تابع
*- وقال فراج بن منصور المزروعي الموايقي هذه القصيدة يسند
على عبدالله بن دهيمش بن عبار ويذكره ببعض مشاهير الرجال : 509
باسم الإله الغفـور *** بديت ونظمت اسطور *** لشاعر عناز المشهور
نهديها لأبن عـبـار
على تأليفـه مشكور *** سجـل فعـل مثل النور *** كـلام الرجـل الوقـور
صافي ما عليه اغبـار
أفيدك عن العرعور *** يثنون خلاف المظهور ***اللي يعاديهم مكسور
مذهول الفكر ومحتـار
ونعم بالربع الباقين *** محاميـدٍ مشهـوريـن *** مـن قـديـم معـروفـيـن
وهذا قولي باختصـار
وأفيدك عن الفرهود***أهل المكارم والجود***منهم خطاب حامي الذود
بحدود السيف البتار
وكفاف الريشة معلوم *** فعله بالهية بالقوم *** من عاداته يفني الكوم
حر ومن ماكر حرار
ولا تنسى افعال الحميد *** منهم لطام العنيـد *** جراد اللي مثـل الحيـد
مبطي خيال ومغـوار
ومنهم خليفة الحقبان *** وأبو فنوش وراكان ***عساهم بجنة رضوان
مع الأخيار الأبرار
والخرامطة باللقوات *** لهم بالعايل سطوات *** خـلوا أجموعه شتـات
وأسقوا الخصم الأمرار
وأذكر لك منهم بلعاس *** خيال وقوي الباس *** تلقا ذكره عنـد الناس
لا لفيتـه شب النار
واذكر منا أبن مليحان*** شجاع وخلفة شجعان***من يناطحهم خسران
تفـر اعداهـم فرار
والخالد هم والطرفات *** يعـرفهم زمان فات *** نعـم إلى صار مثارات
دايم بالهيه حضّار
* وقال عبدالله بن دهيمش بن عبار هذه القصيدة رداً على فراج بن
منصور يعتذر لـه عن النقص الحاصل : 510
جاني جواب بسطور *** من فراج ابن منصور *** صدق ولا يعد الزور
وكلامـه لـه اعتبـار
اللي زودنا بالقيل *** وعطانا الشرح بتفصيل *** عـن قـديـم المفـاعيـل
وربعه يوطون الأخطار
ذكرنـا عـن النسيـان *** بكلام مابـه بهتـان *** تشكـر يا عـزيـز الشـان
وأرجو قبول الأعذار
كاني نسيت العرور *** أقبل عذري يالمنعور *** معلوماتي فيها قصور
وشيخان الويلان أكثار
وكاني نسيت الفرهود *** كلامك صدق وما كود *** ماني للطيب جحود
ولا عندي للحق أنكار
وكفاف الريشة مفهوم *** يجلب حياته بالسوم *** عـديـم ولابـه مثلـوم
ولا عندي له احتقـار
وتذكر لي فعل الحميد *** اللي يزهون التمجيد *** منهم جـراد الصنديد
الـلي بالهيـة جبـار
ونعم برجال الحقبان *** نعـم بذربين الأيمان *** بالكـرم يفنـون الضـان
عديت الفعل اللي صار
والخرامطة باللقوات *** فعلهـم عليـه أثبـات *** ما شمت فيهـم شمـات
عوق اللي يبي الأشرار
وذكرت الطيب بلعاس *** والنعم بعريب الساس *** اللي للعدو طساس
وللخصم العاتي دحار
ولا رجـال الملـيحـان *** الـلي بالهية فرسان *** شجعان بيوم الأكـوان
ونعم بعزيزين الجـار
والخالد هم والطرفات *** فخرهم مابه شكات ***هل النخوة والشومات
يزهاهم مدح الشعار
كاني مخطي يا فراج *** شعرت بندم وأحراج *** ولاني مع أحد منعاج
ولا فضل بعض الأنفار
الفعل الماضي كثيـر *** مـا حصيتـه بالتعـبيـر *** عديـت النزر اليسيـر
ولا قصدي والله مختار
مانـي مع أحد منحاز *** ولا عندي فرق بعناز *** جميع الويلان أعزاز
أهـل عـزة وأفتخـار
طيبهم مافيه اشكوك *** لكن ما حصاه البـوك *** اللي يعاديهم مـدروك
من ناطح جمعهم نـار
نعم بسلايل مزروع *** أهل العلم المسموع *** خصمهم لو ماهو طوع
يطيع بخشم المقوار
ونعم بكل المحاميـد *** اللي لعـداهـم تنكيـد *** فـي زمـان الـمـجـاريـــد
من طويلين الأشبار
والنعم بربع أبن هديب *** هل الشهامة والطيب *** مقدمهم عزالقريب
لـه تواريخ وأذكـار
قلت الواقع واليقين *** وعديت أفعال الوافين *** ما نكتب ظن وتخمين
ولا نهضم حق أهل الكـار
وأنا لك الله حريص***شخصت المعنا تشخيص***أنشدالرجـل البخيص
وأنصى حفاظ الأخبار
ولالي عند أحد مقصود *** الا تبيان أهل الجود ***ولاني بحال الجحود
أجهدت لربعي باصخار
من يطيب اضهر ثـناه *** وأتشرف في طريـاه *** والكتب اللي سجلناه
تاريخ اجدود وتذكـار
لا شك أن كاني قصرت *** عن الخمال اعتذرت *** لـو أحاول ما قدرت
أحصي شعب بخمس أقطار
*- قال الشاعـر حمدان بن عبدالله العنزي هذه القصيدة يسند على
عبدالله ابن دهيمش بن عبار ويذكره في بعض مشاهير الموايقة : 511
يـا راكـب مـن عـندنا نـاب الأكـوار *** من ساس هجن من سنين سمايـل
أكتب جـوابي وأرسلـه لأبـن عبـار *** سـوالـفـه تشـفي القـلـوب الغـلايـل
قـلبـت صـفحـات المجـلـد بـالأذكـار *** ولـقـيـت بـه تـمجـيد كـل الـقبـايـل
أولاد وايـل مـا بـهـم قـول شبـشـار *** قـولـه صحـيح ومـاضي لـه دلايـل
الكـاتـب الـلي مـا ذكـر فـعـل كسـار *** ما ينسي راعـي الفعـول الهـوايـل
راعي الدلال اللي على موقـد النـار *** أنا أشهـد أنـه مـن عيـال الحمايـل
كـم فـاطـر ترعـابهـم مـر الأشجـار *** قـفـر نـبـاتـه مـن حقـوق المخايـل
سربة محاميد عـلى الحـرب صبـار *** يـوم الـمـلاقـا يـتعـبـون الـسـلايـل
والنعم في ربعي إلى صار ما صـار *** يـثـنـون دون معـبسـات الشمـايـل
لحقوا هل الحرشا على قب الأمهار *** وأركوا عـلى كبـد المعادي ملايـل
خيالهم يركض على الموت بصخار *** والروح ما عـنهـا عـريب مسايـل
أخـوان شاهـه عـز للضيف والجار *** وأنشد هـل التاريخ من دور وايـل
هـذا كلامـي يـا فـتى الجـود تـذكـار *** ومن ذكّـر الناسين مـا هـو بعـايـل
طـريـق سهـو ولا لـهـا ذات تعـبـار *** خـلـه جـمـالـه يـوم رد الـجـمـايــل
* قال عبدالله بن دهيمش بن عبار هذه القصيدة رداً على حمدان بن عبدالله الموايقي : 512
سـر يا قلم وأكتب جواب ابن عبـار *** رداً عـلى حـمـدان راعـي المثايـل
حمدان مدهـال الفخـر مكـرم الجـار *** وجـه لـنـا زيـن العـلـوم الصمايـل
الـلـي يـذكـّرنـا عـلـى أفـعـال كسـار *** الـنـادر الـلي بالـفـخـر لـه فـعـايـل
أرجو السموحة وأقبلوا منا الأعذار *** ما تنحصي افعـال الرجال الأوايـل
نـسـيـت أبـن جـزاع أيـضـاً وشكـار *** أفـعـالهـم بالطيـب مـا بـه جهـايـل
ويا ما نسينا مـن المشايخ والأمـار *** حـمـايـة الـخـلـفـات يـوم الـدبـايـل
ماني لهـم يـا نسـل الأجـواد حـقـّار *** ولا لي مقاصـد يـوم سجلـت قـايـل
مـن فضل مولانـا مشاهيرنـا أكثـار *** ولا أقـدر أعـدد كـاسبيـن النـفـايـل
وأشكـر جناب الـلي يزود بالأخبـار *** عـن كـل مـنعـور كـريـم الـسبـايـل
راعي الحميا اللي على مجده أيغار *** والطيّب الـلي كاسـب عـلـم طـايـل
يظهـر ثـنـاه بطول باعـه والأشبـار *** ويرفـع مقامـه عن علـوم الرذايـل
حـاولـت أعـدد كـل فارس ومختـار *** ريـف الهجافى ومتعبيـن الأصايـل
عـديـت مشـوار وخـلـيـت مـشـوار *** وبذلت جهدي فـي جميع الوسايـل
والخاتمه نرجـوك يا صاحـب الكـار *** تسمح لنا يا شوق ضافي الجدايل
*- قال الشاعر محمد بن صالح المري هذه الأبيات من ذات القافية الصعبه
يسند على عبدالله بن دهيمش بن عبار : 513
أبـدع القيفـان بالـوقـت المنـاسـب *** وأنتبـه وأيضاً عن الزلـة أحاسـب
وآخـذ الجـزلـة ولا أحب الهـزيلـه *** وأجتهد من قبل لا يقولون راسب
يـا عبدالله يـا أبـن عـبـار المعـنى *** وصلك المكتوب يا زاكي المناسب
مقصد المكتوب بهـدي لـك سـلام *** في معاني جت قوارعها على سب
أسند لك القول يا وافي الخصايـل *** حيث مثلك شاعـر وللطيب كاسـب
وأختـم القيفـان مثـل الـلي بـديتـه *** أبـدع القـيفـان بالـوقـت المناسـب
* قال عبدالله بن دهيمش بن عبار هذه الأبيات رداً على الشاعر محمد بن صالح المري : 514
مـرحـبـا بـالـقـيـل مـن قـرم نـوده *** جـاء لنـا عبـر الفيافي والسباسب
نظم أبن صالح كما الشهد المصفا *** من رحيق الورد تجنـاه العـياسب
قـلتهـا وأشكـرك في بـدع المثايـل *** يوم خطو اللاش مثل الداب لاسب
يا محـمـد نـفـتهـم مقصـود قـافـك *** والذهـب يامسنـدي مالـه رواسـب
عن مثاليم البشر ندخل على اللـه *** من يقول القول عن قوله محاسب
أتـدرى مـن الـخـطـايـا والـرزايـا *** وأترك المخلوق لا أمدحها ولاسب
*- قال الشاعـر مشرف بن خلف المطردي الجعفري هذه القصيدة يسند
على عبدالله بن دهيمش بن عبار : 515
البـارحـة فـي مرقـدي مـا تهنيـت *** سهـران فـي ليلي والأفكـار تنـدار
للبـاركـر مـن جـرة الحبـر عبيـت *** وكتبت من زين المعاني بالأشعـار
سطرت بالأبـواك قـاف لـه ابديـت *** نظـم القـريحة مـا شريتـه بـدينـار
وأرسلت به مرسال للقـرم عنيـت *** أرسلـتـه لقـرم العـيـال أبـن عـبـار
قـرم كـلامـه مـرحبـا بـك وحيـيـت *** وبعـد التحيـة دلـة نصفهـا ابـهـار
ومن بعدها يقدم سمينه من العيت *** سلم له المكتوب يا وافي الأشبـار
وقـله أنا في عالي الصوت ناديـت *** للـوايـلي حيثـه ذرانـا عـن الحـار
شرواك بـه عنـد اللزوم استعزيـت *** يا زبن مضيوم عليه الزمن جـار
بالسجن أنا في عيشتي ماستلذيت *** كـنـه يـدق بثـومـة الكـبـد مسمـار
أفـزع لنا يالقـرم يا طيـّب الصيت *** عند الشيوخ بجاهكم يابن الأحرار
وعلى محمد اشرف الخلق صليت *** شفيعـنـا يـوم القيـامـة عـن النـار
* قال عبدالله بن دهيمش بن عبار رداً على مشرف بن خلف الجعفري : 516
بسم الذي تسجد له الناس سميت *** رب الخلايق خـالـق سبع الأطـوار
ومن بعد ذكره قلت بالقيل وأمليت *** من فيض جـم يشبه النيـل مـدرار
ياأبن خلف جاني نديبك إلى البيت *** سلم لـي المكتوب وأبدالي أسـرار
من حين للمندوب يا القرم قهويت *** وفـر عـلينـا واجبـه بالعجـل سـار
وقـلت أبلغـه أنـي للقضيـه توليـت *** وسلـم عـليـه وبلغـه كـل الأخبـار
نخـيـت ذربيـن الرجـال العـنـاتيـت *** ونخيت لـك كـل المشايخ والأمـار
والشاهد الـلـه ما بجهـدي تونيـت *** ياأبن خلف ماني من الجهد ذخـار
ولا نذخـر الا عن خطاة السرابيت *** الـلي قـضيتهـم بـهـا كسـر تعـبـار
للي قـدرتـه يا فتى الجـود سويـت *** عشريـن ليلـه بيـن الأجـواد دوار
من طحت بالبلوى أنا مثلك ابليـت *** الله يعين اللي على السجن صبـار
أن طاب مسعايه على العـز غنيت *** رب الملأ ياقاك من شـر الأخطار
*- وقال الشاعر عساف بن عبدالله العواجي هذه الأبيات يسند على
عبدالله بن دهيمش بن عبار : 517
عبدالله العبار حافض عـلى تـراث *** جدك وأبوك احـذر يجيلـه نقاضي
صفحتك ورد مخالطه نبت جثجاث *** أقطع عـروقـه لا يجي بالحياضي
من قبل ما تزرع أبي تعمل ابحاث *** والشاعـر البيطار مثلك ايحـاضي
عدل خطأ من هوبالأشعار قدعاث *** عـدل وبـدل بالـمعـانـي وخـاضـي
ماحد خبر وادي الرمه سند الداث *** ولا أحد خبر ديك بالهوقت باضي
ترى الشعر ماهوب خبـز وكـراث *** ولا تاجده لودرت سوق المقاضي
ولا ينـوخـذ قـوه ولا هـو بميـراث *** يحب ناس وناس عنـه امتغـاضي
* قال عبدالله بن دهيمش بن عبار هذه الأبيات رداً على الشاعر عساف بن عبدالله العواجي : 518
حي الرفيق الـلي بالأشعـار بعـاث *** يـقـول جـد ولا يـريـد الـتـغـاضــي
أقسم مفاعيـل البحـر ستـة اثـلاث *** اللي حصل يا مسندي فعـل ماضي
نذرى الرماد لكل من صابه غلاث *** ولا نـبـالـي لـو يـكـون امتعـاضـي
ترى الذهب لو كان بالرمل ينداث *** ما ينـتـرب يجـلي صـداه البيـاضي
عندي براهين عـلى كـل الأحـداث *** وشهـايـد فـيهـا خـتـوم وتـمـاضي
بعض الرجال قلوبهم تقل محراث *** سود الضماير قولهم هـرج فاضي
الخلق مبطي يالعواجي بها خباث *** ولولا الخطأ يالقرم ما حـط قاضي
أقـولهـا ولاني وراء القـوم لهـاث *** وكلن بعقـله يا فتى الجـود راضي
*- قال الشاعر الدكتور حجاب بن عايض الجعفري هذه القصيدة يسند
على عبدالله ابن دهيمش بن عبار : 519
جتنـا الهـديـة والتحـيـه والأوراق *** مشكور لشعور الوفا يا ابن عبـار
هلا بمرسالك وفيـك من الأعمـاق *** مـن فيض وردٍ بالـوفى دايـم حـار
دايم على شوفك حريص ومشتاق *** بظـروف تحكمها قوانيـن وأقـدار
أذكر مشاعركم إلى خاطري ضاق *** بعـدك كمـا جـار لنـا دونـه اجـدار
لكن عسى الباري يبشر بالأوفـاق *** وبيني وبينك تفتح أبواب الأسرار
الـحـمـد لـلـه وسـع أفـاق الأرزاق *** مـار الحكيم أحيان يبلش ويحتـار
ياأبن الكرام البوق ما يرفع أعناق *** وأكبـر خساره راس قوم إلى باق
نـايـم عـلى عميـاه مبطي ولا فـاق *** ولامن تقاليد العـرب فيـه مسمار
ومن الردى فاتق على بيته أرواق *** حـي حيـاة العـار وأن مات للنـار
لا بـد يـا أبـن العـم يـنـدم ويـنعـاق *** مثل الذي ضايق هل الغار بالغـار
مستقبله لا التفـت الساق بالسـاق *** أخير ما يوخذ هك اليـوم مـن ثـار
يالوايلي طير الهوى بالفضى تاق *** يـدور بـأفـلاك الـكـواكـب إلـى دار
يحط من روس المعالي له اسواق *** ويجيب من غبـات الأبحـار محـار
مر تشوف من الأمل ضوح بـراق *** وأحيان تظلم في سماالدار والدار
تفنا الحيـاة وباقـي طيـب الأخـلاق *** ولا خير باللي ما يتدرا عن العار
* قال عبدالله بن دهيمش بن عبار هذه القصيدة رداً على الشاعر
الدكتور حجاب بن عايض الجعفري : 520
حي الجواب الـلي لفـاني بالأوراق *** خط الفهيم حجاب ممدوح الأذكار
حي البيوت اللي ضميري لها تاق *** أبيـات شعـر كنهـا قطـف الأزهـار
سجلت رد الوايلي زاكي الأعـراق *** والفكر يملي مـن عذيات الأشعـار
هيضني وقلبي على القيل مشفاق *** مشتاق لعلـوم النشامـا هـل الكـار
أعتـز باللي بدرب الأجواد ينساق *** اللي على منهج طريق الفخر سار
ولا الردي ودك عنه بعـد وافـراق *** تـحـول مـن دونـه ملايين الأمتـار
كـب الـردي عسى تعشاه الأطلاق *** الخايـب الهلباج مقصوف الأعمار
اللاش جعل اللاش في ناب زراق *** ثعبـان نـفـد وشوكتـه تقـل شنكـار
اللي من ثياب الخـزا لبسه اشقاق *** مـا ينفع العـانـي ولا يكـرم الجـار
اللاش لو يصعـد طويلات الأطباق *** مهمـا أرتفـع لا بـد ينـزل بمحـدار
الحر مسكانه عـلى راس شوهاق *** طيـر السعد بالحيد دايم لـه أوكـار
والبوم دوم بطامن الجـرف نغـاق *** ما ظنتي صـاد السمينه ولـو طـار
يا مسندي قـلبي جزوع ومحـراق *** اكـره قبال وقـرب عميان الأبصار
السافـل الـلي كن قـلبـه بـه افتـاق *** نـذل ورزيـل وملسنه تقـل منشـار
حيث الردي لو كان تسقيه تريـاق *** لا بـد مـا يسقيـك حنظـل وجنـزار
ينساالجمايل لعن أبوهاك الأشداق *** ومن ينكر المعروف خاين وغدار
أقـولـهـا ولا هـمـنـي كــل هـــلاق *** الخـايـب الـلـي بالـدياويـن ثـرثـار
*- قال سويلم الرميثي الشويكي هذه القصيدة يسند على عبدالله ا بن دهيمش بن عبار : 521
يا الله يا اللي عالم بكل ما أخفيـت *** أنـت الإلـه الـلي نعـبـده ونـرجـيـه
بديت باسمك يالـولي يـوم سميـت *** وخـلاف ذا سجـلـت قـول منـقـيـه
البارحـة في هجعـت الناس ونيـت *** ونـت مريض ما لقـا مـن يـداويـه
ونيت من فـرقـا عشيري وجضيت *** والعيـن عافـت نومهـا مـا تدانيـه
طار الكرى وفي مرقدي ما تهنيت *** مارتحت أنا والقلب كثرة طواريه
عـلى عـشيري عـن ديـاره تنحيـت *** عـني نحاه البعـد وش لون نأتيه
أشكي لأبن عبار يا نعـم ما اطريـت *** نعم بأبـو مشعـل إلى حل طاريـه
نعـم بأبـو مشعـل إلـى جيـت للبيـت *** حـلال للصعـبـة ويفـرح بناصيـه
يالقـرم أنـا مـن زايـد العـذل مـليـت *** أقصى العـرب ولا دواني بنيخيه
* قال عبدالله بن دهيمش بن عبار هذه القصيدة رداً على سويلم الرميثي : 522
سار القلم يكتب من القيل ما امليت *** رد الجواب اللي لنا القرم مهديه
جاني جواب الوايلي طيـب الصيـت *** سويلـم المنعـور طابـت معـانـيـه
تلقا الوناسة في مضيفه إلى الفيت *** وعلوم صدق ما بها قول تشويه
أن كان يا سويلم على خلك أنويـت *** أنص الحبيب الـلي تعـزه وتغليـه
مالك ومال أهـل العذل والشواميت *** أدحـم وما قـدر عـلى العبـد يأتيـه
كب الردي يا مسندي كنـه اسبيـت *** ومن فازفي خله عسى الله يهنيه
ولا العشيـر الـلي لـقـربـه تـمـنـيـت *** أرسـل وليـك يالـرمـيثي لـواليـه
أن قـال لـه يـا مـرحبـابـك وحيـيـت *** لازم بغـالـي المـال تملأ مخـابيـه
وأن قال علم بالسبب ليـه لي جيـت *** نطلب من الله والي الكون يهديه
كانك عـلى منهاج شـوري تمشيـت *** خـذ الجواب اللي من البال نمليه
* - قال سالم الرميثي الشويكي هذه القصيدة مجاراة لقصيدة سويلم
الرميثي وعبدالله بن دهيمش بن عبار : 523
يا الله يا محـيي العظـام الهتاهيـت *** يا مكـون الإنسان من نطفة مويه
يا خالقه من طين ثم ترجعـه ميت *** فـي قـدرتـك عبدك تميتـه وتحييـه
رب الخلايق عالم بكـل ما أخفيـت *** الكـل يطلـب رحمـة الـرب يرجيـه
وخلاف ذا يـا راكـب فـوق وانيـت *** تـوه جـديـد مسـجـل بسـم راعـيـه
عـليـه الـلي ما قـال كلمـة توذيـت *** أبــوه لـعـلـوم الـمـراجـل مـربـيـه
يلفي لأبو مشعـل يهلي إلـى جيـت *** عـطـه الكتـاب وقـلـه الـرد نبغـيـه
سويلم عـلى خلـه يجـر التناهيـت *** دمعـه على الخدين تجري سواقيه
وأنـا سمعـت أنـك بـالأمثال رديـت *** تـقـول لـه أرسـل ولـيـك لـوالـيــه
أريـدأخـبـرك أنـي لـخـلـه تـعـنيـت *** وجبنـا الخبر اللي يوده ويرضيـه
وقبله أنا من غرقت النـوم فـزيـت *** مالحت لوعات الحبيب وعزاويـه
حـدوه عـني وأنـا عـنهـم تـنحيـت *** ولـو طالـت الـمـدة نعـزه ونغـليـه
عشرة سنين على الأصباع عديت *** لو هو مع الأموات يمدين عازيـه
والمعذرة يا مسندي كاني أخطيت *** نـزهـت أنـا الأمثال يالقـرم تنزيـه
* قال عبدالله بن دهيمش بن عبار هذه القصيدة رداً على الشاعر سالم الرميثي الشويكي : 524
سر يا قلم وأكتب بيوت لها أبديت *** أمثال مـن غايـة ضميري مسويـه
حـي الـزميـل الـلي لقافـه تهجيـت *** سالم عريب الساس زبن المداليه
أحسنت يا سالم باللي قلت أقـديت *** أخـوك يـالمنعـور تـنجـز دعـاويـه
يا ليتني لك يا فتى الجود خاويـت *** عسى نجيـب الـلي يعـزه ويرجيـه
أن كان ما وافق نجبناهـل الصيت *** نـجـيــب لـه زورات يـمـه نـوديـه
حـتى تنـال الـلي لوصلـه ترجيـت *** على هدفك اللي أنت يالقرم ناويـه
وأن كان ذا ما فـاد للواي غـزيـت *** وأنخى لك الشعار بالشعر تهجيـه
قـلته وأنـا يـا مسنـدي مـا تبريـت *** كـان ايحصل بالمال ملزوم نعطيـه
عساه يجمع شملكم عقب تشتيـت *** ولا على الله سامك العرش نشكيه
هذا جوابي وأنـت بالحـق أقـريـت *** والمنتجي ما يرجعـه قـول يا هيـه
ناديت أنااللي يسمعون التصاويت *** ومليت من جـور الزمان وتحديـه
ناداني سويلم وأنا لصوته أوحيت *** ومـن جـل قـدره قـلت للقـرم لبيـه
الـلـه يجـيـب الـلي تـوده بتـوقيـت *** والحاسد الفاسد عسى الله يعـميه
يتبع