تابع
*- مقاطع من شعر الشاعر عايد بن ضافي بن جلوي رحمه الله :
كـريـم يـا بـرقـاً سـحـابـه مـخـيـّـل *** يضوي من المنشا مـزونـه مـقابيـل
عسى مصبـه فـوق راس الشليـل *** يسقي القـلات الـلي بوسط الغـراميل
وحلوان مع لغف الطرايف مسيل *** منـزل عـرب مشعـان هـم والعباهيل
مـريـت حـروة دارهـم واتـخـيـــل *** زوعـت ظعنهم يـوم دور المراحـيـل
ما شفـت نـزل بـيـوتـهـم واتـويـل *** بـس الهـوادي والمـنـازل مسـاميـل
وفيض عـلى منـدا قـليب الـرحيـل *** وبطن الخرم والخنذوه ضفه السيل
وقال عايد من قصيدة أخرى :
كـريـم يـا بـرق الحيـا يـوم نـاضـي *** بـرقـاً نخـيـلـه يـم ابا الهيـل وشبيح
مـزنـنً تـحـدر للحـفـر والـريـاضي *** مـا خـلـت برقه لو مزونـه مـراويح
ان سـال واسقى يابسات الاراضي *** وادالدواسر فاض سيله على السيح
خـلا سـكـان الـقـرايـا فـضـاضـــي *** قـدّ الحـزوم وطـفـح الـقـاع تطـفيـح
وقال في أحد الرجال من قصيده :
يافلان يابن فـلان ظـنيت بـك ظـن *** واطـلـب عساهـا مـا تخيب الظنوني
يابن الذي عـن المواجيب مـا كـن *** جــزام عـنــده كـل صـعـبـاً يـهـونـي
أنـا نصيـتـك يـوم رجـلي عـجـزن *** وعجزت لا الحق بشت ثوبي متوني
كلـن شـرا يـوم الاراضي يـبـاعـن *** وانـا أتحـرى بالسنه صـرف شـوني
نبي مساحه ارض نـبـني ونسكن *** بـلشت بمسكـن عـيلـتي وابـلشـونـي
حنا عقب مشعان نشره على من *** كـحـيـلان لـو انـه فـقـيـد الـعـيـونـــي
قــل تــم يـا هـداج تـيـمـا تـبـيــنّ *** خـل الـجـمـاعـه كـلـهـم يـشـهـدونــي
جتك المثايل واتلا الاخبار ماجـنّ *** بـالـلـي لـيـا لـحـق الـطـلـب ينزلونـي
تـلافتـن شقـح العشايـر وفـرحـن *** وتـطـابـحـوا قـدامـهـن يـنـتـخـونـــي
وحوارهن جاه الفرج عقب ماحنّ *** بملـكـاد جـمـع موسعـيـن الطـعـونـي
وهذه قصيدة للشاعر عايد بن ضافي الجلوي رحمه الله يسند على ابن جهاد من شيوخ السلمات من ولد سليمان من عنزة بهجرة المضاويح :
يالـلـى نقلت العـام جـرف الـوعـيـره *** ليتـك ياخـو ربـدا نقـلت المضاويح
حيث ان عندك زود عرف وبصيـره *** وعـنـدك لبـيبـان السيـاسـه مفاتيح
وسـيع بال ولا انـت ضيـق حصيـره *** هـداج يانشفت سـراب الضحاضيح
وأبـوك مـاشـاهـد قـنـاة الـجـزيـــره *** غـيـر الـركـاب الـلي عـليهـا لواليح
جـهـاد جـاهـد بـالـسـنـيـن المـريـره *** وطـرد عـن الـديرة رجالن زحازيح
مـا عـنـده الـلي يا جلـس يستشيـره *** غـيـر المـراكـي والـدلال المـدابـيح
وشـلون اثـنـيـن وكـل واحـد بـديـره *** وأنـتـم سـلايـل مبعـديـن المصابيح
صـيـروا جميع ولمـت الشمل خـيـره *** الـراي واحـد يالـوجـيـه المفـالـيح
أغـد الـفـرج و الـعـز يـأتـي بـشـيـره *** ويرجع لكم دور العطاوي شليويح
صـيرو من الـزبـنـه شمـال الحفيـره *** مـنـهـا شـمـال وقـربـوا للمسـاريح
مسجـد جمـاعه مـا يـوصـف بـغيـره *** والـيـا دخـلـتـه بـه تـلاوة وتسبـيح
ومـطـوعـاً شـلان ثـوبـه قـصـيــــره *** يقـراء بـكـم عقب الأخير التراويح
والـبـدو مـا يـحـيـون بـالـزرع ديـره *** يحـيـون كـثـان الصـفـا بالمـزالـيح
الـيـا اصبـحــوا كـلاً تـولـج بـعــيـره *** ونسيوا معارف حضرهم والفلاليح
هـذاك يـومـي نـاطـحـيـنـه حـضيـره *** وهـذاك جـولـه من بسيطا سماميح
يا جيـت جـابـوا لأول الـوقـت سـيره *** ذكـرى سـنـة مـربـاعهـم بالمليليح
وقال عايد بن ضافي بن جلوي رحمه الله :
نـظـم القـوافي صميـم القـلـب هـيـضهـن *** مـن راس تلـن تهـايـف صـوب ريعـاني
واشوف قورن سراب القيض ينهضهـن *** مـن دونهـن يـوم يـزمي تـقل غـدرانـي
جـاوبـت ذيـبـا بـصـوتـه مـا يـريـضـهـن *** عـوا عـلـى عـقـلتـن مـن بـيـن جيـلانـي
ذيـبـا رقــى بـالـعـوالـي ثــم فـيـضـهــن *** أقـبـل عـلـيـه الـمسـا مـا شـاف زيـلانـي
راحـت عـلـيـنـا سنيـن مـا ينـتعـوضهـن *** لـو جـا عـقـب وقـتهـن سيلا ورجعـانـي
مـا غـيـر ذكـرا هـك الايـام حـافـضـهـن *** ذكـرى زمـانـن عـزيـتـه يـوم خـــلانـي
والبيـض الـلي سهرنـا من غمايضهن *** صـارن عـجـايـز وحـنـا اليـوم شيباني
***