قصائد من شعر المساجلات - من الديوان المطبوع وغير المطبوع - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

07-04-2022, 05:07 PM

تابع
*- قال عسكر بن عبدالله بن شريعة رحمه الله يسند على عبدالله بن عبار : 252

أشكي لأبـن عـبـار من كبـر هـمـي *** الهـم فـتـش غـايـة القـلب تفتيـش
كـن الـطـعـام مـلـوث فـيــه سـمــي *** وأيامنا يا القـرم صارت تنـاويش
* قال عبدالله بن دهيمش بن عبار رداً على عسكر بن شريعة رحمه الله :
حـي الكـتـاب الـلـي بـعـثـتـوه يـمي *** يا مرحبابه عد ما ألفوا مطاريش
شلـت القـلم والقـاف بالفكـر جـمي *** وعـروق قـلبي للقـوافي معـاطيش
لا تشتكي يا الـقـرم هـمـك وغـمـي *** يـوم سرور ويوم بـه كـدر العيش
قـلـتـه وأنـا بـدنـايـي مـاني منـمـي *** شفي وقصد مناي نـزل الحناتيش
الـلابـة الـلـي دمـهــم سـاس دمــي *** وقـت اللوازم بالشجاعـة مداغيش
وعـلى رسـول الـلـه قـافـي يـتـمـي *** سلام عـدد ماهوى الطير بالريش

* وقال عسكر بن شريعة رحمه الله يسند على عبدالله بن دهيمش بن عبار: 253

حي الكتـاب وحي مـن ولـف القيـل *** يا مـرحـبـابـه عـد وبـل نـثـر مـاه
يا راكب اللي ما علوا فوقها الشيل *** حـمـرا هميـم من النجايـب معـذاه
سارت طلوع الفجر مشيه هواذيـل *** والعصـر بديـار الـرفاقـه امعشـاه
تحـمـل كـتـابـي للـرجـال المشاكيـل *** ذبـاحـة لـلـضـيـف حـيـل مــربــاه
تلقا الوناسة عندهم وأشقـر الهيـل *** لا صـبـه الصبـاب سـاقـه بيـمنـاه
سـلم لأبـن عـبـار واسرع بتـعجيـل *** وقلـه تـرى رد الخبر منـك نـتنـاه

* وقال عبدالله بن عبار رداً على عسكر بن عبدالله بن شريعة رحمه الله : 254

خـط لـفـانـي بـه جـديـد الـتـمـاثـيـل *** يحمل جـواب كنـه الشهـد معـنـاه
فـرحت بـه فـرح العـرب بالهماليـل *** رحـب بـه المعلوق والقـلب حيـاه
مرسول من قـرم صميدع وحلحيـل *** مـن لابـة تـثـني نـهـار الـمـثـاراه
قـم يـا نـديـبي فـوق عجـل التنابيـل *** هـاف من الممتـاز راعـيـه عـبـاه
مع الفجـر سـاروا عـليه المراسيـل *** ينصى المنامة هي مقـره وملفـاه
سلـم عـلى الـلي يكسبـون التنافيـل *** عسكرومخلف مع مثيله وشرواه
وسلـم عـلى كـل الرجال المشاكيـل *** وابن مهـاوش والقـروم المسمـاه
خلـف وأبن عـواد راعي المعاميـل *** ومهدي خليفة عزمن عمست أرياه
وياسين ومعطش زبـون المداخيـل *** وفرج عـز الـلي بالملازين ينخـاه

*- قال الشاعر عواد بن شقا بن الشمري رحمه الله هذه الأبيات يثني على الشيخ
مشهور بن سعود بن يعيش ويسند على عبدالله بن دهيمش بن عبار : 255

يا أبن المعنى عندي الفكر محتاس *** إلـى سـاح بالي جاه شي وحاسـه
سهران ليلي ما تقل عندي أونـاس *** عـدي سجيـن مطوقينه احـراسـه
يا القرم قلبي صايبه تقل وسـواس *** كـل ما برى جرحي تجيه أنتكاسه
هـات القلم وأكتب جوابي بقرطاس *** مـن فيـض عـدٍ عـارفيـن مقـاسـه
شكيت لأهل المجد والطيب والباس *** مشهور عنوان الفخـر والسياسه
أبـن يعـيش معـرب الجـد والسـاس *** الـوايـلي تـعـرف مـراسيم ساسـه
أبـو محـمـد لا انعـقـد عـقـد لـولاس *** قلاع ضرس المعتدي في مداسه
يـا أبـو محـمـد لا تـحـدا بـالإفـلاس *** وغــيـابـنـا لا تـرفـعـه لـلـريـاسـه

* وقال عبدالله بن دهيمش بن عبار هذه القصيدة رداً على عواد بن شقا
الشمري رحمه الله ويثني على مشهور بن يعيش : 256

أبدي جـوابي بالولي خالـق النـاس *** من جـوّد احـباله تـقـوت أمـراسه
يفـرج لمن قـلبه من الهـم حسـاس *** عـواد عبر عن مشاعـر احساسه
يا أبو شقا عسى الولي يبعد الباس *** ويزيـل همـك بالفـرح والـوناسـه
الـلـه يجيـرك من بلا كـل هوجـاس *** عقب الهموم البال يجلي عماسـه
وأن جار وقتك وأنتوالك بالأتعـاس *** أنـص الـذي قـدرك يميـز مقـاسـه
أزبن على الطيب لـو أنـه بمكنـاس *** أنصه ولا تنصى خطات الهلاسـه
أنص الكريم معـرب الجـد والساس *** مشهور شيخ ولا ذكر بـه نحاسه
خلفـة منبـه من بني وهب وجلاس *** فيـه الحمية والصخى والحماسـه
قرم القروم من الرجاجيل مـرواس *** عسى مـع المخلوق يكثر اجناسه
عـادات جـده للـمـنـاعـيـر طـسـاس *** يسقي العـدو سم الأفاعي بكاسـه
يفعـل كمـا فعـل المهلهـل بجسـاس *** ذاك الذي من عـانـده شـال راسـه

* وقال عواد بن شقا بن رحيّل الشمري رحمه الله هذه الأبيات يثني على عبدالله بن دهيمش بن عبار : 257

يـا الـلـه يـا عـلام غـيـب الخـفـيـاه *** إلـى ومـر أمـره نـفــذ مـا يــراوي
ومن ضاق باله رجع أمره لمـولاه *** فـردٍ صمـد مـالـه شـريـك يسـاوي
أبـي اشـتـكي لـلـه والـوذ بـاحمـاه *** وإلـى جـلالـه رافـعـيـن الشـكـاوي
أسهر وعيني طارق النوم ما جـاه *** ولـو أتـمـنـى مـا تـفـيـد الـمـنـاوي
قـلبي جزوع وزايـد الهم ما اقـواه *** والحـمـد لـلـه مـا عـليـنـا دعـاوي
يا أبـن المعـنى يـا ربـيع المجيعـاه *** مـا عـنـدي الا حضرتـك يالنـداوي
لـيـتـك سمعـتـن يـوم ونـيـت ونـاه *** عـدي طـريح طـاح مابـه رجـاوي
أبـو شـقـا عـلـيـك يـسنـد بشكـواه *** عجل يا ابن عـبار وين أنـت داوي
أنت الصديق الـلي بطيبه عـرفنـاه *** أفزع معي يا القرم كان أنت ناوي
شرواك باللزمات والضيـق ننخـاه *** ولا بـغـيــرك مـا تـفـيـد الـنـخـاوي

* قال عبدالله بن دهيمش بن عبار العنزي هذه الأبيات رداً على الشاعر عواد بن شقا الشمري رحمه الله : 258

مـبـداي بسـم الـلي عبـاده تـرجـاه *** رب الـمـلأ حبـلـه شـديـد العـراوي
لا حـلت البلـوى دعـونـاه باسمـاه *** لـه نـلـتجي عـن كـايـدات البـلاوي
يـا أبـو شقـا مـطلـوبكم ما اتغـالاه *** والشاهـد الـلـه مـا نقولـه هـزاوي
الـلي نخـانـا أرواحـنـا مـن فـدايـاه *** وكان أشتكى حنـا نثيب الشكـاوي
الـهـم مـا بـيـنـي وبـينـك قـسـمنـاه *** والكـل يـاخـذ مسهـمـه بالتسـاوي
كـانـك تـوجهـنا عـلى درب جيـنـاه *** لو حـال من دونـه جبال وعـلاوي
نـوصـل ولـي الـلي بشعـرك تمنـاه *** والله يعيـن الـلي ضميـره شقـاوي
أن كـان لـه مطلـوب حنـا عـطينـاه *** ما نمتنع يا القـرم لو هـو غـلاوي
وتفـوز بالـلي كـنـه الـريـم حـلـيـاه *** بنـت الحمايـل متعـبيـن القـهـاوي
أطلـب مـن الله يبلغ القـرم مشهـاه *** اللي سكن سلمى وذيـك الحـراوي

*- وقال الشاعـر جلعود بن لافي الشمري رحمه الله هذه القصيدة يسند على عبدالله بن دهيمش بن عبار العنزي : 259

شكـري وتقـديـري لكـم وأحتـرامي *** مـني لـكـم يـا سـاكـنيـن الـرياضي
بعـثـت مـن حـايـل عـليـكـم كلامـي *** من راسي ومرضي ورضا وراضي
ولانـي بـجـحـاد الـوفـاء للحشـامي *** تقديركـم بالنفس حاضـر ومـاضي
وهـوايـتي مـدح الرجـال الكـرامـي *** واجب ولا بترك المواجب تغـاضي
والـلـه يـا أبـن عـبـار ماني بكامـي *** أقـولـهـا وتـسـتـاهـلـون البـياضي
حـيثـك لشيمـات المكـارم تـحـامـي *** ولا قـلت قول بغير الأهداف فاضي
ومن هذي أفعالـه عـزيـز المقامـي *** ناجح ولو تزعـل نفـوس امراضي
للضيـف تجيـب الذبيحـه اشمـامي *** وللجـار ما أنتم بالقساوه اغـلاضي
أيـضـاً وفـيـكـم لـلخـوي الـتـزامـي *** وفـعـايـل غــراء طـوال اعـراضـي
وعـدوكـم منكـم يشـوف انـهـزامي *** وصديقكم ما شاف قاصر وحاضي
وأعـرض كلامي للرجـال الفهـامي *** عـنـاز كالسيـل أن تـعـّرم وهـاضي
أولاد وايــل طـيــبــيـن الأسـامــي *** تـاريـخـهـم يشهـد بـلا حكـم قـاضي
قـلتـه وأنـا مـن ناطحين الجهـامي *** شـمـر هـل النخـوة بكـل أنتهـاضي
أهـل اللحيسـة مـا بـهـذا خـصامي *** عـدوهـم قـلبـه من الخـوف جاضي
حـقيقـة الواقـع مـا هـي بالحلامـي *** شمـر كـما بـرق الحيـا يـوم ياضي
وربعـي وربعـك طيبيـن أنسجامـي *** تجمعهـم سلـوم العـرب بافتـراضي
وكـل الـقـبـايـل طـيـبيـن العـلامي *** الـطـيـب كـالـنـوار وسـط الـفـياضي
لا شـك مثـل الـنبـت ورد وثـمـامي *** والعـشب ما ينبت بصبخا خضاضي
وحـنـا بضـل الـلي عسـاهم دوامي *** آل السعـود يـعـالجـون الشـواضـي
في حكمهم شفنـا العـدل بالتمامي *** يا عـل حكم أهـل الشرف ما يعاضي
هـم عـزنـا لا صـار بـارد وحامـي *** وهـم ضلـنـا كـان اكتمت بانخفاضي
قـبـل آل سعـود عيـوننـا ما تنامي *** كنـا بـوقـت فـات فوضى وضواضي

* قال عبدالله بن عبار العنزي رداً على الشاعر جلعود بن لافي الشمري : 260

سـمـيـت بـالـرحـمـن رب الأنــامـي *** وبديت أسجل من قرايض الفاضي
نرسل جواب اللي بعـث لي سلامي *** جلعـود ابن لافي نـزيـه العـراضي
جـانـا الجـواب وكـل قـولـك سنامي *** مثـل العسل مجنـاه ورد الفيـاضي
ومن قـبلـنـا قـالـوا حسين العـلامي *** زيـن السوالف للنشامى احماضي
لا شك ما صـاب الهـدف كـل رامي *** ولا كـل سـابـوح بالأمواج خـاضي
القول واضح والهـدف مـن جلامي *** حيـثـك كما بليهان بالحمـل نـاضي
أنـشـدك وأنـت الـلي تـميـّز كلامـي *** عنـدك على ظلم النزيـه أعتراضي
عـن واحـدٍ رد اللنقـا لـه أعـوامـي *** وقـال وتمادى في حـديثه وخاضي
سـوالـفـه مـابـيـن عـامي وشـامـي *** مضمونهـا كنـه صـديـد المخاضي
هــل كـان مـن حـقـي أرد الأثـامـي *** وهـل واجبي أذود أنا عن حياضي
وهـل ممكـن أجـرد لساني حسامي *** والظالم أجعل في لهاته اشضاضي
لـومي عـلى الطيـب رفيع المقامـي *** ولا الـردي جعلـه مهف أم شاضي
والـلـه يـا لـولا شيمتي وأحتشامي *** وعنـدي لطيب الغانمين أحتفـاضي
لا أقـول لـلي مـا فهـم وش مـرامي *** قول يغيض اللي على الفعل راضي
لا شـك نغــلي حـظـنـا مـا ايسـامي *** مـا ينجلب بالسوق مثـل المقـاضي
وأنـت الـذي مثـلـك عـداه المـلامي *** حـيثـك من اللي يرغبون التراضي
يـفـداك يالشغمـوم خـطـو الغـلامـي *** الـلاش من قربه يـزيـد أمتعاضـي
ودرب الرذيله ما مشت لـه أقدامي *** ولا خير باللي عن لزومه يضاضي
واليـوم كلـن مرجهـن بـانسجـامي *** ياخـذ مـن بنـوك العـقـار أقـتراضي

*- قال الشاعر مخلد بن سعدون العتيبي يسند على عبدالله بن عبار : 261

سر يا قـلم وأكتب وعبـر بالأيضاح *** خـط لأبـن عـبـار فـيـه العـلـومـي
قـلـه تـرانـي مـا تـهـنـيـت بـامـراح *** سهران طول الليل ما ذقت نومي
القـلـب فـيـه جـروح والسـد منبـاح *** ما دمت أنا بالعان تكثر اهمـومي
شـفـي بـغـرو قـطع الـقـلـب بسلاح *** جـر الضماير وأودع القلب يومي
وسهم المحبة يا فـتى الجـود ذبّـاح *** أن ما ذبح راعيه يرمي الهدومي
يا وجد حالي وجد من هو بعد طاح *** فوق البكا والنوح ينخا القرومـي
ردوله الشجعان من عقب ما صاح *** وشالوه كبده من جروحه تزومي
وأخـذ ثلاث شهور بالدرب مـا راح *** فـخـذه وسـاقـه غـاديات لهـومـي
مـا للبنـادم كـود مـا جـاء بالألـواح *** أمـا شـقـي ولا سـعـيـد مخـدومـي
يـاليـتـني بـيـن الـرفـاقـه ومـرتـاح *** بـيـن الـرفـاقـة دالـه وامحشومـي
أدلـه مـع الخـلان فـي كـل مسـراح *** عيني تفوز بشوف زين الرقومي
وسـلام مـنــي عــد مـا بـــارق لاح *** عـلى النبـي الهـاشمي كـل يـومي

* قال عبدالله بن دهيمش بن عبار رداً على مخلد بن سعدون العتيبي : 262

سميـت بسـم الـلـه فـلاق الأصبـاح *** الواحـد الماحـود منشي الغيـومي
دعاك يوسف يالولي عقب ما ماح *** بالبيـر يـرجي رحمتـك يالرحومـي
وناداك يونس فوقـه الموج طفـاح *** ونجيت موسى من مكيد الغشومي
يا الله يـا الخـلاق بالخلـق الأرواح *** يـبـقـا جـلالـك والمـلأ مـا تـدومـي
في قدرتك تجـري ذعاذيع الأريـاح *** نـوب بـراد ونـوب عـج وسمومي
نطلبك أبن سعدون تعـطيه الأفراح *** الـنـادر الـلي مـا ذكـر بـه ثـلـومي
الـلي شكالي من عـذيـات الأسناح *** والحـب تشكيـه الخلايـق عمـومي
نجل العيون اسهومها كنها أرماح *** طعينهـن يـا مسنـدي مـا يـقـومـي
تشكي وأنا مثلك من الوجد منلاح *** لوح الهـدف بمشوكات السهومـي
الـحـب خـلانـي لـك الـلـه ســـواح *** مـالـي جـدا لـكـود نـط الـرجـومـي
على الذي يطري خيالـه بالأشباح *** الصاحـب الـلي محتفـظ بالسلـومي
الصاحب الـلي لا قصير ولا شناح *** سـبحـان ربـي كـمـلـه بالـرسومـي

* وقال الشاعر مخلد بن سعدون العتيبي أيضاً هذه القصيدة يسند على
زميله عبدالله بن دهيمش بن عبار العنزي : 263

بــديــت قـافـي وأولـــه آه ويــــلاه *** لا والـلـه الا تـو هاضت اشجونـي
واجـر قـلبـي يـا أبـن عـبـار جـراه *** عـلى ولـيـف حـط بـيـه اطـعـونـي
قـطّع عـروق القـلب وأقـفا وخـلاه *** ولا يـوم حـتى بالشهـر زاورونـي
أقـفـا وأبن سعـدون مـا فـاده أدواه *** وعسى على ما فات هم يندمونـي
محتار في قلب العنا كيف أبا أنهـاه *** عـن حبهـم كـان أنهـم ما يبـونـي
عيني بشوف الزين يا القرم مغراه *** القـلـب والعـينيـن فـيـه ابتـلـونـي
مـاني بخـيـل ولا تـغـالـيـت مشـراه *** أشـريـه مهمـا بالـثـمـن كلـفـونـي
أشكي لأبن عبـار بالصوت وأنخـاه *** تكفـا يا أبـن عبار خابت اظنونـي
مالي غـنـا عـن نخـوتـه لا عدمنـاه *** تكفا بشـورك للصواب أرشدونـي
رايـك سـديـد ولازم أمـشي بمعنـاه *** ما اخـالـفـه لـو لابـتـي عـاتبـونـي
حـيثـك فهيـم ومـن رجـال امسمـاه *** عـنـاز لا ثـار الـدخـن يـذكـرونــي

* وقال عبدالله بن دهيمش بن عبار رداً على مخلد بن سعدون العتيبي : 264

سر يا قلم حضرت لك بوك وأدواه *** أكتب وسجـل من طرايـف لحونـي
رد الجـواب الـلي لـفـانـا وقـرينـاه *** مخلـد شكا من صـد خـله اغبونـي
قـرم العيـال أسـنـد عـليـه بشكـواه *** وجاب الخبر ما وقف العلم دونـي
مخـلـد شكالي من غـرامه وعـزاه *** قـلـبـه يشـابـه يـابسـات الشنـونـي
عـزاه للـمـنعـور مـن كـبـر بـلـواه *** قبله ذريح وقـيس صابـه جنـونـي
يا مخلـد السعدون قصـدك فهمنـاه *** نخيتـني يـا القـرم وأبشـر بعـونـي
ابشر بغالي الروح والمال والجـاه *** وأن ما كـفـا يا مسندي تعـذرونـي
وكانك تريد الشور ما عنـك نكمـاه *** أصبر عسى كل المصاعب تهوني
أوصيك خـلاق الملأ أمش برضـاه *** ومـا دبـر الـمـعـبـود لازم يـكـونـي
وأحذر من الدجال لا تقرب احمـاه *** وأفطن تـرى الغـدار لا بـد يخـوني
عـليـك بالـلي تـبـذل الجـود يمـنـاه *** إلى بـار بالصاحب ردي العـفـوني
والمعـذرة فـي أول الـقـاف وأتـلاه *** وعن القصور وخملتي سامحوني
يتبع