الإهداءات

 

 

   

 

    
  

 


    -  تعديل اهداء
العودة   موقع قبيلة عنزه الرسمي: الموقع الرسمي لقبائل ربيعه عامه و عنزة خاصه ركن الأدب الشعبي الركن الخاص بقصائد الشاعر محمد سوعان الربيع
الركن الخاص بقصائد الشاعر محمد سوعان الربيع كل مايخص شعر الشاعر المبدع محمد بن سوعان
 

إضافة رد
 
   
أدوات الموضوع انواع عرض الموضوع
 
قديم 06-15-2017, 05:09 PM   #1
شاعر
 
الصورة الرمزية محمد بن سوعان الربيع
 
تاريخ التسجيل: Jun 2012
المشاركات: 407
افتراضي مواهبي عند اللزم يسعفني

مواهبي عند اللزم يسعفني
--------------------------------------------------------------------
هاجوس قلبي هاض واسترسل القاف = واركاب فكري روّحن ما اخذلني
دعيتهن جني سريعات واخفاف = لبــن نــدايــا حيث مــا عـــانــدني
ويوم البعض يرقد على فراش ولحاف = انا عيوني حينها ما ارقدني
هجسً يطوقني وهجسً بعد طاف = وهجسً اظعونه من بعيدً لفني
دشيت ببحورً بها الوان واصناف = واخترت من جزل المعاني وجني
وليا بغيت القيل ما ادوّر اسعاف = مواهبي عنــد اللـــزم يســــعفني
لاشك احاسيسي رهيات وارهاف = وريضان فكري مخضره ما امحلني
من فيض جاشي ما اتسلف تسلاف = وعلى حسب ما اريدهن يبتنني
اوظف المعنى على كل ميقاف = واصـوّر الاحداث بســلوب فــني
واعرف واميّز كلمة الحق واخاف = يلــقا بقــولي هفـوةً تمــتهني
اخشى الكلام الناقص الهابط الجاف = والنفس دايم غيّهــا ما فتني
ماني بمغـرورً بنفسي ومزهــاف = والحلم دايــم منهــجي والتأني
ماني بخطــو اللي تلقـف تلقــاف = هــاك الذي في كل مجلس يغني
وقولً فقد معناه ما صاب الاهداف = وارماح بيدين الغشيم افشلني
ولاني على ما قيل بالناس عرّاف = به ناس مثلي وايضاً أدون مني
وفيهم على القمه تعلا بمشراف = شاعر واذا هو رتـب القيل فـنّي
مثل الدرر تاتي معانيه وانظاف = شـــواهـــدً للناس ما ينتــهـــني
مثل القمر نوره بالابصار ينشاف = فيه العقــول الواعــيه يهتدني
عـدً روّي مثل الروافد لها اضفاف = منـه النفوس الضاميه يرتوني
فيها النصايح للفهيمين الاشراف = امثال لاهــل المعرفه يصـلحني
تبقى اتردد بالنواحي والاطراف = يعطن هدوا للناس من دون منّي
تبقى ولو راعيه شالته الاحتاف = ولا تخفي الحكمه سنينً مضني
وبعض القصيد اليوم لا خضت به جاف = مابـه فوايــد تــذكر ويرتجني
تجيك قيفانه هزيلات واضعاف = ياتــي بهــرجً هــابطً وامتــدني
تنزل سريعه ثم ترحل كالاطياف = مثــل الغيــوم العـابره يرحــلنّي
لو هو طرق بيبان الاشعار ما ناف = دايم اشــدوقه بالركيك يهــذني
مثل الغرير اللي على جال ميهاف = قــام يتخبط والفــوايــد غــدني
وما كل من سدد على الصيد هداف = ولا حصل الطولات كل امتمني
ومن يدعي بالعرف في حقه اجحاف = يتعب وكل مغرور ما يرجهني
الكامل الله والبشر ينقص اوصاف = ولولا الخطايا اعمالنا يرجحني
وهناك قولً ما على صدقه اخلاف = مكـارم الاخــلاق فيـه اســتوني
عبره قريناها على بيض الاصحاف = نصايحً في غرسهن يثمرني
قصةً حكيمً ينصح ابنه بما شاف = لقمان نصحه للقــوب المســـني
نصيحةً فيها المواعض والانصاف = قال الكبر للنفس ظلم وتجنّي
واشوف بعض الناس للكذب ميلاف = مراكبه فوق القمر يســـبحني
مبلي وملقوفً وللهرج خطاف = وليا حــكــى ســـوالفه يفضحــني
اسرف بهرج الزُّور يامال الاذلاف = ودايم لســـانه بالهزيلـه يوني
زاد بغروره وايتعجرف تعجراف = مغـويه شــيطان وتقفـاه جنـّي
شــفتــه تمادا بالوقاحة والإسراف= وخلف الستار الهيس حربً يشني
مثـل البهيم اللي تضرا للأعلاف = ينهق وايلا شــاف العلف يرجهني
نصيحتي له يركد ويرجع اخلاف = قبل العيون الغـــافيه يبصـرني
وان زاد انا والله لااجيبه اكتـاف = واكويه كـيّه تقطــع شكوك ظني
هذا ومثله ياهــل العرف ينعــاف = قربه خســاره للجميع وغـبني
ولابد ما ياتي على الزيف كشاف = ويفضح امورً بالنفوس اختفني
ما غيــّر المضمون ديكور واغلاف = حقــايـقً لابــد ما يظـهــرني
ويالله تبعـد كـل واشـي وبـــلاف = عــن كــل خـيّر يا الهـي وعـني

محمد بن سوعان الربيّع
__________________
نقره لعرض الصورة في صفحة مستقلة
محمد بن سوعان الربيع متواجد حالياً   رد مع اقتباس
قديم 06-15-2017, 05:41 PM   #2
صاحب الموقع
 
تاريخ التسجيل: Mar 2008
المشاركات: 8,319
افتراضي

ولابد ما ياتي على الزيف كشّاف = ويفضح امورً بالنفوس اختفني
ما غيــّر المضمون ديكور واغلاف = حقــايـقً لابــد ما يظـهــرني
ويالله تبعـد كـل واشـي وبـــلاف = عــن كــل خـيّر يا الهـي وعـني

أحسنت يا أخ محمد الزيف هو الذي نكافحه منذ سنين والحمد لله انكشف عند من ينظر وفي هذه القصيدة كعادتك مبدع وقد وصفت الشعر والشعراء خير وصف والحقيقة أنني عندما اشيد باشعارك هو شهادة حق وليس مجاملة ونقول لك موفق 0
عبدالله بن عبار متواجد حالياً   رد مع اقتباس
قديم 07-28-2017, 01:04 AM   #3
شاعر
 
الصورة الرمزية محمد بن سوعان الربيع
 
تاريخ التسجيل: Jun 2012
المشاركات: 407
افتراضي

هلا استاذي الفاضل ابو مشعل
يسعدني مرورك الطيب اشكرك وما عليك زود
تقبل تحياتي
اخوك ابو فهــــــــــــــد ,
__________________
نقره لعرض الصورة في صفحة مستقلة
محمد بن سوعان الربيع متواجد حالياً   رد مع اقتباس
إضافة رد


أدوات الموضوع
انواع عرض الموضوع

 
تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

 
 
 

الساعة الآن 07:29 PM.


Powered by vBulletin® Version 3.8.8 Beta 3
Copyright ©2000 - 2017, Jelsoft Enterprises Ltd 
vEhdaa 1.1 by NLP ©2009