أعز خلق الله
السلام عليكم ورحمة الله وبركاته ..
وأسعد الله أوقاتكم بالهدى والرضا والبركة ..
قصيدة موجّه لشيخنا أبو ثامر
نجل شيخ مشائخ قبيلة عنزة
الشيخ جدعان بن زبن بن محروت بن فهد البيك بن هذال
حفظه الله ورعاه وسدد على دروب الخير خطاه

البيضا تغشى طايل العلم والبوع=شيخنا بن هذال يا مطيب صنيعة
يفداه شيخٍ ما يجي منه منفوع=شجاع بالنكبات ونفسه دنيعة
ويا زبن ليتك حيٍ لو هو اسبوع=وتشوف صيدات الحرار البزيعة
إخوان بتلا والمراجل لكم طوع=سلم الجدود وحافظينه وديعة
والسيف يجلى الحيف ومن هاب مخنوع=والحر ما يقبل لربعه هزيعة
ياعل يفداهم هل الذل وخضوع=أللي رضوا لربوعهم بالخنيعة
وحنا سيوف الحق والحق متبوع=والكذب لأهل الخنا والخديعة
والمسألة ما هي تجارة ومشروع=حظ الفتى لو بالذهب ما يبيعة
والله من قلبٍ من الهم ملقوع=ضيم القرايب وين نشكي وجيعة
ويا ذا الحمام أللي دما القلب مفجوع=إبشر بفزعات ربك سريعة
إحمد هل الطولات والطيب وفزوع=إمطير والعجمان نشكر فزيعة
وشمّر هل الطنيات والعز مشيوع=عز القرايب يا حماة الوسيعة
والخالدي ينخى ولا هو بمردوع=يا ساس جدّي والمنابت ربيعة
وهواجر ريف الخواطر ضواري فدوع=ندري بهم قبل الإذاعة تذيعة
مع الحضر أللي بها الطيب مزروع=متكانفين الطيب سلم وطبيعة
ويا كويتنا حنا هل الطيب وسنوع=الساس واحد والمجاني رفيعة
حنا هل الشومات ومن دونك دروع=ولكويتنا حنا إسوارٍ منيعة
يعيش بيرقنا على العز مرفوع=تفداه وايل والقبايل جميعة
ومن راد درب الحق يبعد عن القوع=ويترك خبيثات الأعمال الوضيعة
وجدعان هو شيخنا وحنا له ربوع=أللي مشى باعرافها والشريعة
ويا زبن ليتك حي ٍ لو هو اسبوع=وتشوف حرارك براس الطليعة

داعين الله العلي القدير بإسمه المكنون المخزون الذي خلق به كل شيء في هذه الأيام الفضيلة المباركة أن يعز العرب والمسلمين ويوحد صفوفهم وينكئ عدوهم ويرزقهم الأمن والأمان ورغد العيش الكريم وأن يعلي بهم كلمته وينصر بهم عباده المستضعفين .

أخي الفاضل ابن دوهان ..
قصيدة جيدة تحمل المعاني الجميلة، والشيخ وفقه الله تشهد له أعماله ومواقفه .