موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

Thursday 4th August,2005

عسى ضناهم.. هم مقادم ضنانا

إذا كان الشعر لسان حال شاعره فشاعرنا لسان حال كل مواطن فجع بفقد قائده العظيم وقد صور مشاعرنا بصدق ولاء الشعب لقادته العظام بقوله:
عسى ضناهم هم مقادم ضنانا ويصونهم مولاي من كل حوبه
وفي القصيدة لمحات جمالية لا تستغرب على عبدالله بن عبار الشاعر والمواطن:

يالله يا رحمن تجبر عزانا = بالعاهل اللي المسلمين فجعو به
ندعوك باسمك يا معلي سمانا = تضفي عليه المغفرة والمثوبه
يا خالق المخلوق تقبل دعانا = ارحم ابو فيصل فقيد العروبه
يا رب عفوك لا تخيب رجانا = الطف بحال اللي قليله عيوبه
الطف بعاهلنا زعيم زعمانا = تقبل حسناته وتغفر ذنوبه
قايد مسيرتنا وحامي حمانا = حرز الوطن لا صار للكون شوبه
قاهر معادينا وعز صدقانا = عز الصديق وللمعادي عقوبه
القدر حان وصادق العلم جانا = وما قدر المولى عباده رضو به
والصبر في وقت المصيبه جدانا = نصبر على البلوى ولو به صعوبه
ومن حان يومه ما يرده بكانا = العمر يبلا والسنين محسوبه
مرحوم ياللي بواجبه ما توانا = يجهد على عز ومعزة شعوبه
ياما سهر بأسبابنا من غلانا = وياما تلقى من الصعوبات نوبه
عدل القضاء الصنديد حاز برضانا = ريف البلاد بشرقها مع جنوبه
يعوضنا بالليث مرهب عدانا = قروم الرجال اللي طريقه مشوبه
اخوانه الشجعان هم ملتجانا = سقم المعادي والخصوم مغلوبه
هم سورنا هم عزنا هم ذرانا = ياما عفوا عن عاصي عقب توبه
جينا نبايعهم ونعلن ولانا = حيث الفخر والمجد مبطي رقوبه
نسل الزعيم اللي رفع مستوانا = اللي اليا صار اللزوم اعتزو به
عبدالعزيز اللي من الكيد عانا = يوم ان نار الحرب والع شبوبه
بجهود أبو تركي بدأ العز هانا = حكمه على بلاده ربيع وخصوبه
جاهد وأسس بالجزيرة كيانا = وأنجب ملوك بالمسير اقتدو به
هم قدوة الأمة سبايب هدانا = منهم وهم نص الكتاب احكمو به
زالوا دواعي جوعنا مع ظمانا = وزال الكدر والعز ذعذع هبوبه
نطلبك يا رب الخلايق عسانا = ما نفقد اللي كل خير سعو به
عسى ضناهم هم مقادم ضنانا = يصونهم مولاي من كل حوبه
رب العباد من المحبه عطانا = نحبهم والنفس ما هي مغصوبه
يا من نشد عنا نفيدك ترانا = أرواحنا لقادة وطنا جلوبه

الشاعر عبدالله بن دهيمش بن عبار العنزي

الرابط

http://search.suhuf.net.sa/2005jaz/aug/4/tr2.htm