|
هـبـيــت يـا وقـت ٍ ...
السلام عليكم
تحية طيبة هبّيـت يـا وقـت ٍ بـه النـاس منصنـعـه=قامت تهافى وتاخذ المصل مـن مصلـه راحت قيمهـم ساقـط الجنـع مـن جنعـه=طبّل لها السلتوح وابليـس يرقـص لـه مـن مثلهـم مـاثـاب يــا بـاغـي ٍ منـعـه=مـادام ماهـي مأصلـه بقلـبـه الخصـلـه يــا جـاهـد ٍ بالـمـنـع لا تمـنـعـه انـعــه=حبـل الرجـا مقطـوع ماينفعـك وصـلـه ختـم عليـه الظـرف والـجـرم ياشنـعـه=مسلسل حكايه انتهى الوقت من فصله خـل السَّنـع يالسنـع يـم أهلـه السنـعـه=وخلك من اللي هايف الفكر مرخص له إن ما ارتفع بالدين يبقى علـى الخنعـه=مهما تعلهص خايب العلم علهـص لـه وتـرى ردي السـاس مايخـلـي الدنـعـه=وألا الأصيـل مـن الـردى يمنعـه أصلـه فهد العنزي |
صح لسانك ياخال يا فهد احساس وشعور
تحوي كلماتك . ولكن هذه احوال الدنيا والبشر حتى الاولين لهم شكاوي من ما اشرت اليه . والله يعين المستحين سلمت وصح لسانك |
أخوي <<<< فهد شكرأ لك على القصيدة الجميل
تقبل مرور أخوك رياض بن سالم منزل العنزي |
هذه الأبيات محاولة لمجاراة أبيات الأخ فهد ونظراً لصعوبة القافية فأن ما هان تبارك والمعذرة : فهد نظم قـافـه وهـو بـارع بصنعـه ** ونويت أبي أكتب ثمان أبيات الخص لـه يقطف ورود الشعر يوم استوى ينعه ** ياخذ من السنبل ويعرض عن القصله كـما ذكـرت الـزمن يا فهد به كنعـه ** هـذا ايحفـن لـه وذاك شـوي يقبص لـه به روس تعلوا وبعض الروس منخنعه ** ترجي لعل الأمل نوره يبصبص له النجم بـه مرزم وبـه طالع الهنعـه ** والكل لـه واجب الرحمن خصصله يا فهد نفس الردي ما تطري القنعه ** حيثك وصايف ردي الساس تبخص له من كثر ماله كثر تفديعه وفنعه ** يا مكثر اللي لأجل ماله يلوقص له من أنعوج يلزم على الخشم له رنعه ** والغوج ودك بالرسن دوم تقرص له |
متعب الفققي
صح بدنك وشاكر لك مرورك العذب لاهنت رياض العنزي لاهنت الجمال يكتمل بحضورك لاهنت تقبل تحيتي شاعر عنزة عبدالله بن عبار صح لسانك وشاكر لك مجاراتك ولاهنت مجاراتك لنا شرف في الحقيقه والا حنا ماحنا الا هواة شعر والا ماحنا شعار شاكر لك ابياتك العذبه ولاهنت تقبل مروري |
صح لسانك يا فهد وبنآنك وأعلا الله شآنك ..
وحفظك من عواثير الدنيا وفتنها .. عند قراءتي لأبياتك الجميلة ومعاني مفرداتها ورد أبو مشعل عليها حفظكم الله جمعياً ذكرتوني بأبيات لعلّها للشاعر الأسمر الجويعان رحمة الله عليه حين قال : الحـر يـشـرف نايـفـات المراقـيـب *** والبوم مايذكـر علـى راس مرقـاب الـحـر مايشـبـه طـيـور الغرابـيـب *** الحـر ، حـر وماكـر الحـر مايـعـاب وطير السعـد مايلقـي بـه عذاريـب *** كـل ٍ علـى مربـاه والاصـل جــذاب الطيب لاهل الطيب ساس ومجاذيب *** ألا ولا عـش الرخـم يجـذب عقـاب والثعلبـي مايشبـه النـمـر والـذيـب *** ولا كل رماي ٍ يـرز الهـدف صـاب صح لسانك مرة أخرى على هالأبيات البالغة بالحكمة ومعانيها الرجولية.. والله المستعان على الدنيا وما فيها ، ونسأله بعزته وقدرته وجلاله أن يديم علينا وإياكم أجمعين ستره وعفوه فوق الأرض وتحت الأرض ويوم العرض . |
يا مرجع صبيان وايل صح لسانك وبنانك وأعلا الله شآننا بك يا أبو مشعل ..
عز الله علم وحلم وحكمة بالغة .. فتقبل صدق المحبة والإعتزاز بشخصك الكريم .. وكن من أخاك بدعاءه إلى الله عز وجل بأن يطيل عمرك على الهدى والصلاح وأن يقر عيناك بصلاح الذرية والسمية .. وإن يديمنا وإياكم بعفوه وستره ورحمته فوق الأرض وتحت الأرض ويوم العرض .. |
الأخوة الأفاضل الشاعر فهد المسيكي ومحمد بن دوهان حفظكما الله ورعاكم : اشكركم على الأطراء وقد جذبني أبيات الأخ فهد حيث أن القافية الصعبة دائماً تكون مثل نبات الجبل الوعر بحيث تكون قفر وبنفس الوقت الوصول إليها صعب ولذلك يشرفني أن أنسخ لكم وللقراء الكرام مقاطع مما قلت سابقاً من الشعر ذات القافية الصعبة : قـال الـذي فـكـره بـالأشـعــار نـبـّـاغ ** لحـمـيّــد الـمـلـفــي أوجــه بـلاغـي يالشاعراللي لأصعب القـاف صـوّاغ ** جـاك الـوكاد وزايـد الـهـرج لاغـي أحـذر مـن الغـادر يليغــك ولا أيـلاغ ** أبـعـد عـنـه كان أنت للقول صاغـي بالناس عاجـه لولبس بشت وشماغ ** يسير لـو ما هو على الدرب بـاغـي وبالناس داب بشـوكـة النـاب لـداغ ** مـن يـلـدغـه بالسـم خـلاه ثـاغــــي وبالناس ثعلب عنـد وقـت اللزم راغ ** وبالناس حاشي دوم بالشيل راغـي مـا تنفـع اللمعـه ولا تفيـد الأصبــاغ ** ولا يـنـفـع الـشنـه جـديـد الدبـاغـي والبيت كان الساس بالقاع ما صـاغ ** يـنهـار سقـفـه لـو تضـبـه بـراغـي لاشـك من يصمد على الحق مـا زاغ ** مـا ينـزلـق مع كـل ملحـد وطـاغـي ومن زاغ عقلـه ما يجـد مخ وأدماغ ** تجـويـف رأسـه مـا يسـد الفـراغـي دف الــمــرنــدي كــان دقــه بـكـلاغ ** تسـمـع رزيحـه للـهـبايـب أيـنـاغـي وقال عبدالله بن دهيمش بن عبار هذه الأبيات من ذات القافية الصعبة : الـورد مـن قـاع الصّبخ مـا تجـثــه ** ولا أظـن بالصبخا تجوز الحراثـه والـهـلـب مـا حـاز السبـق لو تلثـه ** والطيــر مـا ظـني تصقـر بغـاثــه والقبس لو ضبضب طلالـه ودثـــه ** مـا سيّـل الـقـاع الجلــد والدماثــة الطعـس عاصوف الهبايـب تـكـثـه ** وحيد الجبل راسي صعيب اجتثاثه حـبـل السمـل لا تحتـزم فـي انكثـه ** ولا تعـتـزي بالـلي جـداه الشراثـه مـن زان طـبـعــه لـلمكـارم يـحثــه ** ومـن خـاب بالعليـا يقـل أكتـراثــه أنـجـح وغــث اللي نجاحـك يغــثـه ** وخلك تكيـد أهـل الحسد والخباثـه حاسـدك ضـدك سـم حـقـده يـبـثــه ** لو كنت لـه مثـل الخلاص بشثـاثه وش عـاد لـو هـو لـك تبسم أبلـثـه ** إلـى شافك بنعـمه تـزاود أغلاثـه ومـن راد علمـه كـل منصف يـنثـه ** عـلـيـه تـطـليـق الـردى بـالثلاثــه ومـن طـاب جـده لا يـفـاخـر بجثـه ** يـرقـا العـلا مـا دام مـجـده وراثـه تحت الثرى صـارت بوالـي ورثــه ** ولا عـاد بالعظـم الرميـم أستغاثـه والـلـي تـدنـا لـلعــلــوم الـمـعـــثــه ** أمجــاد جـده بأوسـط الـرمل داثـه والـلي عن الماجوب تكثـر أعـلثــه ** عـق الجدود وضاع ماضي تراثه هـذا الـزمان اللي استفرس اشبثـهّ ** وصار الفخـر لمروجيـن الحـداثـه * وقال عبدالله بن دهيمش بن عبار أبيات من القافية الصعبة: قــال الـذي ماكـاده الجمـع والطـرح ** وإلـى أبـدي لـه جـابـة حلهـا صــح أسند على اللي يفتهم موجز الشرح ** خـاض الملاعـب بالقصيد وبـها دح أنشـدك يا محمد عن الغــر والقـرح ** مثـل النجـوم الساطعة نورها أيضح الكيـد يأثر في صميـم الحشى جـرح ** طـول المدى ينزف صديده تقل مـح وكـم واحـد ينـدب علـى بالي المرح ** دلا يـنـوح وقـلـت خـل العـلا ونـــح لـو قلت له أصعـد على قمة الصرح ** أعـيا العـذول وطاع من قال له طـح لوبان له كـرم العنب يحسبه ســرح ** ألا وشــرش الحنظلـه يحسبـه جــح ومن ساربالدرب الوعر يبرحه برح ** واللـي وقع مـا تـنـفـعـه قـولـتـه أح أصبـر عسى رب الملأ يـبعـد الترح ** ودارٍ تــذم بـجـالـهــا كـــبـهــا ورح ولا تمضي أيـام الزمن كـلـهـا فــرح ** والـلـي يــدور الطـايلـه لحــهـا لــح والطيب ماهوبالحكى وأشهب الذرح ** ولا يـدرك المـادح بخيـل إليــا شـح * وقال عبدالله بن دهيمش بن عبار هذه الأبيات موعظ ونصايح : أبـتـدي بـسـم الــولـي رب الــفـلـــق ** مـنجـي إبـراهيـم مـن نـار الحـريـق مخرج ذا النون مـن غـلس الغســق ** وسط جـوف الحـوت باللجة غريـق يـا قـلـم سـجـل بـصـفـحـات الــورق ** قـول صـدق وبـه نـصايـح للصديـق أحتـرص يـالعـبـد مـن طغـو الفسـق ** مـن تعـاوج صـار لأعـمالـه وسيـق أنـتـبـه حــذراك لا تـنـسى الـنـفــــق ** يــوم يـنكـرك الـولـد هـو والشقيـق مـا نـفـع لـو مـزقـوا جـيـب الـعــلـق ** مـن درج مـا يرجعـه نوح وشهيـق لا تـرافـق كـود مـن صـان الــرفـــق ** يـحـتـفـي بـك كـل مـا بـالـك يضيـق وأحـذر من أهـل الجهـالـة والحـمـق ** لـو تـكـافـى شـرهـم يـلـحـق لحيـق والسـوالـف مـثـل مخـبـاط الـفـشـق ** ومـن تعـاوج تـاه مـا دل الطـريــق بـس لا تـنـغــر فـي بـعــض الـلــوق ** مـثـل كـدش الـزور تـرهـم لـلعليـق بـيـنهـم تـصيـر تـقــل أرنـب سـلــق ** حادهـا الـقـناص فـي واد العــقـيـق مـن صـبــر لـلـمـر صيــوره لـعـــق ** صافي الترياق مـن شهـد الـرحيـق * قال عبدالله بن دهيمش بن عبار العنزي هذه الأبيات في النصح 0 نـعــوذ بـالـرحـمـن مـن كـل عـايــق ** حيثـه عليـم ويعلـم الجهـر والهمس الـلـه يـقـديـنـا لـسنـع الـطــرايـــــق ** والعـقـل لـه تمييز بالشوف واللّمس يـا العـبـد بانـت لـك جميع الحقـايـق ** كانك تريد الحق أوضح من الشمس أمـض وتـفــكـّر بـالأمـور وتـهـايـق ** ما ينفع المثبور لـو قـال كنت أمـس الـجـد مـا يـرفـع وضـيـع الخـلايــق ** بـس العـظام البالـيه داخـل الرمـس كـم دار بــادت كـن فـيـهـا حـرايـــق ** زالت معالم رسمها وانطمس طمس عـقـارب الـسـاعـة تـعـد الــدقـايــق ** والعبد لاهي منغمس باللشقا غمس والعـمـر يـذبـل مـثـل ورد الحـدايـق ** والمرتحل ما يرجعه فزعت الخمس وقال عبدالله بن دهيمش بن عبار هذه الأبيات من شعر الحكمة : صـلـب العزايـم لـلمعـالـي تـســلـّق ** والعـز الأقعس فاز به من سبق لـه حق الحشو لـو خـف حملـه تزلـّق ** والحيص شـال الشيل لـو زاد ثقـلـه ومن خار عـزمه ثوب مجده تشلّق ** خـاب وخسر وغـراب بينه نعق لـه واللي على الغصن المطـّرف تعلّق ** يسهل عـلى عاصوف الأرياح رقله والـلي تـجمـل بـالهـدوس السملـق ** مثـل الـذي يـزرع بالأصباخ حقـلـه ومن جاد مع راي الريـا والـتمـلـّق ** يـقـضي لـزومـه ثـم يعـطيه صقـلـه والـلي عـلى كـل الجنـوس ايتخلـّق ** الـيـا شاف غـرات المغفـل درق لـه والـلـي تـشـدق بـالـكـلام وتـجــلـّـق ** كنـه يـمـص بـمـايـل الشدق بـقـلـه لـه مـلـسـن مـثـل الـعـريـني مـذلـّق ** والـهـرج بـالـبـاطـل تـعـوّد لنـقـلـه لا تصدقـه لـو هـو حلف لك وطلـّق ** لازم يخـون بصاحبـه مـا صدق لـه ما يشبع الجايع مـن اللحس واللـّق ** ولا يـروي الظامي سراب برق لـه والكل يرغب لـو عـلى الأفـق حلـّق ** والـوقـت هـذا يختلـف مـن بـدقـلـه شفـت الـزمان الـيـوم راسـه مفلـّق ** وسلم الكـرام أدبـرعسى الله يعقلـه وأن ضاعت الأفكار والصبـر غلـّق ** العـاقـل الـمـدرك يـقــديـه عـقــلـــه * قال عبدالله بن دهيمش بن عبار العنزي هذه الأبيات : سرحت مع طيف الخيال ورحل بـي ** أسري وارافق هاجسي واعتزل به مـا ودي أحـد مـن المـلأ يبتحل بـي ** اقفـل عـلى غيض المشاعـر بعـلبـه عن ما تريد النفس فكري شهل بـي ** والهـون ذل ولا ربح مـن عمـل بـه للحيف وعلـوم الـردى مـا نـزل بـي ** حيث الشرف مـا جاز بيعـه وجلبـه مـا دام خـلاق الـعـبــاد اكـتـفـل بــي ** بـه اكتـفي مالي عـلى الخلق طلبـه أجنب الـلي من العـرب مـا شبل بـي ** ومن لا حفظ مودتي ما انشغـل بـه صديقي اللي أن ما تصلت أتصل بي ** وأن مااتصل واجب علي اتصل به أكـن لـه كـل الـمـحـبـه بــقـلــبـي ** ويـكـن لــي كـل الـمـوده بـقـلـبــــه أن جيت رحـب وأبتهج واحتفـل بـي ** وأن جاني أدي واجبه واحتفـل بـه يفهم مقـاصد غـايـتي مـا جهـل بـي ** صحبـة نـقـا مـالـي مطامـع بسلـبـه وقت اللزم مـا مـوقـفـه قـيـل سلبي ** المـرجـلـه والطـيـب فـاز ونـفـل بـه يـلـوذ بـه مـن قـال وقـتي فعـل بـي ** فرحت ضمير اللي نصاه ودخـل بـه يـفـداه الـلي مـن ثقـل نـفسه يعـلبي ** كـن الخـلايـق مـن نحـانـيح صلـبـه ويفـداه الـلي بحلـوق الأجـواد يلـبي ** والـيـا لـقـا غـرت رفـيقـه دجـل بـه ودنـيـاك هـذي مـثـل مـا قـال فـلـبي ** مـن صـارع ظـروف الليالي تغـلبـه مـا هـي بكثـر الغـربـشـه والتـشلبي ** كانه غـرز ضرع الزمن من يحلبـه |
الاخ محمد بن دوهان اشكرك جزيل الشكر على عذب مرورك واضافتك ،،،،
شاعر عنزة عبدالله بن عبار العنزي ، صح لسانك يابومشعل ابيات درر وانت مطوع القيفان اول وتالي ، قصائد مايكتبها كل واحد ، وفعلاً القافيه الصعبه مثل القفر اللي ماكل ياصله ، وبما ان المجال حول القافيه يسرني استعرض هذه القصائد التي كتبتها على هذا النحو : من قصيدة في النصح : يافواز احذرك هذا الوقت فتنه = انتبه لا تضيع في طرق الدشاره المماشي والمسالك فيه نتنه = لا يغرّك ما ظهر لك من شعاره الفصاحه أعربوها اليوم لتنه = لا تقول شلون ركّز بالعباره العبر تكفيك من شرّاب تتنه = من يحسب الكار في مز الزقاره ذاك عقله شاف شي ٍ فات حتنه =اتركه والنار أوّلــهــا شراره ومن لزم لك باللوازم صير متنه = وسلم اهلك إياك يذهب بالحضاره ماعليك من الزمن وشلون رتنه = دايم ٍ يالقرم خلك بالصداره بالمــدا نعرف المعامق وين وتنه = السنيّف لو زما ماصار قاره وكان خافي شي اتنا الوقت اتنه = قلتها والحر تكفيه الإشاره ومثلها قولي : خـلـت الـمخـيـلـه بالسمـاء مـار اسبقـتها عاصفه=غــطــت مـعـالـم جــوّهـا بـها العــجـاجـه ثــايره هــدت جـسـور ٍ عـاليــه راحـت بـها مـتــراصـفه =مــع المـباني وفــوقــها روّح حـــطـام الــطـايره أغــدىبـها الطـرقـي طـريـق يـصيب عد الناصفه =أغــدى الجــدي وحــتى النـعـايـم مـاتــدله بـايره مـنـظــر نـظـرتـه مـار أنـا وشـلـون اببـدا وآصفه =يـضـرب عـلى حـد الـوتـر وأقـــواسـها والـدايره قـلـته وأنـا مــن حـيـنها حـطــيــت خـط مـناصـفه=والـنـصـف الآخـرماانـتصـف به الجروح الغايره جاحت جروحه من الزمن من عقب ذيك القاصفه=يـوم اخــتــلف مــيـزانــها خـلـّت أمــور ٍ سـايره بـحــد الجـبـال مـعـلــقه ابْـجـحـر ضـبـع ٍ لاصـفه =تـــركـتــها دام إنــهـا هــجـّـت وراحــت نـــايـره ومما قلت بالدراسه : شفـني تراي مخـلـّص من التفاضل = والحمــدلله صار يالقـرم ايزي مـار البــلا ياخـوك لازم أناضـــــل = حتى اتـــريّح بـــاقي الإنجــليـزي لو الهوى بالكيف من دون عاضل = مبـطي مقـرّي بين روس النزيزي بمصـملخـات ٍ كلبـوهن هـضـاضل = تشوف البدون مجدّعه ضرب تيزي وخــوّة نـشاما بالـمـلا هـم أفاضل = هــذا الطــرب إن كـان حنـا نحيـزي وايضا: وَا هنيّ مـنهـو تخـرّج ماشـقى أيّـام الـدراسَه= كــل يــوم ٍ ماتـعــذّب بـيـن هـمّـه والمـشـاكل وعـزّي لْمثـْلي شبـاب ٍ مـار شاب اليوم راسه = من كثــر ماشـــاف واللهْ قــلبه اليـــوم امتـآكل ظــلــم ٍ والحقْ غـــادي ولا لقيت إلا التعــاسه=ولو هي بيـدَيّ واللهْ غــيـر يرجـــع بالـكـــلاكل مانفعـني كثر فهمي ولا استفـدت من الفـراسه =حـظّي مــاقَــام ليـّــهْ طايح ٍ وسط المراكل مـن (سـي بـلَسْ) واللهْ راح عقـلي بالتمـاسه = وإن سلمنا من غثاها طحت راجع (بالأوراكل) ذي لغــات وزود تـلـقى شي مـثـله بالخـيـاسه=اتـّنـــوّع مانْـعَـــرفْ لـه بكـل تـــرم ٍ اتّـــشــاكل وحالف إن نجحت فيهن غير ألمّ جـموع ناسه= لمفطحات ٍ مع مشاوي السحَر معها الشواكل والبـلا بـمنهــو تـولّى أمـرهـن فـيه النجـاسه= ماعــرف قـــدره ومثـْـله مايــسَرّح بالســواكل لـو سلـمـت ورحت مرّه غـيـر يهـفيـك بمقـاسه=غـيـر تـاقع بالمهـافي واعـرف إنـك غـير تاكل ودام علمي مسلّمـينه وصار هذا اليوم سـاسه =عـــزّي لأجـيـال بعـــدي ليا لفت مثل الهياكل ويــا لايـمي بـالله دوبـك غيـر ترجـع بانتكاسه= لو تـلـوم اليــوم واللهْ مــن بَعَــدْهَـا تعــود نــاكل ومن القصائد ذات القافيه الصعبه : جتـنـي وأنـــا ورّاد بـــأرض ٍ خـلـيّـه=من شفتها اللّيْ من ايديه تملّـص قــالــت ســــلام ٍ بــاديــه بـالـتـحـيّـه=وصنّخـت أنـا والجسـم منـي تقـلّـص القلب ذاب وراح معها ضحيّه = من شوفهـــا خــطــر ٍ عليه يتــهـلّص قـرّبـت أنــا مــن دون قـصـد ودريّــه=وأشّر رفيقي غاد عيونه تفلّص لــدّت علـيـه الـبـنـت بـعـيـن ٍ قـويّــه=موقـف حَرَجْنـي كيـف منـه اتخـلّـص بلمحـة بصـر نشدتـهـا يالبنـيّـه =عيّنتي وضحـا مـن بعــيـد اتبلّـص قالـت لــي وشّــو وسْمَـهـا والمـزيّـه=ورديـت أنـا غفـل ٍ ولا هــي تطـلّـص وعيونـهـا طـمـشـاء وتـراهــا قـنـيّـه=ماتـرمـس القيـعـان بعشـبـه تـعـلّـص وتهـوّلـــتْ امـــروّحـه بـالـشـلـيّـه=ماتـــدري إن الوصـف فيـهـا محـلّـص أغديـتـهـا عـنــدي وراحـــت غــديّــه=وجــاني رفيقي قــال خبل ٍ مخلّـص قلت الخبـل مـن عـاف زيـن السجيّـه=هــذاك خـبـل ٍ يـاكـل مــن الهـطَـلّـص يابو العيون الناعسه زانهـا الوطـف=بالله نــظــره وضــامــري لا تـكـفــه كفكـف مدامـع دمعهـا تدمعـه نـطـف=لــــوف الـلـفـايـف لـفـهــا لا تـلـفــه بك الحلا والزين وطف ٍ معـه غطـف=لا وا هـنـي مــن لايـعـك فــي مـزفـه عجل عليه وبرّد القلـب لـي و اطـف=اطـــف اللهب بـالـصـدر بالله طـفــه ياللي خطفت القلب من مرقده خطف=ومـن سبّـتـك العـقـل صـابـه مخـفـه ارحم لحالي وعامـل القلـب باللطـف=لاتحرمـه ياشـوق مـن شـوف شـفـه اعطف عليه وبادل العطف بالعطـف=وبـاقـي الـمـلا خـلـه يــروح بمهـفـه واترك كثير الهجر والصد والشطـف=ولا تستـمـع للـنـاس بـهـرج ٍ تطـفـه وهـاك الزهـر امنـوّر ٍ قاطفـه قـطـف=مــن راس عـالـي والهبـايـب تـنـفـه شاكر لكم حضوركم الكريم تقبلوا تحيتي فهد المسيكي |
الله يعطيكم العافيه جميعا
|
أخينا فهد شكر الله لك : هكذا استطعنا ان نظفر منك بهذه الدرر بعد محاولة استنهاضك بما كتبنا من قصائد فأنت بحر وكلامك نهر من حيث العذوبة وحيث أنني كنت ولا زلت أحث الشعراء من الجماعة وأقول لك حبذا لو جمعت شعرك في ديوان وطبعته فأن الوسائل متيسرة لحفظ التراث ونشره وشكراً لك وقد ذكرتني في أحد القوافي بأبيات قلتها اسند على الرجل الفاضل يوسف القراري الموايقي أبو راضي فقلت : يا أبـو راضي جـور بـقعـا لا يهمـك ** بـأمـر ربـك تـنـتهي كـل المشاكـل أطلـب أن الـلـه مـع احـبـابـك يلمّـك ** وتبتهج يا شوق منقوض العثاكـل دق راس الـداب الأرقـط لا يـسـمّـك ** وأنـت الـلي لعـداك بالأقـدام راكـل يا أبو راضي كـل مـّره جيـت يـمـك ** تذبـح من العيت ضخمات الهياكـل الكـرم مـوروث مـن جـّدك وعـمـّك ** لو يشين الوقت تنفق ما أنت ناكـل يعـلم الـلـه لـو طـلـب ناصيـك دمـّك ** كان قلت أبشر وحضرت الجراكـل أريـحـيـات الصخـى حـزت تـخـمـّك ** ترتقص من هـزت الجود وتـواكـل وانت عيلم مـا نضب نقـروح جمّـك ** كـنـك الـهـداج أو مـثـلـه تـشـاكـل مـا تـنـام ولا تـضـع راسـك بكـّمـك ** تسري وتجري لدرب الطيب داكـل أشهـد أن أبـوك عـّرب منسب أمـك ** مـا نـجبـهـا مـن رعـاديـد الأفـاكـل تـجتـمع كـل الـمـكـارم فـي مـعـمـّك ** يـوم ولـد الـّلاش هـمـه بـس ياكل الصخى مثـل البحـر مـوجـه يطمـّك ** مـن يسبـك يـا عسى عـذراه ثاكـل يا أبو راضي ياعسى من هو يذمك ** مـا يـنـال لـضنـوتـه حـق السياكـل |
الحقيقة انه فخر لنا وجود شاعر بعنزة مثل عبدالله بن عبار
وصح لسانك على الابيات الرائعه ثانيا اشكرك على اطراءك ومرورك الرائع وانا مجرد هاوي للشعر ولا اعتبر نفسي شاعر واعتز بما قلت والقصائد فعلا يجب توثيقها فالسطو على القصائد هالايام مثل قولة سلام مما قلت ايضا ولها قصه: ياللي بديت اللعب حدّك ترى : اللِعب=تمشـي وتنكـس مـا قطـعـت الـقـرَارَه ترمي ورميك يخطِي القلـب والجِعـب=تـبـي الإشَــاره وتـــدّرق بالْـجـحَـاره احـذر شعيـبـك لاتـفـرق غــدا شِـعـب=وتـضـيـع مـابـيـن الـغَـبَـا والـغَـتَـاره مايستوي لي السِعب ياراعي السِعب=يـا هـاذب الهـذبـات فــي كــل غــاره ياراكب المعسوف أرني على الصِعب=مـتـولّـم ٍ يـــا مـدّعــي بالـشـطـاره اعـب المعانـي كـان تعبـى لهـا اِعـب=والا انثبـر و اجـعـر جعـيـر الجـعـاره وخَلّك تـروّح مـن مماسِـدْك بالدِعـب=وأنـا عـلـى مـرقـاي فــي راس قــاره وهذه قلتها ولها مناسبه كما اني دائما ماارى الكثير من الشعراء يبني القاف على ضعف ، والحقيقه انا لااعترف بالقاف الضعيف والذي غالبا مايبنى على ضعف مع امكانيه وجود الاجود ولكن البعض لايستطيع لكون هذه قدرته ، ليا صار القاف ماهو مركوز مالله محليه ..... مـاهـي هــروج ٍ مبتـداهـا سيـداتـي سـادتــي=بالـثـانـيـه متـقـطّـعـه وبــالأولــه مـتـواصـلــه لا الأولـه هــي أولــه ولا الثانـيـه لــو جـادتـي=ولا هي طريق ٍ متّبع والحاصله من حاص له هــذي طـروقـي بصعبـهـا عسفـتـهـا بقـيـادتـي=مبطي عليها بصمتي خصلـه ماهـي متخاصلـه صعب القوافي والمعانـي منهجـي هـي عادتـي=يالـلـي تـقــول المـبـتـدي المـبـتـدي ماتـاصـلـه عـنـا تـلايـس وانثـبـر لا تحـيـد هــاك حيـادتـي=معهـا تتـوه بمهمـه ٍ مايقطعـه مـن لاص لــه جهـلـك لـهـا ينبـيـك عنـهـا بـالأخـيـر إفـادتــي=ليـا مـن خذلـك العـرف حنـا نفصّـل المتعاصلـه غصـب ٍ عليهـا تنثـنـي مــن فوقـهـا إرادتــي=حصلتها وبعض العرب ايّس ماهي له حاصلـه متسـلـسـلات مسلـسـلـه سلسلـتـهـا بـريـادتـي=لـمـالا نـهـايـه تنـتـهـي لا نـقـطـه ولا فـاصـلـه نقصانـهـا للـغـيـر كـامــل مـالـهـا إلا زيـادتــي=إمـــا مـعــي والا تـراهــا روّحـــت مـنـداصـلـه اقطف قفر وانحت صخـر تبقـى معـي بسيادتـي=مـن دونهـا فكـري شهـر حـده لمـع بـه ناصلـه بحـر ٍ زمـا مـا يسبحـه مـن كــاد وألا كـادتـي=اثنين لا ثالث لهـم وش لـون منهـو غـاص لـه وهذه تعتبر فقط ابيات غريبه كونها تقرأ افقياً ورأسياُ : فقيدنا بالأصل ساسه رفيعي=عالي عديم ٍ بالمهمه مفادي بالأصل لاقلنا مسيكي سبيعي=عديم ٍ مفكّر محنّك قيادي ساسه مسيكي هيلعي ٍ شجيعي=بالمهمه محنّك مهادي معادي رفيعي سبيعي شجيعي بتيعي=مفادي قيادي معادي مهادي وهذه تعبر عن نفسها آتي على وضح النقا لـي ظــاهر ٍ هــو بـاطني =ولـي بـاطـن ٍ هـو ظـاهري مـع الـملا متوافقـه لـو كنت أنا هـذا أنا حـد الـزمن ما حاطني =كانـه غـدا خله عسى يهفي قلوب ٍ خافقـه .ما آتي على وجه وقفــا سـوات مـن هو ساطني =بـــاقـْــفاي , والا بالمـــواجه رمــــة ٍ متلافـــقه وش لـي بهـلايـم هالمـلا لو شاطني ما شاطني =مالـي وما لاهــل الردى والنفس ماهي شــافقه أمشي بسلم أهل الوفـا لو بالـقـفـا من لاطنــي =ينــكس على فعل الردى منهو حياته مصافقه مثل السلوقي ينســهــج لو هـو لعـده قاطني= أي الخــلا ، تـزهــاه دام إن العلـوم مطافقه .ما اواطـن اللي بالوطـا أبداً لهم مــــا اواطني =كــــلن وخـــله يلتقـــــي يلــقى خليل يرافقـه ولقيت أنا خلي الخلا بلوماحة ٍ متـــفاطــني =سندا ألـــوف بــراســهــا مـاهي رخوم منافقه الحقيقه اشكر ابو مشعل الذي اضاف على هذا المتصفح جمالا وبهاءً كما اننا نطمع بالمزيد من فرايدك يابومشعل ، فابياتك درر ولاهو حي الله واحد يجيبها ... تقبل تحيتي |
الأخ فهد المسيكي : بارك الله فيك ونوّر بصيرتك وفي نظري أنك تملك على موهبة شعرية وليس مجرد هاوي وأتمنى لك التوفيق والسداد وشكراً لك على هذا الأبداع فإلى الإمام وتقبّل تحياتي الحارة |
شكرأ على المحاوره الجميل يا ابو مشعل والاخ فهد تقبلو مرور ي
|
ألف شكر لجميع شعار القبيلة فلهم مني كل الاحترام والقدير 0 وحفظهم الله جميعاً
|
| الساعة الآن 01:23 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd