|
مقاطع من الأبداع في شعر عبدالله بن عبار
((1)) من صار ما شب القريفـن بكبريـت ولا دخّـن الشيشة ولا شال الأبكات ((2)) ما طب ديوانك هـل الكـذب والهيـت مجلس شرف مابـه مغالط ولجـّات تجمع بـه الـلي للمسولف مصانيـت لو جاه راعي الثرثرة صار سمّات يسكت به الثرثار من غيـر تسكيـت يسمع سوالف تبهج البـال دسمات ((3)) فـاض قـافـي مـن ينـابـيع الجـمـام مـن مشاعر خاطـري فكـري نقـاه عـيـلـمٍ مـا كـيـل لـتـره بـالـغــــرام صافـي القـراح مـن عـذب الـفـراه مـن سميـن القـاف نخـتـار السنـام وأن كتبنا القيـل يعجـب مـن قـراه والمـعـانـي تحتشـم عـنـد الحشـام جـزلهـا بيـن العـرب يظهـر صـداه يـفهمـه مـن يفـتهـم قـصـد المـرام والغـبي هـيهـات مـا يـفـهـم لـغـاه |
((4)) الـلي عـطـانـا صـح بالخيـر نـجـزاه حيـث الغـلط يعـمي لبيب البصيره والجهد اللي وسط الدفاتـر نشرنـاه تـعـاونـوبـه طـيـبـيــن الـســريـــره وإلـيا وقـعـنـا بالخطـأ مـا قصـدنـاه لـو هـو قـدر مثـقـال حـبـة شعـيـره والـلي يـنـوه للمؤلـف عـن اخـطـاه عـنـدي كلامـه مـن كـبـار البـريـره أفضـل مـن الـلي بالدياويـن يشـنـاه كـان الحسـد ولـع بـقـلـبـه سعـيـره ولاّ النسب يا القـرم مابـه محابـاه وكـلـن عـلى رايـه يـقـرر مـصيـره |
((5) يزمر وضيع الشان والفعل سربوت وإلـى بـدأ الـلازم يشـابـه خـواتـه دايـم لـسـانـه بالـديـاويـن مـفـلــوت مـثـل الـمسجـل مـا تـمـلـل لـهـاتـه الضرس له مقلاع لاصار منخـوت لازم تـشـيـلـه مـا يـفـيـدك ثـبـاتــه والحنظلـة مـا ظنـتي تـنـقـلـب تـوت والغـرس يطلـع مثـل بـذره نبـاتـه ومجهودي المبذول يالقرم مفتـوت أجهـد عسى الشاني يوقف شناتـه مهـما بـذلـت الجـهـد لا بـد مذهـوت مـن ولـف أستهدف وتكثـر لغـاتـه لا شك ماني عـند الأجـواد مشمـوت والـثـور خـلـه مـا يـفـارق فـلاتــه |
((6)) بعض المراجل دونها قطع الأرقاب مـا تـنـفـع الجـلـوه ولا من دخـالـه والحـاسد الـلي صـار للنـار شبّـاب الـلي يـبـي عـنـاز يـقـطع اوصـالـه يلفـظ كـلام ولا يحسـب لـه حسـاب والحق يظهـر لـو يـبـون اغـتيـالـه عـنـاز مـا تـقـبـل نـمـانـيـم نـصّـاب الـلي يحـوك السالـفـه مـن خيـالـه وايـل ولا وايـل عصابات واحـزاب نسل عنـزة معـروف جـده وخـالـه اقـولـهـا ولا هـمـني هـرج الأذنـاب مـا يـجحد المعروف كـود الحثالـه |
((7)) فـي ربـعـة تلـقـابهـا رمس شيبـان تـلـقـا المسولف واحـد ولا يلجـون تلقـا سـوالفهـم تـقـل نظـم مرجـان ماهم من اللي بالنـقيلي أيتحاكـون في مجلس مابه سوى فلان وفلان الـلابـة الـلي عـن سواهـم يعـزون |
((8)) أن جاك مني يا فتى الجـود تقصير أفطن ترى يمحا الذنوب الأستغفار الجـو تعصـف بـه زوابـع معاصير والهـرج يا مشكـاي للكبـد مسمـار أن كان سيلك يطمر الحزم وايزيـر جاك المحيط اللي بـه الموج هـدار جاك المحيط الـلي يشيل الشخاتيـر مـا ينطح موجـه وفوجـه إلـى فـار تسمع على جاله صريـر النواعيـر سيله عرمرم يقذف الموج بالطـار |
((9)) دنـيـاك هـذي فـانـيـه مـا بهـا خـيـر يلعـب بهـا يـا مسنـدي كـل عـيـار ((10)) العـلـم يـودع خـامـل الـذكـر دكتـور والمـال خـلا الـلاش يفخـر ابمالـه ((11)) راكب اللي بوسط أسمه حرف ميم جـمس والبـويـه مثـل دم الفـلـيـق مـنـوة الـلي للممـاشي مستـهــيـم أشهـد انـه يستـوي مركـوب بـيـق كنـه الـلي سـار بـتعــميـد الـزعيـم فـي مـهـمـه كـلـفـه بأمـر الفـريـق يقـطـع البـيـداء تـقـل تـفـزيـز ريـم لـو تـطـوف البـنـز يلحقهـا لحيـق أن مـشى بـالـقـار يـشبـه للـظـليـم وأن تحـرك بالصحاري قـلت هيـق لـو يـمـد الصبح مـن شـرق الدليـم الظـهـر تـلـقـاه بمغـيـرا الـطبـيــق ولـو مشى بالليـل مـن حـرة سليـم مع طلوع الشمس شفته في بقيق ولـو تحـرك مـن جلاجـل والتـويـم عقب ساعة طـب موقـق والشقيق كـنـه الـمـيـراج مـثـلـه سيـم سـيـم لو ما خاف من الزلل لا أقول ميق أنطـلـق مـرسول مـن حـي النظيـم مـستـخـف ولـلمسـافـة مستـسيـق مـد مـن وادي حـنـيـفـة بـن لجـيـم ثم سار الجمس مع وادي العـقيق مر بارض الخرج مع حوطة تميـم والهياثـم وارض ليـلى والحـريـق سـايـقـه صـنـديـد والتـوقـيـت تـيـم مخلص ويمشي بدربـه مـا يميـق سـاهـرٍ بـالـلـيـل مـا شـافـوه نـيــم دون مقصـد عـنـوتـه ما فـك ريـق مقـصـده نـجـران دونـه مـا يـقـيـم ينصى اللي للضيف منطوقه رقيق عـنـد أبـو هـزاع لـلـعـانـي نــديــم لـلـعـداء قـاسـي وللأصحـاب لـيـق دلـتـه تطـمـا عـلى جـمـر الصريـم جـاهـزة وبجـنبـهـا عـذي البـريـق رايــبـه فـنـجـالـهـا شـف الـوخـيـم والـبـيـالـة مـن مـصـانـع بـادريـق |
((12) بعض الخلايق كان للطيب سويـت يغيضهـم عـلـم الفضيلـه اليـا فـاه جحادت المعروف مداحـت الميـت ما عنـدهـم غيـر الريـا والمحابـاه |
((13)) الشاهـد الـلـه كنهـم مـن عـرب طي كـلـن يـقـول أقـلــط دلالــه مـلـيـــه شبيـه حاتـم بالصخـى وأبنـه عـدي تـلـقــاه فـي هـاك البـيـوت العـذيـه أوصيك ثـم أوصيك يا مسنـدي عي حـذراك تـقـلـط عـنــدهـم قـيـدنـيـه تاخـذ سنه واشهور ما عوقـك شي غـيـر الذبـايح بالصحـون الفـضيـه |
((14)) لابـد تجبرك المجالس عـلى الـردي جـامـل وحـاذر لا تـنوشـك رزايلـه |
((15)) يا سعـود يـا مشكـاي قلـت آه ثـم آخ من نفـح هـرج المرجفين المطافيخ يا سعود راسي من كلام العـرب داخ من كثـر ما يسمع لجاجة وتصريخ يـا شيـخ لا تـسمـع مـنـافــق ونـذاخ هـرجه نفـاق وبـه تـملّـق وتمـريـخ مـا جـابـه الـنـمـام طـشـه بـالأوساخ حكي النقـيلي بـه دناسة وتمصيـخ لا يـسـتـفــزك كــل مـحــرش وزلاخ اقـفـل مـجـال المخبثيـن الـمـزانـيـخ الـمحـرش الـلـي بـالـديـاويـن جـلاخ حـيثـه يمطخ فـي مهـاجيـه تمطيـخ خطـو اللخيـمـة بالمجالـس إلـى لاخ لـوخ الـرضيع يلطخ الهـرج تلطيـخ والهرج من لفض الملاسن إلى فاخ شـوك الكبود ولـون لـدغ الشماريخ يـا شيخ بعـض النـاس لـلنـار نـفـاخ يـقـدح زنـاده فـي شـرار الصلابيخ ينصب على الفتنة محابيل وافـخـاخ حـقـود لـو كـشّــر تـبسّـم وتـكـلـيـخ خطـو الـرجل هرجه طراطيع شراخ مـا عـنـده الا الكهـكهـة والطـرابيـخ وأنت الـذي يا سعـود للحـمل زخـاخ كـان ادبحـوا عنـه الرجال المطانيخ يا سعـود جـدك ذلـل الباش والـكـاخ والفـيـل جابـه خازمـه عـقـب تلميخ مجده بنا ساسه على صلب الأصياخ ولا زال بـاقـي مـا تشلّـع ولا صيـخ وابـوك الـلي لعيون الأضـداد فضّاخ الـيا تـرامـوا والـنـواظـر مـكـاويــخ بـه عيب قصب الكوم واذراه شمـّاخ يـمـنـاه مـن فيض النـدا نبعهـا طيخ بحـر الصخى مـا هـو مـبـذر وبـذاخ كفـه يـجـود الـيـا بخـل كـل طخطيخ هـداج تيمـا مـا يشبـه عـلى اوضـاخ الـوايـلي نـسـل الشيـوخ المجـاويخ الحـر مـا يـنجـب عصافـيـر وافـراخ والليـث شبلـه ليـث مـا خلفتـه ذيـخ أنت العوض بـه ما أنت للنزل شلاخ لـم الشتـات ورسخ الشمـل تـرسيخ يـا سعـود مـا عندي كياتـب ونسـاخ لا شــك لـلــويـلان ولـفــت تــاريـخ الـلابـة الـلي جـهـدنـا عـنـدهـم بــاخ حصيـلـنـا مـنهـم شـمـاتـه وتـوبـيخ يا حيف يا زرعي زرعـته بالأصباخ المـاء هـمـاج وقاعـهـا تقل زرنيـخ حـبـل القبـيلـة بـه تـقـاطيـع وأبـتـاخ وأنـا أفـتخر بغنيم ودهـام وأمصيخ والكـل عظمـه بـاد تحت الثـرى تـاخ بـيـن اللحـود ومرمسات البـرازيـخ والـيـوم كـلـن صـار لـلنـفـس زبــاخ وصـار الفخر كله مضاهر وتشكيخ واليـوم كـلـن صـار بـالبشت كـشـاخ وكـلن بـراسـه فـرخ الـزوم تفـريـخ وكـلـن يـزوم وبـالـديـاويـن جـمّــاخ وكـلـن تسمى شيـخ بالكبـر والميـخ والشيخ من غطى على كل من شاخ ولا صار مثـله بالعرب للعرب شيخ ستـر الهنوف الـلي تزهت بالأفـتـاخ الـليـث أبـو تركي زعـيـم المصاليخ الحاكـم الـلي عنـد بـاب الفخـر نــاخ وكـل الشيوخ ارقابهـم لـه مطاويـخ يـوم الجـفـاء بـثـليـم تسعيـن طـبـاخ يـقـرون هـتـّاش الـبـداة المـنـاويـخ وإلى حصل يـومٍ به صياح واصراخ ثـار الكـتـام وصـار للشلـف تنجيـخ وثـوع مـن الـدم الحمـر تـقـل بخـاخ والـروس تحـذف كنها حـذف بطيخ حمي الوطيس ولشهب الملح طخاخ يـدبـر عـدوه يـترك الـزوم وايـفـيخ سيـف أخـو الأنـور للمناعيـر صلاخ يـفـرا اللحـم وايشلخ العـظم تشليخ الـحـر الأشـقـر بـالجـنـاحيـن كـفـّـاخ رام الهـداد وفصخ السبّـق تفصيـخ الـنـادر الـلـي بـالمخـالـيــب صـبّــاخ ذبـاح ما ضربه عـلى الجلد تمشيخ صقـر الجـزيـرة مـا يلوبـد بالأكـواخ مـواكـره روس الجـبـال الشـواميخ الحـكـم مـا جـالـه بـطـبـلـه ومنـفـاخ جـاه بكـفـاح اينـوخ الخصم تـنويـخ شاد الأمجـاد اللي على المجد شمّاخ شيـده أبن مقـرن على سطح مريخ شم الجبل من جارف السيل ما صاخ يـرسي لـهـوج العاصفـات النوافيخ كـا الـطـود مـا حــّرك روابـيـه نكّـاخ صـرحـه منيـع ولا تهـده صواريـخ |
((16)) أن أقبلـت وأرهـت علينـا المطاليـب درنـا بـهـا عـلـم الـفخـر والشكالـه وأن أدبرت عشنا بها عيشت الذيب يـوم يـجـوع ويـوم يـشبـع عـيـالـه نوبٍ بها يا حمود نقدر عـلى الطيب وأحيان نغضي عن خطات الجماله نخـاف تـأتي ساعـةٍ يـفـرغ الجـيـب وتبـقـا ذراريـنا عـلى النـاس عالـه |
((17))
الـمـال عـز الـسـافـلـيـن الـهـدايـف والفـقـر ذل الـطيـبـيـن العـزيـزيـن مـن قـل ماله شاف عزر وكسايـف ومن كثر ماله عد ضمن المسمين ((18)) واليوم أشوف الـلي رصيده ملايـين مـا يـقـتـنع بالـمـال لـو يكنـز الـمـال يجـض مثـل اللي تضجـر مـن الدين كـنـه فـقـيـر ولا بـجـيـبـه ولا ريــال |
((19))
بحثت فـي ماضي الفعـول وتهـولـت حصـر المفاخـر مـا لـنا فـيـه حيـلـه شرق وجنوب وثم غربـت وأشملـت أبـحـث ولـو كـان المصـادر قـلـيـلـه والـلي ذكـرتـه واقـعـي مـا تـخــيلـت يشهـد لهـم كخـيـا البـواشي وفيـلـه |
((20)) حتى الـذي مثـل النعجـه الـربـيضه دلا يـسـوي بالمـجـالس ضـواضي الهيس مـا يشكـل عـلي اتحـريضه ايبس لحاضه قبـل ييـبس لحـاضي خله عسى ياطاه سكس العـويضه عشرين طـون حمولتـه بالمقـاضي |
((21))
جحـادة المـعـروف دقـاتـهـا اكـبـار تـرمـي الـتـهـايـم لـلعـبـاد الـبـريـه حنـا بذلنا الجهـد من ضمن الأنفـار ومن واجب المسلم يحفظ الوصيه نخشى الملامة يابن الأجواد والعار وندرى الحسود اللي يدور الدعيه أكتـب مفاخـر لابـتي مـا بهـا أنكـار ولا نـي حـراوي عـنـدهـم للعطيـه واليـوم أشوف بتالي الوقـت تغيـار يـا مسنـدي خـل العـلـوم امغـطيـه قـلت الوكـاد ولا لـنـا بنبشت الغـار أخـاف تـلـدغـني مـن الـغـار حـيـه وأفطن ترى الدنيا لها أقبال وادبار مـثـل المحـالـة فـوق جـال الركيـه ورب الـمـلأ لمـدور الـستـر سـتـّار الـلـه يـكـافــيـنا الـبلا والـبـلـيـــــه |
((22))
راكـب الـلي مـا تبـاريــه الدداسـن يسبق الفكسار وجيـوب السفـاري لـو تـبـارن بالمماشي مـا تـواسـن مع مسير القـار أو خـط الصحـاري الشبـح فـيـه المـواتـر مـا يقـاسـن غـيـر روز الرايز ماله من يماري سار من حـي النظيم إلـى محاسـن سـافـر المنـدوب منصاه القـراري يا نـديـبي وصّـل المكتـوب راسـن للكـريـم الـلي لفعـل الطيب ضاري يوم ولـد اللاش فـرشه ما يداسـن عـن مفاعـيل الفخـر ما كـان داري للكـرم يـوسف أفـكـاره ما تـناسن أبـو راضي مشتهـر عـلمه جهاري ما حكـابـه بالـردى ذرب الملاسن ولا تـعـرض لـلـمسبـة والـمـزاري يـوم سـرد الخيل تكعـم بالمـراسن مـن حمايـل تأخذ حقوقـه اجبـاري هجـنهـم تشكي حفـاهـا بالفـراسن مـن سواهيـج القـوايـل والمساري والـركايـب والسبايا اليـوم خـاسن عصرنـا عصر التكاسي واللواري |
((23))
الجن يجهلني مثـل ما انـت يجهـلـك عـالـم خـفـي وآيـات ربـك اشهــوده العـالـم الـلي بـالخـرايـب لـهـم مـلـك مثـل الخيـال ونعـتـرف فـي وجـوده طريحهـم لـو كـان مـا يقـطع السلـك سـلاسـل الـبـيـشـة يـفـصـم أزروده وخـبيـثهـم ملعـون بالـكـيـد يزعـلـك نـقـرأ عـلـيــه إلـى تـجـاوز احـدوده ولـو شفتهم بالعيـن غابـت مراجلـك تـقـفـي معـيـف ودارهـم مـا تـعـوده |
((24))
فـي مجـلس مـا يـلتـقـابـه أجـانيـب مـن عـزوة ما هـم هذاليـف حـاره |
((25))
البيض يـا مـا لـوعـن قـلب رجـال الفـاتنـات المغـويـات الغطـاريـف لو عاشرن من جملة الناس عقال خلنهـم عـقـب الـرصانـه ملاقيـف |
((26))
يا علي وينك غايب يا فـتى الجـود أشـوف مـنـك الـدو يالقـرم قـافـر نشدت عنك وقيل لي غير موجود صوب الحفـر قالولي أنك مسافـر احسبك رايح تعـتمـر تطلـب الفـود مـن ربـك الرحمن للذنـب غـافـر لاشك ظني رحت تبحث عن الخود تـبغـي تـزوج تعـتـفـر تقـل طافـر يا علي سفراتك لها أثبات وشهود لا زلـت لحمـول الـمحـبـة أتعـافـر عندك اثنين وغيرهن تطلب الزود والهقوه أنك بأريش العيـن ظافـر وأنت الذي طلبك لـو دونـه حـدود تـأتـيـه لـو بـينـك وبـينـه مخـافـر قلبك يحب اللي هدب رمشها سود مثل الغزال اللي مـن الرمي نافـر من دور قيصر يا أبو خالد ودايود جـرب هواهـن كـل مسلـم وكـافـر لعبن على قلب العواجي وصاهـود مـع ذيب أبن شالح عقيد الخنافر فرسـان والـلـه تـودع الخيـل يبّـود إلى ثـار عـج القاع وقع الحوافر الـلـه يخـون البـيض قـادنهـم قـود لوهم شخوص رجال والعز وافـر |
((27))
الـلي يـبي ربـعـه تـعـزه وتـغـليـه يـجهـد بـلازم لابـتـه وايـحـمـاهـا يـشـوم لـلعـلـيــا ويـنـفـع دوانـيــه وأن هـام هـوماتـه بعيـد مغـزاهـا ومن قـال جـده كان يقهـر معاديـه عـوق الخصوم اليا تعاظـم عياهـا أن كـان مـا يسلـك طريقـه ويتليـه وش عـاد لـو بأفعـال جـده تبـاهـا مـا فـات مـات ولا تـفيـد المداويـه ذكـر العـلـوم الفانية وش جـداهـا كانه محى طيب الجدود بمخـازيـه كيـف ايتفاخـر والمفاخـر محـاهـا ولا كل من سمي تطولـه مشاريـه بعض الرجال الوقت غيـّر ضناهـا والناس كلـن يا عـلي دون عانيـه والمرجلـة تصعب على من بغاهـا قـلتـه وفعـال الـردى مـا انخاويـه والناقصة تحسب على من سداهـا |
((30))
يا أبـو مهـدي ويـن دورٍ خابرينـه يـوم كـانـت تجـتـمع كـل العـوانـي ذودهـم عـن كـل عايـل محـتمـينـه بالسيـوف وبالـرمـاح وبالـردانـي الفلـك يجري مثـل جـري السفينـه واللـيـالـي مـا تـخـلـي مـودمـانـي عـقـب سكن البـر صرنـا بالمدينـه مـن فضـل مولاي شيدنـا المبـانـي نركـب بـيـوكـات لـو كانـت ثمينـه فـي حـيـاة مـا تـجـيـنـا بـالـتمانـي |
((31))
الرجل وقته يابن الأجواد يقضيه بـيـن الـدوام وبيـن خـدمـة عيـالـه |
((32))
لا صارما يلقا الفتى فرش والحاف عـن طـاري الـمنـه تلحـف عبـاتـه |
((33))
قـلبي تهيّض يالحميدي من الكبـت يشفق على قرب الرجال المشاكيل يا القـرم عـذبـني زمـانـي وشيبـت لـوهــنـي الـدالـهـيـن الـبـهــالـيـــل جربت أنا يا مسندي وأنـت جربـت تـفـهـم وعـنـدك للمعـانـي تحـاليـل وضع البشر لو قيل لي عنه كذبـت دور تغـيـّر بـه سـلـوم الـرجـاجيـل أحتـرت من وضع العبـاد وتعجبـت ناس سعت بالحيف والقال والقيـل تمدحك بقبالك وتشمت إلـى غـبـت ومن يصنع المعروف ماله مقابيـل ما يذكرونك بالثناء لـو بهـم طبـت وعـيـونهـم عـلى المعـايـب درابيـل ناس تذمك بالخطأ دون مـا اذنبـت واهروجهـم تـزيـيف مالـه دوالـيـل بـذر الحسد بصدورهـم نابـت نبـت واقـلوبهـم بالحقـد سـود ومغـاليـل يـوم الأحد ما يفرقونه مـن السبـت ما يفرقون الكدش من سبّق الخيل |
((34))
أشـره عـلى الطيـّب وكـب الـزلابـه من خلقت الدنيا بها أنذال وخيار |
((35))
الديك لو هـو فـرخ يبين لـه عـرف والخيـل بالمـركض تبيـن الأصيلـه |
((36))
الشجـرة المثمـرة تتـشـابـك اغـصـانـه والعـوشزة مـابهـا يـا مسنـدي مـونـه والحـر يكـفـخ تـفـوج الـريـح جنحـانـه واهـل المحـابـل تـمـنـوا لـو يصيـدونـه والبوم ينغـط بوسط اسلـوع جيـلانـه طول الزمن موقعه في راس صعنونه من طاب فعـلـه سـراة القـوم عشرانـه ومن خاب صادق اسفال الناس واعفونه |
((37))
تشتاق للسجات مع صحصح الريـد فـي خـايـع مـابـه عـقـوم وحفـايـد بالـروض تسمع لأم سالم زغـاريـد تـنشد لحنها فـوق خضـر الجرايـد فيـه الوضيحي والظـبـا والقـرامـيـد وحــرٍ يشبـب بالـشبـب كـل صايـد |
((38))
كـم واحـدٍ حـطـوه بـذراع مسـعـود خـلي عـلـف لمهرفلات السراحيـن |
((39))
الـلاش يـبلش صاحبـه والـقـرابـات وأن جت من الأجناب مثل الحليله مـاني بحـال الـلي عـلـومـه رديـات مـا دام معي أهـل الهداف الجليلـه ما دام معي أهـل القـلوب النظيفـات مالي ومـال أهـل الدنس والدغيله مـار الـعـرب بـهـم مقاريد وأبخـات ومن طـاب حظه مـا يجي للهزيلـه بهـم الأشـم الـلـي اهـدافـه بعـيـدات عـنـد الـلـوازم مـا يـبـور بعـميـلـه وبهم الخسيس اللي اهدافـه دنيـات ذيـخ عـلى البلعـه يلـوقص بذيـلـه |
((40))
يا منزل اللي بالفيافي لهـا ارجـاف سحـبٍ يـعـل اليابسه غـيـث مـاهـا ينبت بهـا قـوت البهايـم والأعـلاف تـزهـر ونبـت القاع يصبغ ثـراهـا تسمن بها انعامٍ مهازيل واضعـاف تبهج صـدر مـن باعها واشتـراهـا بعـد السنين اللي محيلات وعجاف يرجع لهـا المولى ويذهـب جـفاهـا يخضر منبوت الـروابي والأشعاف فيه أم السالم بس تـزعج اغـنـاهـا |
((41))
أرض الصبخ مابـه بختـري ونـوار والعوشزه مـا ينجني مـن ثمـرهـا والحنظلـه لابـد يظهـر بـهـا أمـرار لـو هي على شط الفرات ونهـرهـا |
| الساعة الآن 09:37 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd