ملاحظة الوائلية التي وردت في آخر بيت من القصيدة الموجهه لي وبها دعوة احتفال المقصود بها قصر الوائلية مضيف الشيخ حسين بن على الطويلعي حيث دعيت بها من قبل رجال عنزة الأوفياء لكي يعمل لي حفلة بمناسبة نجاتي من الحادث ومع شكري الجزيل للداعين فأنني أعتذر في الوقت الحاضر وقصر الوائلية هو الذي قلت به من قصيدة :
كـن قـصـر الـوايـلـيـه ضلـع ســاق *** شـيـده لـلـمـرجـلـه جـعـلـه يـعـيش
حـيـن مـا تـلـفـي تـلـفـظ بـالـطـلاق *** وعـلـق العـيتـا عـلى شنكار شيـش
يـلـتـقـي ضيـفـه بلهـفـه وأشـتيـاق *** عـادتـه حـط الهـرافـي فـوق عـيش
لا تــرده خـاطــره لـلـطيــب تـــاق *** يفتكـر فـي قـول محـدى والخـميش
الـصـخـى بـالـوايـلي مـالـه اقـنـاق *** حيـث نبـع الجـود مـن كـفـه يجيش
والمـراجـل دربهـا يـا حسين شـاق *** ما فـرق فيها النحيـف من اللشيش
ولا صبر يا حسين من جلده ارقـاق *** والـليـالـي فـرقـت بـنـي الـحـريـش
بالبشر يا حسين من يشكي الغراق *** وبالبشر يا حسين من كبـده عطيش
فـيـه مـن صـّدر مـن النعمـة ومـاق *** وفيهـم اللي ما حصل لـه سندويش
وإسندت على أبو علي هذه القصيدة :
يا راكـب الـلي يـوم تـنظـر لميـصـه *** مثـل الجواهـر لـون بديـه وشاصه
جيـبٍ اليـا شغـّل تـقـل بـه رعيـصـه *** واليا انطلق بالقار مثـل الرصاصه
ما بيـن سعـد وبين رمـلـة خـريصه *** يا زيـن مع هـاك الطريق ارتقاصه
سار الفجر والنور يومض بصيصه *** لحسين بـالـدمـام وجهـت منـاصـه
في مجلسه تلـقـا ونـاسه وهـيـصـه *** مجلس شـرف مـابـه كلام للواصـه
أبـو عـلـي حـرٍ يـشـبـب قـنـيــصــه *** وكـره رفـيـع ولا يـطـب القـفـاصـه
نـفسه بجـزلات المـراجـل بخيـصـه *** وصنع الجمايل مهنته واختصاصه
رجلـه عـلى رقي المعالي حـريصـه *** يـوم الـردي عنهـا سريعٍ محاصـه
يـعـبـا لحـل الـمعـضلات العـويـصـه *** عون الرفيق الياشكا من خصاصه
نـزه الشوارب مـا تـدنس قـمـيصـه *** ولا صـار عرضه تقل منديل ماصه
شام وشمخ عـن العـلـوم الرخيصه *** ولا يقـترب من كـل عيـب ونقاصـه
عسى الـولـي يكـفيـه شـر النقيصـه *** حيثه عـلى المجـد التليد احتراصه
هـو محزمي عنـد أرتعـاد الفريصه *** والرجل تعرف سيرته من اخلاصه
ولا الـردي لـو هـو سـلايـل قبـيصه *** تـاريخ ربعـه مـا يهـمـه اقصاصـه
عفن اللغى يا حسين عـقلـه مليصه *** مشغـول فكره مـع سبيته وهاصـه
الـلاش مثـل الـداب يعطـب قـريصه *** عـن سـم نـابـه مـا تـفيـد القراصـه
هـذا زمـانٍ تـّرك الـهـدر حـيـصـــه *** خـارت قـواه ولا بعـظمـه مصاصـه
والـلي تميّـز لهجتـه مـن وصيصـه *** كـلـن يـقـول الـيـوم دنـّق وقـاصــه
دنيـاك يا مشكـاي صـارت خبيصـه *** يقـولـه الـلي غـبت المـوج غـاصـه
وعند الولي رزق الطيور الخميصه *** تـمسي زواحنهـا سوات القـلاصـه
ومن قصيدة تبلغ مائة بيت ضمن مساجلة بيني وبين الشيخ حسين هذا المقطع :
بـديـت أفكر وين صوب الهدف وين *** لكن نـويت أسند على ذرب الأفعـال
أسندت منظوم القوافي عـلى حسين *** نسـل الحمايـل زاكي الـجـد والخـال
الـوائـلي يـفـهـم جـميـع المـضامـين *** والقصـد ما يخـفـاه لـو ربـع مثقـال
أبــو عـلي لـه حـق نـأتـيـه عـانـيـن *** حيثه من أصحاب الفضائل والأنفال
وحنا على عرف المصّيت حريصين *** نشفـق على الطيّـب إلى جابنا الفال
صيته مـع الأجـناب والـربع الأدنيـن *** نسـمع عـلومه بالفخـر كلهـا جـزال
عـنه الـرفـاقـة والأجـانـيب راضيـن *** تسلم يمينـه شـوق منقوض الأقـذال
رام العـلاء مـا طمن الراس تطمين *** شـامت به العـليا على المنزل العـال
قـرم العـيـال اللـي لطيـبـه بـراهـيـن *** لـلعــز والـطـولات والمـرجـلـه نــال
يتبع سلوم الي على الطيب ماشيـن *** حيث ا لرداماله على حسين مدخال
ما حـاد عـن سلم العـرب والقوانيـن *** ولا عوقه عن واجبه كثـر الأشغـال
عـز الرفيق وريف من جـوه ناصين *** دايـم مـضيـفـه للشغـامـيـم مـدهــال
من عـرفـتي لـه مـدة أعـوام وسنين *** ما مـل ممدوح السجايـا والأخصـال
يلقى الهواشـل مسفهـل الحجـاجيـن *** ما هـو مـن اللـي ناظره كـنه عـقـال
يـنطـح قـبـال مسيـره بـالنبـا الزيـن *** بالقـدر والحشمة وحسن الإستقبـال
وإلى لفـوه اللي عـلى البن شفـقيـن *** قـلـّط لـهـم مـن رايـب الهيـل فنجـال
وحيلٍ تغّرس في شحمهـا السكاكين *** يـفــرح بـغــالـي سـومـهــا كـل دّلال
شــاد وشـمـخ بـالـوائـلـيـة ديـاويـن *** يـجـذبـك ديـوانـه مثـل نايـف الجـال
بـيتـه مـلـم الأصدقــاء والـمـوالـيـن *** مـا صـك بـابـه دون ربعـه بـالأقفـال
تـلقـى مشـاكيـل الـقـروم الحشيمين *** بالمجلس الـلي جلسته تشرح البال
بيت الشرف ضم الرجال الشريفيـن *** بـيـت الـفخـر ما فـيه لجة ولا جـدال
بيت الصخى بيت الرجال العزيزيــن *** بيـت اللنـقـا ضلـه للأجـواد مـقـيـال
نـفخـر بنسل عـطيـل شـم العـرانيـن *** الـلي فخرهـم صار مضـرب للأمثال
موروث من عقب الجدود القـديميـن *** مبطي مـراجلهـم جـديـدات وسمـال
مـن صلب لابـة يلحـقـون المخـلـيـن *** رجـالـهــم بـالـكـون لـلـروح بـــّذال
التعديل الأخير تم بواسطة عبدالله بن عبار ; 11-10-2013 الساعة 09:36 PM
|