من هجوسٍ يوم ندعيها تجينا بالجدايد =ولاتجيب إلا البيوت اللي جديره بالإشاده
عودتنا بالجزايل والنوادر والفرايد =تستمر تجيب حتى تلحق الشاعر مراده
شاعر ٍ لاهد فكره مايعوّد غير صايد =مثل حرٍ هده الصقار وإعجب في هداده
شاعر ٍ واعي جنى من سالف أيامه فوايد=مايمر بيوم ٍ إلا أعطاه درسٍ وإستفاده
إن تكلم منطقه موزون وعلومه ركايد =مايجيك بعلم ٍ إلا ثابت ٍ عنده وكاده
جاء يسلم ويتشرف في لقى وساع البنايد= والأكيد اليوم هذا يعتبر ثالث عياده
مرحبا ترحيب حسب العُرف وسلوم وعوايد =منهج أجداد وحفظته مثل حفظي للعباده
بـ من تعنّا من قريب ديار وإلا من بعايد =مرحبا مايقبل التقليل قابل للزياده
في محلٍ يجمع الوافين من كل البدايد =حضرة أصحاب السمو وإلا المعالي والسعاده
عند داعينا رفيع الذات كساب المجايد =شيخنا هزاع ربه بالكرم والخير زاده
عنه أرحّب عد ماينشر بطيّات الجرايد =وماتبثه شاشة التلفاز بمباشر وإعاده
مرحبا بـ بن صباح اللي على الروّاد رايد= من الكويت يمثّل الحكّام ويمثل بلاده
مرحبابك يا سليل الجود كساب الحمايد =سعود من آل الصباح أهل الشيم وأهل الرياده
ذات جود لـ شعبهم مداتهم ماهن زهايد = دوّن التاريخ سيرتهم على طول إمتداده
والكويت بحكمهم متهنيه والخير سايد = شيوخ نسل شيوخ ومن أول زمن حكّام ساده
الصباح اللي يخلون الصّعَب معسوف هايد= كم عنيد ٍ طوعوه وحولوبه عن جواده
للصباحي منجزات عظام وأمجادٍ خلايد = ومركبه وسق الشداد ولايحول عن شداده
وفيه تربطنا القرابه والمذاهب والعقايد = والحكم يحتاج حزم وصبر وإصرار وجلاده
ومرحبا بالشيخ بن هذال حلال العقايد = شيخنا اللي في يديه الحبل حله وإنعقاده
شيخ ينطح للصعايب مايهمّه كل كايد = يوم بعض الناس لو حمله خفيف شوي كاده
مسلط اللي لاوعد يفعل ويافي بالوعايد = راس قوم وطول عمره ماتعرّض للنقاده
ذاخرينه للقبيله درع وحزام وسنايد = ينطح الجمع الكبير بكنّته وإلا براده
بـ كل قوّه لادعاه الزّام يقدم مايحايد = ولو عطاء أمر لـ عزوته عنّاز يبشر بإعتماده
فيه عزة نفس دمث أخلاق فيه اللين زايد= غير عند الحق حازم لاتغاضي لاهواده
في مثل شرواه نفخر ياعسى أيامه مدايد = لاغرابه يوم يفعل طيب فيه الطيب عاده
وعذروني جاركم ربي من صدوف ونكايد = وأختم الموضوع بعد ضهار فحواه ومفاده
مايوفيكم كلام ولاتوفيكم قصايد = والمقام أكبر من إطراء كل شاعر وإجتهاده
والنهايه كل رجّالٍ لـ صرح الطيب شايد = يستحق إنه يلبّس له على المتنين راده

نعمٍ بك وبأهلك وأجدادك الكرام أخي العزيز حمد، وأنت ممن يمثلون القبيلة ونفخر بشخصك العزيز وبنهجك الكريم وفقك الله، وصح الله لسانك وبنانك على ما أبدعت وقلت في هذه القصيدة العصماء بمن يستحقها ممن نفتخر ونعتز بهم وبسيرتهم وبمكانتهم أجمعين ..

وقد أوفيت وكفيت بالترحيب بنجل شيخ مشائخ قبيلة عنزة الشيخ مسلط بن زبن الهذال أبو فهد حفظه الله ورعاه وصحبه الكرام أبناء الكرام، ونسأل الله أن يلبسه ثياب الصحة والعافية وأن يطيل بعمره ..