موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

قصائد مساجلات جديده

قال معيض بن راكح المرعضي الرويلي أبو جابر هذه الأبيات يثني على
زميله عبدالله بن دهيمش بن عبار :

يـدوم راسـك يـا زعـيـم الـرجـولــه *** يطـول عـمـرك يـا كـبـيـر المهـابـه
ومليون نـعـمٍ فـي مـقـامـك نـقـولـه *** يـالـوايـلي يـالـلـي عـزيـز جـنـابـه
يا ابن عبار الـلي كسب كـل طـولـه *** الـلي عـلى التاريخ سـطّـر كـتـابـه
الـلي كتـب بالمجـد صولـه وجـولـه *** مـثـل العـلـم مـرفـوع كـلـن درابـه
سيـرة فـخـر كـل الـرجـال شهدولـه *** هـذي الحقيقـه كـان تـبي الأجـابـه
يـصـعـب عـلـينـا لـو نـعـدد فـعـولـه *** بـه الخصايـل ما حصتها الحسابـه
وبـالمخـتصـر اسـمـع كـلام نـقـولـه *** عـن زبـدة الموضوع خـذ الأجابـه
تـفـخـر بـه الـويـلان فـي كـل دولــه *** الـلي لـهـم سـيـفٍ قـٍوي نـصـابـه
وصـلاة ربـي عـدد شـعـٍـر يـقــولــه *** عـلى رسول الله وعـلى الصحابـه

قال عبدالله بن دهيمش بن عبار هذه الأبيات جواب لأبيات الشاعر
معيض بن راكح المرعضي أبو جابر :

حي الزميل الـلي وصل لي رسولـه *** عـبـر الجهاز القاف بالحـال جـابـه
الـوافـي الـلي عنـده الصّدق سولـه *** يتعب عـلى الجـزله من أول شبابه
يا معيـض مـا تشكل عـلي الثعـولـه *** مـادام بـي شرواك يـبـدي اعجابـه
يفـداك مـن ضـم الـردى في حثولـه *** الـلاش عـنـوان الـدنس والخيـابـه
يعيش أبـو جابـر من أهـل البطولـه *** المرعضي من ساس عزوه ولابه
رجـالهـم خصمـه الـيـا شاف زولـه *** تنهـار من ساعـة لقـاهـم اعصابـه
عـدوهـم يـبـلـش الـيـا جـوه صولـه *** يـوم الشجاع الشّلف يدمي حرابـه
يـوم الـغــزاه الـكـل يـلـكــد ذلــولــه *** يسري ويجـري ما تـونـت ركـابـه
والـيـا زقـح مـر الـكبـود الـزعـولـه *** نـطـيـحـهـم لابــد يـنـزف صـوابـه

قال الشاعر عبدالله بن جريبيع الربيلي العنزي يسند على عبدالله بن دهيمش بن عبار العنزي :

يا أهـل الاعـلام اذواقنا ليـه تنـداس *** لـيـه ومـشـاعـرنـا لـديـكـم وداعـه
ويـن القصيـد الـلي للأذهـان لـمّاس *** ويحاكي الـوجدان عـنـد استماعـه
توهج ابياتـه مـثـل تـوهـج الألماس *** وكنـه عقود من الذهب عند باعـه
الياصاغه المبدع وعدّه على الناس *** اصحـاب لـب يـقـيـمـون البضاعـه
بحلوقهـم تعـهـدت حبـس الأنـفـاس *** بخـلالها الشاعـر يـزيـد انـدفـاعـه
اصل الشعر يبغي له انسان حساس *** يكتب عـن احـداث الحياه انطباعه
امـثـال ابـن عـبـار للـشعـر نـبـراس *** فـي منهجـه ياجـب عـلينـا اتباعـه
لو شعر ابو مشعل بالأشعار ينقاس *** مـا احـدن عليه يبرهن الأستطاعه
يـا حـبـذا يـكـون لـلـشـعـر حـــرّاس *** عـبـر الصحف والتلفزه والأذاعـه
ما ينشرون الا شعـر يطنـخ الـراس *** مـاغـيـر ودك تسمعـه كـل سـاعـه
ماهـي سوالف مدعي شعـر هـلاس *** مـاغـيـر زاد اسعار حـبـر الطباعه
قصده فقط تصنيف ضيان الأقبـاس *** ويهيضـه تصفيق بعـض الجماعـه
وهي بالنهايه مـثـل جنحان عـباس *** تـركيبـه أصـلاً يـفـتـقـد لـلـبـراعـه
دون العذوبـه والمعاني والأحساس *** امـجـرد أن القـاف بالنـظـم طـاعـه
لو ينسحب من ساحة الشعر لاباس *** أو اعـتـزال بـحـد ذاتـه شـجـاعــه

قال عبدالله بن دهيمش بن عبار جواب لقصيدة الشاعر عبدالله بن جريبيع الربيلي :

بـديـت بالـتسجيـل مـن دون كـرّاس *** ما عـاد يـوجد مـن يخط بـيـراعـه
القـاف مـا يكتب بصفحات قـرطـاس *** في شاشـه الـلاتّـب بالعيـن راعـه
وأن دك بالخـاطـر روابع وهوجاس *** نظم القريض الراس يبعد صداعه
الشعـر فـن وتقـرضـه كـل الأجناس *** من عصر ربيعه ومضر وقضاعه
الشعـر يلقـا بكـل محـفـل ومجـلاس *** مطلوب حفظه عن سبايب ضياعه
قـاف لـفـانـي كـنّـه الشهـد بالـكـاس *** الـلي كتبـه تسلـم أنـامـل اصباعـه
قريت جـزل القاف من طيّب الساس *** عبدالله جـريبيع عـرفـه اطـمـاعـه
الـنـادر الـلـي مـا تـدنّــا لـلأدنـــاس *** عـنده عن عـلوم الـرذايـل منـاعـه
وابـوه قـبلـه كـان بـه شـدّة البـاس *** مـن عانـد الصنديد بالكـف صاعـه
وزمـيـلـي عـليـان للخصـم طساس *** قـرم العـيـال الـلي طـويله ابـواعـه
الـلي تحدّى بالوعد وقـت الأدمـاس *** دعـس عـليـه وكـل مـاذاق تـاعــه
مـن عـزوة لهـم مفـاخـر ونـوماس *** منـزل هـل الملحا براس الـرفـاعـه
يوم الجياد بلجمها تضرس ضراس *** بـهـم قـسـاوه للخـصيـم وقـطـاعـه
ولادعه كان اعتلوا سرج الأفـراس *** لـهـم فعـايـل صـدق ماهـي أشاعـه
وبيوتهم تزمي مثـل حمر الأطعاس *** يفـرح بها الجيعان وقـت المجاعـه