وهذه ابيات مقطع من قصيدة : 68

وجدي على اللي جيبها ينفح الطيب *** الجـادل الـخـود الـفـتـاة الـوسيمـة
الجـادل المجمـول بـيض الـتـلابـيـب *** هيف الخواصر والمناكب ضخيمة
خـدلجـه مـن نـاعـمـات الـرعـابـيـب *** نجـل العيون وعنقهـا عنـق ريمـة
سردا شناح تصوب القـلب تصويـب *** وتنقض معاطيب الجروح القديمه
الزول عـود الحـور بيـن الجراجيـب *** عـدل الـقـوام وقـامتـه مستقـيـمـه
فيهـا الجمال الـلي اوصافه تعاجيـب *** بالحسن تصلـح للعـذارى زعـيمـة
مـا مثـلهـا مـع لابـسـات الـجـلابـيـب *** شمّى عـفيفـة والمنـاسب كـريمـة
حـديـثهـا يـفـتـن عقـول النواصيــب *** دلـت تـهـنـف بالحساس الرخيمـة
شبـت بـقـلبي حـامـيـات اللـواهـيـب *** وش حيلتي ياهل القلوب الرحيمة

* قال عبدالله بن دهيمش بن عـبار هـذه القصيدة في الوجـد : 69

سر يا قـلم سطر عـلى البوك تسطير *** خــط بسـواد الـزاج بـيض الـوراقي
فـاض القريـض وعبّـر الفكـر تعبيـر *** هاضت شجون البال والصدر ضاقي
وباحـت كوامـن خـاطـري بالتفـاكيـر *** والـقـلـب هـايـم بـالـروابـع وشـاقـي
والجوف شبت به سوات المساعـيـر *** تحــرق معـاليـق الضمايـر حـراقـي
الـوجـد تشكيـه الـرجـال المـنـاعـيـر *** لـولا الحـيا لا أصيح وأنخـا رفـاقـي
وأسند على اللي يفهمون الفـوازيـر *** الـلـي مـداركـهـم وسـاع الــنـطـاقـي
قـلب العـنـا ما طاع شاير ولا مشيـر *** يا لـيـت لـو قـلبـي عـن الغـي فـاقـي
وجـدي على اللي حال دونه محاذيـر *** وجـدي عـليـه ولهـفـتي وأشتياقـي
فـر وخفـق لـه خافقـي خفقـت الطيـر *** حبـه تـمكـن فـي صـميـم العـمـاقـي
رسمه تصور لـي مع الطيف تصوير *** وذكرى خـيالـه دوم بـالفـكـر بـاقـي
قـربـه ألـذ مـن الـعـسـل بـالـقـواريـر *** وبعـده كـمـا الجنـزار مـر الـمـذاقـي
قـربـه يـنـوّر مـظـلم الـقـلـب تـنـويـر *** لاشـك بعــده هـو سـبـايـب أرهـاقـي
ليـتـه سـمـح لـي بالنظـر بس تبحيـر *** من خوف عن وصله يطول الفراقي
وأن كان صـد لـداعـي الهجـر تبريـر *** يــدرى كلام أهـل الحسـد والنفـاقـي
ضـاع الأمـل بـه مـا لقـوه المـداويـر *** وعـزي لمن عـن شف بالـه أيعاقـي
مـا عـاد لـي فـي واقـع الأمـر تدبيـر *** والصبـر لـو طال المدى لـه أقـناقـي
كيـف الـوسيلـة كـان صـدوا مـدابيـر *** مـقـفيـن والمقـفي صعيـب اللحاقـي
وش عـاد مـا نـقـدر نجيهـم مساييـر *** نــمـر ديـرتـهــم مـرور الــطـراقــي
لـو كـان قـربـه يـنشـرى بـالـدنانـيـر *** لأشـريـه لـو زاد الـمـهـر والسياقـي
عسى يجيبه موهـب الفضل والخيـر *** رب الـعــبـاد الـلـي تـكـفـل أرزاقـــي
هـو مطلبي مـن بـد هنـف الغـنـاديـر *** لـو حـسنهن مثـل الحواري أرقاقـي
سـود الجـدايـل نـاقـضات الـدعـاثيـر *** صخـاف الوسوط وناسعات العناقـي
لـون الشفـايـف لـون ورد المزاهيـر *** وخـدود خـالـط مـع حـمـاره شفاقـي
هـو مطلبي هـو غايتي بس لا غـيـر *** ولـو درت غـيـره بالعـرب كان لاقـي
هـو مطلبي مـن لابسـات الـتـنـانـيـر *** متخـيـره مـن جملـت البيـض نـاقـي
أغـليـه ولـه عـنـدي معـزه وتـقـديـر *** وفـي عـرش قلبي ناعم العود راقي
مـا سـار بـدروب الـدنس والمعاييـر *** ولا ظــن بـه ظـن الـردا كـل هـاقــي

وقال عبدالله بن دهيمش بن عبار هذه الأبيات في الوجد : 70

حاولـت أبـدد ضيقت البـال بالقـيـل *** نظمه جلا غيض القلوب الحـزينـه
اسمر وأسامر سامـر النجـم بالليـل *** والـلي تـولع ما غشى النوم عينـه
باح الكنين من الطنا والصبر عيـل *** والقـلـب مـن وجـده تبـيّـح كـنـينـه
قـلـب المـولـع ما يـطيـع العـواذيـل *** هـام وغـرام الشـوق زاود حـنينـه
عـلى ولـيـفـه قـام يـعـول تـعـاويـل *** يشـوم بالغـالي عسى الـلـه يعـينـه
شـف الضـميـر مسامـره بالتعاليـل *** يا سعـد حـظ الـلي يسامـر خـديـنـه
لـي صاحـب يحبـه القـلـب بالحـيـل *** ودي لـو تـصافـح يـمـيـني يـمـينـه
يطـري عـلي اليـا لمحـت المعاميـل *** بالمجلس الـلي بـه وقـار وسكينـه
ويطري عليه حين سوق الفناجيـل *** وأشوف لـه مـع خنـت البـن عينـه
ويطري علي اليا نفح ريحة الهيـل *** هو صاحبي يا أهـل القلب الفطينـه
هـو حضوتي مـا ابـدلـه بالتبـاديـل *** غـلاه خـلا الـقـلـب عـنـده رهـيـنـه
هـو مطلبي من لابسات الخلاخيـل *** مـن بـد سكـان الـقـرى والـمـديـنـه
مـا هـام قـلبي بالحسان الغـراميـل *** لـو عـرضت لي كـل عـفـرا حسينه
مـا أريـد غيـره لا وخـلاق جبريـل *** حـيثـه كـمـل عقلـه وخـلقـه وديـنـه
جنيت مـن لامـا عشيري محاصيل *** هـو راس مـالـي والكـنـوز الثمينـه
يسوى من لكـوك السبايـك مثاقيـل *** الجـوهـر المكنـون وسط الخـزينـه
معدن جواهـر ما يصدي اليا شيـل *** يوضع على صدور الرعابيب زينه
رصيدي وكنزي عـريب الأخاويـل *** الـلي شبكـتـه بـالـعـقـود الـمـتـيـنـه
مجناه من صيـد الرجال المشاكيل *** مـن ساس لابـه يحتمون الضعينـه
عسى المزون الـلي تهـل الهماليـل *** دار الغـضي تسقي نفـوده وطـينـه
اطلب يا عـل ديـارهم يدهجه سيـل *** وتـزهـر خمايـل تـلعـتـه مع بطينـه

من شعر عبدالله بن دهيمش بن عبّار هذه الأبيات : 71

لا نويت أكتب قصايـد لـي أنـقـادن *** القـريـحـة بالطلـب مـا تـفشلني
أنـظـم بيوتن أفكاري بـهـن جـادن *** عنـد من يقـرأ القوافي اتجملني
لا دلهت هجوس الأفكار لي نـادن *** الـروابـع والهـواجيس تشغـلني
الأمـانـي والـتــواجـيـد مـا فــادن *** لـو صبرت ظروف الأيام تبحلني
من يشد اوتار الأعصاب لـو بادن *** كـان قـيـدنـي زمـانـي وكـبـّلـنـي
الزمن ما اظـن يعـفي ولا ايهادن *** نـوب يرضيني ونوبات يزعـلـني
ليت عندي طايـره مثـل أبـن لادن *** لا نويت بظـرف ساعة توصلني
أبي أزور اللي أشواقي له أزدادن *** مـنوتي لـو كـان دايـم مقـابـلـني
كـان لحظـات السعادة لـنـا عـادن *** هـمسه بغـلس الـديـاجي يعـللني
يا شبيه الـلي تلفّت عـلى الشادن *** لوسمحت أقر الرسايل وراسلني
عادتي ما أنكـر صحيبي ولا خادن *** من يـبـور بـواجـبي وايتجاهـلني
الحـرار الـلي يصيدن ولا يصادن *** شبكهن ضمن الغـرانيق هـولـني
دام شـمـاخ الشواهيـق مـا مـادن *** عـن لـواهـيـب السمـايـم أتظللني