الله من قلب(ن) كفخ كنه الطير*
من راس عيطان(ن) رفيع(ن) لواها


شاف الحباري مقفيات ومدابير*
حزة غروب الشمس قبل مساها


ورفرف جناحه ظاري(ن) للمغاوير*
خلفه فروخ(ن) ما تهيأ عشاها


أشقر قطامي ما شبكوه الصقاقير*
مخالبه دمث الثنادي فراها


متفهق الجنحان عوق المخامير*
وأقشر عليه(ن) يا أعتلا(ن) في سماها


إليا صفقها راح ريشه بعاثير*
مخالبه ورى اللحم في شواها


وقلبي مثل رفه لكن السبب غير*
مقاصده عجزت لا ألحق مداها


شفه بزوعات السلف والمظاهير*
ونجوع بدو(ن) راح وقت(ن) حواها


يا طل نجم سهيل عقب المحاظير*
وكل(ن) يريد الديره اللي رباها


ورودم من المنشى سحاب التباشير*
وشعاع نور الشمس عنى غطاها


بعد العصر قطب سحابه بتحجير*
وديم مطرها وإحتكم من إعشاها


وياما أصبحت هملولها له شخاتير*
حقوق تملئ دحالها مع صفاها


ويا خيلوها صادقين المحازير*
وقالوا على نيال ربي رماها


وضفت على الخنفه وكتت حوادير*
حتى الردايف والمحفر ملاها


تلعج وتبرق مظلمه رعدها يزير*
وتموج بغصون الشجر من هواها


وبعد شهر زان الدحل بالنواوير*
والارض طلع نبتها من دفاها



وأهل الدبش بدوا برأي ومشاوير*
كل(ن) يريد إبله تحصل مناها


والهرش حاضنه بكار(ن) معاشير*
الهرش هايج والقطيع يحداها


وتمشي ورى الراعي بكار(ن) مخادير*
لو تنفدي بالروح روحه فداها


ودنوا لعفش البيت زمل(ن) خواوير*
قبل طلوع الشمس تسمع رغاها


وحث(ن) عليه(ن) مترفات الغنادير*
غيد(ن) وكل(ن) توها في صباها


هيف الخصور ونابيات المحاصير*
عنوق الخشوف اللي ربت في فلاها


النافعات قليلات المسايير*
والكل منه(ن) تعتني بقصراها


وزاعت مع الألغاف شقح ومغاتير*
والضعن يمشي خلفها وإتلاها


مع دربها تسمع رزيم المصاغير*
وتسمع مدرهش للحوير دعاها


وتسمع حنين حوير(ن) يتبع الضير*
تشله(ن) شقحاء طوال(ن) إخطاها


تلعاء رقبه حنفاء خشم شكلها ظهير*
شقحاء مغاتير(ن) سواد بقراها


وتسمع رهيم مسابقات الأعاصير*
غر النواصي رابح(ن) من قناها


الصافنات مثورات المعاصير*
شقر الخيول اللي السعد في نحاها


ذاك الطرب ماهو بدق المزامير*
وناس(ن) لغير الله تعلن ولاها


وذي منوتي ما دامني حي وأسير*
ولا الليالي ما تبين خفاها


وذا قول من ضاقت عليه التدابير*
وصاغ البيوت اللي بشعره بداها


وجاب الحطب ودنا طوال المناقير*
بيض(ن) تونس من تربع قفاها


وكلف غلام(ن) من سلالة مناعير*
النار شعلل نورها في غضاها


فسر عن عضودك وحط المقادير*
ثم خل حمستها على قد ماها


وإحمس على الجمر وخل الدوافير*
ما دام جمر النار يوقد سناها


ولا تنشغل عن حمسها بالتفاكير*
خلك محاضيها وفكر معاها


ويالونت شقراء مثل مهرة الزير*
صبه على المبرد وطير شذاها


ثم دقها بنجر(ن) يجيب الخطاطير*
ونعم بدقتها وخفف إملاها


ثم إغلها على الجمر غلي تصهير*
ثم إجذها تصفي ومسح جباها


ثم دق من الهيل الخضر والمسامير*
والزعفران اللي يزهي حلاها


وتصير تقل خضاب بإم الدواوير*
بيض الكفوف اللي كثير(ن) حياها


وسله على هيله تفوح التعابير*
ينعشك ريحة فوحها مع غلاها


ثم إغلها بالنار من عقب تبهير*
ثم إصفها بالثانيه من وراها


وحط القدوع ودسمه للمشاهير*
بسمن(ن) إعرابي تستحقه لحاها


ثم صبها لأهل الوجيه المسافير*
اللي نهار الضيق يذري ذراها


اللي بهم هده ومده وتدبير*
للمعضلات اللي صعيب إلتواها


جحول الرجال اللي بها يوجد الخير*
خفاف النفوس اللي قليل(ن) خطاها


اللي بهم في عسر الأيام تيسير*
شخوص الرجال اللي خفيف(ن) نباها


للي نصاهم ما بدوا بالمعاذير*
فرحت حجاج اللي بحاجه نصاها


فهود(ن) تسرك بالليالي المعاسير*
لأبعد موارد ما يقصر رشاها


وإذبح كباش(ن) من أعراض الفقاقير*
وأهل الكرم حذرى تنقص إقراها


وإترك عفون(ن) يجمعون الدنانير*
هم أغنياء وكبودهم في ضماها


لا تصطحبهم لعن أبو هالدناقير*
رافق رجال(ن) عالي(ن) مستواها


من عاشر الأنذال يطيح بالبير*
ويلَبس السوداء وهو ما أكتساها


في عشرة الأنذال عار ومعايير*
ولو تبتعد عنها يعمك بلاها


والعلم واضح للذكي دون تفسير*
كل(ن) تقدم له ثمرة(ن) جناها


قرب الردي شبه على نافخ الكير*
والمهنه القشره زهته وزهاها


وترى الردي كوبان ذليل وحقير*
له لحيت(ن) ما تنحشم من رداها


عن اللوازم دايم(ن) فيه تقصير*
نفسه على حقوقه قليل(ن) وفاها


عليك باللي ما يهاب المخاسير*
الطيبه بأغلى ثمنها شراها


سفر الحجاج الهيلعي دامر المير*
لا قال كلمه بالوقوف يحماها


يرفع صديقه يا وقع بالعواثير*
وإليا أظلمت دنياك نوره إجلاها


واليوم جاء بالوقت غيره وتغيير*
بعض المراجل كفنت في رداها


راحوا أهلها والسفر والمسافير*
ونجومها غابت وكل(ن) نفاها


ويالله يا مدبر بحسن التدابير*
تعين رجل(ن) شيمته ما رماها


ويشوف من وقته مذله وتقصير*
ودنياه عيا ينعدل منحناها .



الشاعر/ محمد معتق اليمني العنزي