الصدر ضاق وقام فكري يهوضي
وبديت حسب ما أعرفه بأعتراضي
ودليت أنا من فيض نبع يفوضي
شط الفراة بداخل الصدر فاضي
حيث البحر بالوُرد ما قيل قاضي
بإذن الولي خلاق خمس الفروضي
الواحد اللي في عباده يقاضي
القلب من هرج الحواسد يجوضي
وفصحة ما كنيت والفكر هاضي
ناس ٍ على عرض المقفي تخوضي
بين الأحبه يرثون الأبغاضي
الناس فيهم (يادخيل)مغموضي
لهم مقاصيد ٍ بشضف الشضاضي
لاطيع هرجة مبغضين الحضوضي
أهل وجيه ً مايغشاها البياضي
الواحد يمرى في كثير ألفوضي
من شان يقضي حاجته والمقاضي
وليا بغيته في لوازمك جاضي
أسأل مجرب وأنت فكرك يعوضي
قرم ٍ صميدع ماضي لك مواضي
عن المراجل ماأنت رجل غضوضي
تبذل جهودك يوم يبس اللحاضي
خاويتكم وأعرفك حوض ٍ وروضي
عشرة سنين ٍ حافظينه حفاضي
عساك عن جور الدهور محفوضي
في جاه محيي مرمسات النقاضي
يا أبن هشال أعطيك راي معروضي
وكل ٍ بعرفه يافتى الجود راضي
على النبي أعداد نبت الفياضي