مجاراااة
====

ابن عمك وان تردا لاتسبه

ابيات للاخ الشاعر سطم بن فهد الخليل راقت لي وجذبني معناها
وكانت تلك المجاراة المرفقه على امل ان تنال اعجاب الجميع



لا تشب النار خله لاتشبه = لبس الموضوع ملبـوس الجمالي

وان بــدالك موقـفـن مع مـن تحبه =عالج الموضوع بالصدر الشمالي

وابن عمـك وان تـردى لاتسبه = مااتـعلــم الغـيب وظـروف الليـالي

نبهـه عــن غلطـته لاجـل يتنبه =كان جــا للسالفـه ذكــر ومجـالي

وغيـر هـذا بـاقي الاقـوال كـبه = للجـدب ياشجرتـن مالـه ظـلالي

الحياة اليا انتزع منهـا المحبه = جعــلها عقــب المحــبه للـزوالي

الشاعر/
سطم فهدالخليل الجعفري الشمري

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,
شب ضو النصح يالمنعور شبه

مجاراتي لابيات الاخ الشاعر سطم فهد الخليل

ياسـلام الله عـلى رجــلً نـحــبـه = العريـب اللي من قـروم الـرجالي

نفخــر بمعـنـاه وخـلافــه نـكـبـه = والكـلام الـزيـن برفـع لــه عـقـالي

ياســطم معــناك بالخافــق نـظـبـه = والذهـب يا صاح يشرا بالـريالي

شـب ضو النصح يالمنعـور شـبـه = جـارك الله مـن صواديــف الليـالي

صب فنجال الوفـا والطـيب صبـه = وبالتسامح والصـبر ترقـا المعـالي

ترتفع نفس العـريب اعـن المسـبه = وابن عمك يا غلط عطه المجالي

ان بـــلاه ابليس واغــواه ولعـــبـه =غض عنه الطرف ياشفت الخمالي

قـل عسى يهديـه للتوفيق ربـه = من خفـوقً دايـم من الغش خـالـي

والتسـامـح كــل مـنعــورً كسبـه = اجــرً ومعـروف,,,, والمـدح المـثالي

واالحروف اختامها طـيب ومحـبـه = للعريب ابـن الفهـد قــرم الرجـالي

محمد بن سوعان الربيّع
اليوم الثلاثاء 22 شــوال 1440 هجري

أختيار موفق وقصيدة سطم فهد بن الخليل تستحق المجاراة فقد وضع النقاط على الحروف ونطق بالحكمة والموعظة ومجاراتك له جاءت في وقتها وكل منكم حكيم رأي صح لسان الشاعر سطم وصح لسانك يا أخ محمد أنت دائماً تتحف منتداك بالكلام الطيب والشعر الهادف وفقك الله وشكراً لك دائماَ وأبداً

لاهنت استاذنا واديبنا المخضرم بعض مما عندك شاعرنا القدير ماعليك زود استاذي ابو مشعل