( عاشوا الرجال الأوفياء وأخص بالشكر جميع قبيلة عنزه وأقول عفيه ربعي وعزوتي عفيه حمران النواضر عفيه بواجت الديار عفيه شرّابة المغر عفيه الفدعان )

في هذه الليله عقد رجال من قبيلة عنزة في مدينة حفر الباطن اجتماع استجابه لنداء السجين ممدوح بن علي الطلوحي وتبرّع الرجل الفاضل المقدّم طيار متقاعد رجل الأعمال المعروف سعود بن شحاذه المهيدي الفدعاني بمبلغ مليون ريال وتبرّع الرجل الفاضل ذياب بن خشان المهيدي الفدعاني في مبلغ ستمائة ألف ريال وتبرّع الرجل الفاضل فيصل بن فياض بن نامي الغبيني الفدعاني بمبلغ مئتا ألف ريال وتبرّع الشيخ ثامر بن جزاع الهذال بمبلغ مائة ألف ريال كما تبرّع الرجل الفاضل عايد الرثعان الدهمشي بمبلغ مائة ألف ريال وتبرّع الرجل الفاضل خالد بن زيد الرويضان القماصي بمبلغ مائة ألف وتبرّع عدد من الذين حضروا الأجتماع وقد بشّرت أن المبلغ المتبقي قد كمل نسأل الله أن يجعل ما تبرعوا به في موازين أعمالهم وأجرهم على الله ولهم الشكر من كل عنزي وهذه مقاطع مما قلت في مدح قبيله الفدعان من قصائدي القديمه :



وهذا مقطع من قصيدة قديمة قلتها بأحد المناسبات :
مـن لابـة يـأمـن بـهـم كـل خـايــف ***والـنعـم حمـران النـواظـر فـداعين
تشهـد لهـم بالطيـب كـل الطوايـف *** فـرسان بالهيجـاء سطام المعاديـن
اهـل العـلوم المسملات الطـرايـف *** مضرب مثل بالطيب والناس دارين
تاريخهـم مـا ينحصي بالصحـايـف *** مبطي عـلى خمس الفضايل معيين
أولهـن الـلـي بالسنين الـعـجـايـف ***الصوت لبن مهيـد يوم الزمن شين
والثـانـيـة يـوم العـطـايـا عـذايـف *** جـزل العـطيـه سنهـا خـلـفـة غبيـن
والثـالثـة عـن عايـزات الحسايف ***صغيـرهـم شـرب المغـر بالـدياويـن
والـرابعـة يثـنـون دون العـطايـف *** الـروم مكـديـن الـعــدا بـالـمـيـاديـن
والخـامسة بـوج الديـار المهايـف *** فـي كـل ديـرة يدلجـون المضاعيـن
يـوم الغـزاه ويـوم عصر النكايـف *** نـالـوا فخـرهـم بالحسام أبو حـدين
فـوق النجايـب موميـات السفايـف *** فـي كـل يـوم لـدارالأضـداد غـازين
قـبـل المـرازق تنحصر بالوضايـف *** داجوا بـدارالكرد وارض السلاطين
من بشر ابـن عـنـاز ماهـم لفايـف *** مـن نسل وايـل بالمناسب عـريبين
هـذا الوكـاد ولا نـبـي مجـد زايـف *** ما قـلـت تمجيـدي هـقاوي وتخمين
والمدح مايزها العـفـون الهـدايـف *** يستاهـل التمجيد من يفعـل الـزيـن
وقـلت هذا المقطع من قصيدة أخرى لها مناسبة
هيضني الـلي قـال بالـربـع الأدنـيـن *** منـطـوق قـولـه للحقـايـق أيـنـافـي
وأظـن مـا يـقبـل عـلى ربعـه الشين ***ألا النبيـت الـلي مـن الأصـل هافـي
يا اللي تقـول القول هقـوه وتخميـن ***أسـمع كلامـي وأفـهـمـه يالسنافـي
وأن كـان مـا تـدري بفعـل الفداعين ***أنشد وأنا أبي أخبرك عن كل خافي
حمـر النواطـر لـو نشدت المعـادين *** عـدوا جـميـع أفعـالهـم بـأعـتـرافـي
حمـر النواظر يـوم خوض الميادين *** والـريـق نـاشـف مـا يـبـل الأشافـي
حمـر النـواطـر بـالملاقـا ضريـريـن *** فـوق الـنجـايـب يقـطعـون الفيافـي
حمـر النـواظـر مـقحـميـن الأكاويـن *** ضد المعادي يـوم ضـرب الشلافـي
حمـر النـواظـر مـن قـديـم أمسميـن ***في ما مضى واليوم دورك عوافـي
ومن قصيدة أخرى قلت أيضاً :
لـي لابــة يـوم الــنـقـا كــان مـردود *** يشهـد لهـم تاريخهـم عبـر الأجيـال
يـوم الوغـى كـان أرتدوا درع دايود *** والخيـل تلكد والنضى تهـذل أهـذال
أفـعـال حمـران النواظر لهـا شهـود *** أرداهـم الـلـي لـغـالـي الـروح بــذال
فدعان من فضل الولي صافق النود *** الـشـاهـد الـلـه مـا بـهـم قـول قـوال
فـدعان وأن صالوا طوابير وحشود *** صابـورهم يـزمي مثـل نايف الجـال
فدعان لا ركبـوا على الخيل والقـود *** يـا مـا رمـوا بالكون فـارس وخيـال
ولو أبـي أفندهم عـلى جموع وفنود *** وأذكـر فعـايلهـم جـديـدات وأسـمـال
ستـة عشر لابـة تسلسل من أجـدود *** والـكـل مـنهـم زاكـي الـجـد والخـال
منا المهيد أهل الصخى ماكر الجـود *** ومناالغبين اللي تضرب بهم الأمثال
وضنا عربان وضنا مـزرع وملحود *** ومـكـاثـرة ضـد العـدا يـوم الأهـوال
وجــدعــة والـعــواد لـلخـصـم لادود *** والـروس بالهـيـه يضدون الأبطـال
والشميـلات مـزبـنـت كـل مـضـهـود *** كشـور وعيال الجذع مثـل الأشبـال
وأولاد سيف عيال منصب ومسعـود *** عـاداتـهـم ردع المعـادي الـيـا عـال
والميـّس الـلي كنهـم شامـخ الـطـود *** رجـالـهــم عــنـده حـمــيـه وزعــّال
والهضبي الشجعــان حمـايـة الـذود *** يـوم الـمـلاقـى وأحـمـر الـدم شـلال
وسـلايـل سـليـمـان كسـابـت الـفـود *** ضحـوه لا شـان اللغـى تحمي الـذال
وعـيال خلـف فعـلهـم صـدق ماكـود *** غـضيـور وقـلفـان ذربـيـن الأفـعـال
وهـل القـويـداء لابتي صفـوة العـود *** الحنـاتيش أهـل الفضايـل والأنـفـال
ولا أقـول عن فعـل القبايل بهـم زود *** عنـدك خبـر ما يحقـر الناس رجـال
ربعـك عضودك والذي ماله اعضود *** لابـد تـطـمـع بــه هـلابـيـج الأنــذال
بهـم أعتزيت ولا عن اللاش منشود *** ومن لا اعتزا بربعه فلا يفيده المال
قـلته وحاضر عصرنا سهود ومهود *** بسط وعـدال ولا بهـا اليـوم غربال
زال الـزمان الـلي بـه الكـيـد والكـود *** العصر اللي من هوله الراس ينثال
وقلت هذا المقطع من قصيدة طويله :
لابتي نسل مفدع ما بهم عرق هـافي *** بالمنـاسب صليبة من اعزاز القبايـل
يوم كانت للأيـدي نالـوا الحـق وافي *** يـوم عصر الحرايب هابهم كل عايـل
مجدهم نفتخر به يوم طعـن الشلافي *** يـوم خوض المعامع واقتحام الدبايل
حقهـم يـدركونه بالسيوف الـرهافي *** يجلـبـون الغوالي فوق سرد السلايـل
يـلكـدون السبـايـا مـقـبلات ومقـافي *** وينطحـون السرايا واحمر الدم سايل
وزادهـم يبـذلـونه بالسنين العجـافي *** في جـفـان الصياني مثـل تـل النثايـل
يدخلون الدخيل ويحتمـون الضعافي *** ويلتقـون الهواشل يـوم شح المكايـل
يذبحـون الردوم ويذبحـون الهرافي *** ويذبحـون المدرع في حـدودالصقايل
يوم عصرالظلام ومشعل النورطافي *** يقحمـون العـنيد ويـرملـون الحـلايـل
فعلهم له شواهد ماعلى الناس خافي *** مـن قديم العصور وفعلهم لـه دلايـل
بالفخر منزلتهم فوق روس الشعافي *** مـن سلايل عبيـد ومن صناديد وايـل

ولا تهون جميع قبائل عنزه