وجب أن اكرر نشر هذه القصيدة لملائمتها لهذا الموضوع وهذه القصيدة هي آخر ما قلت حول من وهم بعض شيوخ عنزة ونقل نسب عنزة إلى غير نسبها :
( رسالة إلى كل عنزي شريف يهمه نسبه الصحيح )
نجبـت النديـب وشد جيـب جـديـد طـراز *** مرفـعّ وقشع الهيش مـانـاش صـدامـه
تـعـلاّ بصهات الجيـب وأسقـاه بالممتـاز *** يـبـوج الديـار ويسهـر الليـل مـا نـامـه
يسوقـه عـلى هـونـه ولا يشغـّل الغـمّـاز *** ينـاظـر عـن السهوات خـلفـه وقـداّمـه
تـبـارك ولـي الكـون كـنـه خطات الـبـاز *** اليـا لاح لـه خـرب الحباري تقل خامـه
تـوجـه يـبـي ربـعٍ كـرام وعـلـي اعـزاز *** يحـث السرى من عاصمة نجد مجهامه
نـويـت أرسلـه ماني مجامل ولا منحـاز *** عـلى أولاد وايـل ضد من عال وأكعامه
أخص الرجال الصيد ما طاعـوا الهمّـاز *** ولا أسند على هلباج أو هيس واخمامه
خـطـات الـرجـل ودك توقاله بقفـاز *** لأنـه شبـيـه الـلي ينجسك بجحامه
وخطات الرجل صوره تعلّق على برواز *** خـيـالـه نضيـر بهيكـل الجسم والقـامـه
بعيـدٍ عـن الفـزعـة وعـن نفعـة المعتـاز *** ولالـه سـوى جـده بـدأ ينقـل اعـظامـه
الـلي ولـّع الفتـنـة وشـب الحطب بالقـاز *** يدور الخطأ ونفسه عـلى الشر معتامه
يحسب النسب مـالـه قـواعـد ولا مركاز *** مـعـه شـلـة اتـطبـل عـلى رقـع دمـّامـه
تصديت للحاسد ومن طبعه استفزاز *** مفرّق شمل ربعه بغيبات وأنمامـه
صدحت بكلام الصدق ماهي رموز الغاز *** ولا يظـلـم الـلي عـزوة سعـود حكـّامـه
أبي أشرح أهداف اللي لجـد عنزة لمّـاز *** يـعـوث بنسبـهـا وهـو مبـاديـه هـدّامـه
نـقـلهـا لـقبـايـل تسكـن الشام والأهـواز *** يـشكـك ويـطعـن والـمـخـالـيـق لـّوامـه
ولا تقـل عـرفـت نجـد ولا كنهـا بحجـاز *** ولا تقـل قـبـل اجـدودهـا طبـوا اتهـامـه
تـرى جـدنـا عـامـر تسـمّى عـلى عـكـّاز *** طعـن بالعصا العايـل ولا فـكـه احسامه
قبـل وقعـة الأغيـال وقصـة جبـل خـزّاز *** وقـبـل مـنـاخ الـزيـر هــو وأبـو دلاّمـه
تـرانـا بـني وائـل بعيـن العـدو مـخـراز *** لنـا أمجـاد من يكتب بها تتعب اقـلامـه
تـرنـم بـه الـحـادي وغـنى بـه الـرجّـاز *** لحـون الفخـر بامجـادنـا تـنشد انـغـامـه
صناديد يوم الخيل في مطرد والزاز *** مغاوير يوم الروح تجلب لمن سامه
تـزول الجبـال ولا تـزحزح نسب عـنّـاز *** لـه الفيـن شاهـد بـيـن باحـث وعـلاّمـه
نسبنـا كضلع طويـق راسي ولا يـنهـاز *** أمجـد وافـاخـر بـه وانـا شامخ الهـامـه
محرف نسب عنّـاز مهما أجتهد ما فـاز *** كلامـه وهـم والناس مـا تقبـل أوهـامـه
يفوز الـذي يجهد ولـه بالصحيح أنجـاز *** ومن لا يعد الصدق ما ايحقـق احـلامـه
نـدبـت الشيـوخ الـلـي ثـقيليـن بـالأرواز *** يشيلون حمل الـلي عـلى كاهـله ضامه
ولا أظـن أبـو خالـد مع النـوري الفـواز *** يـوقـع بختمـه مشهـد الـزور وابـهامـه
التعديل الأخير تم بواسطة عبدالله بن عبار ; 12-22-2010 الساعة 10:55 PM
|