في محفل ٍ هبّة رياح عطوره=يبهر جماله من جمال حضوره
عند العديم بن العديم النادر=نسل الكرام اللي طوال شبوره
ابو عمر راع المقام السامي=شوق الهنوف الغاده الغندوره
شاعر علم له وقفة ٍ محسوبه=وشوره سديد ويستدل بشوره
بالطيب مثّل لابته ماقصر=بسم القبيله ماذخر مذخوره
فعله يجمّل جمل الله حاله=ونفسه على طيب الفعل ماموره
بسمه واسم ربعه هلا حياكم=يامرحبا من خطّر ٍ مسروره
ترحيبةٍ من طيْب نفس تقدم=ماهي لـ احد من دون أحد مقصوره
إعداد ماذعذع نسيم الغربي=ومادارت أيام الزمن وشهوره
واعداد من لبّى وطاف بمكه=وصلى بطيبه والرسول يزوره
من شاعر ٍ لاقال جاب الندّر=لاصوتوا بسمه وجاله دوره
الله منحني موهبه شعريه=وآزن بيوتي ماتجي مكسوره
وأثمّن لقولي و احسب حسابه=وأحتاط و اجنّب عن المحذوره
لنّ الشعر حبك ٍٍ وسبك ومعنى=ماهو فقط تسجيل صوت وصوره
والشاعر اللي مايجمل ربعه=أقول لاحاجه لهم بظهوره
وانا هنا واقف لبذل جهودي=ولا يُلام المجتهد بقصوره
وارجع لموضوع الحفل واكمل=وابو عمر وجهوده المشكوره
فعلك ينومس بيض الله وجهك=لك راية ٍ بيضاء علت منشوره
دعيت لرجال الوفاء وأجابوا=ولا حسبت أموالك المخسوره
عنك ابارحب وأحتفي بضيوفك=حيث ان بيتي سور بيتك سوره
وأكثر بترحيبي لهم و أزيده=وافرش لهم ورد الغلا وزهوره
حيّ الرجال معربين المنسب=العزوه اللي بالوفاء مشهوره
لابة بني أكلب إبعاد الهقوه=بـ أطيب ذكر بين العرب مذكوره
لابة بني اكلب عزاز الأنفس=الطيب أشادوا بنيته وقصوره
وعلم الفخر ترشحوا بو شاحه=وعلى العزاز بيوتهم معموره
للطّيب روّاده وله تجاره=وسوق المراجل عندهم هاموره
هم بربيعه وبربيعه حنا=من تغلب نموره عيال نموره
أبنا عمومه والوثايق تشهد=يروي لنا التاريخ عبر سطوره
رجال ٍ لياقاموا بواجب سدّوا=بفزعاتهم يضرب مثل مخبوره
لاصعبه إلا لاوقفوا حلّوها=مهما تعقّد حبلها مقدوره
اهل السيوف الحدب واهل السطوه=يوم الشقاء وذاك الزمان وجوره
يوم إنها بإم الفشق والشلفا=كبد العدو من فعلهم مسموره
هذا وأنا من عزوة ٍ معروفه=الخصم منهم ماتطير طيوره
يوم العرب غاره وراها غاره=تقفي عداهم مرغمه مجبوره
يافزعة اللي من غليبه جاهم=ياسهرعين الخصم ياثابوره
عيال وايل كل قوم ولاهم=مثل درج عبر الزمن وعصوره
ويكفي شرف قول الرسول محمد=في سنته وأقواله الماثوره
دعا لها وقال عنزه نعم الحي=مبغي عليها وقال هي منصوره
وكل القبايل ماعليها قاصر=المرجله ماهي لـ احد محصوره
لاعودت لمعانده وطلابه=كل ٍ على حقه اطوال شبوره