عرض مشاركة واحدة
قديم 08-31-2019, 07:04 PM   #15
فئه صاحب الموقع
 
تاريخ التسجيل: Aug 2008
المشاركات: 1,538
افتراضي

قال مؤرخ قبائل ربيعة الأديب عبدالله بن عبار هذه القصيدة في أحوال الدنيا وتقلبات الزمان :
سر يا قلم وأكتب من أشعاري أمليك *** من خاطـري سجل قرايـض وقيفان
الـقـلـب دكـت بـه طـوارق دواكــيــك *** يلعب بـه الهوجاس والفكر حيـران
كـل ما هجـد زادت عـلـيـه الـدبـاليـك *** روابـعـه تـطـري تـشاكيـل وألــوان
أحتـرت بـك يا هاجسي ويـن أوديـك *** نـوبٍ بـيـات ونـوب كونـك أمسيـان
حـاولـت عـن كـل الخلايــق أخـفـيّـك *** لاشـك قـالـوا كـل ما يخـتـفـي بـان
كـني أشـوفـك كـن بـالعيـن أراعـيـك *** لـو كـان مـا يضهـر خيالك للأعيـان
ما تنوصف يا هاجسي كيف أحـليـك *** كـنـّك ضحاح اللال يـزمـي بـقـيعـان
أنـت السراب اللي الضهيره تسويك *** كـنـه غـديـر ولا شرب مـنه ظميـان
أنـت الأمانـي والأمانـي أتضــاهـيـك *** أنت الأمـل يطـري على كـل وجـدان
أنـت الـذي ريـح الهبايـب أتشـاديـك *** أنـت الهواجس والروابع والأشجان
أنـت الخيال اللي المشاعـر أتناجيـك *** هومات شاعـر ولا أحاسيس فـنـان
أنـت الـذي تملـي قرايض طـواريــك *** وأنت الـذي تـبدع عـذيـات الألحـان
سجل على بيض الصحايف مبـاديـك *** مقصودهـا ما يدركـه كـود فـهـمـان
أقـولهـا ويـا سـامع الـقـول نعـطيـك *** أقـوال صــدق ولا تـكلـمـت بـهــتان
يـا الفاهـم أسمع كل ما قـلـت يعنيـك *** أعرف هـدف معـناي والهرج وكدان
أوصيك يا من تسمع القول أوصيـك *** خـذ النصيحه يـا فتى الجـود مجـان
قول العذول اللي عـن الشين ناهيـك *** يرشدك للمعـروف من قلـب ولسان
وأن كـان تسمع جابتي لـب داعـيـك *** خـذ الحـذر لا يـدخـل الـبـال نـسيـان
عن الضلال لمسلك الحـق نـهــديـك *** درب الهدى فيه الفضايل والإحسان
أفطـن تـرى نيبـان بـقعـا مـشـاويـك *** حـذراك مـن بقـعـا تعـضـك بنيـبـان
دنياك يا بن آدم تــراهـا شرابـيـــــك *** لو سانعـت لازم تـقـودك بـالأرسـان
لـو أضحـكـتـك أيـام لابـــد تـبـكـيــك *** غـداره وفـيـهـا وساويـس شيـطـان
حـذراك مـنـهـا وعـدها من أعـاديـك *** دنـيـا الشـقـا مـا وفـرت كـل ديـقـان
كان أنت جاهلها بها أخبرك وأدريك *** مـا دامـت لقيصر وكسـرى وكنعـان
دالـت بحكـم الشـاه والبـاش والبـيك *** ومالت على قـارون قـبـلك وهـامان
أطـلالـهـم لـوهـي تـكـلـم أتـحـاكـيـك *** طالع أثـار اللي على الخيـل فرسـان
بس أنشد الأهـرام قـل كيف ماضيك *** وين الـذي عانـد دليـل ابـن عمـران
وأنشـد سبـأ بلقيس ما هي خباريـك *** ويـن الـذي مـنـهـا تـعـجـب سليمان
وأنشـد حمى دميـاط ويـن الممـاليـك *** ثم أنشد الشهباء عن ملوك حمـدان
وأنشد دمشق الشام قل وين أهاليـك *** وين الخليفه ويـن ابن أبـي سفيـان
وأنشد قصر بغداد قـل ويـن راعـيـك *** وين الذين حطمـوا عـرش ساسـان
وأنشـد وسائل من تشوفـه حـواليـك *** من شاف من عيّـن سلاطين عثمان
آثـار بـالـيـن الـعـهـد دون تـنـبـيـــك *** بادت وأهلها روحـوا مع خبـر كـان
كـم حـاكـم أطـلال قـصـره أتـوريــك *** عبرة من التاريخ في ماض الأزمان
يا قصر شفتـك عقـب ما باد منشيـك *** أضحى جـدارك تـقـل موقـد بنيـران
زال الرخـام وزال نـقـش السراميـك *** وأصبح محيطك ناحـل بس جــدران
كنه مضى بسقفـك عـباريـد بلجـيـك *** وغديت من بطـو الزمن تقل نيشـان
كـنـّك رمـيـت بحـامـيـات الـنيـازيـك *** أو تـقـل قضك مع قـواعـدك بـركـان
أنشـدك يـا قصر الـفـنا ويـن بـانيـك *** ويـن الذي شيّد عـلى الساس بنيـان
واليوم صـار أسفلك يا قصر عاليـك *** عقـب الشموخ اللي تقل شم ضلعان
طـفـت مـصـابـيـحـك وكـل الأتـاريـك *** عقب المضيف اللي مداهيل شيخان
وين الذي عـن لافح الشوب يـذريـك *** يا ما لجـأ لـه من ضعافـي ويـتمـان
ويـن الـذي وجودهـم كـان زاهيـك *** صالوا وجالـوا بـيـن تـرك ورومـان
فـي عـصرهـم كـل الممالـك أداريـك *** حازوا بـلاد الصين والهنـد وأيــران
يـوم المعـزه والفخـر في ضـواحيـك *** من لاذ بك يحشم عن الظيم ويصان
يا ما عـنالـك طـارش سـار نـاصيـك *** فوق الرمك ولا على الهجـن هجـان
مفـتـوح بـابـك للـنـدى والـشبـابـيـك *** راعيك ما سكـر عـن الضيف بيبـان
يـلقـا الكرامـة كـل مـن سـار باغـيك *** وتفـرح ضميـر اللي تنصاك جيعـان
فـي جـفـنة لا نـوشح الـزاد تـقـريـك *** يـجـدع بـهـا حيـل ربايـط وخـرفـان
كـم شيخ لابـه صيت علمـه أيناديـك *** تسيـر في طيبـه مـع النـاس ركبـان
اليـوم قصـره منظـره صـار يغـثـيـك *** عقـب الـوناسـه ما بـقي فيـه سكـان
لـو كـان تنشد وين راحـوا عـوانيـك *** ويـن الـديـاقـا والمشاكيـل الأعـيـان
شخوص الرجال وداحمين المداريك *** محـتـهــم الأقــدار شـيـب وشــبــان
يا قصـر ما شفـت القروم الـدوامـيك *** اللي تـوارثــوا الـفخـر ورث جـدان
صالوا على جرد السبايـا بـروابـيـك *** يـــوم الفخـر والعـز بعـنـان وسنـان
اللـه وأكبـر كيـف خلـيـت مـراعـيـك *** ما تقـل دوج بـك من النيـب قطعـان
عينت سكانـك عسى الهجـر يـلويـك *** جاك الـنـيا والحيف من كل الأركـان
البـوم ينغـط فـي خـرايـب سـواريـك *** فـوق الرموس الباليه حـوم غربـان
هجـر الـنيـا والبيـن واللـوم غاشيك *** مابك سـوى قـل الوناسة والأحـزان
سبحان من خـلا أصحابـك أتجافـيك *** حـتى يشوفـك دارس العهـد خـربـان
غـارت يـنـابـيـعـك ولا عـاد تسقـيـك *** من عقب ما كانت خباري وغـدران
يا جافي الأصحاب لا سال واديـــــك *** أخلا جنابـك بس يصرخ بـك الجـان
عـزالـلـه أن الـيـوم قـلـت حسانـيـك *** من يـوم ربعـك شملهم صـار شتـان
هبـيـت يا قصـر النـدم خاب راجيـك *** من يلتجي لـك تالي الوقـت خسـران
لو بـك مـعـزه صـاحبـك مـا يـخلـيك *** لاشـك ما أنـت لشاكي الضيم مزبـان
الـلـه أيـكافـيـنـا مصـايـب بـلاويـــك *** موطن خزي موطن مهونه وحقران
صاحبك يا قصر القشر بـه أنعـزيـك *** ودنـياك مـا دامـت لطـلقيـن الأيمـان
دنـيـاك يـا غافـل تـرى طبعهـا هـيك *** والعـمـر مـهـما طـال يـقـفـاه ديــّـان
الـعـمـر يفـنى والـليـالـي تـهـالـيـــك *** وبـقـدرة اللـه كـل مـن فـوقـها فــان
يوم الحشر يا العبـد ما فيـه تشـكيك *** فيـه أيتسـاوى كـل راعـي وسلطـان
فـي ساعـة ما ينفـعـونـك بنيخيــــك *** ولا أظـن يفـزع لك قـرايـب وخـلان
تنهج خلاوي ما تجد من يخــاويــك *** أذكر مـصيرك يـوم تـدرج بالأكـفـان
حسبك عملك إلى تضايـقـت ينجـيـك *** ولا فـلا غــيـره رفـاقـــه وصـدقــان
عملـك في كـل الطرايـق أيــباريـــك *** في يوم ينصب لك على الحق ميزان
لا تنخـدع بالمـال حـاذور يـغـريـــك *** مـن ينخـدع بالمـال خاسـر ونـدمـان
ولا تغـتبـط لـو الـخـلائــق اتـهـنيـك *** لا بــد مــا يــأتــي لـلأفــلاك دوران
أصبـر علـى ما قـدر الـله واليـــــك *** رب العبـاد اللي ضمن رزق الإنسان
أصبر إلى ضاقت عليـك المساليـــك *** وأفطن ترى عند الولي رفعة الشان
وأطـلـب ولـي الكـون بالـمـد يغـنيـك *** أنصـه ولا تركـن عـلى فلان وفـلان
وإلى شكيت مكـون الكـون يشفيـــك *** الـلي شـفـا أيـوب مـن عـل الأبـدان
ولا ترتـجي بصـرت حكيـم يـداويــك *** لو كان عنده طـب ما طاح مرضـان
وأنـذرك عن رفقـة خطاة الصعاليـك *** هـل الغـدر مـا سلمهـم سلم عربـان
ولا تخالـط الأجـرب حذاريك يعـديـك *** مـا أظـن يبـرى لـو طليـته بقطـران
تـصيـر مثـلـه مـن قـربـتـه أيهـبـيـك *** عن القراح من الظمأ تشرب اسيان
وترى الطغاه اللي عن الحق تعميـك *** أهل القلوب اللي عن الحـق عـميان
اللـي علـى علـوم الرذايـل أتربيـك *** أدنـا خطاهم وأهـونـه شـرب دخـان
بالناس تلقى البوم والصقر والديــك *** والثعـلب المحتـال والذيـب سرحـان
وأبعد عن اللي ما يحبون طـاريــــك *** لازم يـعـيـبـونـك لــو إنــك كحـيلان
وراعي الهدف كنه رفيق أمصافيــك *** إلى بـدت لـه لازمـه جاك شـفـقـان
مهما سعيت بحاجته حين يأتيـــــــك *** حـزت قـضى من لازمه قال جحدان
لو قلت وش داعي الجفا قال مابيـك *** وإلــى ذكـرت السـابـقـه قـال مـنـان
قـلـه تـقـلـع لا تـجــيـنـي ولا أجـيـك *** وش عـاد لـو كنتـم رفـاقـه وجيـران
خـلٍ تـقـيـرب لـه وهـو دوم يقصيـك *** خلـه يـولـي رفـقـتـه فـود عــوجـان
لو تزبنـه ملـزوم يـخـلـف هـقـاويـك *** لـو كـان جـيـبـه بـالـدنـانـيـر مليـان
ولـو تشتكي لـه هقـوتي مـا أيـشكيك *** أعطيك عـن قـربـه تعـاميم وأعلان
عـلـيـك بـالـطـيــب قـبـالـه أيـعـلـيــك *** ولا الـردي قـربـه يحطك بالأطـمان
علـيـك بـالـلـي بـالبشـاشـه أيحييـــك *** يضحك أحجاجه بالندى كل الأحيان
عـلـيـك بـالـلـي بـالكـرامـه أيـبـاديـك *** تعـتـز فـي قـربـه ولا قــرب كوبـان
إلــى بــدت لــك لازمـه قــال لـبـيــك *** خـل صدوق وصادق فـيـكٍ ما خـان
لو تزبنه مظيوم بالروح يحـميـــــك *** حيثه مجـرب من صماصيم شجعـان
أنص الذي قربه يسرك ويرضيــــك *** الحيـص شـيـال الـمحـامـل بـليـهـان
وإلـى حـداك الظيـم دور معـانيـــــك *** أزبـن هـل الجـودا صواريم حـوران
ولا الـردي لـو جـيـت زابن أيجـليـك *** مثـل الكـداده مـا بهـا وكـر عـقـبـان
ولـد الـردي لا تجـعـله من مراكيــك *** خـله يـولـي مثـل طيـر ابـن بـرمـان
مالك ومـال اللاش لو هـو غـدا بيـك *** لازم يـتـلـه مـن مـعـامـيـق رديــان
وحـاذورك الـنـمـام بـالـك أيـحـديــك *** يكيـد مـا بـيـن البـنيـخـي والأخـوان
حيثه يفكك شمل الأصحـاب تفكيــك *** يفرح أن كانه شاف الأقراب عدوان
لا تحسب أنـه منصح لـك ويغليـــك *** أعرف ترى قلبه على الشر ضرمان
وأفطن ترى الشراث لا بد شانيـــك *** ما يـقـتـنع لـو تحملـه فـوق الأمتـان
لـو كـان مـا تاجـد ريـال بمخـابـيـك *** مـا يـأسـف لحـالـك ولا راح قـنعــان
وإلى حكيت أحفظ قرايض مهاجيـك *** وأوزن كـلامـك لا يـقـولـون كـذبـان
وأعرف ترى الثرثار هرجه تماتيـك *** كـأن فـي جـوفـه مسجـل وشـرطـان
لو تزهمه بالصوت ما تقـل يـوحيـك *** وإلى نصحته صد غاضب وزعـلان
يــدرد ولا عـنـده عــلـوم تـسـلـيــك *** يــفـرا الـكـلام بـلا دلايــل وبـرهــان
والفـاهـم الـمـدرك بـرايـه ايـقـديـك *** وأهل الجهل دايم عـن الحق عميان
وإلى ظهر علمك ترى الناس توذيك *** أحفـظ كرامـة سمعتـك قـدر الأمكان
والخاتـمه أطـلب وليّـك وباريـــــــك *** وصلوا على خير البشر نسل عدنان

التعديل الأخير تم بواسطة محمد بن دوهان ; 08-31-2019 الساعة 07:47 PM
محمد بن دوهان متواجد حالياً   رد مع اقتباس