موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

* من مدونات ديوان الوائلي قال عبدالله بن دهيمش بن عبار العنزي :
مـريـت في مـلعـب الإسـتـاد لي مّـره *** ودخلت بمدرجه من ضمن جمهوره
شفـت الجماهيـر بالسـاحات مشتـّره *** تـوافـدت تحتـشد بالـلعـب مسحـوره
تنوس نوس الدبا اليا ناض من حّره *** قـوم تهارف تـقـل هـرفال مسعـوره
بهم خطو عـود متوهـن مـن السـّره *** وبهـم شباب وبهم شمطان وابزوره
والكـل مـنـهـم تـرنـم والـلـحـن جّـره *** يصفق كفوفه وصوته شق حنجوره
صفيرهـم يسمعـه مـن يسكـن البّـره *** ويوحيه حتى الذي في راس تـنـوره
وشفت النواظر من التشجيع محمّره *** نعـوذ بالـلـه تقـول الـقـوم مخمـوره
اللـه وأكبر أعصاب الشخص منّزره *** يـبـغي فـريـقـه ينـال الفـوز بالـدوره
وأن كان بطـل القـدم فـر القـدم فـّره *** دخل جراب الهوا مع شبك ماصوره
هتـف ولوّح هـاك الجمهور بصـوّره *** كـنـه يشـابه صلاح الديـن بعـصوره
وأن كان جاب الهدف بمعـاود الكّره *** تـعـالـت أعـلامهـم بالأفـق منصـوره
نـاس تضاحك تشـوح الريح بغـتّـره *** وناس تناحب من الخسران مذعوره
اللاعـب المنتصر مـدعـوم ومـشّـره *** مـار المشجع قليل الفـود وش دوره
وعـند النهـاية تشوف القـاع مغـبّره *** الـكـل فحـط وعـلـق صـوت زمـوره
توحي صريخ العجل بالقار له صّـره *** يزعجك تفحيطهم والروح مخطوره
واللي تجشم عفاش القـاع وأحـفـّره *** خـلـه يـعـلـه يـطيح بقـاعـت الجـوره
طايش عملهم نظـام الشرع مـا قـّره *** والمنعوج يردعه مصقول أخو نوره
ذاك الزعيم الـذي يكـوي عـن العـّره *** المقرني ما ربح من حاد عن شوره
يـا أمـة فـي سـراب الـوهـم مغـتـّرة *** ترقص من القول طربانه و مسروره
عـدوانـنـا تـنـتـج الصـاروخ والـذّره *** وحنا انتـفاخر بنصر الفـوز بالكوره
نـقـول وقـلـوبـنـا مـا يـنـطـفـي حـّره *** وش فـوزنـا وقـوة الإسلام مكسوره
كـل مـا فرحنـا انتذكـر مصرع الـدّره *** جابوا لنـا قصته بالصوت والصوره
الغـادر الـمعـتـدي عـم العــرب شـّره *** والغرب يستعطفه لا يجرح شعـوره
اعـمالهـم تـزعـل الخـفـرات بـخـّدره *** عـبـر الجرايد بكل الصحف منشوره
أنا أشهـد أن الحقيقة يـاعـرب مـّره *** هو كيف نفرح ودار القدس مخفوره
القدس تـنخى مـن التدنيس مـنضّره *** في حكـم صهيون منهيـه ومـامـوره
وين أنـت يالمعتصم يا منجـد الحـّره *** أفـزع لها صاحت مـن الذل مقهـوره