يامرخص الذمه وبايع ضميرك - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

07-19-2010, 02:34 PM

أقتباس أبيات النويبعي
يامرخـص الـذمـه وبايع ضميـرك *** افـطن تـرى سـب الاجاويد بـه عـيـب
اوليـه يالمسكين تـنسى مـصيـرك *** ونـسيــت يــوم مـا تـفــيـد الاكــاذيـــب
تـزعـل ولـد عمك وتزعل قصيرك *** خل الردى ولاانت بوكيل على الطـيـب
يصيـد لـك مـع الصقـاقير طـيـرك *** وتبعدك عن بعض العرب ركبت الجيب
والا مـعـه حـذرا تحـطه شويـرك *** وحــذرا تتخـاوي شـاذبـيـن العـراقـيـب
وترى البطيني لو يشرع بخيرك *** يغـدي كـما بـسٍ حـوالـي الـقـصاصيـب
اليا صار عنـدك شي دايم يديـرك *** وان كـان ما من شي عـن دارك يغـيب
وما كل من لك طاب طيب لغيـرك *** والبـدو قـالـوا السالـفـه تحضر وتغيب
وبعض العرب يكفي برايه ينيرك *** وعـنوانهـا يعـلـمـك وش بالمكـاتـيـب

أبيات مجاراه من نظم عبدالله بن عبّار
يـا نـويـبـعـي يـا عــل ربـي يـجـيـــرك *** أنا أشهـد أن يالوايـلي هرجك مصيب
أن كـنـت تـاجـر ترجي النـاس ميـرك *** تلقـا البشر يا نـويبعي حـولـك اتـليـب
الـكـل مـنـهـم وده أنــه عـشـيـــــــرك *** تصيـر شيـخ ويـكـثـرون الأصـاحـيـب
أن كـثـر مالـك صـار كـلـن سـميـرك *** تسمـع طـرايـف بالـعـلـوم التعـاجيـب
وأن انـفـقـرت الـكـل جـنـّب مـسيـرك *** ولا سلموا لـو ينطحونك مـع السيـب
يا مسنـدي وضـع الـبشـر لا يـضيـرك *** اصبر ترى أمور الزمن له حـراديب
شعـرك بـجـزلات النـصايـح سفـيـرك *** تبي البشر تـاخـذ عن العـيب تجنيـب
يـا زيـن فتي لـفـظ الكـلام اتـعـبـيـرك *** وأنـت الـذي تطـرق جميع الأساليـب
عدلت عـن عـوج الطـرايق مسيـرك *** ولالي عـلى ما ماقلت يالقـرم تعـقـيـب