل المرجان
نصيحة والشعر شعـور *** نـأخـذ بـالـقـول المأثـور *** أفـهـم ما قـلـت ومشكور
218- وأسمح كان أني غلطان
قـافـي نـقحـتـه تـنقيـح *** مـا بـه لمـز ولا تجريـح *** والـلي مـا هـرجـه صحيح
219- أخطأ ما صاب النيشان
قلت ومن شعري نظمت *** والقول أخير من الصمت *** نـصيحة فيـهـا ساهمت
220- عسى ما تذهب مجان
وآخـر كـلامـي بـالـقول *** صلى الـلـه على الرسول *** شفـيع الخـلـق المرسول
221- محمد صفوة عدنان
التعديل الأخير تم بواسطة عبدالله بن عبار ; 08-25-2021 الساعة 04:47 PM
|