السلام عليكم
تحيه طيبه ،،،

وقصيدة متواضعه لاولاد وايل ،، مع الاشاره لصاحب المقطع العضياني العتيبي ،،،الذي ذكر معلومات مغلوطه اضافه الى اسلوبه اللي ذكرها به ، ولو انها صحيح لما رديت بغض النظر عن اسلوبه

ياراكب اللي شدّت اليـوم بـشـداد
من ساس هجن ٍ بمعمـقها نماري
.
اللي سلفها من على دور الاجداد
خزيـزة ٍ ماهي مخـاليـص شـاري
.
سبع الزمول بساسها شي ٍ وكـاد
من عيـدهيّـه ماغشـمها البشـاري
.
توصيفـها وان جهّـسه كــل قصاد
يبقى عليـها بـالحقـيـقـه اقتــداري
.
حـمرا شفـقـا لونـها ماهـو اسنـاد
والكتـف والغـارب شحاه الشقاري
.
وان طيّرت منسولها تفـتخـت عــاد
تقـل عليها من الـوضيـحي مـواري
.
واكـواعها عـن زورهـا تنسنـح غـاد
عـصما يـديــن مـقـولمــات الاثــاري
.
عوصا ذلـول آذانـها رهــف وحْـداد
والعيـن عيـن اللي لكـح لــه حبـاري
.
ماكنـّهـا الا ظلـهـبــت شعـلـة زنـاد
ليا عـوربـت بـاصْلِـيـخ نــاره تـواري
.
دقـيّـقـة عـرنـون صـخـف ٍ بـهـا بـاد
مجـذا رقبتـها شـوح عـنـه العــذاري
.
وعضـودها بالـوصـف كــرب ٍ ومـلّاد
والــزور علـى بطيـــنـهـا تـقــل زاري
.
مسـلوعـه سـرسـاح وفخوذهـا ابـداد
شنـاحـية ٍ تطـوي بعــيـــد المـسـاري
.
قـرنـا مناسـم وان وطت صلب الاصلاد
مـشـــــلاعـهـا عــدّه مــلاهـط شـبــاري
.
ليـا ذومـلت طفـقه خفـيفه ورهـواد
تقطــع رهــاريه الخـــلا والجــهاري
.
وان حدرت خطو السنيّف لها اجلاد
صمصمّة ٍ من راسها السيل جـاري
.
وان سندت قفقوف حزم ٍ على احياد
الارض تزوى من يمـين ويـســاري
.
تجغــش صلاهيــم الرضم مالهـا ماد
وتقَــص جــرّتهـــا بلــيــل ٍ قـــماري
.
عنها العشار من السراميـد ســـرمــاد
سنـيــن مـرمـل مـاتعــرف الصـــراري
.
من نيّها للــوثـر زِيّــن لـهــا لـْـبـَاد
قـــدم ٍ عليهــا رعي نبــت البــداري
.
مرباعها طفيــحا عـلى عزم واوفاد
ومن طعس الايــدا يــم هاكالمـحاري
.
يــم الاســامــر مرتــع ٍ للنــضــا ذاد
من دونها الضيــرين بهــاكالمــداري
.
ومن كور الهوجــا للجواميس تـرتاد
ومن الحْلــوات عريقهـا بانــحــداري
.
لعـــج علــيها من اول الوقت رعّـــاد
تطارخت غـــدرانــهـــا بالصـــحاري
.
العشـب شــرك وغــادي تقــل سجّاد
وسط القراشع والدعــث والمــذاري
.
وعقب السماك مشــرّقه فاتــت اكباد
عـــدت وخــامه واقبـلــت للمــراري
.
مصيـفــها دار الحفيــره والاثـــمــاد
بها الـذْريــرِي طـــول شوفــك يباري
.
ومن اشريفا تعـــزْبــه للغــف الانفـاد
وتحمـض على حـد الحــزم للـسـماري
.
يـــم اللبيّدي ودونــه بــهاكـــالاوهـاد
مادوّجـــت بحـــدود نبـــت الـــكباري
.
ولاقــلّــدت يــاطيـــب الساس بــقْــلاد
ولاهجـجــتــها بــالمســيـــره بـــواري
.
يطنــب عليها كــل صاحي ومـســراد
وقــدامها رقص العـصِـي والـهـواري
.
لاشــك ماتــرهــم لــها هــاكـــالاذواد
مدلّهــــه بـــدار العـــذا بــالـــقـفـاري
.
ومع كنّة الثــريا لهـــا العــدّ مــيعــاد
من عقب مانشّــت جميـــع الخــبـاري
.
خمسة عشـر بــاع ٍ بها الفــرز يزداد
خمس المقــم متقــابــلــه بانـــكساري
.
وان جــَا لها الحـــوّال ماجـــاه لـــدّاد
ماهي لنــا ولاهـي على الوقــم كــاري
.
من طبع ربــعي للنقــــا ذروة امجـــاد
خلـــفة مسيــك نعـــدها لكــل قــــاري
.
مقيبــل ومسيـّب ونـــويبـغ مع بـــرَاد
وعلطـــان معــهم ماعليــهم غـــبـاري
.
واولاد وايـــل كـــلهــا نــــعــم الاولاد
بنــي وهب وجـــلاس ويــّا العـــماري
.
وضنا عبيـــد مطــوعيــن ٍ للاضــــداد
راحـــت ذلـولي يمــهم باختـــصــاري
.
معها نديبــي والــرسالـــه لهــا ابعــاد
دونــك رسنـــها يانــــديـم الضــواري
.
واقفــى عليــها بــاوّل الليــــل مــــدّاد
تـــشدا ظليــم ٍ جفّــله حــس صـــاري
.
ملفـــاه ربــاع ٍ رفّعـــوها بــالاعـــماد
من ساس ربـع كلبـــوهـــم حــــراري
.
متـــقابليــن ٍ بالنــقــا مثـــل الاطـــواد
عطهم جوابي وانت تــمرح اجبـــاري
.
تفــنيـــد للـــي لــجَــمّ الامثــــال ورّاد
حبلـــه قصير ويحســب العــدّ غــاري
.
من غير عنكــثتــه للاشعـــار ماجـــاد
من عقب عبجــه قـــد عطــوه اعتباري
.
ماغيــر ينـــذخ بالســواليـــف حــــلّاد
وســط المجالــس كـــل ليــل ونهـاري
.
يقول قول ٍ مــادرى عــنه بــه كـــــاد
وش عـــاد ياهــرجٍ من الصدق عاري
.
جــانا مسجّــل ما اســـتفـدنا ولا فـــاد
ذاك العتيـــبي كـــل قــولـــه هــــذاري
.
مثله كثيـــر ٍ من عــنا الوقــت مانـــاد
لمصملخ الضلـــع المشـــرّف يشــاري
.
لو حــاولـه ياتــيه سبعيـــن جــلمـــاد
عــدّه يقول لمن رقـى لـــه حـــــذاري
.
مثبـــت ٍ عـــزه علــى صلـــب الاوتـاد
تقـــول محتكــر المـعــــزه احتـــكاري
.
واللي نكـــث ياربعـــنا لــو لــنـــا راد
مثـــامثـــه هبـــت عــليها الـــــذواري
.
راحت كما عِــرْب ٍ تــدهــدى بالاصهاد
والا علِيــــــم ٍ شعــطــتـــه الــســـواري
.
خــلـــوه يــاربعـــي مــفـــلّـــي ومــنقـاد
خلــــوه ماعنـــــده مــن الشـــر طــاري
.
دامـــه يبــابــي مـع رهــاريه الاجــــراد
الحمـــد لـــرب ٍ للمخــالــيـــــــق بـــاري


فهد العنزي

الأخ فهد المسيكي صح لسانك وما شاء الله عليك فقد أجدت وصف الذلول أما عن قصيدة الرجل المكسرة التي تطرق بها لحدث ما يجب ان يتطرّق له لأن القبيلة التي يمدحها عندها من مكارم الأخلاق من الشّيم والقيم والكرم والشجاعة ما يغنيه عن التطرق لذلك الحدث سواء صح أو لم يصح

كان يتردد عليه بين الحين والحين رجل متوهم وهو يدعي أن جدّه ذبح برجس بن مجلاد وأحيان يقول أن جده ذبح جديع بن هذال وعند الأخير استقر رايه على أن جدّه ذبح جديع بن هذال وكنت أحاول افهامه ولكنه مصر وفي ذات مرّه كرر القول أن جدّه ذبح جديع وأدعى أنه متأكد وكان عندي رجال فقلت تراكم شاهدين نحن نعترف أن جدك ذبح جديع وجديع محسوب عن ألف فارس وقد مضى على وفاته اكثر من مأتا سنة ونحن نريد نعد كم أنجب أخيه مغيلث أو مهلهل من ذرية ونعد دية ألف رجل مضافاً عليها عدد ذرية أحد أخوته وعليكم دفع الدية طالما أنك اعترفت بأن جدك قتل جديع وليس منكم أحد يسد بجديع فأجمع الدية من جماعتك وأدفعها لأسرة المنديل وهذا يعتبر أعتراف منا بأن جدك ذبح جديع وقلت له سوف أقدّم غداً للمحكمة والشهود حاضرين فوضع يده على راسه وقال والله أن الرواه كذبوا عليه وأنا أكذب ثم تراجع

ولذلك الرجل الذي ذكر بقصيدته أنه قتل من عنزة 99 رجل عليه أن يكون شاهد ويجب المقاضاة ولكن البدو عندهم مثل عندما يتحدث شخص بسالفه غير صحيح يقولون ( طب لها الرواق ) يعني لا تعتمدها ومن الواجب أن يصدر أعتذار من شيخ القبيلة التي استضافت هذا الرجل وسجلت قصيدته

ابومشعل حياك الله وصح بدنك وسلمت

شكرا لك لثناءك ، وبالنسبه للرجل فهو تعرض لعنزة باسلوب لايقوله الشخص حتى لو انه صحيح ، ولا يطري على الرجل انه يذكر السالفه بالاسلوب هذا وهو يدعي الطيب وحب الطيب، عزالله ان متناقضات الوقت هذا عجزت اجمعها ، حيث ان الطيب صار تعريفه كل من يعده بروحه يوحي انه من اهله وينتفي عن غيره ،، وهو يلطخ بالهرج لطخ

بالنسبه للرجل الذي ذكرت اللي يدعي قتل جديع فإنه معلوم لدي ، ولقد دخل في نقاش مرة في سالفه مايدري وش سنعها هو ولايدري عنها الا ان جديع بن هذال ذكر بها ، فجاك مسهم لان ورد اسم جديع ويدعي مثل ماقلت والرجال هذا له خرابيط بالنت وادعاءات غريبه ماحد يمه ، يسولف مع الخليان لحاله
واما سالفة 99 هذي يرددها البعض قبل العتيبي وقصائد اخرى لاتقل عن قصيدة العتيبي من حيث الوزن واختلاف القافيه ، لكن مايصح الا الصحيح

صح لسانك فهد
ابيات جزله
وتشكر عليها

ياهلا بك اخوي صاعد المصلوخي

صح بدنك ولاهنت شاكر لك حضورك